(
vovworld)-ກ່າວຄຳເຫັນທີ່ວາລະໄຂກອງປະຊຸມໃຫຍ່ແນວໂຮມປະເທດຊາດຫວຽດນາມ ຄັ້ງທີ VIII ໃນຕອນເຊົ້າວັນທີ 26/9, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ຢືນຢັນ: ໄລຍະຜ່ານມາ, ແນວໂຮມປະເທດຊາດຫວຽດນາມ ໄດ້ມີການປະກອບສ່ວນອັນໃຫຍ່ຫລວງຫລາຍຢ່າງໃຫ້ແກ່ພາລະກິດປະຕິວັດຂອງຊາດ, ສົມເປັນຕົວແທນຂອງມະຫາຊົນ. ທ່ານເລຂາທິການໃຫຍ່ ຍັງເນັ້ນຫນັກເຖິງ: ບັນດາຫນ້າທີ່ຈຸດສຸມຊື່ງແນວໂຮມປະເທດຊາດຫວຽດນາມ ຄວນປະຕິບັດໃນໄລຍະຈະມາເຖິງ ເພື່ອປະກອບສ່ວນສ້າງສາ ແລະ ປົກປັກຮັກສາປະເທດຊາດ. ວິທະຍຸກະຈາຍສຽງຫວຽດນາມ ຄັດສະເຫນີເນື້ອໃນບົດກ່າວປາໄສຂອງທ່ານເລຂາທິການໃຫຍ່ ຫງວຽນຟູຈ້ອງ ຜ່ານບົດຂຽນທີ່ພາດຫົວຂໍ້ວ່າ: ແນວໂຮມປະເທດຊາດຫວຽດນາມ ສວມບົດບາດສຳຄັນໃນການສ້າງສາ ແລະ ປົກປັກຮັກສາປະເທດຊາດ”
ທ່ານເລຂາທິການໃຫຍ່ ຫງວຽນຟູຈ້ອງກ່າວປາໄສທີ່ກອງປະຊຸມ
ພາບ:vov
|
ເລີ່ມຕົ້ນບົດກ່າວປາໄສ, ທ່ານເລຂາທິການໃຫຍ່ ຫງວຽນຟູຈ້ອງ ຢືນຢັນ: ກອງປະຊຸມໃຫຍ່ຜູ້ແທນທົ່ວປະເທດແມ່ນເຫດການສຳຄັນໃນຊີວິດດ້ານການເມືອງຂອງປະຊາຊົນທົ່ວປະເທດ. ພັກກອມມູນິດຫວຽດນາມ ຍາມໃດກໍຕີລາຄາສູງບົດບາດຂອງແນວໂຮມປະເທດຊາດຫວຽດນາມ ແລະ ມີຄວາມປິຕິຊົມຊື່ນຕໍ່ການພັດທະນາຢ່າງບໍ່ຢຸດຢັ້ງຂອງແນວໂຮມປະເທດຊາດຫວຽດນາມ, ພາບພົດຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເຊິ່ງແມ່ນປັດໄຈຕັດສິນຊີ້ຂາດໄຊຊະນະຂອງການປະຕິວັດຫວຽດນາມ.
ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ: ພັກກອມມູນິດ ຫວຽດນາມ ໄດ້ກຳນົດ: ແນວໂຮມປະເທດຊາດຫວຽດນາມ ເປັນຕົວແທນປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນ ແລະຖືກຕ້ອງກັບກົດໝາຍ, ເຕົ້າໂຮມການເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ປະຕິບັດປະຊາທິປະໄຕ, ເພີ່ມທະວີຄວາມເຫັນດີເຫັນພ້ອມໃນສັງຄົມ, ຕິດຕາມກວດກາໄຈ້ແຍກຕີລາຄາ, ເຂົ້າຮ່ວມການກໍ່ສ້າງພັກ, ລັດ, ປະກອບສ່ວນສ້າງສາ ແລະ ປົກປັກຮັກສາປະເທດຊາດ.
ການປະກອບສ່ວນສຳຄັນທີ່ສຸດຂອງ ແນວໂຮມປະເທດຊາດຫວຽດນາມ ນັ້ນແມ່ນເປີດກວ້າງ, ປັບປຸງກຸ່ມກ້ອນມະຫາສາມັກຄີທົ່ວປວງຊົນ
ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ: ໃນໄລຍະຜ່ານມາ ແນວໂຮມປະເທດຊາດຫວຽດນາມ ໄດ້ມີບັນດາການປະກອບສ່ວນອັນໃຫຍ່ຫລວງໃຫ້ແກ່ພາລະກິດປະຕິວັດຂອງຊາດ. ການປະກອບສ່ວນສຳຄັນທີ່ສຸດຂອງ ແນວໂຮມປະເທດຊາດຫວຽດນາມ ນັ້ນແມ່ນປະກອບສ່ວນເປີດກວ້າງ, ປັບປຸງກຸ່ມກ້ອນມະຫາສາມັກຄີທົ່ວປວງຊົນພ້ອມກັບພັກ, ສ້າງກຳລັງແຮງອັນໃຫຍ່ຫລວງໃຫ້ແກ່ການພັດທະນາຂອງປະເທດຊາດ.
