ວັນທີ 3/3, ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ກ່າວປາໄສຕໍ່ໜ້າສະພາແຫ່ງຊາດອາເມລິກາ ຊຶ່ງໄດ້ສະແດງຄວາມວິຕົກກັງວົນຂອງ ອິດສະຣາແອນກ່ຽວກັບຂໍ້ຕົກລົງສາກົນກ່ຽວກັບບັນຫານິວເຄຼຍຂອງອີຣານ ຊຶ່ງອາເມລິກາ ແລະ ບາງປະເທດພັນທະມິດພວມມານະພະຍາຍາມເຈລະຈາເພື່ອບັນລຸໄດ້ໂດຍໄວ. ເຖິງວ່າ ໄດ້ຮູ້ແຈ້ງວ່າ ບໍ່ໄດ້ຮັບການຕ້ອນຮັບຈາກທຳນຽບຂາວກໍຕາມ, ແຕ່ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ຍັງຄົງຍອມຮັບເພາະພວມດຳເນີນບັນດາບາດກ້າວເດີນດ້ວຍການຄິດໄລຫຼາຍຢ່າງກ່ອນທີ່ດຳເນີນການເລືອກຕັ້ງຢູ່ ອິດສະຣາແອນ ໃນວັນທີ 17/3 ນີ້.
ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ຖະແຫຼງທີ່ກອງປະຊຸມປະຈຳປີ AIPAC ເມື່ອວັນທີ 2/3 . (ພາບ: AP) |
ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ໄປຮອດ ອາເມລິກາແຕ່ວັນທີ 1/3 ຕາມຄຳເຊີນຂອງທ່ານປະທານສະພາຕ່ຳ John Boehner ສະມາຊິກພັກສາທາລະນະລັດ, ຫາກບໍ່ໄປຕາມທາງການທູດຢ່າງເປັນທາງການຈາກທຳນຽບຂາວ. ກ່ອນທີ່ຂຶ້ນເຮືອບິນ, ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ຢືນຢັນວ່າ ທ່ານໄປຮອດວໍຊິງຕັນເພື່ອພາລະກຳປະຫວັດສາດ, ກະຕຸກຊຸກຍູ້ສະພາແຫ່ງຊາດ ອາເມລິກາຍອມຮັບບັນດາມາດຕະການລົງໂທດໃໝ່ຕ້ານອີຣານ. ການຢ້ຽມຢາມໄດ້ດຳເນີນໃນຈຸດເວລາກ່ອນກຳນົດສຸດທ້າຍໃຫ້ແກ່ສັນຍາແມ່ສະບັບໜຶ່ງກ່ຽວກັບບັນຫານິວເຄຼຍຂອງອີຣານເມື່ອວັນທີ 31/3, ມຸ່ງໄປສູ່ການບັນລຸບັນດາ ຂໍ້ຕົກລົງທີ່ມີລັກສະນະວິຊາການ ຢ່າງຊ້າສຸດແມ່ນວັນທີ 30/6.
ທຳນຽບບໍ່ເປີດໄຟຂຽວ
ສິ່ງໜຶ່ງທີ່ແນ່ນອນ ກໍແມ່ນວ່າ ໃນການຢ້ຽມຢາມຄັ້ງນີ້, ທັງປະທານາທິບໍດີອາເມລິກາ Barack Obama ແລະ ລັດຖະມົນຕີການຕ່າງປະເທດ John Kerry ຕ່າງກໍບໍ່ມີການພົບປະກັບ ທ່ານນາຍົກລັດຖະມົນຕີ ອິດສະຣາແອນ Benjamin Netanyahu. ເຫດຜົນທີ່ອາເມລິກາຍົກອອກມານັ້ນ, ຕາມປະເພນີແລ້ວ, ປະທານາທິບໍດີອາເມລິກາ Barack Obama ບໍ່ເຄີຍພົບປະກັບການນຳປະເທດຕ່າງໆກ່ອນທີ່ດຳເນີນການເລືອກຕັ້ງຢູ່ປະເທດຂອງເຂົາເຈົ້າ. ກ່ອນໜ້ານັ້ນ, ປະທານາທິບໍດີອາເມລິກາ Barack Obama ໄດ້ຕຳໜິຕິຕຽນ ທ່ານນາຍົກລັດຖະມົນຕີ Netanyahu ຊຶ່ງໄດ້ໄປຢ້ຽມຢາມອາເມລິກາຕາມຄຳເຊີນຂອງທ່ານປະທານສະພາຕ່ຳ John Boehner ຫາກບໍ່ຜ່ານທຳນຽບຂາວນັ້ນ ແມ່ນລະເມີດຫຼັກການອັນເປັນພື້ນຖານຂອງການພົວພັນລະຫວ່າງ 2 ປະເທດ. ໃນຂະນະນັ້ນ, ທ່ານຮອງປະທານາທິບໍດີອາເມລິກາ Joe Biden ກໍຈະບໍ່ມີໜ້າໃນການອະພິປາຍ ເຖິງແມ່ນວ່າ ຕາມທຳນຽມແລ້ວ, ເມື່ອມີການນຳຂອງປະເທດຕ່າງໆມາກ່າວປາໄສຕໍ່ໜ້າສະພາແຫ່ງຊາດ, ຮອງປະທານາທິບໍດີຕ້ອງມີໜ້າແບບບັງຄັບ. ທີ່ປຶກສາດ້ານການປ້ອງກັນຄວາມສະຫງົບແຫ່ງຊາດອາເມລິກາ ທ່ານນາງ Susan Rice ໄດ້ຕຳໜິຕິຕຽນເລື່ອງທ່ານປະທານສະພາຕ່ຳ John Boehner ເຊື້ອເຊີນທ່ານນາຍົກລັດຖະມົນຕີ ອິດສະຣາແອນ Benjamin Netanyahu ມາກ່າວປາໄສຕໍ່ໜ້າສະພາແຫ່ງຊາດອາເມລິກາໃນຈຸດເວລາກ່ອນທີ່ດຳເນີນການເລືອກຕັ້ງທົ່ວປະເທດອິດສະຣາແອນ ພຽງ 2 ອາທິດ ແມ່ນບໍ່ສອດຄ່ອງກັບນ້ຳໃຈສຳພັນທະມິດລະຫວ່າງອາເມລິກາ- ອິດສະຣາແອນ.
ບາດກ້າວເດີນທາງການເມືອງ
ເບິ່ງຄືວ່າ ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ຄາດຄະເນໄວ້ລ່ວງໜ້າກ່ຽວກັບປະຕິກິລີຍາຈາກທຳນຽບຂາວ, ແຕ່ສຳລັບທ່ານແລ້ວ, ການຍາດແຍ່ງເອົາການສະໜັບສະໜູນຈາກຫາງສຽງກ່ອນທີ່ດຳເນີນການເລືອກຕັ້ງຢູ່ ອິດສະຣາແອນ ໃນວັນທີ 17/3 ແມ່ນສຳຄັນກວ່າສິ່ງໃດໝົດ. ຄວາມຈິງໄດ້ສະແດງໃຫ້ເຫັນວ່າ ໃນຈຸດເວລາໃກ້ຈະຮອດວັນເລືອກຕັ້ງຢູ່ ອິດສະຣາແອນ, ໂດຍປະເຊີນໜ້າກັບຄູ່ແຂ່ງ Isaac Herzog ສັງກັດພັກແຮງງານນັ້ນ, ທ່ານ Netanyahu ພວມຂົນຂວາຍການເມືອງໃຫ້ຕົນເອງດ້ວຍການຫັນ ຄວາມສົນໃຈບັນຫາຈຸດສຸມໄປຍັງບັນຫາການພົວພັນຕ່າງປະເທດເພື່ອປະເຊີນໜ້າກັບຄັນຕະລະບັດໃນການຫາສຽງເລືອກຕັ້ງ ທີ່ແນໃສ່ບັນດາບັນຫາເສດຖະກິດ ແລະ ການພົວພັນພາຍໃນທີ່ພວມກໍ່ຄວາມຫຍຸ້ງຍາກແກ່ທ່ານ. ເພາະສະນັ້ນ, ການນຳໃຊ້ບັນຫານິວເຄຼຍຂອງອີຣານ ໄດ້ຮັບຖືວ່າ ແມ່ນວິທີທີ່ດີທີ່ສຸດ ເພາະວ່າ ແຕ່ດົນນານມາແລ້ວ, ອີຣານຖືກຖືວ່າ ແມ່ນໄພນາບຂູ່ທີ່ເປັນອັນຕະລາຍໃນສະເພາະໜ້າ ແລະ ຍາວນານທີ່ມີຕໍ່ຄວາມສະຫງົບຂອງອິດສະຣາແອນ. ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ກໍແມ່ນຜູ້ຕຳໜິຕິຕຽນຢ່າງຕໍ່ເນື່ອງກ່ຽວກັບການເຈລະຈາກັບອີຣານ, ທ່ານຖືວ່າ ໃນການເຈລະຈາຄັ້ງຕ່າງໆເມື່ອມໍ່ໆມານີ້, ອາເມລິກາໄດ້ຜ່ອນສັ້ນຜ່ອນຍາວຫຼາຍຢ່າງໃນຂະນະທີ່ເຕເຮຣານ ຍັງຄັງຄົງມີຄວາມມັກໃຫຍ່ໃຝ່ສູງໃນການຜະລິດອາວຸດນິວເຄຼຍ ແລະ ສິ່ງນີ້ບໍ່ພຽງແຕ່ເປັນໄພນາບຂູ່ຕໍ່ຄວາມສະຫງົບປອດໄພຂອງອິດສະຣາແອນເທົ່ານັ້ນ, ຫາກຍັງກໍ່ໃຫ້ເກີດສະພາບຂາດສະຖຽນລະພາບໃນພາກພື້ນຕາເວັນອອກກາງ ແລະ ໃນໂລກອີກດ້ວຍ. ກ່ອນທີ່ກ່າວສູນທອນພົດຢູ່ສະພາແຫ່ງຊາດອາເມລິກາເປັນເວລາ 1 ວັນ, ກ່າວຄຳເຫັນຕໍ່ໜ້າກຳມາທິການບັນດາບັນຫາລວມ ອາເມລິກາ-ອິດສະຣາແອນ, ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ສະແດງຄວາມວິຕົກກັງວົນວ່າ ຄວາມມານະພະຍາຍາມຊອກຫາຂໍ້ຕົກລົງນິວເຄຼຍກັບອີຣານຂອງປະທານາທິບໍດີອາເມລິກາ Barack Obama ກໍເປັນການນາບຂູ່ຕໍ່ຄວາມການຄົງຕົວຂອງອິດສະຣາແອນ.
ເຫດຜົນທີ່ 2 ທີ່ພາໃຫ້ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ກ່າວຄຳເຫັນຕໍ່ໜ້າສະພາແຫ່ງຊາດອາເມລິກາ ກໍແມ່ນຍ້ອນປະຊາຊົນອິດສະຣາແອນ ຢາກເຫັນນາຍົກລັດຖະມົນຕີຂອງເຂົາເຈົ້າ ສະແດງທັດສະນະຂອງອິດສະຣາແອນຢ່າງແຂງແຮງຕໍ່ໜ້າບັນດາ ສ.ສ.ຊ ອາເມລິກາ. ເພາະສະນັ້ນ, ຜົນສຳເລັດໃນບົດກ່າວປາໄສຢູ່ສະພາແຫ່ງຊາດອາເມລິກາໃນວັນທີ 3/3 ກໍມີຄວາມໝາຍເຊັ່ນດຽວກັນກັບຄວາມສຳເລັດຜົນເຄິ່ງໜຶ່ງຢູ່ອິດສະຣາແອນສຳລັບ ທ່ານນາຍົກລັດຖະມົນຕີ Benjamin Netanyahu.
ການພົວພັນລະຫວ່າງອາເມລິກາ-ອິດສະຣາແອນ ແຕ່ດົນນານມາແລ້ວ ໄດ້ກາຍເປັນບັນຫາສຳຄັນໃນເວທີການເມືອງ ຂອງ 2 ປະເທດ. ອິດສະຣາແອນແຕ່ດົນນານແລ້ວ, ໄດ້ກາຍເປັນພັດທະມິດຍຸດທະສາດຂອງອາເມລິກາຢູ່ຕາເວັນອອກກາງ. ເຖິງວ່າ ທ່ານນາຍົກລັດຖະມົນຕີ ອິດສະຣາແອນ Benjamin Netanyahu ໄດ້ຖະແຫຼງທີ່ກອງປະຊຸມປະຈຳປີ AIPAC ເມື່ອວັນທີ 2/3 ວ່າ ສຳພັນທະມິດອາເມລິກາ-ອິດສະຣາແອນ ມີຄວາມໝັ້ນຄົງໜັກແໜ້ນຍິ່ງກວ່າເວລາໃດໝົດ , ຈະສືບຕໍ່ພັດທະນາ ແລະ ນຳນຽບຂາວພັດປະຕິເສດຂ່າວ ຈະຕັດການຊ່ວຍເຫຼືອແກ່ອິດສະຣາແອນ, ແຕ່ທີ່ຈິງແລ້ວ, ການພະວພັນລະຫວ່າງ 2 ປະເທດ ໄດ້ມີຄວາມຂັດແຍ້ງກັນແລ້ວ. ການຢ້ຽມຢາມອາເມລິກາໂດຍມີການຄິດໄລຫຼາຍຢ່າງຂອງທ່ານນາຍົກລັດຖະມົນຕີ ອິດສະຣາແອນ Benjamin Netanyahuຄັ້ງນີ້ ໄດ້ເຮັດໃຫ້ຄວາມຂັດແຍ້ງນີ້, ຍິ່ງເລິກເຊິ່ງຂຶ້ນຕື່ມ.