(vovworld)-ຫວຽດນາມ ພວມຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ ເພື່ອປະຕິບັດຈຸດໝາຍຮອດປີ 2020 ກາຍເປັນປະເທດອຸດສາຫະກຳໂດຍພື້ນຖານຢ່າງມີໄຊ ສະນັ້ນ ເລື່ອງສ້າງຊົນຊັ້ນກຳມະກອນຫວຽດນາມ ໃຫ້ເຕີບໃຫຍ່ເຂັ້ມແຂງ ໄດ້ຮັບການກຳນົດວ່າ ແມ່ນຫນ້າທີ່ສຳຄັນ ແລະ ຮີບດ່ວນຂອງພັກ, ລັດ, ທັງລະບົບການເມືອງ, ກຳມະກອນແຕ່ລະຄົນ ແລະ ທົ່ວສັງຄົມ. ດ້ວຍຄວາມໝາຍສຳຄັນນັ້ນ, ວຽກງານເບິ່ງແຍງດູແລ ແລະ ປົກປ້ອງສິດຜົນປະໂຫຍດອັນຊອບທຳໃຫ້ແກ່ຄົນງານຢູ່ບັນດາຮາກຖານຜະລິດ, ໂຮງຈັກໂຮງງານ… ຍາມໃດກໍແມ່ນການເຄື່ອນໄຫວບຸລິມະສິດຕົ້ນຕໍ.
ພາບປະກອບ:tapchicaosu
|
ອົງການກຳມະບານທຸກຂັ້ນ ມີບົດບາດຕັ້ງຫນ້າໃນການເຂົ້າຮ່ວມສ້າງດ້ານກົດໝາຍ, ນະໂຍບາຍ ແລະ ຂົນຂວາຍກຳມະກອນ, ລັດຖະກອນ, ຄົນງານ ແຂ່ງຂັນກັນອອກແຮງງານທຳການຜະລິດ, ປະກອບສ່ວນສຳເລັດບັນດາຫນ້າທີ່ພັດທະນາເສດຖະກິດສັງຄົມຢ່າງມີໄຊ. ກຳມະບານທຸກຂັ້ນ ໄດ້ສົມທົບກັບບັນດາຂະແຫນງການ ແລະ ອົງການກ່ຽວຂ້ອງ ດຳເນີນການກວດກາ, ຕິດຕາມກວດກາຫລາຍຄັ້ງ ເພື່ອປົກປ້ອງສິດຜົນປະໂຫຍດອັນຊອບທຳຂອງຄົນງານ, ປະກອບສ່ວນຫລຸດຜ່ອນການຢຸດງານລວມໝູ່ ພ້ອມທັງມອບຂອງຂວັນຫລາຍພູດທີ່ມີຄວາມໝາຍ ແລະ ແທດຈິງໃຫ້ແກ່ຄົນງານປະສົບກັບຄວາມຫຍຸ້ງຍາກ.
ເອົາໃຈໃສ່ເຖິງສິດຜົນປະໂຫຍດອັນຊອບທຳຂອງກຳມະກອນຈາກຂັ້ນຮາກຖານ
ທີ່ການເຮັດວຽກກັບຄະນະປະທານສະຫະພັນໃຫຍ່ແຮງງານຫວຽດນາມໃນເດືອນ 3, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສະເຫນີສະຫະພັນໃຫຍ່ແຮງງານຫວຽດນາມ ໃນປີ 2015 ສືບຕໍ່ສົມທົບຢ່າງແຫນ້ນແຟ້ນກັບລັດຖະບານ ສ້າງບັນດາຂະບວນການແຂ່ງຂັນອັນແທດຈິງ, ປະຕິບັດຫນ້າທີ່ພັດທະນາເສດຖະກິດສັງຄົມຕິດພັນກັບການຮັບປະກັນ ແລະ ເບິ່ງແຍງດູແລສິດຜົນປະໂຫຍດອັນຊອບທຳ ແລະ ຊີວິດການເປັນຢູ່ຂອງຄົນງານໃຫ້ນັບມື້ນັບດີກວ່າ. ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ພວກເຮົາສົມທົບນຳກັນຢ່າງແຫນ້ນແຟ້ນເພື່ອຮັບປະກັນ, ເບິ່ງແຍງດູແລຊີວິດການເປັນຢູ່ ແລະ ສິດຜົນປະໂຫຍດໃຫ້ແກ່ຄົນງານດີກວ່າຄື: ໂຮງຮຽນອະນຸບານ, ເຮືອນຢູ່, ປະກັນສັງຄົມໃຫ້ແກ່ຄົນງານ, … ກຳມະບານຄວນເອົາໃຈໃສ່, ໃກ້ຊິດຕິດແທດກັບຄົນງານ, ປົກປ້ອງສິດຜົນປະໂຫຍດອັນຊອບທຳໃຫ້ແກ່ຄົນງານ.”
