(vovworld) - ກອງປະຊຸມສຸດຍອດ ອີຢູ ຢູ່ Bratislava, ປະເທດ Slovakia ຈະໄດ້ຈັດຕັ້ງໃນວັນທີ 16/9 ແມ່ນໂອກາດເພື່ອໃຫ້ ອີຢູ ສະແດງຄວາມສາມັກຄີພາຍໃນກຸ່ມ ແລະ ກຳນົດທິດທາງໃນໄລຍະຈະມາເຖິງ, ພາຍຫຼັງທີ່ ອັງກິດ ຕັດສິນຖອນອອກຈາກສະຫະພາບ. ມີຫຼາຍລາຍການໃຫ້ແກ່ການກະກຽມເຊື່ອມໂຍງຢ່າງເລິກເຊິ່ງ, ກ້ວາງຂວາງກ່ວາພວມໄດ້ຮັບການກະກຽມໃຫ້ແກ່ເຫດການນີ້. ແຕ່ເຖິງຢ່າງໃດກໍ່ຕາມ, ເພື່ອໃຫ້ບັນດາປະເທດສະມາຊິກບັນລຸໄດ້ຄວາມເຫັນດີເຫັນພ້ອມກ່ຽວກັບທິດທາງພັດທະນາລວມຂອງ ອີຢູ ແມ່ນສິ່ງບໍ່ງ່າຍດາຍ. ບົດຂຽນ “ອີຢູ ຊອກຫາບັນດາບຸລິມະສິດໃໝ່ເພື່ອພັດທະນາ” ຂອງ ຮົ່ງເວີນ, ນັກຂ່າວ VOV.
ບັນດາຜູ້ແທນເຂົ້າຮ່ວມກອງປະຊຸມບໍ່ເປັນທາງການບັນດາລັດຖະມົນຕີການຕ່າງປະເທດ ອີຢູ
(ພາບ: ສຳນັກຂ່າວສານຊິນຮວາ/TTXVN)
|
ກອງປະຊຸມສຸດຍອດ ອີຢູ ຢູ່ Bratislava ໄດ້ຈັດຕັ້ງໃນສະພາບການສະຫະພາບພວມຕ້ອງປະເຊີນໜ້າກັບບັນດາບັນຫາຄື: ເລື່ອງ ອັງກິດ ຖອນອອກຈາກ ຊາຍຄາລວມ, ວິກິດການຂອງຊາວອົບພະຍົບ, ແຜນການຮ່ວມມືດ້ານການທະຫານ ແລະ ການພັດທະນາເສດຖະກິດພາຍໃນກຸ່ມ.
ບັນດາບັນຫາຕົ້ນຕໍ
ອາດເວົ້າໄດ້ວ່າ, ບັນຫາຊາວອົບພະຍົບແມ່ນບຸລິມະສິດລວມຂອງບັນດາປະເທດສະມາຊິກ ອີຢູ ທີ່ກອງປະຊຸມສຳຄັນນີ້. ກ່ອນທີ່ຈັດກອງປະຊຸມ, ທ່ານ Donald Tusk, ປະທານສະພາເອີລົບ (ອີຊີ) ໄດ້ກ່າວເຕືອນບັນດາການນຳ ເອີລົບ ບໍ່ສາມາດເມີຍເສີຍຕໍ່ໜ້າບົດຮຽນກ່ຽວກັບ Brexit (ອັງກິດຖອນອອກຈາກ ອີຢູ), ພ້ອມທັງ ຢັ້ງຢືນຕ້ອງແກ້ໄຂບັນຫາຊາວອົບພະຍົບໃນກອງປະຊຸມສຸດຍອດຢູ່ Bratislava ໃນທັນທີ ຖ້າຫາກຢາກມີ “ເອີລົບມີຄວາມສັນຕິພາບ”. ໃນຈົດໝາຍເຊື້ອເຊີນທີ່ຝາກເຖິງບັນດາປະເທດສະມາຊິກເຂົ້າຮ່ວມກອງປະຊຸມ, ທ່ານ Tusk ໄດ້ຢັ້ງຢືນວ່າ: ເອີລົບຊັກຊ້າໃນການແກ້ໄຂວິກິດການຊາວອົບພະຍົບ ແລະ ປະຈຸບັນ, ບໍ່ມີເວລາຫຼາຍສຳລັບບັນຫານີ້. ຕາມທ່ານ Tusk