(vovworld)- ໂດຍບໍ່ຫົວຊາຕໍ່ການຄັດຄ້ານຂອງປະຊາຄົມສາກົນ, ໃນເດືອນ 4/2016, ສປປ ເກົາຫລີ ໄດ້ດຳເນີນບັນດາເຫດຍິງລູກສອນໄຟຢ່າງລຽນຕິດ. ການກະທຳນີ້ໄດ້ເຮັດໃຫ້ສະພາບການ ຢູ່ແຫລມເກົາຫລີ ເຄັ່ງຕຶງຂຶ້ນຕື່ມ, ສິ່ງດັ່ງກ່າວກໍໝາຍຄວາມວ່າ ການເຈລະຈາກ່ຽວກັບບັນຫານິວເຄຼຍຢູ່ແຫລມເກົາຫລີ ບໍ່ທັນໄດ້ຮັບການປະຕິບັດຄືນໃຫມ່.
ວັນທີ 1 /4, ສປປ ເກົາຫລີ ໄດ້ຍິງລູກສອນໄຟ ໄລຍະສັ້ນໃສ່ເຂດທະເລທາງທິດຕາເວັນອອກ. ການກະທຳນີ້ດຳເນີນໄປພາຍຫລັງ ທີ່ບັນດາການນຳ ອາເມລິກາ, ສເກົາຫລີ ແລະ ຍີ່ປຸ່ນ ໃຫ້ຄຳໝັ້ນສັນຍາຈະສົມທົບກັນຢ່າງແຫນ້ນແຟ້ນກວ່າເພື່ອສະກັດກັ້ນ ສປປ ເກົາຫລີ ພັດທະນາໂຄງການນິວເຄຼຍ ແລະ ລູກສອນໄຟພຽງ ສອງສາມຊົ່ວໂມງ. ວັນທີ 15/4, ພຽງຢາງ ສືບຕໍ່ຍິງລູກສອນໄຟ Musudan, ສາມາດໄປເຖິງດິນແດນ ອາເມລິກາຄື: ເກາະ Guam ແລະ Alaska. ກອງທັບ ສເກົາຫລີ ຖືວ່າ: ເຫດຍິງທົດລອງລູກສອນໄຟຄັ້ງນີ້ຖືກປະລາໄຊ ແຕ່ນີ້ເປັນຄັ້ງທຳອິດ ທີ່ ສປປ ເກົາຫລີ ຍິງລູກສອນໄຟນຳວິຖີ Musudan ເຄື່ອນທີ່.
ສື່ສານໂຄສະນາສເກົາຫລີໃຫ້ຂ່າວກ່ຽວກັບເຫດຍິງທົດລອງລູກສອນໄຟ
ຂອງ ສປປ ເກົາຫລີ
ພາບ: AP
|
ປັບປຸງກຳລັງແຮງນິວເຄຼຍ
ພາຍຫລັງເຫດຍິງລູກສອນໄຟ 2 ຄັ້ງ, ວັນທີ 24/4, ສປປ ເກົາຫລີ ໄດ້ຖະແຫລງວ່າ ເຫດຍິງທົດລອງລູກສອນໄຟນຳວິຖີ ຈາກກຳປັ່ນດຳນ້ຳ, ພາຍໃຕ້ການຊີ້ນຳຂອງປະທານ Kim Jong Un ແມ່ນຜົນສຳເລັດອັນຍິ່ງໃຫຍ່. ການນຳ Kim Jong Un ໄດ້ຍ້ອງຍໍບັນດາເຈົ້າຫນ້າທີ່, ນັກວິທະຍາສາດ ແລະ ພະນັກງານເຕັກນິກ ພ້ອມທັງ ຮຽກຮ້ອງເຂົາເຈົ້າຊຸກຍູ້ໂຄງການນີ້ ເພື່ອເພີ່ມທະວີກຳລັງແຮງດ້ານນິວເຄຼຍ ເພື່ອສາມາດບຸກໂຈມຕີບັນດາເປົ້າໝາຍຢູ່ ອາເມລິກາ - ສເກົາຫລີ ບໍ່ວ່າຈຸດໃນເວລາໃດ. ຕໍ່ຫນ້າການກະທຳດັ່ງກ່າວ, ທ່ານ Jeffrey Lewis, ສັງກັດສະຖາບັນຄົ້ນຄ້ວາສາກົນ Middlebury, ລັດ California ປະເທດ ອາເມລິກາ ຖືວ່າ ຖ້າຫາກສິ່ງດັ່ງກ່າວແມ່ນຄວາມຈິງ, ນີ້ອາດຈະແມ່ນບາດກ້າວໃຫຍ່ຂອງ ສປປ ເກົາຫລີ ໃນການພັດທະນາລູກສອນໄຟຍິງຈາກກຳປັ່ນດຳນ້ຳ ແລະ ແມ່ນ “ບາດກ້າວກະໂດດຂັ້ນໃນຄວາມມັກໃຫຍ່ໄຝ່ສູງ” ຂອງສປປ ເກົາຫລີ. ນີ້ແມ່ນການຜັນແປລ້າສຸດໃນບັນດາການກະທຳມໍ່ໆມານີ້ຂອງ ພຽງຢາງ ເພື່ອສະແດງກຳລັງແຮງດ້ານການທະຫານ. ປະຈຸບັນ ມີຄວາມວິຕົກກັງວົນບໍ່ແມ່ນຫນ້ອຍກ່ຽວກັບເລື່ອງ ສປປ ເກົາຫລີ ອາດຈະສືບຕໍ່ດຳເນີນບັນດາການທົດລອງ ນິວເຄຼຍ ໃນອະນາຄົດໃກ້ໆນີ້ ເມື່ອກຳລັງການທະຫານ ອາເມລິກາ ແລະ ສເກົາຫລີ ໄດ້ຖ່າຍທຳບັນດາການຍົກຍ້າຍຜິດປົກກະຕິຢູ່ຮາກຖານນິວເຄຼຍ Punggye – ri ຂອງ ສປປເກົາຫລີ ໃນອາທິດກ່ອນ. ນອກນັ້ນ ກໍມີພະຍານຫລັກຖານສະແດງໃຫ້ເຫັນວ່າ ກອງທັບ ສປປ ເກົາຫລີ ໄດ້ສະກັດກັ້ນບັນດາເສັ້ນທາງຢູ່ Kiju, ທາງທິດເຫນືອແຂວງ Hamgyong, ຊື່ງແມ່ນສະຖານທີ່ມີຖານທີ່ໝັ້ນການທະຫານຫລາຍແຫ່ງ. ເລື່ອງສະກັດກັ້ນບັນດາເສັ້ນທາງຄ້າຍຄືກັນໄດ້ດຳເນີນກ່ອນທີ່ປະເທດນີ້ປະຕິບັດການທົດລອງນິວເຄຼຍຄັ້ງທີ 4 ໃນໄລຍະຕົ້ນປີ.
ກ່ອນການຜັນແປດັ່ງກ່າວ, ປະທານາທິບໍດີ ອາເມລິກາ Barak Obama ຕ້ອງກ່າວເຕືອນກ່ຽວກັບບັນດາຄວາມສ່ຽງຢ່າງຮ້າຍແຮງຈາກ ເລື່ອງ ສປປ ເກົາຫລີ ດຳເນີນການຍິງທົດລອງລູກສອນໄຟຢ່າງລຽນຕິດ. ທ່ານ Obama ຖືວ່າ ເຖິງວ່າຖືກປະລາໄຊໃນເຫດທົດລອງສ່ວນຫລາຍກໍຕາມ ແຕ່ບົດຮຽນ ແລະ ຄວາມຮູ້ ໃຫມ່ແມ່ນສິ່ງທີ່ພຽງຢາງ ບັນລຸໄດ້. ອາເມລິກາ ແລະ ພັນທະມິດ ຕ້ອງມີສະຕິຢ່າງເຂັ້ມງວດຕໍ່ບັນຫານີ້.
ສູ້ຢັນກັນແທນທີ່ການເຈລະຈາ
ໃນຖະແຫລງການໃຫມ່ສຸດ, ທ່ານ Ri Thae Song, ລັດຖະມົນຕີວ່າການກະຊວງການຕ່າງປະເທດ ສປປ ເກົາຫລີ ໄດ້ຢືນຢັນຢ່າງຈະແຈ້ງວ່າ: ພຽງຢາງບໍ່ມີແຜນການຢຸດຕິບັນດາເຫດຍິງທົດລອງລູກສອນໄຟ ນັບທັງໃນຂະນະທີ່ອາເມລິກາ ຢຸດຕິບັນດາການຊ້ອມຮົບປະຈຳປີກັບ ສເກົາຫລີ. ໃນຂະນະນັ້ນ, ວົງການນັກໄຈ້ແຍກພັດຖືວ່າ ບັນດາເຫດຍິງທົດລອງລູກສອນໄຟ ແມ່ນຄວາມມານະພະຍາຍາມສ່ວນຫນຶ່ງຂອງການນຳ Kim Jong Un ເພື່ອປັບປຸງທີ່ຕັ້ງບົດບາດກ່ອນທີ່ດຳເນີນກອງປະຊຸມໃຫຍ່ພັກແຮງງານ ສປປ ເກົາຫລີ ຊື່ງຈະຈັດຂຶ້ນໃນເດືອນ 5 ຈະມາເຖິງ, ນີ້ແມ່ນເຫດການໄດ້ຮັບການຕີລາຄາວ່າຜິດປົກກະຕິ ເພາະບໍ່ເຄີຍດຳເນີນໃນຕະຫລອດ 36 ປີຜ່ານມາ. ຫລາຍຄົນຖືວ່າ ໃນໂອກາດນີ້ ທ່ານ Kim Jong Un ຈະຖະແຫລງຢ່າງເປັນທາງການວ່າ ສປປ ເກົາຫລີ ແມ່ນປະເທດມີອາວຸດນິວເຄຼຍ ແລະ ມີກຳລັງບົ່ນຊ້ອນດ້ານການທະຫານ.
