(vovworld)- ວັນທີ 25/8, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ເປັນປະທານກອງປະຊຸມຄະນະປະຈຳການລັດຖະບານ ກັບບັນດາ ກະຊວງ, ຂະແຫນງການກ່ຽວຂ້ອງ ເພື່ອຕີລາຄາກ່ຽວກັບບັນດາຜົນກະທົບຈາກເສດຖະກິດໂລກໃນໄລຍະມໍ່ໆມານີ້ຕໍ່ພື້ນຖານເສດຖະກິດຫວຽດນາມ. ກ່ອນນີ້ ຫວຽດນາມ ກໍໄດ້ວາງອອກບັນດາມາດຕະການເພື່ອຈຳກັດຜົນກະທົບຢ່າງຫຍໍ້ທໍ້ຈາກພາຍນອກ ເພື່ອສູ້ຊົນບັນລຸບັນດາຄາດໝາຍພັດທະນາເສດຖະກິດສັງຄົມທີ່ໄດ້ວາງອອກ. ບົດຂຽນຂອງນັກຂ່າວ ທູຮວາ ດ້ວຍຫົວຂໍ້ວ່າ: ເປັນເຈົ້າການໃນການຮັກສາເສດຖະກິດມະຫາພາກເປັນປົກກະຕິ.
ກອງປະຊຸມຄະນະປະຈຳການລັດຖະບານ
ພາບ:TTXVN
|
ບັນດາຜົນກະທົບຢ່າງຫຍໍ້ທໍ້ ລວມມີ ລາຄານ້ຳມັນໂລກຫລຸດລົງຢ່າງແຮງ, ຕະຫລາດຫລັກຊັບໃນໂລກຜັນແປໄປຢ່າງຜິດປົກກະຕິ, ບັນດາກະແສທຶນສາກົນ ແລະ ນະໂຍບາຍແລກປ່ຽນເງິນຕາຂອງຫລາຍປະເທດໃນໂລກໄດ້ຮັບການດັດປັບຢ່າງລຽນຕິດ ພາຍຫລັງ ສະກຸນເງິນຢວນຂອງຈີນ ອ່ອນຕົວ. ທ່າເຕີບໂຕຂອງບັນດາພື້ນຖານເສດຖະກິດຫາກໍພົ້ນເດັ່ນຂຶ້ນ, ໃນນັ້ນ ມີຈີນ ຫລຸດລົງຢ່າງລຽນຕິດ ໄດ້ສົ່ງຜົນກະທົບບໍ່ຫນ້ອຍເຖິງເສດຖະກິດໂລກ, ໃນນັ້ນ ມີເສດຖະກິດຫວຽດນາມ.
ຮັບມືຢ່າງທັນການ
ການເປັນເຈົ້າການຮັບມືກັບການຜັນແປເສດຖະກິດໂລກ ຂອງຫວຽດນາມ ແມ່ນສະແດງໃຫ້ເຫັນຜ່ານນະໂຍບາຍດັດປັບອັດຕາແລກປ່ຽນລະຫວ່າງສະກຸນເງິນດົງກັບສະກຸນເງິນຕ່າງປະເທດ. ນັບແຕ່ໄລຍະຕົ້ນປີ, ເມື່ອຕະຫລາດການເງິນສາກົນປະກົດມີບັນດາການຜັນແປເກີນຂອບເຂດການຄາດຄະເນຂອງບັນດາອົງການສາກົນໃຫຍ່ຄື: ລາຄານ້ຳມັນຫລຸດລົງຢູ່ໃນລະດັບຕ່ຳສຸດໃນປະຫວັດສາດ ແລະ ອັດຕາດອກເບ້ຍ ຂອງ ທະນາຄານສູນກາງສະຫະລັດອາເມລິກາ ຫລື Fed (Federal Reserve System) ເພີ່ມຂຶ້ນ ພ້ອມກັບວິກິດການເສດຖະກິດຂອງ ເອີລົບ ແລະ ວິກິດການ ຢູ່ ເກຼັກ ໄດ້ເຮັດໃຫ້ ຄ່າສະກຸນເງິນ USD ຖີບຕົວຂຶ້ນຫລາຍເມື່ອທຽບໃສ່ການຄາດຄະເນຂອງ Fed, ທະນາຄານແຫ່ງລັດ ຫວຽດນາມ ໄດ້ເປັນເຈົ້າການໃນການດັດປັບເພີ່ມອັດຕາແລກປ່ຽນເງິນຕາລະຫວ່າງທະນາຄານ ເປັນ 2 ຄັ້ງ ແມ່ນ 2%. ສະນັ້ນ ໃນ 7 ເດືອນຜ່ານມາ, ຕະຫລາດແລກປ່ຽນເງິນຕາຕ່າງປະເທດ ແລະ ອັດຕາແລກປ່ຽນເງິນຕາເປັນປົກກະຕິໂດຍພື້ນຖານ. ການເປັນເຈົ້າການຂອງທະນາຄານແຫ່ງລັດຫວຽດນາມ ອີກຄັ້ງຫນຶ່ງສະແດງອອກຜ່ານການຮັບມືກັບບັນດາການຜັນແປຂອງເສດຖະກິດໂລກໃນຊຸມມື້ຜ່ານມາ.
ຫາງສຽງຖືວ່າ ບັນດານະໂຍບາຍ ແລະ ມາດຕະການຮັບມືກັບສະພາບເສດຖະກິດໂລກໃນຊຸມມື້ຜ່ານມາຂອງຫວຽດນາມ ແມ່ນທັນການ ແລະ ເໝາະສົມ. ທ່ານຮອງສາດສະດາຈານ ດຣ ເຈີນຮ່ວາງເງິນ, ອະທິການບໍດີ ມະຫາວິທະຍາໄລການເງິນ - Marketing ນະຄອນ ໂຮ່ຈິມີນ ຊີ້ແຈ້ງ:
“ການບໍລິຫານນະໂຍບາຍອັດຕາແລກປ່ຽນເງິນຕາຢູ່ ຫວຽດນາມ ມີ 2 ໝວດປັດໄຈສົ່ງຜົນກະທົບ. ນັ້ນແມ່ນ ປັດໄຈຈາກພາຍນອກ ຄື: ສະພາບການເສດຖະກິດໂລກປະຈຸບັນ, ສະກຸນເງິນ USD ຖີບຕົວ ແລະ ສະກຸນເງິນຢວນຂອງຈີນອ່ອນຕົວ ກໍ່ກຳລັງດັນຕໍ່ການດັດປັບອັດຕາແລກປ່ຽນເງິນຕາຂອງພວກເຮົາ. ປັດໄຈພາຍໃນປະເທດນັ້ນແມ່ນ ການສົ່ງອອກເຕີບໂຕຢ່າງຊັກຊ້າ, ການນຳເຂົ້າເກີນດຸນເພີ່ມຂຶ້ນ. ສະນັ້ນ ພວກເຮົາຕ້ອງດັດປັບອັດຕາແລກປ່ຽນເງິນຕາ. ທະນາຄານແຫ່ງລັດ ດັດປັບອັດຕາແລກປ່ຽນຄືແນວນັ້ນ ແມ່ນເໝາະສົມ, ທັນການ, ມີໄຫວພິບ.”