“ແນວໂຮມປະເທດຊາດຫວຽດນາມ ໄດ້ສາມັກຄີກັນ, ເຕົ້າໂຮມກຳລັງ, ສ້າງກຸ່ມກ້ອນມະຫາສາມັກຄີໃນທົ່ວປວງຊົນ ບໍ່ພຽງແຕ່ດ້ວຍການໂຄສະນາເທົ່ານັ້ນ ຫາກຜ່ານຫລາຍຂະບວນການແຂ່ງຂັນຮັກຊາດຢ່າງເລິກເຊິ່ງ ກວ້າງຂວາງ, ບັນດາບັ້ນຂົນຂວາຍມຸ່ງໄປເຖິງການປະຕິບັດບັນດາຫນ້າທີ່ການເມືອງຢ່າງມີໄຊ, ປັບປຸງຊີວິດການເປັນຢູ່ຂອງປະຊາຊົນ. ພົ້ນເດັ່ນແມ່ນການຂົນຂວາຍສ້າງຊີວິດທາງດ້ານວັດທະນະທຳຢູ່ເຂດຊຸມຊົນ, ສ້າງ ແລະ ປະຕິບັດກົດລະບຽບປະຊາທິປະໄຕ, ປະຕິບັດແຜນນະໂຍບາຍ, ແນວທາງຂອງພັກ, ນະໂຍບາຍກົດໝາຍຂອງລັດ, ຮັບຟັງ ແລະ ເຕົ້າໂຮມບັນດາຄຳເຫັນ, ຂໍ້ສະເຫນີແນະ ແລະ ຄວາມມຸ່ງມາດປາດຖະຫນາຂອງປະຊາຊົນ ເພື່ອສ່ອງແສງເຖິງພັກ ແລະ ລັດ, ປະກອບສ່ວນສຳຄັນເຂົ້າໃນຄວາມເຫັນດີເຫັນພ້ອມໃນສັງຄົມ, ປັບປຸງກຸ່ມກ້ອນມະຫາສາມັກຄີທົ່ວປວງຊົນ.”
ແນວໂຮມປະເທດຊາດຫວຽດນາມ ກໍເອົາໃຈໃສ່ປ່ຽນໃຫມ່ວິທີການເຄື່ອນໄຫວ, ມຸ່ງໄປເຖິງຂັ້ນຮາກຖານ. ບັນດາອົງການສະມາຊິກຂອງ ແນວໂຮມປະເທດຊາດຫວຽດນາມ ໄດ້ເຂົ້າຮ່ວມຢ່າງຕັ້ງຫນ້າເຂົ້າໃນບັນດາຂະບວນການຮັກຊາດ. ແນວໂຮມປະເທດຊາດຫວຽດນາມ ກາຍເປັນຊາຍຄາລວມຢ່າງແທ້ຈິງ ເພື່ອໃຫ້ປະຊາຊົນທຸກຊັ້ນວັນນະ, ທຸກຊົນເຜົ່າ, ສາສະຫນາ, ຊາວຫວຽດນາມ ອາໄສຢູ່ຕ່າງປະເທດ ເສີມຂະຫຍາຍເຈດຈຳນົງ, ພູມປັນຍາ ພ້ອມກັນສ້າງສາປະເທດຊາດ, ເພີ່ມທະວີການພົວພັນກັບປະເທດຕ່າງໆ.
ທ່ານເລຂາທິການໃຫຍ່ ຫງວຽນຟູຈ້ອງ ຢືນຢັນ: ດ້ວຍບັນດາຜົນງານທີ່ບັນລຸໄດ້, ແນວໂຮມປະເທດຊາດຫວຽດນາມ ສືບຕໍ່ສົມເປັນຕົວແທນໃຫ້ແກ່ເຈດຈຳນົງ ແລະ ຄວາມມຸ່ງມາດປາດຖະຫນາຂອງປະຊາຊົນທຸກຊັ້ນວັນນະ.
