(vovworld)- ທ່ານປະທານໂຮ່ຈິມີນ ເຄີຍຢືນຢັນ “ພະນັກງານ ແມ່ນກົກເຄົ້າຂອງທຸກວຽກງານ”, ການປະຕິວັດຢາກຍາດໄດ້ໄຊຊະນະຕ້ອງເອົາໃຈໃສ່, ປັບປຸງກົກເຄົ້ານັ້ນ. ທ່ານປະທານໂຮ່ຈິມີນ ເນັ້ນຫນັກວ່າ: “ວຽກງານໄດ້ຮັບຜົນສຳເລັດຫລືປະລາໄຊລ້ວນແຕ່ແມ່ນອີງໃສ່ພະນັກງານ, ສະນັ້ນ ເລື່ອງ ສຶກສາ, ບຳລຸງສ້າງຕະຫລອດຮອດການນຳໃຊ້, ຄຸ້ມຄອງພະນັກງານເພື່ອໃຫ້ຖັນແຖວພະນັກງານດີ, ມີຄຸນສົມບັດ, ມີກຳລັງຄວາມສາມາດ, ອິດທິພົນຊື່ສຽງ, ຕອບສະຫນອງຄວາມຮຽກຮ້ອງຕ້ອງການ, ຫນ້າທີ່ປະຕິວັດຕ້ອງໄດ້ຮັບຄວາມເອົາໃຈໃສ່, ເບິ່ງແຍງ ເປັນປະຈຳ. ແນວຄິດນັ້ນຂອງເພີ່ນແມ່ນສະແດງໃຫ້ເຫັນຄວາມສຳຄັນໃນການບຳລຸງສ້າງຖັນແຖວພະນັກງານ, ສະມາຊິກພັກ ໃນການປົກປັກຮັກສາ ແລະ ສ້າງສາປະເທດ ຫວຽດນາມ. ໃນສະພາບການປະຈຸບັນ, ບັນດາຄຳສັ່ງສອນຂອງປະທານໂຮ່ຈິມີນ ກ່ຽວກັບວຽກງານພະນັກງານ ມີລັກສະນະສະຖານະການຢ່າງເລິກເຊິ່ງ. ບົດຂຽນຂອງນັກຂ່າວ ລ້າຍຮວາ ແລະ ມີເຈີມດ້ວຍຫົວຂໍ້: ແນວຄິດໂຮ່ຈິມີນ ກ່ຽວກັບວຽກງານພະນັກງານ
ທ່ານປະທານໂຮ່ຈິມີນໂອ້ລົມກັບພະນັກງານ,ກຳມະກອນຂະແຫນງ
ລົດໄຟຫວຽດນາມ
ພາບເອກະສານ:internet
|
ເມື່ອຄາວຍັງມີຊີວິດຢູ່, ປະທານໂຮ່ຈິມີນ ຍາມໃດກໍເອົາໃຈໃສ່ ແລະເບິ່ງແຍງ ເປັນພິເສດເຖິງວຽກງານບຳລຸງສ້າງ ແລະ ຝຶກຝົນຫລໍ່ຫລອມພະນັກງານ. ປະທານໂຮ່ຈິມີນ ໄດ້ອະທິບາຍຢ່າງຄົບຖ້ວນ ແລະເຂົ້າໃຈງ່າຍວ່າ: “ພະນັກງານໃດ, ຂະບວນການນັ້ນ”. ສິ່ງດັ່ງກ່າວແມ່ນສະແດງໃຫ້ເຫັນຢ່າງຈະແຈ້ງໃນວຽກງານເບິ່ງແຍງ, ຝຶກຝົນຫລໍ່ຫລອມຖັນແຖວພະນັກງານຂອງພັກກອມມູນິດຫວຽດນາມ.
ຝຶກຝົນຫລໍ່ຫລອມ, ບຳລຸງສ້າງຖັນແຖວພະນັກງານຕອບສະຫນອງຄວາມຮຽກຮ້ອງຕ້ອງການພັດທະນາຂອງປະເທດຊາດ
ທ່ານເລຊວນບີກ, ຜູ້ທີ່ຄົ້ນຄ້ວາກ່ຽວກັບປະທານໂຮ່ຈິມີນໃນໄລຍະ 40 ປີ ໄດ້ຖືວ່າ: ຕາມແນວຄິດໂຮ່ຈິມີນ, ຄວນເອົາໃຈໃສ່ເປັນພິເສດເຖິງແຕ່ລະຂອດ, ຈາກການບຳລຸງສ້າງຕະຫລອດຮອດການນຳໃຊ້, ຍົກຍ້າຍພະນັກງານ, ທົດສອບ ແລະ ສັບຊ້ອນພະນັກງານເຮັດແນວໃດໃຫ້ເໝາະສົມກັບແຕ່ລະວຽກງານ, ເພື່ອຈາກນັ້ນເສີມຂະຫຍາຍໄດ້ກຳລັງຄວາມສາມາດ, ທ່າແຮງຂອງພະນັກງານແຕ່ລະຄົນ. ປະຈຸບັນ ໃນບັນດາເອກະສານຂອງພັກກອມມູນິດຫວຽດນາມ ກ່ຽວກັບວຽກງານພະນັກງານ, ພັກ ໄດ້ສືບທອດ ແລະ ຮັບເອົາບັນດາຄຳສັ່ງສອນຂອງ ປະທານໂຮ່ຈິມີນ, ເອົາໃຈໃສ່ເປັນພິເສດເຖິງການບຳລຸງສ້າງຖັນແຖວພະນັກງານທີ່ມີກຳລັງຄວາມສາມາດ, ມີຄຸນສົມບັດດີ, ພິເສດແມ່ນຖັນແຖວພະນັກງານຫນຸ່ມເພື່ອເປັນຖັນແຖວພະນັກງານສືບທອດໃນອະນາຄົດ. ທ່ານເລຊວນບິກ ຊີ້ແຈ້ງວ່າ:
“ຄວນຖືຄຳເວົ້າຂອງເພີ່ນເປັນລຳພຶງຢູ່ໃນໃຈ ແລະ ພັດທະນາຕົນເອງ ນັ້ນແມ່ນ: ດຸໝັ່ນຂະຫຍັນພຽນ, ປະຢັດທະຍັດ,ສັດຊື່ບໍລິສຸດ, ມີຈິດໃຈທ່ຽງທຳເຫັນແກ່ສ່ວນລວມບໍ່ເຫັນແກ່ສ່ວນຕົວ, ນຳເອົາສຸດກຳລັງຄວາມສາມາດຂອງຕົນເພື່ອຮັບໃຊ້ປະເທດຊາດ. ບັນຫາພື້ນຖານນັ້ນແມ່ນ ສະຕິສູ້ຊົນຂອງແຕ່ລະຄົນ, ໄດ້ຮັບການສະຫນັບສະຫນູນຈາກອົງການຈັດຕັ້ງມະຫາຊົນ ແລະ ປະຊາຊົນ. ຂ້າພະເຈົ້າເຊື່ອໝັ້ນວ່າ: ພະນັກງານໃນອະນາຄົດຈະຮັບໃຊ້ໃຫ້ແກ່ປະເທດຊາດດີກວ່າ.”