ເປັນເຈົ້າການຕໍ່ຫນ້າບັນດາການຜັນແປທີ່ຫຍຸ້ງຍາກກວ່າ
ບັນດາການຜັນແປ ຂອງພື້ນຖານເສດຖະກິດໂລກຍາກທີ່ຈະຄາດຄະເນໄດ້ ຮຽກຮ້ອງ ຫວຽດນາມ ຕ້ອງສືບຕໍ່ການຕິດຕາມຢ່າງໃກ້ຊິດ ແລະ ມີມາດຕະການຮັບມືຢ່າງເປັນເຈົ້າການ, ທັນການ, ຈຳກັດຜົນກະທົບຢ່າງຫຍໍ້ທໍ້ໃນລະດັບຕ່ຳສຸດ ແລະ ຍາດແຍ່ງສິ່ງສະດວກຢ່າງສູງສຸດ. ນະໂຍບາຍດັດປັບອັດຕາແລກປ່ຽນເງິນຕາຢ່າງມີໄຫວພິບ ແມ່ນໄດ້ຄິດໄລ່ເຖິງແຜນການນັບແຕ່ນີ້ຮອດທ້າຍປີ. ທ່ານນາງ ຫງວຽນທິຮົ່ງ, ຮອງຜູ້ວ່າການທະນາຄານແຫ່ງລັດຫວຽດນາມ ຢືນຢັນວ່າ:
“ດ້ວຍຄວາມຕັດສິນໃຈຮັກສາຕະຫລາດເປັນປົກກະຕິ, ທະນາຄານແຫ່ງລັດ ໄດ້ກະກຽມບັນດາມາດຕະການ, ເຄື່ອງມືທີ່ຈຳເປັນ. ການດັດປັບເພີ່ມ 1% ອັດຕາແລກປ່ຽນເງິນຕາສະເລ່ຍລະຫວ່າງ ທະນາຄານ ແລະ ພາຍຫລັງດັດປັບເປັນ 2 ຄັ້ງ, ອັດຕາແລກປ່ຽນສະກຸນເງິນດົງ ສາມາດຮັບມືກັບການຜັນແປຂອງຕະຫລາດໂລກ ແລະ ພາຍໃນປະເທດ ບໍ່ພຽງແຕ່ນັບແຕ່ນີ້ຮອດທ້າຍປີ ຫາກນັບທັງຊຸມເດືອນຕົ້ນປີ 2016, ສ້າງຄວາມສະຖຽນລະພາບໃຫ້ຕະຫລາດເງິນຕາຕ່າງປະເທດ ແລະ ຮັບປະກັນຄວາມສາມາດແກ້ງແຍ້ງຂອງສິນຄ້າຫວຽດນາມ.”
ນອກນັ້ນ, ຫວຽດນາມ ຍັງກະກຽມບັນດາມາດຕະການຮັບມືກັບຜົນກະທົບຈາກລາຄານ້ຳມັນຫລຸດລົງ. ກະຊວງການເງິນ ຫວຽດນາມ ໄດ້ຢືນຢັນວ່າ: ດ້ວຍລາຄານ້ຳມັນຄືປະຈຸບັນ, ການສ້າງລາຍຮັບເຂົ້າງົບປະມານຂອງຫວຽດນາມ ຍັງຄົງຮັບປະກັນຕາມແຜນການແມ່ນລື່ນກາຍປະມານ 8%. ສຳລັບການຜັນແປໃນຕະຫລາດຫລັກຊັບ ຫວຽດນາມ, ຄະນະກຳມະການຫລັກຊັບແຫ່ງລັດ ແລະ ບັນດາກະຊວງ ຂະແຫນງການ ຢືນຢັນ: ຕະຫລາດຈະຟື້ນຕົວຢ່າງວ່ອງໄວໃນໄລຍະຈະມາເຖິງ.
ດ້ວຍບັນດາລັດຖະນະໂຍບາຍຫວ່າງແລ້ວນີ້ ເພື່ອຮັບມືກັບຜົນກະທົບຢ່າງຫຍໍ້ທໍ້ຈາກເສດຖະກິດໂລກ, ຫວຽດນາມ ຍັງຄົງຄວບຄຸມເສດຖະກິດມະຫາພາກເປັນຢ່າງດີ. ບັນດາຄາດໝາຍກ່ຽວກັບການເຕີບໂຕ, ໄພເງິເຟີ້, ສ້າງລາຍຮັບເຂົ້າງົບປະມານ, ການເຄື່ອນໄຫວນຳເຂົ້າສົ່ງອອກສິນຄ້າ ກໍຄືການຜະລິດດຳເນີນທຸລະກິດ ຍັງຄົງບັນລຸຄາດໝາຍທີ່ວາງອອກ.