ເວທີປາໄສຫວຽດນາມ-ອາເມລິກາລາຕິນກ່ຽວກັບການຄ້າ ແລະ ການລົງທຶນ ໄດ້ຖືກໄຂຂຶ້ນໃນວັນທີ 5/7ຢູ່ຮ່າໂນ້ຍ
(ພາບ: internet)
|
ເວທີປາໄສຫວຽດນາມ-ອາເມລິກາລາຕິນກ່ຽວກັບການຄ້າ ແລະ ການລົງທຶນ : ຮັດແຄບຊອງຫວ່າງດ້ານພູມິີປະເທດ, ເພີ່ມທະວີການຮ່ວມມືລົງທຶນໄດ້ຖືກໄຂຂຶ້ນໃນວັນທີ 5/7ຢູ່ຮ່າໂນ້ຍ ແລະ ຈະແກ່ຍາວເປັນເວລາ 2 ວັນ. ນີ້ເປັນຄັ້ງທຳອິດທີ່ເວທີປາໄສຊຸກຍູ້ດ້ານການຄ້າ-ການລົງທຶນລະຫວ່າງ ຫວຽດນາມ-ອາເມລິກາລາຕິນທີ່ມີຂອບຂະໜາດໃຫຍ່ໄດ້ຖືກຈັດຂຶ້ນ, ທັງເປັນການຢັ້ງຢືນແນວທາງການພົວພັນຕ່າງປະເທດຂອງຫວຽດນາມແມ່ນຖືເປັນສຳຄັນການພັດທະນາຮ່ວມມືຮອບດ້ານກັບບັນດາປະເທດອາເມລິກາລາຕິນ, ທັງສະແດງໃຫ້ເຫັນຄວາມຕັດສິນໃຈຂອງ 2 ຝ່າຍເພື່ອຍົກລະດັບການພົວພັນຮ່ວມມືດ້ານເສດຖະກິດການຄ້າໃຫ້ພັດທະນາທຽບເທົ່າກັບຄວາມສາມາດບົ່ມຊ້ອນ ແລະ ການພົວພັນດ້ານການເມືອງທີ່ດີງາມ.
ອາເມລິກາລາຕິນ ແມ່ນຕະຫຼາດໃຫຍ່ແຫ່ງໜຶ່ງດ້ວຍຈຳນວນປະຊາກອນ 580 ລ້ານຄົນ, ຍອດຈີດີພີບັນລຸກ່ວາ 5.500 ຕື້ USD, ໃນນັ້ນມີ3 ພື້ນຖານເສດຖະກິດ ນອນໃນກຸ່ມ 20 ປະເທດພັດທະນາ ( G 20 ) ຄື : ບຣາຊິວ, ເມັກຊິກໂກ ແລະ ອັກຊັງຕິນ. ອາເມລິກາລາຕິນ ແມ່ນພາກພື້ນທີ່ທຳມະຊາດເອື້ອອຳນວຍຄວາມສະດວກດ້ວຍແຫຼ່ງຊັບພະຍາກອນທຳມະຊາດທີ່ອຸດົມສົມບູນ, ມີຄວາມສາມາດບົ່ມຊ້ອນດ້ານທຶນຮອນ, ວິທະຍາສາດເຕັກໂນໂລຢີ. ໃນຊຸມປີທີ່ຜ່ານມາ, ການພົວພັນລະຫວ່າງ ຫວຽດນາມ ແລະ ບັນດາປະເທດອາເມລິກາລາຕິນໄດ້ພັດທະນາຢ່າງແຂງແຮງ ແລະ ໝັ້ນຄົງໜັກແໜ້ນ. ມາຮອດປະຈຸບັນ, ຫວຽດນາມ ໄດ້ມີ ການພົວພັນທາງການທູດກັບ 27 ປະເທດອາເມລິກາລາຕິນ, ໄດ້ສ້າງຕັ້ງບັນດາຄະນະກຳມາທິການຮ່ວມມືລະຫວ່າງລັດຖະບານກັບ 5 ປະເທດ, ສ້າງຕັ້ງບັນດາກົນໄກທາບທາມດ້ານການເມືອງກັບ 15 ປະເທດ ອາເມລິກາລາຕິນ. ໃນ 10 ປີທີ່ຜ່ານມາ, ໄດ້ມີການຢ້ຽມຢາມບັນດາປະເທດອາເມລິກາລາຕິນ 9 ຄັ້ງ ຂອງການນຳສູງສຸດຂອງຫວຽດນາມ ແລະ ການມາຢ້ຽມຢາມຫວຽດນາມ 10 ຄັ້ງຂອງບັນດາການນຳສູງສຸດຂອງບັນປະເທດ ອາເມລິກາລາຕິນ. ປະຈຸບັນ ຫວຽດ ນາມໄດ້ມີສະຖານທູດ 7 ແຫ່ງປະຈຳພາກພື້ນນີ້ ແລະ 8 ປະເທດ ອາເມລິກາລາຕິນໄດ້ຕັ້ງສະຖານທູດປະຈຳຫວຽດນາມທີ່ຮ່າໂນ້ຍ. ການພົວພັນຮ່ວມມືດ້ານເສດຖະກິດການຄ້າລະຫວ່າງ ຫວຽດນາມ ແລະ ບັນດາປະເທດອາເມລິກາລາຕິນ ໄດ້ເພີ່ມທະວີຢ່າງບໍ່ຢຸດຢັ້ງ, ພິເສດການແລກປ່ຽນການຄ້າໄດ້ເພີ່ມຂຶ້ນໃນລະດັບທີ່ໜ້າປະທັບໃຈ. ວົງເງິນການຄ້າ 2 ສົ້ນໄດ້ເພີ່ມຂຶ້ນທົບ 17 ເທົ່າໃນໄລຍະ 10 ປີທີ່ຜ່ານມາ ( ຄື ຈາກ 300 ລ້ານ USD ໃນປີ 2000 ຂຶ້ນເປັນ 5,1 ຕື້ USDໃນປີ 2011 ) ໃນນັ້ນ ວົງເງິນການຄ້າລະຫວ່າງ ຫວຽດນາມກັບບາງປະເທດໃຫຍ່ໃນພາກພື້ນອາເມລິກາລາຕິນຄື ບຣາຊິວ, ເມັກຊິກໂກ ແລະ ອັກຊັງຕິນ ໄດ້ລືນກາຍລະດັບ 1 ຕື້ USD/ປີ. ຍອດຈຳນວນທຶນໃນຄຳໝັ້ນສັນຍາລົງທຶນຂອງຫວຽດນາມໃນພາກພື້ນບັນລຸກ່ວາ 7 ຕື້ USD ແລະການລົງທຶນຂອງ ອາເມລິກາລາຕິນເຂົ້າຫວຽດນາມບັນລຸປະມານ 2 ຕື້ USD . ຕາມທ່ານນາງ Nguyen Phuong Nga ຮອງລັດຖະມົນຕີການຕ່າງປະເທດຫວຽດນາມແລ້ວ, ໝາກຜົນເຫຼົ່ານັ້ນ ພຽງແຕ່ແມ່ນໃນໄລຍະເບື້ອງຕົ້ນ ແລະ ແງ່ຫວັງຂອງການພົວພັນຮ່ວມມືດ້ານ ການຄ້າ ແລະ ການລົງທຶນລະຫວ່າງ ຫວຽດນາມ ແລະ ບັນດາປະເທດໃນພາກພື້ນນີ້ແມ່ນຍັງໃຫຍ່ຫຼວງຢູ່. ທ່ານນາງ Nguyen Phuong Nga ຮອງລັດຖະມົນຕີການຕ່າງປະເທດຫວຽດນາມ ໃຫ້ຮູ້ວ່າ:
