(vovworld)- ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 47 (AMM47) ແລະ ບັນດາກອງປະຊຸມທີ່ກ່ຽວຂ້ອງຫາກໍ່ອັດລົງຢູ່ ນະຄອນຫຼວງ Nay Pi Taw ຂອງມຽນມາ. ບັນດາກອງປະຊຸມໄດ້ບັນລຸຫຼາຍຜົນງານທີ່ສຳຄັນ, ອີກເທື່ອໜຶ່ງໄດ້ຢັ້ງຢືນນ້ຳໃຈສາມັກຄີພາຍໃນກຸ່ມອາຊຽນ ບົນເສັ້ນທາງສ້າງຈຸດໝາຍລວມ. ຄະນະຜູ້ແທນຫວຽດນາມເຂົ້າຮ່ວມບັນດາກອງປະຊຸມຄັ້ງນີ້ສືບຕໍ່ປະກອບສ່ວນຢ່າງຕັ້ງໜ້າເຂົ້າໃນຜົນສຳເລັດລວມຂອງກອງປະຊຸມ, ຮັບປະກັນບົດບາດໃຈກາງຂອງອາຊຽນ, ເພື່ອສະພາບແວດລ້ອມແຫ່ງສັນຕິພາບ ແລະ ການຮ່ວມມືໃນພາກພື້ນ, ກຳນົດທິດ, ເປີດກ້ວາງ ແລະ ເຮັດໃຫ້ການພົວພັນຮ່ວມມືກັບບັນດາຄູ່ຮ່ວມມືເລິກເຊິ່ງກ່ວາອີກ.
(ພາບ: vov)
ນີ້ແມ່ນບັນດາກອງປະຊຸມສຳຄັນທີ່ສຸດໃນປີຂອງອາຊຽນໃນຂັ້ນລັດຖະ ມົນຕີການຕ່າງປະເທດ. ແມ່ນໂອກາດດຽວທີ່ອາຊຽນສາມາດພົບປະຄູ່ຮ່ວມມືທັງໝົດ 10 ປະເທດຢ່າງຄົບຖ້ວນ. ດ້ວຍການປະຊຸມປະມານ 20 ຄັ້ງທີ່ຈັດຂຶ້ນໃນເວລາກ່ວາ 2 ວັນ (8-10/8/2014), ບັນດາກອງປະຊຸມຄັ້ງນີ້ໄດ້ສຸມໃສ່ສຳຫຼວດກວດຄືນ ແລະ ວາງອອກທິດທາງຊຸກຍູ້ການຮ່ວມມືພາຍໃນກຸ່ມອາຊຽນ ກໍ່ຄືການພົວພັນລະຫວ່າງອາຊຽນກັບບັນດາຄູ່ຮ່ວມມື ກໍ່ຄືແລກປ່ຽນກ່ຽວກັບບັນດາບັນຫາພາກພື້ນ ແລະ ສາກົນຕ່າງກໍ່ມີຄວາມສົນໃຈ ແລະ ບັນລຸໄດ້ໝາກຜົນສຳຄັນຫຼາຍຢ່າງ.
ຕຳຫຼວດມຽນມາຮັບໃຊ້ກອງປະຊຸມ
(ພາບ: Reuters)
ເສີມຂະຫຍາຍສຽງເວົ້າລວມຫຼາຍຢ່າງ
ໝາກຜົນທີ່ພົ້ນເດັ່ນທີ່ບັນດາກອງປະຊຸມຄັ້ງນີ້ແມ່ນທຸກໆປະເທດອາຊຽນ ລ້ວນແຕ່ໄດ້ເຫັນດີເປັນເອກະສັນຕໍ່ຄວາມສຳຄັນໃນການຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ຄວາມສະຫງົບປອດໄພ ແລະ ການຮ່ວມມືໃນພາກພື້ນ. ອາດເຫັນໄດ້ວ່າ, ໃນໄລຍະຜ່ານມາ, ຕໍ່ໜ້າບັນດາສິ່ງທ້າທາຍຢູ່ພາກພື້ນພວມເກີດຂຶ້ນນັ້ນ, ຄວາມສາມັກຄີໃນອາຊຽນແມ່ນຄວາມຮັບຮູ້ລວມຂອງບັນດາປະເທດສະມາຊິກ, ຖືວ່າ, ນີ້ແມ່ນເງື່ອນໄຂເພື່ອໃຫ້ການສ້າງປະຊາຄົມອາຊຽນລວມຖືກທິດ. ພ້ອມກັບບັນດາຄູ່ຮ່ວມມື, ອາຊຽນຕັດສິນໃຈຍົກສູງຄວາມສຳຄັນ ແລະ ຄຸນຄ່າບັນດາມາດຖານການປະພຶດ, ບັນດາຂອບເຂດການຮ່ວມມືໃນພາກພື້ນ.
