(vovworld)-ນັບແຕ່ປີ 2012, ເດືອນ 5 ແຕ່ລະປີ ໄດ້ຮັບການເລືອກເຟັ້ນວ່າ ແມ່ນເດືອນກຳມະກອນ. ນີ້ແມ່ນການເຄື່ອນໄຫວ ເພື່ອຈຸດໝາຍເພີ່ມທະວີວຽກງານເບິ່ງແຍງດູແລ, ປົກປ້ອງສິດ, ຜົນປະໂຫຍດອັນຊອບທຳຂອງກຳມະກອນ. ພ້ອມກັນນັ້ນ ການສ້າງການພົວພັນແຮງງານຢ່າງກົມກຽວ, ເປັນປົກກະຕິ, ເພື່ອໃຫ້ວິສາຫະກິດພັດທະນາ. ປີນີ້ ເດືອນກຳມະກອນ ໄດ້ດຳເນີນໄປ ດ້ວຍຈຸດໝາຍເຮັດໃຫ້ບັນດາການເຄື່ອນໄຫວໃກ້ຊິດຕິດແທດກັບຮາກຖານ, ມຸ່ງໄປເຖິງ ຄົນງານ.
ພາບປະກອບ:internet
|
ສະຫະພັນໃຫຍ່ແຮງງານຫວຽດນາມ ໄດ້ເລືອກເຟັ້ນຫົວຂໍ້ຂອງ ເດືອນກຳມະກອນປີ 2015 ແມ່ນ “ກຳມະບານຮ່ວມກັບ ວິສາຫະກິດ ພັດທະນາແບບຍືນຍົງ, ເພື່ອສ້າງວຽກເຮັດງານທຳ, ຊີວິດຂອງຄົນງານ.” ການເຄື່ອນໄຫວນີ້ ເພື່ອແນໃສ່ປະກອບສ່ວນປະຕິບັດມະຕິຂອງຄະນະບໍລິຫານງານສູນກາງພັກຊຸດທີ 10 ກ່ຽວກັບການ ສືບຕໍ່ສ້າງຊົນຊັ້ນກຳມະກອນ ຫວຽດນາມໃນໄລຍະຍູ້ແຮງການເຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ” ຈາກສູນກາງລົງຮອດຂັ້ນຮາກຖານ.
ເດືອນກຳມະກອນປີ2015 ມຸ່ງໄປເຖິງຄົນງານ
ຫົວເລື່ອງຂອງເດືອນກຳມະກອນປີ 2015 ແມ່ນມຸ່ງໄປເຖິງການຍູ້ແຮງການຜັນຂະຫຍາຍບັນດາຂະບວນການຂອງກຳມະບານມຸ່ງໄປເຖິງຮາກຖານຢ່າງຄົບຊຸດ, ເບິ່ງແຍງດູແລໃຫ້ຄົນງານໂດຍກົງ. ຜ່ານນີ້ ຢືນຢັນບົດບາດ, ທີ່ຕັ້ງຂອງອົງການກຳມະບານທີ່ຕາງຫນ້າເພື່ອປົກປ້ອງສິດຜົນປະໂຫຍດອັນຊອບທຳ, ຖືກຕ້ອງກັບກົດໝາຍໃຫ້ແກ່ຄົນງານ, ປະກອບສ່ວນສ້າງສາຍພົວພັນແຮງງານຢ່າງກົມກຽວ, ເປັນປົກກະຕິ, ກ້າວຫນ້າໃນວິສາຫະກິດ. ທ່ານ ຫງວຽນວັນງ່າງ, ຮອງປະທານສະຫະພັນໃຫຍ່ແຮງງານ ຫວຽດນາມໃຫ້ຮູ້ວ່າ:
“ປີນີ້ ເດືອນກຳມະກອນ ໄດ້ພັດທະນາຢ່າງສູງກວ່າ ແລະ ລະອຽດກວ່າ ເມືື່ອທຽບໃສ່ປີກ່ອນ, ວິທີປະຕິບັດຂອງປີນີ້ຈະໃກ້ຊິດຕິດແທດກັບຮາກຖານ. ສະຫະພັນໃຫຍ່ແຮງງານ ປະກາດໃຊ້ບັນດາເອກະສານ ແລະ ຊີ້ນຳປະຕິບັດ, ທະວີຄູນຮູບແບບ ແລະ ເວລານັ້ນ ບັນດາວຽກງານນີ້ຈະໄດ້ຮັບການຜັນຂະຫຍາຍຢູ່ຂັ້ນຮາກຖານຢ່າງແທດຈິງກວ່າ, ແຜ່ລາມອອກຢ່າງກວ້າງຂວາງໃນສັງຄົມກວ່າ ແລະ ທີ່ຕັ້ງບົດບາດຂອງອົງການກຳມະບານກໍຄໍຊົນຊັ້ນກຳມະກອນນັບມື້ນັບດີກວ່າໃນສັງຄົມ.”
