ວັນທີ 16/5, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ນຳໜ້າຄະນະຜູ້ແທນຂັ້ນສູງຫວຽນາມ ເດີນທາງໄປຢ້ຽມຢາມສະຫະພັນລັດເຊຍຢ່າງເປັນທາງການ ແລະ ເຂົ້າຮ່ວມກອງປະຊຸມຂັ້ນສູງສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາອາຊຽນ-ສະຫະພັນລັດເຊຍ (1996-2016). ການຢ້ຽມຢາມກໍເປັນການຢັ້ງຢືນວ່າ ຫວຽດນາມຖືເປັນສຳຄັນທີ່ສຸດການພົວພັນກັບ ສະຫະພັນລັດເຊຍເວົ້າສະເພາະ ແລະ ອາຊຽນ- ສະຫະພັນລັດເຊຍເວົ້າລວມ, ເຊີນຊູບົດບາດຂອງບັນດາກົນໄກຮ່ວມມື 2 ຝ່າຍ ແລະ ຫຼາຍຝ່າຍໃນສະພາບການໃໝ່ຂອງໂລກ.
ພະນັກງານສະຖານທູດຫວຽດນາມອອກຕ້ອນຮັບທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກຢູ່ສະໜາມບິນ Vnukovo ແຫ່ງ ສະຫະພັນລັດເຊຍ (TTXVN) |
ການຢ້ຽມຢາມ ສະຫະພັນລັດເຊຍຢ່າງເປັນທາງການຂອງທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແມ່ນການຢ້ຽມຢາມລັດເຊຍຄັ້ງທຳອິດ ນັບຕັ້ງແຕ່ທ່ານເຂົ້າດຳລົງຕຳແໜ່ງເປັນນາຍົກລັດຖະມົນຕີ. ນີ້ແມ່ນຈຸດເວລາທີ່ການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານຫວຽດນາມ- ສະຫະພັນລັດເຊຍພວມພັດທະນາຢ່າງແຂງແຮງໃນຫຼາຍຂົງເຂດ.
ການພົວພັນມິດຕະພາບທີ່ເປັນມູນເຊື້ອຫວຽດນາມ- ສະຫະພັນລັດເຊຍ
ການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານຫວຽດນາມ- ສະຫະພັນລັດເຊຍ ໃນໄລຍະທີ່ຜ່ານມາ ຊຶ່ງໄດ້ຮັບການປັບປຸງ ແລະ ເພີ່ມທະວີຢ່າງຢຸດຢັ້ງ ແລະ ມີຄວາມໄວ້ເນື້ອເຊື່ອໃຈການເມືອງສູງ. ການແລກປ່ຽນຄະນະຜູ້ແທນຖືກດຳເນີນເປັນປະຈຳ, ເປັນຕົ້ນແມ່ນຂັ້ນສູງ. 2 ປະເທດໄດ້ຜັນຂະຫຍາຍບັນດາໜ້າທີ່ບຸລິມະສິດໃນປີ 2015 ຢ່າງມີປະສິດທິຜົນ ແນໃສ່ຊຸກຍູ້ການພົວພັນລະຫວ່າງ 2 ປະເທດ; ຈັດຕັ້ງການສົນທະນາຍຸດທະສາດປ້ອງກັນຊາດເປັນປະຈຳຢ່າງມີປະສິດທິຜົນ. ໂດຍບໍ່ຫົວຊາຕໍ່ບັນດາຄວາມຫຍຸ້ງຍາກຂອງພື້ນຖານເສດຖະກິດທົ່ວໂລກ, ການຮ່ວມມືດ້ານເສດຖະກິດ- ການຄ້າ ແລະ ການລົງທຶນລະຫວ່າງຫວຽດນາມ ແລະ ສະຫະພັນລັດເຊຍ ຍັງຄົງສາມາດຮັກສາທ່າເຕີບໂຕໄວ້ໄດ້. ປະຈຸບັນ, ລັດເຊຍຢືນອັນດັບທີ 17 ໃນຈຳນວນ 101 ປະເທດ ແລະ ເຂດແຄ້ວນເຂົ້າມາລົງທຶນຢູ່ຫວຽດນາມ ດ້ວຍ 114 ໂຄງການ ແລະ ມີຍອດທຶນຈົດທະບຽນ 2 ຕື້ USD . ພະລັງງານ ແລະ ຂົງເຂດຮ່ວມມືຍຸດທະສາດທີ່ມີມາແຕ່ດົນນານ ແລະ ບັນລຸປະສິດທິຜົນ, ອັນໄດ້ສ້າງແຫຼ່ງລາຍຮັບຫຼາຍພໍສົມຄວນເຂົ້າງົບປະມານຂອງ 2 ລັດ. ຕີລາຄາກ່ຽວກັບສາຍພົວພັນລະຫວ່າງ 2 ປະເທດ, ທ່ານສາດສະດາຈານ, ດຣ ຕະງອກເຕີ້ນ ຮອງປະທານຮັບຜິດຊອບສະພາທິດສະດີສູນກາງ ຖືວ່າ :
“ ການພົວພັນລະຫວ່າງ 2 ປະເທດ ແມ່ນມີລັກສະນະຕົວຈິງສູງ, ອີງໃສ່ລະດັບຄວາມຮັບຮູ້ກ່ຽວກັບທີ່ຕັ້ງ, ບົດບາດຂອງແຕ່ລະປະເທດດ້ວຍຖານະແມ່ນປັດໄຈກະທົບ. ທັງ 2 ປະເທດຕ່າງກໍມີຄວາມຫວັງມີມາດຕະການຊຸກຍູ້ການຮ່ວມມືເຂົ້າສູ່ລວງເລິກ, ມີປະສິດທິຜົນ, ແທດຈິງ. ໃນຈຕົວຈິງ, ການຮ່ວມມືດ້ານພະລັງງານ, ເຕັກນິກການທະຫານລະຫວ່າງຫວຽດນາມ ແລະ ສະຫະພັນລັດເຊຍ ຄືດັ່ງການຮັບປະກັນທີ່ສຳຄັນໃຫ້ແກ່ຄວາມໝັ້ນຄົງ ແລະ ອະນາຄົດທີ່ພັດທະນາຂອງການພົວພັນ 2 ຝ່າຍ ”
ປະຈຸບັນ, 2 ປະເທດໄດ້ເຊັນເອກະສານຮ່ວມມືໃນທຸກໆຂົງເຂດລວມທັງໝົດກວ່າ 200 ສະບັບ, ສ້າງຂອບເຂດດ້ານກົດໝາຍຢ່າງຄົບຖ້ວນແນໃສ່ຊຸກຍູ້ການພົວພັນ 2 ຝ່າຍໃຫ້ພັດທະນາທັງລວງກ້ວາງ ແລະ ລວງເລິກ. ເພາະສະນັ້ນ, ໃນຂອບເຂດການຢ້ຽມຢາມ ສະຫະພັນລັດເຊຍຄັ້ງນີ້ຂອງທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ, 2 ຝ່າຍຈະພ້ອມກັນສຳຫຼວດກວດຄືນການຊຸກຍູ້ຜັນຂະຫຍາຍປະຕິບັດບັນດາໂຄງການໃຫຍ່ລະຫວ່າງ 2 ປະເທດໃນບັນດາຂົງເຂດລະອຽດ ກໍຄືແລກປ່ຽນກ່ຽວກັບບັນດາບັນຫາພາກພື້ນ ແລະ ສາກົນທີ່ຕ່າງຝ່າຍກໍມີຄວາມສົນໃຈ.