ພິເສດ, ບັນຫາທະເລຕາເວັນອອກຊື່ງແມ່ນຫົວເລື່ອງທີ່ເຄັ່ງຮ້ອນໃນໄລຍະຜ່ານມາທີ່ບັນດາເວທີປາໄສອາຊຽນ, ໃນຄັ້ງນີ້ໄດ້ຮັບຄວາມສົນໃຈ ແລະ ເຫັນດີເຫັນພ້ອມຢ່າງສູງ. ບັນດາທ່ານລັດຖະມົນຕີລ້ວນແຕ່ສະແດງໃຫ້ເຫັນຄວາມເປັນຫ່ວງກັງວົນອັນເລິກເຊິ່ງກ່ຽວກັບສະພາບຄວາມເຄັ່ງຕຶງຫວ່າງແລ້ວນີ້ຢູ່ພາກພື້ນນີ້ ແລະ ເນັ້ນໜັກຄຳຮຽກຮ້ອງບໍ່ປະໃຫ້ເກີດກໍລະນີຄ້າຍຄືກັນຄືນໃໝ່. ກົດໝາຍສາກົນ ແລະ ສົນທິສັນຍາ ສປຊ ກ່ຽວກັບກົດໝາຍວ່ວຍທະເລປີ 1982 (UNCLOS), ການແກ້ໄຂຂໍ້ຂັດແຍ້ງໂດຍສັນຕິວິທີ, ລະງັບໃຈ, ບໍ່ນາບຂູ່ຫຼືນຳໃຊ້ກຳລັງອາວຸດ, ປະຕິບັດຖະແຫຼງການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແມ່ນບັນດາຫຼັກການໄດ້ສ່ອງແສງໃນແຈ້ງການຮ່ວມຂອງ AMM47 ແລະ ບັນດາຄຳຖະແຫຼງປະທານອື່ນໆ.
ຊຸກຍູ້ການພົວພັນກັບບັນດາຄູ່ຮ່ວມມືເຂົ້າສູ່ຄວາມແທດຈິງ
ທີ່ບັນດາກອງປະຊຸມຄັ້ງນີ້, ອາຊຽນກໍ່ປະສົບຜົນສຳເລັດໃນຂະນະໄດ້ຊຸກຍູ້ການປະຕິບັດບັນດາແຜນການດຳເນີນງານທີ່ມີໃນປະຈຸບັນລະຫວ່າງອາຊຽນກັບຄູ່ຮ່ວມມືແຕ່ລະປະເທດ, ພ້ອມທັງໄດ້ກະກຽມສ້າງບັນດາແຜນການດຳເນີນງານໄລຍະຕໍ່ໄປ. ບັນດາປະເທດຄູ່ຮ່ວມມືລ້ວນແຕ່ຢັ້ງຢືນຈະສະໜັບສະໜູນອາຊຽນໜຶ່ງທີ່ໝັ້ນຄົງເຂັ້ມແຂງ ແລະ ເສີມຂະຫຍາຍບົດບາດໃຈກາງໃນພາກພື້ນ, ໃຫ້ຄຳໝັ້ນສັນຍາເພີ່ມທະວີການຮ່ວມມືໃນບັນດາຂົງເຂດບຸລິມະສິດຂອງອາຊຽນກ່ຽວກັບການສ້າງປະຊາຄົມ, ເຊື່ອມຈອດ, ການຄ້າ, ລົງທຶນ, ການເງິນ.
ຫວຽດນາມມານະພະຍາຍາມປະກອບສ່ວນເຂົ້າໃນຜົນສຳເລັດຂອງບັນດາກອງປະຊຸມອາຊຽນ
ຄະນະຜູ້ແທນຫວຽດນາມ ເຂົ້າຮ່ວມບັນດາກອງປະຊຸມໄດ້ມີບັນດາການປະກອບສ່ວນທີ່ຕັ້ງໜ້າ ແລະ ມີຄວາມຮັບຜິດຊອບເຂົ້າໃນການເພີ່ມທະວີນ້ຳໃຈສາມັກຄີ, ສຽງເວົ້າລວມຂອງອາຊຽນ ແລະ ກ່ຽວກັບບັນດາຫົວເລື່ອງໃຫ້ບຸລິມະສິດຂອງກອງປະຊຸມ. ຫວຽດນາມ ຍົກສູງເລື່ອງອາຊຽນມີຄວາມສາມັກຄີ, ເສີມຂະຫຍາຍບົດບາດຮັບຜິດຊອບ, ເປັນເຈົ້າການໃນໂຄງປະກອບພາກພື້ນພວມຖືກສ້າງຂຶ້ນ ແລະ ກ່ຽວກັບບັນດາບັນຫາຍຸດທະສາດທີ່ກ່ຽວຂ້ອງເຖິງສັນຕິພາບ, ສະຖຽນລະພາບ, ຄວາມສະຫງົບປອດໄພ ແລະ ການຮ່ວມມືໃນພາກພື້ນ, ໃນນັ້ນມີບັນຫາທະເລຕາເວັນອອກ. ບັນດາປະເທດພາຍໃນ ແລະ ນອກອາຊຽນລ້ວນແຕ່ໄດ້ແບ່ງປັນ, ເຫັນດີເຫັນພ້ອມກັບທັດສະນະຖືກຕ້ອງຂອງຫວຽດນາມ ກ່ຽວກັບບັນຫາທະເລຕາເວັນອອກ ແລະ ສິ່ງດັ່ງກ່າວໄດ້ລະບຸໄວ້ໃນບັນດາເອກະສານ, ພິເສດແມ່ນໃນແຈ້ງການຮ່ວມຂອງກອງປະຊຸມ AMM47. ຫວຽດນາມ ເນັ້ນໜັກການສະໜັບສະໜູນອາຊຽນສືບຕໍ່ເປີດກ້ວາງ ແລະ ເຮັດໃຫ້ການພົວພັນກັບບັນດາຄູ່ຮ່ວມມືເລິກເຊິ່ງຂຶ້ນຕື່ມ, ສະພາບແວດລ້ອມທີ່ອຳນວຍຄວາມສະດວກ ແລະ ຍາດແຍ່ງແຫຼ່ງກຳລັງໃຫ້ແກ່ວິວັດທະນາການແຫ່ງການສ້າງປະຊາຄົມອາຊຽນ, ຊຸກຍູ້ການຮ່ວມມືໃນບັນດາຂົງເຂດຕ່າງຝ່າຍຕ່າງມີຜົນປະໂຫຍດຄືເຊື່ອມຈອດ, ເສດຖະກິດ, ການຄ້າ, ຮັດແຄບຊ່ອງຫວ່າງການພັດທະນາ…
ພ້ອມກັບບັນດາປະເທດສະມາຊິກອາຊຽນ, ຫວຽດນາມ ພວມມານະພະຍາຍາເພີ່ມທະວີນ້ຳໃຈສາມັກຄີ, ຮັກສາບົດບາດໃຈກາງຂອງອາຊຽນ, ເພື່ອສ້າງປະຊາຄົມໝັ້ນຄົງເຂັ້ມແຂງ, ຮ່ວມສຳພັນຢ່າງແໜ້ນແຟ້ນ ແລະ ພັດທະນາແບບຍືນຍົງໃນປີ 2015. ບັນດາການປະກອບສ່ວນຢ່າງຕັ້ງໜ້າ ແລະ ສ້າງສັນຂອງຄະນະຜູ້ແທນຫວຽດນາມ ໂດຍທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຟ້າມບິ່ງມິງ ນຳໜ້າທີ່ບັນດາກອງປະຊຸມອາຊຽນຄັ້ງນີ້, ອີກເທື່ອໜຶ່ງໄດ້ຢັ້ງຢືນຄວາມຕັດສິນໃຈດັ່ງກ່າວຂອງຫວຽດນາມ./.