ເນື່ອງໃນໂອກາດເດືອນກຳມະກອນ, ສະຫະພັນໃຫຍ່ແຮງງານ ຫວຽດນາມ ແລະ ກຳມະບານຂັ້ນຮາກຖານ ຈະຂະຫຍາຍຂະບວນການ “ ຢູ່ໃສກຳມະກອນປະສົບກັບຄວາມຫຍຸ້ງຍາກ, ຢູ່ທີ່ນັ້ນຈະມີກຳມະກອນ”, ເພື່ອໃຫ້ກຳມະກອນແຕ່ລະຄົນທີ່ປະສົບກັບຄວາມຫຍຸ້ງຍາກ ລ້ວນແຕ່ໄດ້ຮັບການຊ່ວຍເຫລືອ, ຮັບປະກັນຊີວິດກາເປັນຢູ່ເປັນປົກກະຕິ. ພ້ອມກັນນັ້ນ ປຸກລະດົມການແຂ່ງຂັນລະອຽດ, ແທດຈິງ ເພື່ອສຳເລັດຫນ້າທີ່ຂອງແຕ່ລະຮາກຖານ, ແຕ່ລະທ້ອງຖິ່ນ, ແຕ່ລະຂະແຫນງ. ທ່ານ ຫງວຽນວັນງ່າງ, ຮອງປະທານສະຫະພັນໃຫຍ່ແຮງງານ ຫວຽດນາມໃຫ້ຮູ້ວ່າ:
“ກຳມະບານໄດ້ຄົ້ນພົບ ແລະ ຊ່ວຍເຫລືອຄົນງານຢ່າງທັນການ ເມື່ອເຂົາເຈົ້າປະສົບກັບຄວາມຫຍຸ້ງຍາກ, ນັບທັງບັນຫາເຮືອນຢູ່, ວັດທະນະທຳ, ກິລາ ແລະ ຈິດໃຈ. ປະຈຸບັນ ອົງການກຳມະບານທຸກຂັ້ນ ໄດ້ພ້ອມກັບອຳນາດການປົກຄອງທຸກຂັ້ນ ສ້າງເງື່ອນໄຂໃຫ້ແກ່ຄົນງານໃນເວລາເຮັດວຽກ ແລະ ພັກການ.”
ການເຄື່ອນໄຫວແທດຈິງໃນເດືອນກຳມະກອນປີ 2015
ປະຕິບັດຫົວເລື່ອງຂອງເດືອນກຳມະກອນປີ 2015, ບັນດາແຂວງ, ນະຄອນໃນທົ່ວປະເທດ ໄດ້ຈັດຕັ້ງການເຄື່ອນໄຫວແທດຈິງຫລາຍຢ່າງ ໃນກຳມະກອນຂັ້ນຮາກຖານທຸກຂັ້ນ. ໃນນັ້ນ ເອົາໃຈໃສ່ເຖິງບັນດາເນື້ອໃນຄື: ເບິ່ງແຍງດູແລທາງດ້ານວັດຖຸ ແລະ ຈິດໃຈໃຫ້ແກ່ກຳມະກອນ, ເປັນຕົ້ນແມ່ນກຳມະກອນປະສົບກັບຄວາມຫຍຸ້ງຍາກເປັນພິເສດ, ຖືກອຸປະຕິເຫດໃນການອອກແຮງງານ, ຖືກຕິດພະຍາດຍ້ອນອາຊີບ, ແບ່ງປັນ, ພ້ອມກັບວິສາຫະກິດຜ່ານຜ່າຄວາມຫຍຸ້ງຍາກ, ສ້າງການພົວພັນແຮງງານເປັນປົກກະຕິ ແລະ ພັດທະນາໃນວິສາຫະກິດ. ຜ່ານວຽກງານເຫົຼ່ານັ້ນ, ການພັດທະນາສະມາຊິກກຳມະບານຕື່ມອີກ ແລະ ສ້າງຕັ້ງກຳມະບານຂັ້ນຮາກຖານຢູ່ບັນດາວິສາຫະກິດນອກລັດ, ຍົກສູງຄຸນນະພາບການເຄື່ອນໄຫວກຳມະບານຂັ້ນຮາກຖານ, ຈັດຕັ້ງບັນດາການເຄື່ອນໄຫວກວດກາ, ຕິດຕາມກວດກາການປະຕິບັດມາດຕະການ, ນະໂຍບາຍກ່ຽວຂ້ອງເຖິງສິດ, ຜົນປະໂຫຍດອັນຊອບທຳຂອງຄົນງານ.