ມະຕິຂອງກອງປະຊຸມໃຫຍ່ຄັ້ງທີ 6 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ໄດ້ຢືນຢັນວ່າ: “ພະນັກງານແມ່ນປັດໄຈຕັດສິນຜົນສຳເລັດ ແລະ ປະລາໄຊຂອງການປະຕິວັດ, ຕິດພັນກັບຊາຕະກຳຂອງພັກ, ຂອງປະເທດຊາດ ແລະຂອງລະບອບ. ວຽກງານສັບຊ້ອນ, ກະກຽມຖັນແຖວພະນັກງານ, ເປັນຕົ້ນແມ່ນພະນັກງານຂັ້ນຍຸດທະສາດ, ມີຄວາມໝາຍສຳຄັນທີ່ສຸດ, ແມ່ນເນື້ອໃນຈຸດສຸມ, ຮັບປະກັນວຽກງານພະນັກງານເປັນລະບຽບຮຽບຮ້ອຍ ແລະ ເປັນເຈົ້າການ”. ບັນດາອົງການຂອງພັກ ນັບມື້ນັບຮັບຮູ້ຢ່າງຈະແຈ້ງວຽກງານສັບຊ້ອນພະນັກງານ, ບຳລຸງສ້າງ, ຝຶກຝົນຫລໍ່ຫລອມ ແມ່ນຂອດທີ່ສຳຄັນໃນວຽກງານພະນັກງານຂອງພັກ, ເພື່ອກໍ່ສ້າງຖັນແຖວພະນັກງານມີຄຸນສົມບັດ, ກຳລັງຄວາມສາມາດ ແລະ ພູມປັນຍາ, ຮັບໃຊ້ພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມໃຫ້ດີກວ່າ. ການຍົກຍ້າຍພະນັກງານຈາກສູນກາງ ລົງທ້ອງຖິ່ນ ໄດ້ຮັບການປະຕິບັດພ້ອມກັບການຈັດຕັ້ງບຳລຸງພະນັກງານສືບທອດຂັ້ນຍຸດທະສາດ ເພື່ອຍົກສູງລະດັບທິດສະດີການເມືອງ ແລະ ພຶດຕິກຳໃຫ້ແກ່ຖັນແຖວພະນັກງານ, ຮອງສາດສະດາຈານ, ດຣ ຫງວຽນຈ້ອງຟຸກ, ອະດີດຫົວຫນ້າສະຖາບັນປະຫວັດສາດພັກ ຖືວ່າ:
“ຕາມຄຳສັ່ງສອນຂອງ ປະທານໂຮ່ຈິມີນ, ພະນັກງານ ແມ່ນກົກເຄົ້າຂອງທຸກວຽກງານ ແລະ ການສຶກສາບຳລຸງສ້າງພະນັກງານ ແມ່ນວຽກງານຕົ້ນຕໍ. ວຽກງານນັ້ນປະຕິບັດໄດ້ດີ ບັນດາຂອດຕາມຫລັງຄື ແຕ່ງຕັ້ງ, ນຳໃຊ້, ຍົກຍ້າຍ, ນະໂຍບາຍຂອງພະນັກງານຈະສະດວກກວ່າ.”
ຄັດເລືອກຖັນແຖວພະນັກງານ, ສົມກັບຄວາມໄວ້ເນື້ອເຊື່ອໃຈຂອງປະຊາຊົນ