ຫວຽດນາມ: ຂົວເຊື່ອມຕໍ່ໃນການພົວພັນຄູ່ເຈລະຈາລັດເຊຍ - ອາຊຽນ
ປີ 2016, ອາຊຽນ ແລະ ສະຫະພັນລັດເຊຍຈັດຕັ້ງສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາ 2 ຝ່າຍ, ໄລຍະ 2 ທົດສະວັດທີ່ຜ່ານມາ, ນັບຕັ້ງແຕ່ປີ 1996 ຂະນະທີ່ລັດເຊຍໄດ້ກາຍເປັນຄູ່ຮ່ວມເຈລະຈາຢ່າງສົມບູນຂອງອາຊຽນມາຮອດປະຈຸບັນ, ໄດ້ເຫັນປະຈັກຕາບັນດາບາດກ້າວອັນຕັ້ງໜ້າ ແລະ ມີປະສິດທິຜົນໃນການຮ່ວມມື 2 ຝ່າຍໃນທຸກຂົງເຂດ. ຝ່າບລັດເຊຍໄດ້ຢືນຢັນຫຼາຍຄັ້ງກ່ຽວກັບນະໂຍບາຍຖືເປັນສຳຄັນການຮ່ວມມືກັບອາຊຽນ, ເນັ້ນໜັກເຖິງການສະໜັບສະໜູນອາຊຽນໃນການຜັນຂະຫຍາຍວິໄສທັດປະຊາຄົມອາຊຽນ 2025, ສະໜັບສະໜູນບົດບາດໃຈກາງຂອງອາຊຽນ, ຮ່ວມມືຫນູນຊ່ວຍຕ້ານກໍ່ການຮ້າຍ ແລະ ອາດຊະຍາກຳຂ້າມຊາດ, ເພີ່ມທະວີການເຊື່ອມຈອດພາກພື້ນ ແລະ ຮັດແຄບຄວາມແຕກໂຕນໃນການພັດທະນາ. ກ່ຽວກັບການພົວພັນອາຊຽນ - ສະຫະພັນລັດເຊຍໃນປະຈຸບັນ, ທ່ານສາດສະດາຈານ, ດຣ ຕະງອກເຕີ້ນ ຖືວ່າ :
“ ດ້ວຍບົດບາດແຖວໜ້າໃນການຮ່ວມສຳພັນດ້ານກຳລັງໃໝ່ທີ່ພວມພົ້ນເດັ່ນຂຶ້ນ, ອາຊີຕາເວັນອອກສ່ຽງໃຕ້ພວມກາຍເປັນປັດໄຈສຳຄັນໃນແຜນຍຸດທະສາດຂອງໂລກ. ດັ່ງນັ້ນການກັບຄືນສູ່ອາຊີຕາເວັນອອກສ່ຽງໃຕ້ຂອງສະຫະພັນລັດເຊຍ ແມ່ນຍຸດທະສາດຕ້ອງເປັນໄປ. ໃນວິວັດການນີ້, ສະຫະພັນລັດເຊຍຖືຫວຽດນາມແມ່ນຕ່ອງໂສ້ສຳຄັນເພື່ອຊຸກຍູ້ສາຍພົວພັນກັບບັນດາປະເທດອາຊຽນ”
ທີ່ກອງປະຊຸມຂັ້ນສູງ ສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາອາຊຽນ - ສະຫະພັນລັດເຊຍຄັ້ງນີ້, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກພ້ອມກັບບັນດາການນຳອາຊຽນ ແລະ ສະຫະພັນລັດເຊຍຈະແລກປ່ຽນບັນດາມາດຕະການລະອຽດ, ວາງອອກກຳນົດທິດເພີ່ມທະວີການພົວພັນຄູ່ເຈລະຈາອາຊຽນ - ສະຫະພັນລັດເຊຍ ກໍຄືແລກປ່ຽນບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ປະກອບສ່ວນນຳການພົວພັນ 2 ຝ່າຍເຂົ້າສູ່ແທດຈິງ ແລະ ມີປະສິດທິຜົນ. 2 ຝ່າຍຄາດວ່າຈະຮັບຮອງເອົາເອກະສານບາງສະບັບເພື່ອສ້າງພື້ນຖານໃຫ້ແກ່ແຜນການເຄື່ອນໄຫວຮ່ວມມືລັດເຊຍ-ອາຊຽນໃນຂົງເຂດການເມືອງ, ເສດຖະກິດ, ວັດທະນະທຳ, ການປ້ອງກັນຄວາມສະຫງົບ.