(Vovworld)- ຍາດແຍ່ງກາລະໂອກາດ, ຜ່ານຜ່າສິ່ງທ້າທາຍໃນສະພາບການໂລກພວມປ່ຽນແປງຢ່າງວ່ອງໄວ, ສືບຕໍ່ປ່ຽນໃຫມ່ຢ່າງຮອບດ້ານ, ຄົບຊຸດ, ພັດທະນາການປະດິດຄິດສ້າງ, ນຳຫວຽດນາມ ກາຍເປັນປະເທດອຸດສາຫະກຳ ຕາມທິດທັນສະໄຫມ ແມ່ນເນື້ອໃນບົດຂຽນຂອງທ່ານປະທານປະເທດ ຫວຽດນາມເຈືອງເຕີນຊາງ ລົງພິມໃນບັນດາຫນັງສືພິມສະບັບອອກວັນທີ 29/7, ບັນນາທິການວິທະຍຸກະຈາຍສຽງຫວຽດນາມ ຄັດສະເຫນີບັນດາເນື້ອໃນດັ່ງກ່າວຜ່ານບົດຂຽນທີ່ມີຫົວຂໍ້ວ່າ: ສືບຕໍ່ປ່ຽນໃຫມ່ຢ່າງຮອບດ້ານ, ຄົບຊຸດເພື່ອເຊື່ອມໂຍງເຂົ້າກົບສາກົນ.”
ທ່ານປະທານປະເທດເຈືອງເຕີນຊາງ
ພາບ:vov
|
ໃນບົດຂຽນຂອງຕົນ, ທ່ານປະທານປະເທດເຈືອງເຕີນຊາງ ຢືນຢັນວ່າ: 30 ປີແຫ່ງການປ່ຽນແປງໃຫມ່ ແມ່ນໄລຍະປະຫວັດສາດສຳຄັນໃນການພັດທະນາຂອງປະເທດຫວຽດນາມ. ຕີລາຄາສູງບັນດາຜົນງານອັນໃຫຍ່ຫລວງ, ມີຄວາມໝາຍປະຫວັດສາດຂອງກິດຈະການປ່ຽນແປງໃຫມ່, ທ່ານປະທານປະເທດ ໄດ້ຢືນຢັນວ່າ: ໄລຍະປະຈຸບັນ ແມ່ນຊາຕາກຳແລະ ກາລະໂອກາດທີ່ສຳຄັນ, ແມ່ນໄລຍະເພື່ອໃຫ້ຫວຽດນາມ ປ່ຽນແປງຈີນຕະນາການຢ່າງແຮງ, ສ້າງລະບອບນະໂຍບາຍໃຫ້ສົມບູນແບບ, ພັດທະນາເສດຖະກິດການຕະຫລາດຕາມກຳນົດທິດສັງຄົມນິຍົມ. ຄວາມມາພະຍາຍາມປະຕິຮູບລະບົບບໍລິຫານແຫ່ງຊາດຢ່າງຮອບດ້ານ ແລະ ເລິກເຊິ່ງ; ເປັນເຈົ້າການເຊື່ອມໂຍງເຂົ້າກັບສາກົນ ເພື່ອຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ.
