(vovworld)- ທີ່ກອງປະຊຸມສະໄຫມສາມັນເທື່ອທີ 10 ສະພາແຫ່ງຊາດຫວຽດນາມ ຊຸດທີ 13, ບັນດາສະມາຊິກສະພາແຫ່ງຊາດ ໄດ້ປຶກສາຫາລືຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ. ໃນນັ້ນ ບັນດາສະມາຊິກສະພາແຫ່ງຊາດ (ສສຊ) ໄດ້ສຸມໃສ່ປະກອບຄຳເຫັນໃສ່ບັນດາມາດຕະການ ແລະ ການກຳນົດທິດພັດທະນາເສດຖະກິດ.
ພາບປະກອບ:internet
|
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຈະດຳເນີນໃນຕົ້ນປີ 2016. ສະນັ້ນ ບັນດາຄຳເຫັນປຶກສາຫາລື, ປະກອບໃສ່ຮ່າງເອກະສານກອງປະຊຸມໃຫຍ່ຄັ້ງທີ 12 ຂອງພັກ ທີ່ກອງປະຊຸມສະໄຫມສາມັນເທື່ອທີ 10 ສະພາແຫ່ງຊາດຊຸດທີ 13 ແມ່ນສຳຄັນທີ່ສຸດ, ມີລັກສະນະຍຸດທະສາດໃນໄລຍະສ້າງສາ ແລະ ປົກປັກຮັກສາປະເທດຊາດໃນໄລຍະຍູ້ແຮງການເຊື່ອມໂຍງເຂົ້າກັບສາກົນ.
ວິສາຫະກິດແມ່ນກຳລັງຫນູນສຳຄັນຂອງພາລະກິດຫັນເປັນອຸດສາຫະກຳ ແລະ ທັນສະໄຫມ
ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ລະບຸວ່າ ໄດ້ໄຈ້ແຍກ, ຕີລາຄາສະພາບການທຸກດ້ານກ່ຽວກັບການພັດທະນາເສດຖະກິດ ສັງຄົມຢ່າງຊັດເຈນ, ກົງໄປກົງມາ ກໍຄືວາງອອກບັນດາຄາດໝາຍພັດທະນາຢ່າງເໝາະສົມກັບສະພາບຕົວຈິງ, ຮັບປະກັນລັກສະນະຄວາມເປັນໄປໄດ້. ບັນດາ ສສຊ ເຫັນດີຢ່າງສູງຕໍ່ເລື່ອງ ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ໄດ້ກຳນົດຢ່າງຈະແຈ້ງວ່າ ວິສາຫະກິດແມ່ນພາກສ່ວນເສດຖະກິດຫລັກແຫລ່ງຂອງພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ທ່ານ ຫງວຽນກວກບີງ, ສສຊ ນະຄອນ ຮ່າໂນ້ຍ ຖືວ່າ:
“ໃນລັດຖະທຳມະນູນປີ 2013 ກໍກຳນົດວ່າ ວິສາຫະກິດແມ່ນກຳລັງສຳຄັນ. ໃນບັນດາແຜນນະໂຍບາຍລ້ວນແຕ່ກຳນົດຢ່າງຈະແຈ້ງວ່າ ຕ້ອງສ້າງນະໂຍບາຍເພື່ອໃຫ້ວິສາຫະກິດກາຍເປັນກຳລັງນຳຫນ້າ, ຫລັກແຫລ່ງຂອງພາລະກິດຫັນປະເທດຊາດເປັນປະເທດອຸດສາຫະກຳແລະ ທັນສະໄຫມ. ຈາກນັ້ນ ພວກເຮົາຈະເປັນເອກະພາບໃນການຊີ້ນຳ.”