ທີ່ກອງປະຊຸມຄັ້ງທີ 11 ຂອງຄະນະບໍລິຫານສູນກາງພັກກອມມູນິດຫວຽດນາມ ດຳເນີນໄປຫວ່າງແລ້ວນີ້, ມີຫລາຍມາດຕະຖານກ່ຽວກັບພະນັກງານເຂົ້າຮ່ວມຄະນະບໍລິຫານງານສູນກາງ, ກົມການເມືອງ, ຄະນະເລຂາ ໄດ້ຮັບການປຶກສາຫາລື ແລະ ຕັດສິນຈາກຄະນະບໍລິຫານງານສູນກາງ. ເມື່ອສະຫລຸບກອງປະຊຸມ, ທ່ານເລຂາທິການໃຫຍ່ ຫງວຽນຟູຈ້ອງ ຢືນຢັນ: ພະນັກງານຂັ້ນສູງ ຕ້ອງແມ່ນຜູ້ເປັນແບບຢ່າງກ່ຽວກັບຄວາມເກັ່ງກ້າສາມາດ ແລະ ຄຸນສົມບັດປະຕິວັດ, ເດັດດ່ຽວບໍ່ເລືອກຕັ້ງຜູ້ມີຄຸນນະທາດດ້ານການເມືອງບໍ່ໝັ້ນແກ່ນ, ມັກໃຫຍ່ໄຝ່ສູງ ແລະ ແຈ້ງຊັບສິນບໍ່ຖືກກັບຄວາມຈິງ… ເຂົ້າຄະນະບໍລິຫານງານສູນກາງ. ຮອງສາດສະດາຈານ, ດຣ ບູ່ຍດີງຟອງ, ຄູສອນສະຖາບັນການເມືອງແຫ່ງຊາດໂຮ່ຈິມີນ ຖືວ່າ: ແນວຄິດໂຮ່ຈິມີນ ກ່ຽວກັບວຽກງານພະນັກງານ ໄດ້ກຳນົດທິດໃຫຍ່ໃຫ້ວຽກງານພະນັກງານຂອງພັກກອມມູນິດຫວຽດນາມປະຈຸບັນ, ພິເສດ ສຳລັບກອງປະຊຸມໃຫຍ່ຂອງພັກທຸກຂັ້ນ, ກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ.
“ຄວນປະຕິບັດຕາມຄຳສັ່ງສອນຂອງ ປະທານໂຮ່ຈິມີນ ນັ້ນແມ່ນສ້າງບັນດາມາດຖານດີ ແຕ່ ຖ້າຄົ້ນພົບຜູ້ທີ່ກ່ຽວຂ້ອງເຖິງສິ່ງບໍ່ດີ ຕ້ອງປັດເຂ່ຍຢ່າງທັນທີ. ຖ້າພັກປະຕິບັດໄດ້ສິ່ງນັ້ນ ຂ້າພະເຈົ້າຖືວ່າ ຈະໄດ້ຮັບຄວາມໄວ້ເນື້ອເຊືື່ອໃຈຈາກປະຊາຊົນ.”
ໝູນໃຊ້ແນວຄິດໂຮ່ຈິມີນກ່ຽວກັບວຽກງານພະນັກງານ, ໄລຍະຜ່ານມາ ພັກກອມມູນິດຫວຽດນາມ ໄດ້ເອົາໃຈໃສ່ເປັນພິເສດເຖິງການບຳລຸງສ້າງ, ຝືກຝົນຫລໍ່ຫລອມພະນັກງານໃຫ້ພັກ, ພິເສດ ແມ່ນການກະກຽມຢ່າງລອບຄອບຖີ່ຖ້ວນກ່ຽວກັບບຸກຄະລາກອນໃຫ້ແກ່ກອງປະຊຸມໃຫຍ່ຄັ້ງທີ 12 ຂອງພັກ. ດ້ວຍທິດທາງບຸກຄະລາກອນໂດຍສູນກາງປຶກສາຫາລື ແລະ ເປັນເອກະພາບໃນກອງປະຊຸມສູນກາງຄັ້ງທີ11 ຜ່ານມາ, ປະຊາຊົນຕັ້ງຄວາມຫວັງວ່າ ບັນດາມາດຕະຖານກ່ຽວກັບພະນັກງານຂັ້ນສູງ ພັກກອມມູນິດຫວຽດນາມ ຈະຫັນເປັນລະອຽດໃນພຶດຕິກຳຕົວຈິງ. ນີ້ກໍແມ່ນປັດໄຈຕັດສິນຄວາມເຫັນດີເຫັນພ້ອມ ເພື່ອໃຫ້ພັກຮັກສາບົດບາດຊີ້ນຳນຳພາທົ່ວປວງຊົນໃນພາລະກິດສ້າງສາ ແລະ ປົກປັກຮັກສາປະເທດຊາດຕະຫລອດການ.