ຢູ່ຮ່າໂນ້ຍ, ສະຫະພັນແຮງງານ ນະຄອນ ໄດ້ຍູ້ແຮງວຽກງານກວດກາ, ຕິດຕາມກວດກາການປະຕິບັດກົດໝາຍແຮງງານ ແລະ ບັນດາລະບອບນະໂຍບາຍສຳລັບຄົນງານ, ເຊັນສັນຍາແຮງງານລວມໝູ່, ຈັດຕັ້ງການພົບປະລະຫວ່າງການນຳນະຄອນກັບກຳມະກອນ, ອຸດຫນູນໃຫ້ແກ່ຄົນງານມີປະສົບກັບຄວາມຫຍຸ້ງຍາກ. ນາງ ຫງວຽນທິເຮືອງ, ບໍລິສັດ Yamaha Motor ຈຳກັດ ໃຫ້ຮູ້້ວ່າ:
“ປີນີ້ ວິສາຫະກິດພວກຂ້າພະເຈົ້າໄດ້ພັດທະນາບັນດາຂະບວນການຄື: ພົວພັນແລກປ່ຽນສິລະປະ, ກິລາ, ມອບຂອງຂວັນໃຫ້ບັນດາກຳມະກອນທີ່ປະສົບກັບຄວາມຫຍຸ້ງຍາກ. ຜ່ານບັນດາການເຄື່ອນໄຫວນີ້ ຂ້າພະເຈົ້າເຫັນວ່າ ແມ່ນແທດຈິງທີ່ສຸດ, ສະນັ້ນ ຍາມໃດ ຂ້າພະເຈົ້າກໍຢາກເຮັດວຽກຢ່າງຍາວນານຢູ່ວິສາຫະກິດຂອງຕົນ.”
ປະຈຸບັນ ນະຄອນ ດາຫນັງ ມີ 1.300 ອົງການກຳມະບານຂັ້ນຮາກຖານ, ດ້ວຍ ສະມາຊິກກຳມະບານເກືອບ 130.000 ຄົນ. ປີນີ້ ສະຫະພັນແຮງງານນະຄອນ ຈັດຕັ້ງການເຄື່ອນໄຫວຫລາຍຢ່າງຄື: ພົບປະສົນທະນາກ່ຽວກັບການເຄື່ອນໄຫວຂອງອົງການກຳມະບານ ແລະ ຄົນງານ, ປຸກລະດົມບັນດາຂະບວນການ “ຄົນງານເກັ່ງ, ຄົນງານມີຫົວຄິດປະດິດສ້າງ”, ຈັດຕັ້ງການແຂ່ງຂັນກິລາໃນໝູ່ກຳມະກອນລັດຖະກອນ ອັນໄດ້ດຶງດູດຄົນງານ 1000 ຄົນຢູ່ນະຄອນ ເຂົ້າຮ່ວມ. ທ່ານຫງວຽນດືກແທງ, ຮອງປະທານສະຫະພັນແຮງງານ ນະຄອນ ດາຫນັງ ໃຫ້ຮູ້ວ່າ:
“ພວກຂ້າພະເຈົ້າຍູ້ແຮງການພັດທະນາອົງການກຳມະບານ, ພັດທະນາສະມາຊິກກຳມະບານຢ່າງເປັນລະບົບ, ລົງເລິກ, ຂົນຂວາຍຄົນງານເພື່ອໃຫ້ເຂົາເຈົ້າເຂົ້າຮ່ວມອົງການກຳມະບານ ແລະ ການເຄື່ອນໄຫວຂອງກຳມະບານດ້ວຍຄວາມສະໝັກໃຈ.”
ສະຫະພັນໃຫຍ່ແຮງງານ ຫວຽດນາມໄດ້ ກຳນົດ ກຳມະບານຂັ້ນຮາກຖານ ແລະ ບັນດາວິສາຫະກິດພັດທະນາແບບຍືນຍົງ ບົນພື້ນຖານ ເສີມສ້າງ, ເບິ່ງແຍງດູແລສິດຜົນປະໂຫຍດໃຫ້ຄົນງານຄື: ສ້າງວຽກເຮັດງານທຳເປັນປົກກະຕິ, ລາຍຮັບໄດ້ຮັບການປັບປຸງເທື່ອລະກ້າວ, ສ້າງເງື່ອນໄຂສະດວກເພື່ອສົ່ງເສີມສຸຂະພາບ, ຮັກສາອາຍຸຍືນໃນການເຮັດວຽກງານ. ນີ້ແມ່ນພື້ນຖານເພື່ອໃຫ້ຖັນແຖວກຳມະກອນປະກອບສ່ວນເຂົ້າໃນວິວັດການຫັນປະເທດຊາດເປັນປະເທດອຸດສາຫະກຳ ແລະທັນສະໄຫມ.