ຫນ້າທີ່ຕົ້ນຕໍແມ່ນສືບຕໍ່ກໍ່ສ້າງ ແລະ ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ
ຕາມທ່ານເລຂາທິການໃຫຍ່ ຫງວຽນຟູຈ້ອງ ແລ້ວ, ແນວໂຮມປະເທດຊາດຫວຽດນາມ ຄວນເຕົ້າໂຮມປະຊາຊົນຢ່າງກວ້າງຂວາງ ເພື່ອຮັບປະກັນຄວາມເປັນເອກະພາບສູງກ່ຽວກັບແນວຄິດ ແລະ ການກະທຳ, ມຸ່ງໄປເຖິງຈຸດໝາຍລວມ ແມ່ນຮັກສາເອກະລາດ, ອະທິປະໄຕແຫ່ງຊາດ, ສະຖຽນລະພາບດ້ານການເມືອງສັງຄົມ. ພຶດຕິກຳຕົວຈິງໄດ້ຊີ້ໃຫ້ເຫັນບົດຮຽນຢ່າງເລິກເຊິ່ງ, ມີລັກສະນະກົດເກນ ນັ້ນແມ່ນ ບໍ່ວ່າວຽກງານໃດ ຢາກປະຕິບັດໃຫ້ສຳເລັດຜົນ ຕ້ອງມີຄວາມສາມັກຄີ. ປະຈຸບັນ ຫວຽດນາມ ພວມດຳເນີນພາລະກິດຫັນເປັນອຸດສາຫະກຳ ແລະ ທັນສະໄຫມ ໃນສະພາບການມີຄວາມສະດວກຫລາຍຢ່າງ ແຕ່ສິ່ງທ້າທາຍບໍ່ແມ່ນຫນ້ອຍ. ສະນັ້ນ ຍິ່ງກວ່າເວລາໃດໝົດ ຄວນເພີ່ມທະວີຄວາມສາມັກຄີ.
“ແນວໂຮມປະເທດຊາດຫວຽດນາມ ແມ່ນພາບພົດທີ່ມີຊີວິດຊີວາຂອງກຸ່ມກ້ອນມະຫາສາມັກຄີທົ່ວປວງຊົນ. ແນວໂຮມປະເທດຊາດຫວຽດນາມ ຄວນລະດົມກຳລັງໃຈເສີມຂະຫຍາຍບົດບາດນຳຫນ້າຂອງຊົນຊັ້ນກຳມະກອນ, ຄວາມສາມາດບົ່ມຊ້ອນອັນໃຫຍ່ຫລວງຂອງຊົນຊັ້ນຊາວນາ ແລະ ຊົນຊັ້ນປັນຍາຊົນກວ່າອີກ ເພີ່ມທະວີການຮ່ວມສຳພັນລະຫວ່າງກຳມະກອນ, ຊາວກະສິກອນ, ຖັນແຖວປັນຍາຊົນຢ່າງບໍ່ຢຸດຢັ້ງ, ເພື່ອເປັນພື້ນຖານໃຫ້ແກ່ກຸ່ມກ້ອນມະຫາສາມັກຄີທົ່ວປວງຊົນ, ສ້າງເງື່ອນໄຂສະດວກເພື່ອໃຫ້ປະຊາຊົນເສີມຂະຫຍາຍຄວາມສາມາດມີຫົວຄິດປະດິດສ້າງ, ປະກອບສ່ວນຢ່າງຕັ້ງຫນ້າເຂົ້າໃນການພັດທະນາຂອງປະເທດຊາດ. ແນວໂຮມປະເທດຊາດຫວຽດນາມ ຄວນເສີມຂະຫຍາຍປະຊາທິປະໄຕ, ຮັບປະກັບຄວາມສະເຫມີພາບ, ເຄົາລົບ, ລົບລ້າງຄວາມປົ່ມດ້ອຍ ກ່ຽວກັບອະດີດຕະການ, ພາກສ່ວນ ຊົນຊັ້ນ.”
ແນວໂຮມປະເທດຊາດຫວຽດນາມ ສືບຕໍ່ສວມບົດບາດຫລັກແຫລ່ງ, ສ້າງຄວາມເຫັນດີເຫັນພ້ອມໃນສັງຄົມ ປະຕິບັດຫນ້າທີ່ສ້າງສາ ແລະ ປົກປັກຮັກສາປະເທດຊາດ.
ພັດທະນາເສດຖະກິດສັງຄົມ ແມ່ນຫນ້າທີ່ໃຈກາງມີຄວາມສຳຄັນທີ່ສຸດ. ຕາມທ່ານເລຂາທິການໃຫຍ່ ຫງວຽນຟູຈ້ອງແລ້ວ, ເພື່ອປະຕິບັດຫນ້າທີ່ນີ້, ແນວໂຮມປະເທດຊາດຫວຽດນາມ ຄວນສືບຕໍ່ປະຕິບັດບັ້ນຂົນຂວາຍທົ່ວປວງຊົນສາມັກຄີສ້າງຊີວິດທາງດ້ານວັດທະນະທຳຢູ່ເຂດຊຸມຊົນ, ກໍ່ສ້າງຊົນນະບົດໃຫມ່ ແລະ ບັນດາຂະບວນການແຂ່ງຂັນຮັກຊາດເປັນຢ່າງດີ.