ເລື່ອງກຳນົດການຕະຫລາດແມ່ນບັນຫາພື້ນຖານ, ລັດປັບປຸງທຸກການເຄື່ອນໄຫວເສດຖະກິດບົນພື້ນຖານການຕະຫລາດ. ນີ້ກໍແມ່ນຈຸດໃຫມ່ເມື່ອທຽບໃສ່ມະຕິເລກທີ 11. ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຄັ້ງນີ້ ໄດ້ກຳນົດ ລັດຖືຄາດໝາຍການຕະຫລາດ ແລະ ຖືການຕະຫລາດເປັນກົກເຄົ້າ ເພື່ອບໍລິຫານ, ແບ່ງແຫລ່ງກຳລັງ ແລະ ບໍລິຫານພັດທະນາເສດຖະກິດ.
ພັດທະນາເສດຖະກິດຕາມທິດລົງເລິກ
ເນື້ອໃນທີ່ໄດ້ຮັບຄວາມສົນໃຈຈາກ ສສຊ ຫລາຍທ່ານ ນັ້ນແມ່ນ ຮູບແບບການເຕີບໂຕຕາມທິດລົງເລິກ, ສ່ວນຫລາຍແມ່ນອີງໃສ່ການເພີ່ມສະມັດຕະພາບແຮງງານ ຍ້ອນກຳລັງແຮງງານໄດ້ຮັບການບຳລຸງສ້າງ, ມີສີມືແຮງງານສູງ, ໝູນໃຊ້ຄວາມກ້າວຫນ້າດ້ານວິທະຍາສາດ ເຕັກໂນໂລຊີ. ທ່ານ ຫງວຽນຟີເທື່ອງ, ສສຊ ນະຄອນ ຮ່າໂນ້ຍ ປະກອບຄຳເຫັນວ່າ:
“ບັນຫາສຳຄັນສຳລັບຫວຽດນາມ ໃນປະຈຸບັນ ແມ່ນຕ້ອງຊຸກຍູ້ການພັດທະນາເສດຖະກິດ ຕາມທິດລົງເລິກ. ມີສາມບັນຫາຕ້ອງເຮັດ, ນັ້ນແມ່ນປ່ຽນແປງວິທີຈັດແບ່ງແຫລ່ງກຳລັງ ໃຫ້ພື້ນຖານເສດຖະກິດ ຢ່າງມີປະສິດທິຜົນ. ທີສອງ ສົ່ງເສີມວິສາຫະກິດລົງທຶນ, ໝູນໃຊ້ວິທະຍາສາດເຕັກໂນໂລຊີ. ທີສາມ ແມ່ນກ່ຽວຂ້ອງເຖິງການບຳລຸງສ້າງ ແຫລ່ງຊັບພະຍາກອນມະນຸດທີ່ດີມີຄຸນນະພາບ, ພິເສດແມ່ນແຫລ່ງຊັບພະຍາກອນມະນຸດມີຄຸນນະພາບສູງ. 3 ປັດໄຈດັ່ງກ່າວລ້ວນແຕ່ອີງໃສ່ການປ່ຽນແປງຈີນຕະນາການ, ການປະຕິຮູບລະບອບນະໂຍບາຍ.”
ເມື່ອປຶກສາຫາລືທີ່ກອງປະຊຸມ, ບັນດາ ສສຊ ເນັ້ນຫນັກຢ່າງແຮງ ເຖິງມາດຕະການສືບຕໍ່ຜັນຂະຫຍາຍແຜນຮ່າງສັງລວມ ສ້າງໂຄງປະກອບພື້ນຖານເສດຖະກິດຄືນໃຫມ່ ແລະ ສ້າງໂຄງປະກອບບັນດາຂະແຫນງ, ຂົງເຂດ. ສາມຂົງເຂດຈຸດສຸມໄດ້ຮັບການກຳນົດ ລວມມີ: ສ້າງໂຄງປະກອບການລົງທຶນຂອງລັດຄືນໃຫມ່, ສ້າງໂຄງປະກອບລະບອບການເງິນ ທະນາຄານ, ຈຸດສຸມແມ່ນບັນດາທະນາຄານການຄ້າ ແລະ ການສ້າງໂຄງປະກອບລັດວິສາຫະກິດຄືນໃຫມ່, ຈຸດສຸມແມ່ນບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດ.
