(vovworld)- ກອງປະຊຸມສຸດຍອດບັນດາການນຳ ອາເມລິກາ ແລະ ອາຟຼິກກາ ພວມດຳເນີນໄປຢູ່ນະຄອນຫຼວງວໍຊິງຕັນ ປະເທດອາເມລິກາ. ນີ້ແມ່ນການພົບປະຂັ້ນສູງທີ່ບໍ່ໍ່ເຄີຍມີມາກ່ອນລະຫວ່າງການນຳອາເມລິກາ ແລະ ປະ ມຸກລັດ, ຜູ້ນຳລັດຖະບານບັນດາປະເທດອາຟຼິກກາ ເກືອບ 50 ທ່ານ. ກອງປະຊຸມແມ່ນໂອກາດເພື່ອຊຸກຍູ້ການຄ້າ, ພັດທະນາເສດຖະກິດລະຫວ່າງ ອາເມລິກາ ແລະ ອາຟຼິກກາ ກໍ່ຄືເພີ່ມທະວີການມີໜ້າເພື່ອຊອກຫາຜົນປະໂຫຍດຂອງອາເມລິກາ ຢູ່ທະວີບດຳ ຊື່ງແມ່ນເຂດທີ່ຫຼາຍປະເທດໃຫ່ຍຄືຈີນ, ຍີ່ປຸ່ນ, ອິນເດຍ ແລະ ອີຢູ ໄດ້ ແລະ ພວມເພີ່ມທະວີການເປີດກ້ວາງການພົວພັນ.
ປະທານາທິບໍດີອາເມລິກາ Barack Obama
(ພາບ: AFP/TTXVN)
ກອງປະຊຸມສຸດຍອດບັນດາການນຳ ອາເມລິກາ ແລະ ອາຟຼິກກາ ດຳເນີນໄປແຕ່ວັນທີ 4-6/8 ແລະ ຄາດວ່າຈະປຶກສາຫາລືບັນດາບັນຫາພົ້ນເດັ່ນຢູ່ ອາຟຼິກກາ ໃນປະຈຸບັນຄື: ໂລກລະບາດ Ebola ຢູ່ ອາຟຼິກກາຕາເວັນຕົກ; ບັນດາເຫດການລອບຈັບຕົວ, ເຂັນຂ້າມະນຸດຂອງອົງການອິດຊະລາມຫົວຮຸນແຮງຢູ່ນີເຊເຣຍ; ເສິກກາງເມືອງຢູ່ຊູດັງໃຕ້, ໂຊມາເລຍ, ເກເນຍ; ການຊຸກຍູ້ການຮ່ວມມືດ້ານເສດຖະກິດລະຫວ່າງອາເມລິກາ ແລະ ບັນດາປະເທດ ອາຟຼິກກາ.
ກ່ອນຈະດຳເນີນກອງປະຊຸມ, ປະທານາທິບໍດີອາເມລິກາ Barack Obama ຢືນຢັນວ່າ: ອາຟຼິກກາ ຊື່ງແມ່ນທະວີບມີບັນດາພື້ນຖານເສດຖະກິດພັດທະນາໄວກ່ວາໝູ່ໃນໂລກ ແລະ ນັບມື້ນັບມີຄວາມສຳຄັນສຳລັບອາເມລິກາ. ການເປີດກ້ວາງການພົວພັນກັບ ອາຟຼິກກາ ແມ່ນນອນໃນຜົນປະໂຫຍດແຫ່ງຊາດຂອງອາເມລິກາ.
ຍູ້ແຮງການຮ່ວມມືທາງດ້ານເສດຖະກິດແມ່ນຈຸດໝາຍຕົ້ນຕໍ
ເຖິງວ່າເຈົ້າໜ້າທີ່ຖະແຫຼງວ່າ, ກອງປະຊຸມຈະປຶກສາຫຼາຍບັນຫາທີ່ເຄັ່ງຮ້ອນຢູ່ອາຟຼິກກາ ໃນປະຈຸບັນກໍ່ຕາມ, ແຕ່ຈຸດປະສົງຕົ້ນຕໍເຊິ່ງຝ່າຍຕ່າງໆລ້ວນແຕ່ມຸ່ງໄປເຖິງ, ນັ້ນແມ່ນຊຸກຍູ້ການຮ່ວມມືທາງດ້ານເສດຖະກິດ. ໃນບົດປາໄສໄຂກອງປະຊຸມ, ທ່ານລັດຖະມົນຕີການຕ່າງປະເທດອາເມລິກາ Johnn Kerry ໄດ້ຢືນຢັນວ່າ, ການພົບປະຂັ້ນສຸດຍອດທີ່ບໍ່ເຄີຍມີມານີ້, ສ່ອງແສງໃຫ້ເຫັນຄວາມຕັດສິນໃຈຂອງອາເມລິກາ ແລະ
ອາຟຼິກກາແມ່ນພ້ອມກັນມານະພະຍາຍາມເພີ່ມທະວີການພົວພັນຄູ່ຮ່ວມມື, ຊອກຫາກາລະໂອກາດໃຫ້ສັນຕິພາບ, ຄວາມໝັ້ນຄົງ ແລະ ການພັດທະນາເສດຖະກິດ. ທ່ານ Johnn Kerry ກໍ່ຮຽກຮ້ອງບັນດາການນຳ