ຍູ້ແຮງການໂຄສະນາຂົນຂວາຍ, ສຶກສາກົດໝາຍ ແລະ ຍົກສູງສະຕິພົນລະເມືອງໃນຊົນຊັ້ນກຳມະກອນ ແລະ ຄົນງານ, ເປັນຕົ້ນ ສ້າງເງື່ອນໄຂສະດວກໃນການສຳພັດຂໍ້ມູນຂ່າວສານກໍຄືເພີ່ມທະວີການປະສານສົມທົບລະຫວ່າງບໍລິສັດນຳໃຊ້ຄົນງານ ແລະ ຄົນງານ ເພື່ອແກ້ໄຂບັນຫາຮ້ອນເຮັ່ງທີ່ກ່ຽວຂ້ອງເຖິງຄົນງານຢ່າງທັນການ ແລະ ສົມເຫດສົມຜົນ ນັ້ນແມ່ນບັນຫາທີ່ກຳມະບານທຸກຂັ້ນບຸລິມະສິດຕົ້ນຕໍ. ທ່ານນາງ ຫງວຽນທູເຮືອງ, ປະທານສະຫະພັນແຮງງານ ເມືອງ ບີງແທ້ງ, ຊື່ງແມ່ນຫນຶ່ງໃນບັນດາຫົວຫນ່ວຍຕອບສະຫນອງຢ່າງຕັ້ງຫນ້າ ແລະ ປະຕິບັດບັນດາຂະບວນການແຂ່ງຂັນຢ່າງມີປະສິດທິຜົນ ໂດຍສະຫະພັນແຮງງານນະຄອນ ໂຮ່ຈິມີນ ປຸກລະດົມ ແບ່ງປັນວ່າ:
“ພວກຂ້າພະເຈົ້າໝູນໃຊ້ເຕັກໂນໂລຊີຂໍ້ມູນຂ່າວສານເພື່ອຕິດຕາມການເຄື່ອນໄຫວກຳມະບານຂັ້ນຮາກຖານ, ແບ່ງບັນຂໍ້ມູນຂ່າວສານຜ່ານຊອບແວ Google Drive. ດ້ວຍເຄື່ອງມື ແລະ ວິທີປະຕິບັດຄືດັ່ງກ່າວ ໄດ້ຊ່ວຍໃຫ້ກຳມະກອນສຳພັດກັບບັນດາເນື້ອໃນ, ຂະບວນການຂອງອົງການກຳມະບານ, ພິເສດແມ່ນບັນດາວິສາຫະກິດນອກລັດ. ຈາກນັ້ນ ພວກຂ້າພະເຈົ້າມີໂອກາດໄດ້ຮັບຂໍ້ມູນຂ່າວສານຈາກຂັ້ນຮາກຖານ ແລະ ຊ່ວຍໃຫ້ສະຫະພັນແຮງງານເມືອງ ປະຕິບັດວຽກງານກຳນົດທິດທາງບັນດາຂະບວນການດີຂຶ້ນ.”