“ 2 ຝ່າຍມີທ່າແຮງເພື່ອສາມາດເພີ່ມເຕີມໃຫ້ແກ່ກັນ. ຍົກຕົວຢ່າງຄື ຫວຽດ ນາມມີຕະຫຼາດທີ່ກ້ວາງໃຫຍ່ດ້ວຍຈຳນວນປະຊາກອນເກືອບ 90 ລ້ານຄົນ, ມີທີ່ຕັ້ງດ້ານພູມີປະເທດ ແລະ ການເມືອງທີ່ສຳຄັນຢູ່ອາຊີຕາເວັນອອກສຽງໃຕ້, ແມ່ນພື້ນຖານເສດຖະກິດພວມພັດທະນາຢ່າງຂະຫຍັນຂັ່ນເຄື່ອນ, ດຶງດູດການລົງທຶນຈາກຕ່າງປະເທດ. ໃນຂະນະນັ້ນ, ບັນດາປະເທດ ອາເມລິກາລາຕິນ ແມ່ນຕະຫຼາດທີ່ກ້ວາງໃຫຍ່ ມີຄວາມຕ້ອງການດ້ານສິນຄ້າດ້ວຍຫຼາຍຮູບຫຼາຍແບບ, ແທດເໝາະກັບໂຄງປະກອບສິນຄ້າສົ່ງອອກຂອງຫວຽດນາມ, ພ້ອມກັນນັ້ນ, ອາເມລິກາລາຕິນ ຍັງແມ່ນແຫຼ່ງສະໜອງວັດຖຸດິບ, ເຊື້ອໄຟ, ທຶນຮອນ ແລະ ເຕັກໂນໂລຢີໃນບາງຂົງເຂດຊຶ່ງຫວຽດນາມພວມຕ້ອງການທີ່ສຸດ. ມີເງື່ອນໄຂທີ່ສະດວກໂດຍພາວະວິໄສອີກອັນໜຶ່ງ, ນັ້ນແມ່ນທັງ 2 ພາກພື້ນລ້ວນແຕ່ພວມພັດທະນາແບບຂະຫຍັນຂັ່ນເຄື່ຶອນ. ການຮ່ວມສຳພັນດ້ານເສດຖະກິດໃນພາກພື້ນກໍຄືການຮ່ວມສຳພັນດ້ານເສດຖະກິດລະຫວ່າງພາກພື້ນ ກໍພວມພັດທະນາຢ່າງແຂງແຮງທີ່ສຸດດ້ວຍຫຼາຍກົນໄກຮ່ວມມືຄື ເວທີປາໄສຮ່ວມມືເສຖະກິດອາຊີ-ປາຊີຟິກ, ການຮ່ວມມືເສດຖະກິດລະຫວ່າງກຸ່ມ ອາຊີຕາເວັນອອກສຽງໃຕ້ກັບກຸ່ມຕະຫຼາດຮ່ວມທະວີບອາເມລິກາ, ການຮ່ວມມືແບບຄູ່ຮ່ວມມືລະຫວ່າງບັນດາປະເທດປາຊີຟິກ, ເວທີປາໄສຮ່ວມມືອາຊີຕາເວັນອອກ- ອາເມລິກາລາຕິນ ”
ເພື່ອໃຫ້ບັນດາຄວາມສາມາດບົ່ມຊ້ອນ ແລະ ກາລະໂອກາດປະກົດຜົນເປັນຈິງ, ມຸ່ງໄປສູ່ສ້າງການພົວພັນຄູ່ຮ່ວມມື ດ້ານການຄ້າ ແລະ ການລົງທຶນທີ່ຂະຫຍັນຂັ່ນເຄື່ອນ ແລະ ໝັ້ນຄົງລະຫວ່າງ ຫວຽດນາມ-ອາເມລິກາລາຕິນນັ້ນ, ສິ່ງທີ່ສຳຄັນແມ່ນຕ້ອງແກ້ໄຂຮົ້ວກິດຂວາງດ້ານຂໍ້ມູນຂ່າວສານ ແລະ ຊອງຫວ່າງດ້ານພູມີປະເທດ, ຊຸກຍູ້ຄວາມເຂົ້າອົກເຂົ້າໃຈ ແລະ ເອົາໃຈໃສ່ຂອງບັນດາອົງການລັດຖະບານ ແລະ ວິສາຫະກິດຂອງ 2 ຝ່າຍ, ສ້າງບັນດາກົນໄກແລກປ່ຽນ ແລະ ຊຸກຍູ້ການຮ່ວມມືຢ່າງແທດຈິງ. ຍ້ອນເຫດນີ້ເອງ, ແນວຄວາມຄິດຈັດຕັ້ງ ເວທີປາໄສເພື່ອໃຫ້ບັນດານັກຄຸ້ມຄອງ, ວົງການນັກທຸລະກິດ, ນັກລົງທຶນຂອງ ຫວຽດນາມ-ອາເມລິກາລາຕິນ ໄດ້ພົບປະ, ປຶກສາຫາລືຄວາມສາມາດບົ່ມຊ້ອນ, ກາລະໂອກາດ, ການກຳນົດທິດຮ່ວມມື, ຊອກຫາມາດຕະການເພື່ອແກ້ໄຂຄວາມຫຍຸ້ງຍາກ, ສິ່ງຄ້າງຄ່າຢ່າງມີປະສິດທິຜົນ, ສ້າງບາດກ້າວບຸກທະລຸໃນ ການພົວພັນເສດຖະກິດການຄ້າ ແລະ ການລົງທຶນລະຫວ່າງ ຫວຽດນາມ-ອາເມລິກາລາຕິນ ແມ່ນບາດກ້າວເດີນຢ່າງເປັນເຈົ້າການຂອງລັດຖະບານຫວຽດນາມ, ສະແດງໃຫ້ເຫັນການຖືເປັນສຳຄັນ ແລະ ຄວາມຕັດສິນໃຈນຳ ການພົວພັນ ລະຫວ່າງຫວຽດນາມ ແລະ ບັນດາປະເທດເພື່ອນມິດຢູ່ອາເມລິກາລາຕິນສືບຕໍ່ພັດທະນາ. ທ່ານເອກອັກຄະລັດຖະທູດ ເວເນເຊວລາປະຈຳຫວຽດນາມ Jorge Rondon Uzcategui ຖືວ່າ :
“ເວທີປາໄສເຊັ່ນນີ້ ຈະຊ່ວຍຮັດແໜ້ນ ການພົວພັນແບບພິເສດທີ່ມີມາແລ້ວລະຫວ່າງ ຫວຽດນາມ ແລະ ບັນດາປະເທດອາເມລິກາລາຕິນ. ຂ້າພະເຈົ້າປາດຖະໜາວ່າ ເວທີປາໄສຈະແມ່ນບາດກ້່າວເດີນທຳອິດ ແລະ ມີຄວາມສຳຄັນທີ່ສຸດເພື່ອຊຸກຍູ້ການພົວພັນລະຫວ່າງ 2 ຝ່າຍໃຫ້ດີຍິ່ງຂຶ້ນອີກ. ພວກຂ້າພະເຈົ້າເຊື່ອແນ ວ່າ ບັນດາຮົ້ວກິດຂວາງດ້ານພູມີປະເທດ, ດ້ານພາສາ....ຈະບໍ່ຄົງຕົວອີກແລ້ວ. ນີ້ຈະແມ່ນປະຖົມປັດໃຈເພື່ອໃຫ້ພວກເຮົາພັດທະນາການພົວພັນໃຫ້ແຂງແຮງໃນໄລຍະທີ່ຈະມາເຖິງ ”
ໃນບາດກ້າວພັດທະນາປະຈຸບັນ, ທັງ ຫວຽດນາມ ແລະ ບັນດາປະເທດອາເມລິກາລາຕິນ ລ້ວນແຕ່ໄດ້ກຳນົດວ່າ ສິ່ງທີ່ສຳຄັນແມ່ນຕ້ອງສ້າງໃຫ້ມີບາດກ້າວບຸກທະລຸກ່ຽວກັບການຄ້າ ແລະ ການລົງທຶນ. ພວກເຮົາປາດຖະໜາວ່າ ຈາກ ເວທີປາໄສຄັ້ງນີ້ ຈະສ້າງຕັ້ງຫຼາຍກົນໄກຮ່ວມມືໃໝ່ ແລະ ມີສັນຍາຮ່ວມມືທີ່ລະອຽດ ຫຼາຍສະບັບລະຫວ່າງ ຫວຽດນາມ-ອາເມລິກາລາຕິນຈະໄດ້ຮັບການລົງນາມ ເພື່ອສ້າງບາດກ້າວຫັນປ່ຽນຢ່າງແຂງແຮງໃນການພົວພັນຮ່ວມມືເສດຖະກິດການ ຄ້າແລະ ການລົງທຶນລະຫວ່າງ ຫວຽດນາມ ແລະ ບັນດາປະເທດອາເມລິກາລາຕິນ ໃນຊຸມປີທີ່ຈະມາເຖິງ.