ຖືການພັດທະນາວິສາຫະກິດພາກເອກະຊົນເປັນສຳຄັນ
ບົດລາຍງານການເມືອງ ຍື່ນສະເຫນີກອງປະຊຸມໃຫຍ່ຄັ້ງທີ 12 ຂອງພັກ ໄດ້ຖືເສດຖະກິດພາກເອກະຊົນແມ່ນກຳລັງຫນູນສຳຄັນເພື່ອພັດທະນາເສດຖະກິດຂອງປະເທດຊາດ. ເສດຖະກິດພາກເອກະຊົນ ສ່ວນຫລາຍແມ່ນບັນດາວິສາຫະກິດຂະຫນາດກາງ ແລະ ນ້ອຍ. ບັນດາ ສສຊ ຖືວ່າ ນີ້ແມ່ນຈຸດໃຫມ່ມີລັກສະນະບຸກທະລຸໃນຮ່າງເອກະສານກອງປະຊຸມໃຫຍ່ຄັ້ງນີ້. ທ່ານ ຫງວຽນກວກບີ່ງ, ສສຊ ນະຄອນ ຮ່າໂນ້ຍ ຖືວ່າ:
“ມະຕິ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ ພຽງກຳນົດບັນດາພາກສ່ວນເສດຖະກິດ, ໃນນັ້ນ ມີເສດຖະກິດພາກເອກະຊົນ. ແຕ່ຄັ້ງນີ້ ມະຕິໄດ້ກຳນົດຢ່າງຈະແຈ້ງເຖິງການສ້າງກົນໄກນະໂຍບາຍສົມບູນແບບ, ສົ່ງເສີມ ແລະ ສ້າງຄວາມສະດວກໃຫ້ແກ່ການພັດທະນາເສດຖະກິດພາກເອກະຊົນໃນຫລາຍຂົງເຂດເສດຖະກິດຢ່າງແຮງ ແລະ ກາຍເປັນກຳລັງຫນູນສຳຄັນຂອງພື້ນຖານເສດຖະກິດ. ສິ່ງດັ່ງກ່າວ ໄດ້ສ້າງພື້ນຖານເພື່ອໃຫ້ພວກເຮົາພັດທະນາເສດຖະກິດຕາມ ກຳນົດທິດການຕະຫລາດ ແລະ ລະດົມທຸກແຫລ່ງກຳລັງຂອງທົ່ວສັງຄົມຢ່າງແຮງເພື່ອພັດທະນາເສດຖະກິດ.”
ບັນດາ ສສຊ ຖືວ່າ ປະຈຸບັນ ມີວິສາຫະກິດ 500.000 ແຫ່ງຍັງຕ່ຳຢູ່, ຄວນເພີ່ມວິສາຫະກິດໃຫ້ຂຶ້ນເຖິງປະມານ 2 ລ້ານແຫ່ງໃນປີ 2020. ຄຽງຄູ່ກັນນັ້ນ ລັດສືບຕໍ່ສ້າງລະບອບນະໂຍບາຍການຕະຫລາດໃຫ້ສົມບູນແບບ ແລະ ຕາມທິດສ້າງເງື່ອນໄຂແກ້ງແຍ້ງໃຫ້ສະເຫມີພາບລະຫວ່າງບັນດາຮູບການວິສາຫະກິດ.
ອາດຈະຢືນຢັນໄດ້ວ່າ ບັນດາ ສສຊ ໄດ້ປະກອບຄຳເຫັນຢ່າງເຂັ້ມງວດ, ມີຄວາມຮັບຜິດຊອບ ແລະ ສຸດອົດສຸດໃຈ ໃສ່ ຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ, ປະກອບສ່ວນເຮັດໃຫ້ປະເທດຊາດກ້າວຫນ້າ ໃນໄລຍະພວມເຊື່ອມໂຍງຢ່າງເລິກເຊິ່ງ ແລະ ກວ້າງຂວາງ.