ເບິ່ງແຍງດູແລສິດຜົນປະໂຫຍດຂອງຄົນງານດ້ວຍບັນດາການເຄື່ອນໄຫວລະອຽດ
ກຳລັງກຳມະກອນປະຈຸບັນ, ເປັນຕົ້ນແມ່ນຄົນງານຫນຸ່ມ, ເອົາໃຈໃສ່ທີ່ສຸດເຖິງເລື່ອງຍົກສູງຄວາມຊຳນານງານ, ບັນດາການເຄື່ອນໄຫວລະຫລິ້ນບັນເທິງ ແລະ ຊອກຫາວຽກເຮັດງານທຳ. ຄຽງຄູ່ກັນນັ້ນ ບັນດາຂະບວນການໂດຍອົງການກຳມະບານທຸກຂັ້ນປຸກລະດົມ, ສູນກາງຄະນະຊາວຫນຸ່ມກອມມູນິດ ໂຮ່ຈິມີນ ກໍໄດ້ເຂົ້າຮ່ວມເບິ່ງແຍງດູແລເຖິງຊີວິດທາງດ້ານຈິດໃຈຂອງຄົນງານຄື: ກວດພະຍາດ, ໃຫ້ຄຳປຶກສາກ່ຽວກັບສຸຂະພາບ, ຕັດຜົມ, ສ້ອມແປງໂທລະສັບ, ຄອມພິວເຕີ ໂດຍບໍ່ເສຍຄ່າ… ອ້າຍ ຫງວຽນແອງຕວນ, ກຳມະການ ຄະນະປະຈຳສູນກາງຊາວຫນຸ່ມກອມມູນິດ ໂຮ່ຈິມີນ ໃຫ້ຮູ້ວ່າ:
“ພວກຂ້າພະເຈົ້າປາດຖະຫນາຢາກຈັດຕັ້ງວັນບຸນຊ່ວຍເຫລືອຄົນງານ, ຊາວຫນຸ່ມ ກຳມະກອນ ເພື່ອເຜີຍແຜ່ແຜນນະໂຍບາຍຂອງພັກ, ລັດທີ່ກ່ຽວຂ້ອງເຖິງການພັດທະນາກຳລັງກຳມະກອນ ກໍຄືເອົາໃຈໃສ່ເຖິງຊີວິດທາງດ້ານວັດທະນະທຳ ຈິດໃຈໃຫ້ແກ່ຄົນງານ, ເພື່ອໃຫ້ເຂົາເຈົ້າສາມາດປະກອບສ່ວນເຂົ້າໃນວິວັດການຫັນເປັນອຸດສາຫະກຳ ແລະ ທັນສະໄຫມຫລາຍກວ່າ.”
ບັນດາການເຄື່ອນໄຫວນີ້ນຳມາເຊິ່ງປະສົບການ, ບົດຮຽນຫລາຍຢ່າງເພື່ອຊ່ວຍໃຫ້ຊາວຫນຸ່ມພັດທະນາອາຊີບຂອງຕົນ. ນາງຫງວຽນທີທູຮົ່ງ, ກຳມະກອນ ບໍລິສັດ ກີມເກືອງ ຢູ່ເຂດອຸດສາຫະກຳ ດ້າຍອານ, ຫາຍເຢືອງ ໃຫ້ຮູ້ວ່າ:
“ເຂດອຸດສາຫະກຳເອົາໃຈໃສ່ເຖິງກຳມະກອນທີ່ສຸດ, ເຄີຍຈັດຕັ້ງບັນດາການເຄື່ອນໄຫວໃຫ້ແກ່ກຳມະກອນ. ໄດ້ເຂົ້າຮ່ວມບັນດາການເຄື່ອນໄຫວ ແລະ ໄດ້ຮັບການກວດພະຍາດໂດຍບໍ່ເສຍຄ່າ ພວກນ້ອງຮູ້ສຶກດີໃຈຫລາຍ. ຫວັງວ່າ ໄລຍະຈະມາເຖິງຈະມີການເຄື່ອນໄຫວຫລາຍຢ່າງກວ່າເພື່ອສະຫງວນໃຫ້ແກ່ກຳມະກອນ.”
ເພື່ອລະດົມກຳລັງໃຈໃຫ້ແກ່ຄົນງານ, ບັນດາອົງການ, ຫົວຫນ່ວຍຍັງປຸກລະດົມຫລາຍຂະບວນການຄື: ແຂ່ງຂັນອອກແຮງງານເກັ່ງ, ມີຫົວຄິດປະດິດສ້າງ, ຍູ້ແຮງການຄົ້ນຄ້ວາ ແລະ ໝູນໃຊ້ບັນດາຄວາມກ້າວຫນ້າວິທະຍາສາດ ເຕັກນິກເຂົ້າໃນການຜະລິດຢ່າງມີປະສິດທິຜົນ. ຈາກບັນດາຂະບວນການແຂ່ງຂັນນັ້ນ ໄດ້ພົບເຫັນ, ບຳລຸງສ້າງ, ກໍ່ສ້າງໝູ່ຄະນະ, ສ່ວນບຸກຄົນທີ່ກ້າວຫນ້າ, ບັນດາຮູບແບບໃຫມ່ມີຜົນງານດີເດັ່ນໃນການອອກແຮງງານ, ວຽກງານເປັນຈຳນວນຫລາຍ. ນັ້ນແມ່ນພື້ນຖານເພື່ອໃຫ້ຄົນງານປະກອບສ່ວນຢ່າງຕັ້ງຫນ້າເຂົ້າໃນການພັດທະນາເສດຖະກິດສັງຄົມຂອງປະເທດຊາດ.
.