ແລ້ວ, ກອງປະຊຸມສຸດຍອດ ອີຢູ ຢູ່ Bratislava ຈະຕ້ອງແມ່ນບາດລ້ຽວໃນທຸກໆບັນຫາກ່ຽວຂ້ອງເຖິງການປົກປັກຮັກສາເຂດຊາຍແດນຢູ່ນອກ ອີຢູ. ກ່ອນໜ້ານັ້ນ, ທ່ານ ປະທານສະພາເອີລົບ Donald Tusk ກໍ່ເນັ້ນໜັກວ່າ: ປະຊາຊົນໃນທົ່ວເອີລົບ ປາດຖະໜາວ່າ: ພາຍຫຼັງກອງປະຊຸມຢູ່ Bratislava, ອີຢູ ຈະແມ່ນປັດໄຈຮັບປະກັນຄວາມໝັ້ນຄົງ, ສະຖຽນລະພາບ ແລະ ປົກປ້ອງປະຊາຊົນ. ປົກປ້ອງດ້ວຍຄວາມໝາຍກ້ວາງ ທີ່ສຸດເຊິ່ງລວມທັງໃນຂົງເຂດເສດຖະກິດ ແລະ ສັງຄົມ.
ນອກຈາກເລື່ອງສະເໜີບັນດາການກະທຳລະອຽດເພື່ອແນໃສ່ແກ້ໄຂວິກິດການຊາວອົບພະຍົບ, ມີຫົວຂໍ້ໜຶ່ງອີກເຊິ່ງບັນດາການນຳ ອີຢູ ຈະພະຍາຍາມບັນລຸຄວາມເຫັນດີເຫັນພ້ອມນັ້ນແມ່ນ ເພີ່ມທະວີຄວາມໝັ້ນຄົງພາຍໃນກຸ່ມເພື່ອແນໃສ່ຕ້ານການກໍ່ການຮ້າຍ ແລະ ປັບປຸງຄວາມສະຫງົບປອດໄພເຂດຊາຍແດນ. ກ່ອນທີ່ຈັດກອງປະຊຸມ 4 ວັນ, ເຢຍລະມັນ ແລະ ຝຣັ່ງ ໄດ້ປະກາດແຜນການລວມເພື່ອແນໃສ່ສ້າງສຳນັກງານການທະຫານໃຫ້ແກ່ບັນດາພາລະໜ້າທີ່ຂອງ ອີຢູ ກໍ່ຄືກອງປະຊຸມປະຈຳປີ ກ່ຽວກັບນະໂຍບາຍປ້ອງກັນຄວາມສະຫງົບ ແລະ ປ້ອງກັນຊາດຂອງ ອີຢູ. ແຜນການນີ້ໄດ້ເນັ້ນໜັກວ່າ: ຮອດເວລາແລ້ວທ່ີຈະຕ້ອງຍູ້ແຮງນຳ້ໃຈສາມັກຄີກ່ວາອີກ ກໍ່ຄືຄວາມສາມາດປ້ອງກັນຂອງ ເອີລົບ ເພື່ອປົກປັກຮັກສາເຂດຊາຍແດນຂອງທະວີບ ກໍ່ຄືປະຊາຊົນ ເອີລົບຢ່າງມີປະສິດທິຜົນກ່ວາ. ແລະກໍ່ໃນຫົວຂໍ້ດັ່ງກ່າວ, ໃນສານສະຫະພາບເມື່ອວັນທີ 14/9, ທ່ານ Jean – Claude Juncker, ປະທານຄະນະກຳມະການ ເອີລົບ ຢັ້ງຢືນວ່າ: ດ້ວຍເຫດກໍ່ການຮ້າຍຂະໜາດໃຫຍ່ 14 ຄັ້ງທີ່ເກີດຂຶ້ນຢູ່ ເອີລົບ ໃນໜຶ່ງປີຜ່ານມາ, ເປັນທີ່ຈະແຈ້ງແລ້ວວ່າ ເອີລົບຄວນຮັບຮອງເອົາບັນດາມາດຕະການຕໍ່ສູ້ຢ່າງມີປະສິດທິຜົນຕໍ່ລັດທິກໍ່ການຮ້າຍ, ຄວນສ້າງສຳນັກງານໃຫຍ່ຢູ່ ເອີລົບ ຮັບຜິດຊອບກຳລັງທະຫານຮ່ວມອີຢູ. ຊ້ຳບໍ່ໜຳ, ປະທານ ອີຊີ ຍັງສະເໜີໃຫ້ສ້າງກອງທຶນປ້ອງກັນເອີລົບອີກດ້ວຍ.