ອາຟຼິກກາພັດທະນາພື້ນຖານເສດຖະກິດການຕະຫຼາດຢ່າງເສລີ, ສ້າງຄວາມສະເໝີພາບໃຫ້ບັນດາບໍລິສັດຕ່າງປະເທດ, ໃນນັ້ນມີບັນດາບໍລິສັດຂອງອາເມລິກາ. ຄຳຮຽກຮ້ອງຢ່າງກົງໄປກົງມາຂອງທ່ານ Johnn Kerry ແມ່ນອີງຕາມສະພາບຕົວຈິງທີ່ວ່າ, ອາເມລິກາໄດ້ພາດໂອກາດເປັນຄູ່ຮ່ວມມືດ້ານການຄ້າໃຫຍ່ກວ່າໝູ່ຂອງ
ອາຟຼິກກາ ກ່ອນນີ້ 5 ປີ. ປະຈຸບັນອາເມລິກາພຽງແຕ່ແມ່ນຄູ່ຮ່ວມມືດ້ານການຄ້າໃຫຍ່ອັນດັບ 3 ຂອງ
ອາຟຼິກກາ ເທົ່ານັ້ນ, ຖັດຈາກອີຢູ ແລະ ຈີນ, ເຊິ່ງສະແດງອອກຜ່ານຍອດວົງເງິນການຄ້າສອງສົ້ນລະຫວ່າງອາເມລິກາ -
ອາຟຼິກກາ ໃນປີ 2013 . ຖ້າຫາກວ່າໃນການແລກປ່ຽນດ້ານການຄ້າກັບອາຟຼິກກາ , ອາເມລິກາບັນລຸໄດ້ພຽງ 60 ຕຶ້ USD ເທົ່ານັ້ນ, ສ່ວນຈີນພັດບັນລຸໄດ້ 200 ຕຶ້ USD ແລະ 170 ຕຶ້ USD ຕາມລຳດັບ.
ຍິ່ງກວ່ານັ້ນ, ອາເມລິກາຢາກຊຸກຍູ້ການຮ່ວມມືທາງດ້ານເສດຖະກິດກັບ
ອາຟຼິກກາ ແມ່ນຍ້ອນລະດັບການພັດທະນາຂອງທະວີບນີ້ໃນປະຈຸບັນແມ່ນໄວກວ່າອາຊີ. ຕາມການຕີລາຄາຂອງກອງທຶນເງິນຕາສາກົນ (IMF), 6 ໃນຈຳນວນ 10 ພື້ນຖານເສດຖະກິດທີ່ມີລະດັບເຕີບໂຕໄວກວ່າໝູ່ຢູ່ໂລກແມ່ນຂຶ້ນກັບອາຟະລິກາ.
ເພື່ອເຮັດໃຫ້ການຮ່ວມມືກັບທະວີບນີ້ປະກົດຜົນເປັນຈິງ, ຄາດວ່າທີ່ກອງປະຊຸມຄັ້ງນີ້, ຝ່າຍອາເມລິກາຈະແຈ້ງບ້ວງອຸປະຖຳຫຼາຍ ຕຶ້ USD ໃຫ້ບັນດາໂຄງການທັນຍາຫານ, ສະບຽງອາຫານ, ໂຄງການໄຟຟ້າຢູ່
ອາຟຼິກກາ . ນອກນັ້ນ, ລັດຖະບານອາເມລິກາກໍ່ຕ້ອງປະກາດຂໍ້ລິເລີ່ມໃໝ່ຈຳນວນໜຶ່ງ, ໃນນັ້ນມີການເປີດກວ້າງພື້ນຖານໂຄງລ່າງ, ການຕິດຕໍ່ພົວພັນຢູ່ເຂດຊາຍແດນ, ການເພີ່ມທຶນສຶກສາ, ເຊິ່ງປະທານາທິບໍດີ Barak Obama ສະຫງວນໃຫ້ບັນດາການນຳໜຸ່ມອາຟຼິກກາ ຂຶ້ນທົບສອງເທົ່າ.
ບໍ່ພຽງແຕ່ຄືແນວນັ້ນ, ກ່ອນດຳເນີນກອງປະຊຸມສຸດຍອດລະຫວ່າງອາເມລິກາ - ອາຟຼິກກາ 1 ສັບປະດາ. ອຳນາດການປົກຄອງຂອງ ປະທານາທິບໍດີ Barak Obama ໄດ້ຊຸກຍູ້ສະພາແຫ່ງຊາດກຳນົດເວລາໃຫ້ແກ່ກົດໝາຍວ່າດ້ວຍໂອກາດເຕີບໂຕຢູ່ອາຟຼິກກາ (AGOA) ກ່ອນທີ່ໝົດກຳນົດເວລາໃນເດືອນ 9/2015, ສ້າງເງື່ອນໄຂໃຫ້ລັດຖະບານ ແລະ ບັນດາວິສາຫະກິດອາເມລິກາຍູ້ແຮງການຮ່ວມມືດ້ານການຄ້າກັບອາຟຼິກກາ ກວ່າອີກ.