ປ່ຽນໃຫມ່ຈີນຕະນາການແລະວິທີການຍູ້ແຮງການຫັນເປັນອຸດສາຫະກຳ,ທັນສະໄຫມ
ທ່ານປະທານປະເທດເຈືອງເຕີນຊາງຢືນຢັນວ່າ: ຫວຽດນາມ ຕ້ອງມີຈີນຕະນາການໃຫມ່, ຫົວຄິດປະດິດສ້າງກ່ຽວກັບການຫັນເປັນອຸດສາຫະກຳ ແລະ ທັນສະໄຫມ ໂດຍອີງໃສ່ຫລັກມູນວິທະຍາສາດທີ່ເໝາະສົມ ໃນສະພາບການໂລກ ພວມປ່ຽນແປງຢ່າງວ່ອງໄວ. ການຫັນເປັນອຸດສາຫະກຳ ແລະ ທັນສະໄຫມຂອງຫວຽດນາມໃນໄລຍະຈະມາເຖິງ ແມ່ນຕິດພັນຢ່າງແຫນ້ນແຟ້ນກັບການພັດທະນາພື້ນຖານເສດຖະກິດການຕະຫລາດ ແລະ ເຊື່ອມໂຍງເຂົ້າກັບສາກົນ, ຖືວິທະຍາສາດ, ເຕັກໂນໂລຊີ, ພູມປັນຍາ ແລະ ແຫລ່ງຊັບພະຍາກອນມະນຸດມີຄຸນນະພາບສູງ ເປັນກຳລັງຫນູນຕົ້ນຕໍ; ລະດົມ, ຈັດແບ່ງ ແລະ ນຳໃຊ້ທຸກແຫລ່ງກຳລັງພັດທະນາສ່ວນຫລາຍຕາມກົນໄກການຕະຫລາດ ຢ່າງມີປະສິດທິຜົນ. ບົນພື້ນຖານຈີນຕະນາການນັ້ນ ບັນດາການກຳນົດທິດຍຸດທະສາດໃຫ້ວິວັດທະນາການຫັນເປັນອຸດສາຫະກຳ ແລະ ທັນສະໄຫມຢູ່ ຫວຽດນາມ ນັ້ນແມ່ນ: ສືບຕໍ່ພັດທະນາບາງຂະແຫນງອຸດສາຫະກຳທີ່ນຳໃຊ້ແຮງງານເປັນຈຳນວນຫລາຍໃຫ້ເໝາະສົມ, ພັດທະນາອຸດສາຫະກຳປຸງແຕ່ງ, ການຜະລິດ, ພະລັງງານ, ເຄມີ, ອຸດສາຫະກຳວັດສະດຸ, ອຸດສາຫະກຳເອເລັກໂຕນິກ, ອຸດສາຫະກຳຮັບໃຊ້ການຜະລິດກະສິກຳ, ອຸດສາຫະກຳຫນູນຊ່ວຍນຳໃຊ້ເຕັກໂນໂລຊີສູງ, ສຸມໃສ່ການສົ່ງອອກ; ພັດທະນາບັນດາຂະແຫນງທີ່ມີລັກສະນະເຊື່ອມຈອດຢ່າງແຮງ, ຍູ້ແຮງການຫັນເປັນອຸດສາຫະກຳ ແລະ ທັນສະໄຫມ, ກະສິກຳ, ຊົດນະບົດ.
ສ້າງລະບອບນະໂຍບາຍໃຫ້ສົມບູນແບບ, ພັດທະນາເສດຖະກິດການຕະຫລາດຕາມການກຳນົດທິດສັງຄົມນິຍົມ
ຕາມ ທ່ານປະທານປະເທດເຈືອງເຕີນຊາງແລ້ວ, ວິວັດທະນາການຫັນເປັນອຸດສາຫະກຳ ແລະທັນສະໄຫມຂອງຫວຽດນາມ ແມ່ນຕິດພັນກັບການສ້າງພື້ນຖານເສດຖະກິດການຕະຫລາດຕາມການກຳນົດທິດສັງຄົມນິຍົມ. ສະນັ້ນ ຄວນປ່ຽນໃຫມ່, ສ້າງລະບົບກົດໝາຍໃຫ້ສົມບູນແບບ, ກົນໄກສົ່ງເສີມການພັດທະນາ ແລະ ສ້າງສະພາບແວດລ້ອມການແກ້ງແຍ້ງຢ່າງສະເຫມີພາບໃຫ້ບັນດາວິສາຫະກິດທີ່ຂຶ້ນກັບທຸກພາກສ່ວນເສດຖະກິດ; ສ້າງ ແລະ ພັດທະນາບັນດາຕະຫລາດໃຫ້ສົມບູນແບບ, ລົບລ້າງສິດຜູກຂາດ, ກົນໄກ “ຂໍ ແລະ ໃຫ້….” ເພື່ອເສີມຂະຫຍາຍບົດບາດຂອງກົນໄກການຕະຫລາດຢ່າງຄົບຖ້ວນໃນການລະດົມ ແລະ ຈັດແບ່ງບັນດາແຫລ່ງກຳລັງພັດທະນາໃຫ້ການຫັນເປັນອຸດສາຫະກຳ ແລະ ທັນສະໄຫມ, ສ້າງກຳລັງຫນູນໃຫ້ວິສາຫະກິດ. ລັດ ສ້າງສະພາບແວດລ້ອມດ້ານກົດໝາຍ, ສະພາບແວດລ້ອມດ້ານເສດຖະກິດທີ່ສະດວກ, ເປີດເຜີຍ, ກະຈ່າງແຈ້ງໃຫ້ບັນດາວິສາຫະກິດເຄື່ອນໄຫວ, ແກ້ງແຍ້ງຢ່າງ ສະເຫມີ, ຫນູນຊ່ວຍວິສາຫະກິດປ່ຽນໃຫມ່ວິທະຍາສາດເຕັກໂນໂລຊີ, ບຳລຸງສ້າງແຫລ່ງ
ຊັບພະຍາກອນມະນຸດມີຄຸນນະພາບສູງ, ຊຸກຍູ້ການ ປະດິດຄິດສ້າງ, ຍູ້ໄວວິວັດການຫັນປ່ຽນໂຄງປະກອບເສດຖະກິດ; ກຳນົດທິດພັດທະນາ ແລະ ສ້າງບາດກ້າວບຸກທະລຸໃນບາງຂະແຫນງ ແລະ ເຂດແຄວ້ນ. ການປະສານສົມທົບບົດບາດຂອງລັດ ແລະ ການຕະຫລາດ ຢ່າງກົມກຽວ, ມີປະສິດທິຜົນແມ່ນປັດໄຈສຳຄັນເພື່ອຫລຸດຜ່ອນວິວັດທະນາການຫັນເປັນອຸດສາຫະກຳ ແລະ ທັນສະໄຫມ.
ພັດທະນາວິທະຍາສາດເຕັກໂນໂລຊີ, ແຫລ່ງຊັບພະຍາກອນມະນຸດມີຄຸນນະພາບສູງຢ່າງກະໂດດຂັ້ນ
ທ່ານປະທານປະເທດເຈືອງເຕີນຊາງ ຢືນຢັນວ່າ: ຄວນເຮັດໃຫ້ວິທະຍາສາດເຕັກໂນໂລຊີ ແລະ ການສຶກສາບຳລຸງສ້າງແມ່ນລັດຖະນະໂຍບາຍຕົ້ນຕໍ, ແມ່ນກຳລັງຫນູນສຳຄັນທີ່ສຸດເພື່ອພັດທະນາກຳລັງຜະລິດທັນສະໄຫມ, ພັດທະນາເສດຖະກິດພູມປັນຍາ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແກ້ງແຍ້ງຂອງພື້ນຖານເສດຖະກິດ. ຄວນສ້າງລະບົບປ່ຽນໃຫມ່, ປະດິດສ້າງແຫ່ງຊາດ ໂດຍອີງໃສ່ການເສີມຂະຫຍາຍກຳລັງຄວາມສາມາດປະດິດສ້າງຂອງທຸກສ່ວນບຸກຄົນ, ວິສາຫະກິດ ແລະ ອົງການ; ມີນະໂຍບາຍສົ່ງເສີມ, ຫນູນຊ່ວຍບັນດາວິສາຫະກິດປ່ຽນໃຫມ່ເຕັກໂນໂລຊີ, ໝູນໃຊ້ເຕັກໂນໂລຊີທັນສະໄຫມ, ມີກົນໄກພິເສດເພື່ອພັດທະນາພື້ນຖານຄົ້ນຄ້ວາວິທະຍາສາດ, ເຕັກໂນໂລຊີຈຸດສຸມແຫ່ງຊາດ ຕາມຮູບແບບກ້າວຫນ້າ. ສ້າງເງື່ອນໄຂສະດວກໃຫ້ວິສາຫະກິດຂຶ້ນກັບທຸກພາກສ່ວນເສດຖະກິດ, ພິເສດແມ່ນບັນດາວິສາຫະກິດໃຫຍ່ ປະຕິບັດການຄົ້ນຄ້ວາພັດທະນາ ແລະ ໝູນໃຊ້ວິທະຍາສາດເຕັກໂນໂລຊີ ນຳໃຊ້ຮູບແບບບໍລິຫານຢ່າງທັນສະໄຫມ, ເພື່ອຍົກສູງສະມັດຕະພາບແຮງງານ ແລະ ຄວາມສາມາດແກ້ງແຍ້ງ. ສົ່ງເສີມ ແລະ ດຶງດູດນັກວິທະຍາສາດ ຊື່ງແມ່ນຊາວຫວຽດນາມຢູ່ ຕ່າງປະເທດ ແລະ ຊາວຕ່າງປະເທດເຂົ້າຮ່ວມການເຄື່ອນໄຫວວິທະຍາສາດເຕັກໂນໂລຊີຢູ່ຫວຽດນາມ.