ກ່ອນໜ້ານັ້ນ, ທ່ານ Bohuslav Sobotka, ນາຍົກລັດຖະມົນຕີ ສ. ເຊັກໂກ ໃຫ້ຮູ້ວ່າ: ທີ່ກອງປະຊຸມຢູ່ Bratislava, ສ. ເຊັກໂກ ຈະສະເໜີບຸລິມະສິດ 3 ຢ່າງ: ທີໜຶ່ງ ແມ່ນມຸ່ງໄປເຖິງບັນຫາຄວາມໝັ້ນຄົງ, ໃນນັ້ນມີການປ້ອງກັນບັນດາເສັ້ນຊາຍແດນຢູ່ນອກ ອີຢູ, ຕ້ານການກໍ່ການຮ້າຍ, ຮ່ວມມືສ້າງຕັ້ງກອງທັບຮ່ວມເອີລົບ. ທີສອງ, ນຳໃຊ້ທຸກໆກາລະໂອກາດເຊິ່ງຕະຫຼາດເສລີໄດ້ສ້າງຂຶ້ນ ແລະ ສະໜັບສະໜູນຄວາມເສລີໃນການໄປມາໃນ ອີຢູ ເພື່ອມີໃຫ້ຄວາມດຸ່ນດ່ຽງກັບລະດັບຄອງຊີບພາຍໃນກຸ່ມ. ທີສາມແມ່ນ, ຍົກສູງບົດບາດຂອງ ສະພາ ອີຢູ.
ຊາວອົບພະຍົບແມ່ນບັນຫາລວມຂອງ ສະຫະພາບ ອີຢູ
(ພາບ: Reuters/TTXVN)
|
ບັນດາຄວາມບໍ່ລົງລອຍກັນ
ບໍ່ສາມາດປະຕິເສດໄດ້ເລື່ອງກອງປະຊຸມສຸດຍອດ ອີຢູ ຢູ່ Slovakia ມີບົດບາດສຳຄັນໃນວິວັດທະນາການພັດທະນາຂອງ ອີຢູ ໃນໄລຍະຈະມາເຖິງ ແຕ່ຄວາມເຫັນປະເອີບໃຈກ່ຽວກັບໝາກຜົນຂອງເຫດການນີ້ພັດບໍ່ມີຫຼາຍ. ຮອດຈຸດເວລານີ້, ບັນດາເຈົ້າໜ້າທ່ີ ອີຢູ ຍັງຖ່ອມຕົນເມື່ອເຕື້ອງເຖິງແງ່ຫວັງທີ່ຕັ້ງໜ້າຂອງກອງປະຊຸມ. ເຈົ້າໜ້າທີ່ ອີຢູ ທ່ານໜຶ່ງໃຫ້ຮູ້ທີ່ວ່າ: ບັນດາການນຳ ອີຢູ ຈະພະຍາຍາມສະແດງໃຫ້ເຫັນຄວາມສາມັກຄີວ່າ: ດ້ວຍສະມາຊິກ 27 ປະເທດນັ້ນ, ອີຢູ ຍັງສືບຕໍ່ມຸ່ງໄປຂ້າງໜ້າ. ສິ່ງດັ່ງກ່າວອາດຈະໄດ້ຮັບຖືວ່າແມ່ນຜົນສຳເລັດໜຶ່ງຂອງກອງປະຊຸມຈະມາເຖິງ. ໃນສານຂອງສະຫະພາບກ່ອນທ່ີຈັດກອງປະຊຸມ, ທ່ານປະທານຄະນະກຳມະການ ເອີລົບ Jean – Claude Juncker ໄດ້ຍອມຮັບວ່າ: ສະຫະພາບ ເອີລົບ (ອີຢູ) ຍັງບໍ່ທັນມີການຕິດພັນ ເມື່ອການຮ່ວມມືລະຫວ່າງບັນດາປະເທດສະມາຊິກຍັງບໍ່ທັນຄືດັ່ງຄວາມມຸ່ງຫວັງຢ່າງພຽງພໍເທື່ອ. ພິສູດຢ່າງຈະແຈ້ງໃຫ້ຂໍ້ສັງເກດດັ່ງກ່າວນັ້ນແມ່ນກ່ອນຈຸດເວລາດຳເນີນກອງປະຊຸມສຸດຍອດ, ທ່ານ Jean Asselborn, ລັດຖະມົນຕີການຕ່າງປະເທດ ລຸກຊຳບວກ ໄດ້ຮຽກຮ້ອງໃຫ້ຍົກເລີກ ຮູງກາຣີ ອອກຈາກສະຫະພາບ ເອີລົບ ຊົ່ວຄາວຍ້ອນໄດ້ລະເມີດບັນດາ “ຄຸນຄ່າປະຊາທິປະໄຕຫຼັກແຫຼ່ງຂອງ ອີຢູ” ແລະ ມີການປະພຶດຕ້ານຊາວອົບພະຍົບ.