ສິ່ງທ້າທາຍບໍ່ແມ່ນໜ້ອຍ
ທ່ານນາງເອກອັກຄະລັດຖະທູດອາເມລິກາປະຈຳ ສປຊ Susan Rice
(ພາບ:vov)
ບັນດານັກໄຈ້ແຍກມີຄວາມເປັນຫ່ວງກັງວົນວ່າ: ດ້ວຍໄລຍະເວລາກະກຽມສັ້ນ (ພຽງແຕ່ 1 ປີ) ເມື່ອທຽບກັບ 6 ປີຂອງຈີນ, ກອງປະຊຸມສຸດຍອດບັນດາການນຳ ອາເມລິກາ ແລະ ອາຟຼິກກາ ຍາກທີ່ຈະບັນລຸໄດ້ໝາກຜົນທີ່ຕັ້ງໜ້າຄືດັ່ງຄວາມປາດຖະໜາ ຫຼືເວົ້າແນວອື່ນແມ່ນຍ້ອນວົງການເຈົ້າໜ້າທີ່ອາເມລິກາ ຍັງບໍ່ທັນເຫັນດີເຫັນພ້ອມຕໍ່ບັນດາມາດຕະການເພີ່ມທະວີການຮ່ວມມືກັບອາຟຼິກກາ. ແນວຄວາມຄິດຈັດກອງປະຊຸມໂດຍແມ່ນທຳນຽບຂາວສະເໜີ ແຕ່ໄດ້ເກີດການໂຕ້ຖຽງກັນຢ່າງຂ້ຽວຂາດລະຫວ່າງບັນດາອົງການໃນລັດຖະບານອາເມລິກາ. ຄາດວ່າຈະບໍ່ມີເອກະສານສະບັບສຸດທ້າຍ ຫຼືແຜນການດຳເນີນງານໃດໆໄດ້ຮັບການປະກາດໃຊ້ພາຍຫຼັງກອງປະຊຸມ. ເຈົ້າໜ້າທີ່ອາເມລິກາ ບາງທ່ານໃຫ້ຮູ້ວ່າ: ເຂົາເຈົ້າຢາກຮູ້ກອງປະຊຸມຄັ້ງນີ້ຈະດຳເນີນໄປຄືແນວໃດ ແທນທີ່ຢັ້ງຢືນຈະມີກອງປະຊຸມສຸດຍອດລະຫວ່າງສອງຝ່າຍໃນອະນາຄົດ. ຍິ່ງໄປກ່ວານັ້ນ, ເຖິງວ່າ, ນີ້ແມ່ນອາຍຸການທີ 2 ຂອງປະທານາທິບໍດີ Barack Obama ແລ້ວກໍ່ຕາມ ແຕ່ມາຮອດປະຈຸບັນ, ທະວີບນີ້ບໍ່ທັນໄດ້ຮັບບຸລິມະສິດໃນນະໂຍບາຍການຕ່າງປະເທດຂອງຜູ້ນຳທຳນຽບຂາວເທື່ອ. ສິ່ງດັ່ງກ່າວໄດ້ເຮັດໃຫ້ທ່ານນາງ Susan Rice ທີ່ປຶກສາດ້ານຄວາມສະຫງົບປອດໄພແຫ່ງຊາດຕ້ອງຍອມຮັບວ່າ, ຊາວອາເມລິກາ ຕ້ອງປ່ຽນແປງຈີນຕະນາການຫຼ້າຫຼັງກ່ຽວກັບ ອາຟຼິກກາ. ແທນທີ່ພຽງແຕ່ເຫັນໄດ້ການປະທະກັນ, ໂລກລະບາດ, ຄວາມອຶດຫິວທຸກຍາກ, ຕ້ອງເຫັນໄດ້ ອາຟຼິກກາ ທີ່ມີຫຼາຍຮູບຫຼາຍແບບແລະ ເຕັມໄປດ້ວຍການປ່ຽນໃໝ່.
ບໍ່ອາດປະຕິເສດໄດ້ວ່າ: ການພົວພັນລະຫວ່າງອາເມລິກາ- ອາຟຼິກກາ ຍັງມີສິ່ງກີດຂວາງຢູ່ ແຕ່ວ່າ, ກອງປະຊຸມສຸດຍອດລະຫວ່າງອາເມລິກາ ແລະ ອາຟຼິກກາ ຄັ້ງທີ 1 ແມ່ນໂອກາດເພື່ອໃຫ້ສອງຝ່າຍເພີ່ມທະວີການຮ່ວມມື, ເຂົ້າໃຈຄູ່ຮ່ວມມືຂອງຕົນຢ່າງຈະແຈ້ງ ທັງແມ່ນພື້ນຖານເພື່ອກ້າວໄປເຖິງການພົວພັນທີ່ເລິກເຊິ່ງກ່ວາໃນອະນາຄົດ./.