ເປັນເຈົ້າການເຊື່ອມໂຍງເຂົ້າກັບສາກົນ, ຍົກສູງຄວາມສາມາດແກ້ງແຍ້ງແຫ່ງຊາດ
ທ່ານປະທານປະເທດເຈືອງເຕີນຊາງ ຊີ້ແຈ້ງວ່າ: ຕ້ອງສືບຕໍ່ເປີດກວ້າງການເຈລະຈາ, ລົງນາມບັນດາສັນຍາການຄ້າເສລີສອງຝ່າຍ ຫລາຍຝ່າຍ ເພື່ອຊຸກຍູ້ການສົ່ງອອກສິນຄ້າ, ການບໍລິການ, ການລົງທຶນຂອງຫວຽດນາມ ອອກສູ່ຕ່າງປະເທດ ແລະ ດຶງດູດບັນດາແຫລ່ງທຶນ, ວິທະຍາສາດເຕັກໂນໂລຊີ, ລະດັບຄວາມຮູ້ໃນການຄຸ້ມຄອງຢ່າງທັນສະໄຫມຈາກບັນດາປະເທດ ເພື່ອຊຸກຍູ້ການຫັນເປັນອຸດສາຫະກຳ ແລະ ທັນສະໄຫມ. ປັດໄຈຕັດສິນຊີ້ຂາດ ແມ່ນຍົກສູງແຫລ່ງກຳລັງພາຍໃນຂອງປະເທດຊາດ. ຄວນມີຍຸດທະສາດແກ້ງແຍ້ງຂອງພື້ນຖານເສດຖະກິດແຫ່ງຊາດ, ຍຸດທະສາດແກ້ງແຍ້ງຂອງແຕ່ລະຂະແຫນງ, ແຕ່ລະຂົງເຂດຂອງບັນດາຜະລິດຕະພັນ, ເປັນຕົ້ນແມ່ນບັນດາຜະລິດຕະພັນສຳຄັນ, ຂອງທຸກວິສາຫະກິດ, ໂດຍສະເພາະແມ່ນວິສາຫະກິດໃຫຍ່ຂອງພື້ນຖານເສດຖະກິດ. ພື້ນຖານ ແລະ ບັນຫາຫລັກແຫລ່ງຂອງຍຸດທະສາດແກ້ງແຍ້ງໃນການເຊື່ອມໂຍງເຂົ້າກັບສາກົນ ຕ້ອງອີງໃສ່ການປ່ຽນໃຫມ່, ປະດິດສ້າງ ດ້ວຍບັນດາເສົາຄ້ຳແມ່ນວິທະຍາສາດເຕັກໂນໂລຊີ, ແຫລ່ງຊັບພະຍາກອນມີຄຸນນະພາບສູງ ແລະ ລະບອບນະໂຍບາຍທັນສະໄຫມ.
ຕາມ ທ່ານປະທານປະເທດເຈືອງເຕີນຊາງ ແລ້ວ, ຫວຽດນາມ ຄວນສືບຕໍ່ປ່ຽນໃຫມ່ຈີນຕະນາການ ແລະ ວິທີປະຕິບັດການປ່ຽນໃຫມ່ກົງຈັກລັດ ເພື່ອມຸ່ງໄປເຖິງພື້ນຖານບໍລິຫານແຫ່ງຊາດທັນສະໄຫມ, ເພື່ອແນໃສ່ຍົກສູງປະສິດທິຜົນ, ຜົນສັກສິດຂອງການຄຸ້ມຄອງລັດໃນເງື່ອນໄຂພັດທະນາເສດຖະກິດການຕະຫລາດ ແລະ ເຊື່ອມໂຍງເຂົ້າກັບສາກົນ. ພື້ນຖານບໍລິຫານແຫ່ງຊາດທັນສະໄຫມ ແລະ ມີປະສິດທິຜົນ, ສົ່ງເສີມ ແລະ ເອົາໃຈໃສ່ເຖິງການປະດິດສ້າງ ນັ້ນແມ່ນພື້ນຖານປະຕິບັດວິວັດການຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະທັນສະໄຫມໃນເງື່ອນໄຂໃຫມ່ ສຳເລັດຜົນ.