“ສົ່ງເສີມທຸກຄົນ, ທຸກພາກສ່ວນເສດຖະກິດ ປະກອບພູມປັນຍາ, ຊັບສິນ, ກຳລັງເຫື່ອແຮງ ເພື່ອພັດທະນາເສດຖະກິດ, ສ້າງຄວາມຮັ່ງມີອັນຊອບທຳໃຫ້ແກ່ຕົນເອງ ແລະ ຄອບຄົວ ພ້ອມທັງເຂົ້າຮ່ວມການລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ຂົນຂວາຍປະຊາຊົນປະຕິບັດການປະຢັດ ສ້າງແຫລ່ງກຳລັງລົງທຶນໃຫ້ແກ່ບັນດາກິດຈະກຳກໍ່ສ້າງ, ເປີດກວ້າງ ແລະ ພັດທະນາການຜະລິດດຳເນີນທຸລະກິດ, ປະຕິບັດແຜນນະໂຍບາຍການເຕີບໂຕເສດຖະກິດໄປຄຽງຄູ່ກັບການພັດທະນາວັດທະນະທຳ, ຮັບປະກັນຄວາມກ້າວຫນ້າສັງຄົມ.”
ທ່ານເລຂາທິການໃຫຍ່ ຫງວຽນຟູ້ຈ້ອງ ຢືນຢັນ: ດ້ວຍບົດບາດແມ່ນສຳພັນທະມິດການເມືອງ, ແມ່ນອົງການຈັດຕັ້ງຂອງປະຊາຊົນຢ່າງກວ້າງຂວາງ, ແນວໂຮມປະເທດຊາດຫວຽດນາມ ກໍຄວນສືບຕໍ່ຂົນຂວາຍປະຊາຊົນເຂົ້າຮ່ວມການກໍ່ສ້າງພັກ, ສ້າງອຳນາດການປົກຄອງ, ປັບປຸງລະບົບການເມືອງໃຫ້ນັບມື້ນັບໝັ້ນຄົງເຂັ້ມແຂງ. ປະຕິບັດພາລະບົດບາດຕິດຕາມກວດກາ ແລະ ໄຈ້ແຍກຕີລາຄາສັງຄົມສຳລັບບັນດາການຈັດຕັ້ງພັກ ແລະ ອຳນາດການປົກຄອງໃຫ້ດີກວ່າ, ເຮັດໃຫ້ການຈັດຕັ້ງພັກ ແລະ ກົງຈັກອຳນາດການປົກຄອງທຸກຂັ້ນໃຫ້ປອດໃສ, ໝັ້ນຄົງເຂັ້ມແຂງຢ່າງແທ້ຈິງ, ເປັນເຈົ້າການປະກອບຄຳເຫັນຕໍ່ພັກ ແລະ ລັດ ໃນການວາງແຜນກຳນົດກົນໄກ, ນະໂຍບາຍ. ແນວໂຮມປະເທດຊາດຫວຽດນາມ ຄວນສືບຕໍ່ປ່ຽນໃຫມ່ເນື້ອໃນ ແລະ ວິທີການເຄື່ອນໄຫວຕາມທິດໃກ້ຊິດຕິດແທດກັບປະຊາຊົນ, ມຸ່ງໄປເຖິງຂັ້ນຮາກຖານ, ສ້າງຄວາມເຫັນດີເຫັນພ້ອມໃນສັງຄົມ, ປະກອບສ່ວນສ້າງສາ ແລະ ປົກປັກຮັກສາປະເທດຊາດ.
ຢືນຢັນ: ພັກກອມມູນິດຫວຽດນາມ ແມ່ນຜູ້ນຳພາ, ທັງແມ່ນສະມາຊິກສຳຄັນຂອງ ແນວໂຮມປະເທດຊາດຫວຽດນາມ, ທ່ານເລຂາທິການໃຫຍ່ ຫງວຽນຟຸຈ້ອງ ສະເຫນີຄະນະພັກທຸກຂັ້ນ ແລະ ອຳນາດການປົກຄອງຄວນສືບຕໍ່ເອົາໃຈໃສ່ຊີ້ນຳ ແລະ ສົມທົບກັນຢ່າງແຫນ້ນແຟ້ນກັບແນວໂຮມປະເທດຊາດ, ສ້າງກົນໄກເຄື່ອນໄຫວ ແລະ ນະໂຍບາຍສຳລັບວຽກງານແນວໂຮມໃຫ້ສົມບູນແບບ ເພື່ອເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ ແລະ ຍົກສູງຄຸນນະພາບວຽກງານແນວໂຮມໃນສະພາບການໃຫມ່.