ບັນດາການກະທຳຂອງ ສປປ ເກົາຫລີ ໄດ້ເຮັດໃຫ້ ສເກົາຫລີ ຕ້ອງຮັກສາລະດັບເຕືອນໄພ ເພາະ ມີຄວາມເປັນຫ່ວງວ່າ ພຽງຢາງຈະດຳເນີນເຫດທົດລອງນິວເຄຼຍຄັ້ງທີ 5 ໃນບໍ່ວ່າເວລາໃດ. ທ່ານນາງປະທານາທິບໍດີ ສເກົາຫລີ Park Geun Hye ກ່າວເຕືອນວ່າ ຖ້າຫາກ ພຽງຢາງ ຍັງຄົງສືບຕໍ່ປະຕິບັດບັນດາການກະທຳເກາະຜິດຄືດັ່ງກ່າວ ອາດຈະຖືກປະເຊີນຫນ້າກັບບັນດາມາດຕະການລົງໂທດ ແລະ ຖືກກຳລັງດັນຢ່າງແຮງກວ່າ. ໃນຂະນະນັ້ນ, ຈີນ ກໍໄດ້ສົ່ງກຳລັງທະຫານເຖິງເຂດຊາຍແດນ ທີ່ຕິດກັບ ສປປ ເກົາຫລີ. ອາເມລິກາ ພວມຕັ້ງຫນ້າເພີ່ມທະວີຄວາມສາມາດປ້ອງກັນຕົວ.
ປະທານາທິບໍດີ ອາເມລິກາ B. Obama ເນັ້ນຫນັກວ່າ: ວໍຊິງຕັນໄດ້ສະຫງວນເວລາສ່ວນຫລາຍເພື່ອຈັດວາງບັນດາລະບົບຍິງລູກສອນໄຟກໍຄືສ້າງລະບົບປ້ອງກັນເພື່ອສາມາດສະກັດກັ້ນບັນດາການນາບຂູ່ຈາກພຽງຢາງ ໃຫ້ຢູ່ໃນລະດັບຕ່ຳສົມຄວນ. ເຖິງຢ່າງໃດກໍຕາມ, ທ່ານ Obama ກໍຍອມຮັບວ່າ “ບໍ່ມີມາດຕະການທີ່ງ່າຍດ່າຍໃດ”ໃຫ້ແກ່ການນາບຂູ່ຈາກ ສປປ ເກົາຫລີ.
ທ່ານ Josh Earnest, ໂຄສົກທຳນຽບຂາວ ຢືນຢັນວ່າ: ເສັ້ນທາງຊື່ງ ສປປ ເກົາຫລີ ເລືອກເຟັ້ນ ເພື່ອເຊື່ອມຕົວເຂົ້າກັບປະຊາຄົມສາກົນ ພຽງແຕ່ແມ່ນເສັ້ນທາງດຽວ, ນັ້ນແມ່ນຄຳໝັ້ນສັນຍາປອດນິວເຄຼຍຢູ່ ແຫລມເກົາຫລີ ແລະ ເຄົາລົບບັນດາພັນທະສາກົນຂອງຕົນ. ພ້ອມກັບການກະທຳນີ້, ສເກົາຫລີ, ອາເມລິກາ ແລະ ຍີ່ປຸ່ນ ຮຽກຮ້ອງ ສປຊ ຮັບຮອງເອົາມະຕິລົງໂທດໃຫມ່, ຖ້າຫາກ ສປປ ເກົາຫລີ ດຳເນີນການທົດລອງນິວເຄຼຍ ຄັ້ງທີ 5. ຢູ່ ເອີລົບ, ຝລັ່ງ ໄດ້ຮຽກຮ້ອງ ອີຢູ ຮັບຮອງເອົາບັນດາມາດຕະການລົງໂທດເພີ່ມເຕີມສຳລັບ ພຽງຢາງ.
ແຫລມເກົາຫລີ ຖືກແບ່ງແຍກ ນັບແຕ່ເມື່ອສົງຄາມໂລກຄັ້ງທີ 2 ສິ້ນສຸດເມື່ອປີ 1945. ມາຮອດປະຈຸບັນ ສອງພາກເກົາຫລີ ຍັງຄົງຢູ່ໃນສະພາບສົງຄາມ. ເລື່ອງ ສປປ ເກົາຫລີ ເພີ່ມບັນດາເຫດຍິງລູກສອນໄຟຢ່າງຕໍ່ເນື່ອງໃນໄລຍະມໍ່ໆມານີ້ແມ່ນ ບໍ່ນຳມາເຊິ່ງສັນຕິພາບໃຫ້ແກ່ແຫລມເກົາຫລີ ຫາກພຽງແຕ່ເຮັດໃຫ້ຂາດສະຖຽນລະພາບເທົ່ານັ້ນ.