ນອກຈາກນັ້ນແລ້ວ, ຄວາມບໍ່ລົງລອຍກັນລະຫວ່າງບັນດາປະເທດສະມາຊິກ ອີຢູ ຍັງສະແດງໃຫ້ເຫັນຢູ່ບ່ອນວ່າ: ບັນດາປະເທດສະມາຊິກ ອີຢູ ມີຄວາມແຕກຕ່າງກັນກ່ຽວກັບວິທີການຮັບມືກັບຄວາມກົດດັນຈາກໂລກາພິວັດ. ບາງປະເທດປາຖະໜາທີ່ກອງປະຊຸມນີ້, ອີຢູ ຈະເພີ່ມທະວີບັນດາມາດຕະການປ້ອງກັນດ້ານການຄ້າ, ສ່ວນບາງປະເທດອື່ນໆພັດເນັ້ນໜັກເຖິງເລື່ອງຍົກສູງຄວາມສາມາດແກ່ງແຍ້ງຂອງພື້ນຖານເສດຖະກິດ. ໃນຂະນະນັ້ນ, ວົງການຜູ້ສັງເກດການກໍ່ບໍ່ຕັ້ງຄວາມຫວັງຕໍ່ບັນດາບັນຫາທີ່ຍັງຄົງຄ້າງຂົງເຂດການຄ້າໃນປະຈຸບັນນີ້ຄືເລື່ອງເຈລະຈາສັນຍາຄູ່ຮ່ວມມືການຄ້າ ແລະ ການລົງທຶນຂ້າມມະຫາສະໝຸດ ອັກລັງຕິກ (TTIP) ກັບ ອາເມລິກາ ຫຼື ສັນຍາເສດຖະກິດ ແລະ ການຄ້າຮອບດ້ານ (CETA) ກັບ ການາດາ ຈະບັນລຸໄດ້ໝາກຜົນລະອຽດທີ່ກອງປະຊຸມສຸດຍອດ ອີຢູ ຢູ່ Bratislava.
ກອງປະຊຸມສຸດຍອດຂອງ ອີຢູ ຢູ່ Bratislava ໃນຄັ້ງນີ້ແມ່ນສຳຄັນທີ່ສຸດສຳລັບອະນາຄົດແຫ່ງການພັດທະນາຂອງ ອີຢູ. ບັນດາປະເທດສະມາຊິກ ຂອງພັນທະມິດ ສາມາດຜັນຂະຫຍາຍຄວາມສາມັກຄີພາຍໃນກຸ່ມເພື່ອກຳນົດທິດທາງຂອງກຸ່ມໃນໄລຍະຈະມາເຖິງຫຼືບໍ່? ໝາກຜົນນີ້ແມ່ນອີງໃສ່ບັນດາຂໍ້ສະເໜີລະອຽດຂອງແຕ່ລະສະມາຊິກໃນ ອີຢູ ທີ່ກອງປະຊຸມຈັດຕັ້ງວັນທີ 16/9 ຢູ່ Bratislava.