(vovworld) –ວັນທີ 9/12, ບັນດາຄູ່ຮ່ວມມືທີ່ເຂົ້າຮ່ວມໂຄງການ “ທໍ່ສົ່ງອາຍແກສລັດເຊຍ-ເອີລົບໃຕ້“ປະຊຸມກັນເປັນຄັ້ງທຳອິດຢູ່ແບນຊິກ, ພາຍຫຼັງທີ່ປະທານາທິບໍດີລັດເຊຍ Vladimir Putin ຖະແຫຼງຢຸດຕິໂຄງການອາດແກສທີ່ສຳຄັນນີ້ເປັນເວລາເກືອບ 2 ສັບປະດາ. ການພົບປະເພື່ອແນໃສ່ຊອກຫາມາດຕະການທີ່ເໝາະສົມແນໃສ່ສືບຕໍ່ຜັນຂະຫຍາຍໂຄງການນີ້, ເພາະວ່າເລື່ອງຢຸດຕິໂຄງການຈະກໍ່ຄວາມເສຍຫາຍໃຫ້ແກ່ຝ່າຍຕ່າງໆ. ແຕ່ເບິ່ງຄືວ່າຍາກທີ່ຈະບັນລຸມາດຕະການແກ້ໄຂໂດຍໄວໄດ້.
ທໍ່ສົ່ງອາຍແກສລັດເຊຍ-ເອີລົບໃຕ້
(ພາຍ: vietnamplus.vn)
“ທໍ່ສົ່ງອາຍແກສລັດເຊຍ-ເອີລົບໃຕ້ “ ແມ່ນຊື່ຂອງໂຄງການທໍ່ສົ່ງອາຍແກສຂະໜາດໃຫຍ່, ໂດຍກຸ່ມບໍລິສັດ Gazprom ຂອງລັດເຊຍ ເປັນເຈົ້າຂອງລົງທຶນ, ເພື່ອແນໃສ່ສົ່ງອອກອາຍແກສທຳມະຊາດຈາກລັດເຊຍ, ຂ້າມທະເລດຳ, ໄປຍັງເອີລົບກາງ ແລະ ເອີລົບໃຕ້, ເຊິ່ງລວມມີບັນດາປະເທດຄື: ບຸນກາຣີ, ແຊກເບຍ, ຮຸງກາຣີ, ເກຼັກ, ສໂລເວນີ, ກຣົວຊີ ແລະ ໂອຕະຣິດ. ຈຸດປະສົງຕົ້ນຕໍຂອງທໍ່ສົ່ງອາຍແກສນີ້ ແມ່ນເຊື່ອມຕໍ່ລັດເຊຍກັບເອີລົບໂດຍບໍ່ຜ່ານຢູແກຼມ. ເຖິງຢ່າງໃດກໍ່ຕາມ, ວັນທີ 1/12, ປະທານາທິບໍດີລັດເຊຍ Vladimir Putin ໄດ້ປະກາດຢຸດຕິໂຄງການນີ້, ແທນທີນັ້ນແມ່ນທໍ່ສົ່ງອາຍແກສໃໝ່ທີ່ຂ້າມຜ່ານເຕິກກີ.
ກໍ່ຄວາມເສຍຫາຍໃຫ້ຝ່າຍຕ່າງໆ
ທ່ານລັດຖະມົນຕີວ່າການກະຊວງການຕ່າງປະເທດ ແຊກເບຍ Ivica Dacic ໃຫ້ຮູ້ວ່າ, ແຊກເບຍ ໄດ້ລົງທຶນເຂົ້າໂຄງການນີ້ 30 ລ້ານເອີໂຣ. ສ່ວນໂອຕະຣິດ ໄດ້ກໍ່ສ້າງບັນດາຮາກຖານສະສົມນຳ້ມັນອາຍແກສໃນຜືນແຜ່ນດິນຂອງປະເທດຕົນແລ້ວ, ດັ່ງນັ້ນຄວາມເສຍຫາຍຈະຫຼາຍກວ່າ. ອະດີດລັດຖະມົນຕີວ່າການກະຊວງພະລັງງານບຸນກາຣີ, ທ່ານ Rumen Ovcharov ກໍ່ປະກາດວ່າ, ປະເທດນີ້ອາດຈະຖືກເສຍຫາຍເຖິງ 750 ລ້ານ USD/ປີ ຍ້ອນໂຄງການຂົນສົ່ງອາຍແກສຖືກຢຸດຕິໄວ້. ໃນຂະນະນັ້ນ, ທ່ານລັດຖະມົນຕີວ່າການກະຊວງການຕ່າງປະເທດຮຸງກາຣີ ພັດໃຫ້ຮູ້ວ່າ, ປະເທດນີ້ຈະຕ້ອງຊອກຫາແຫຼ່ງອາຍແອສທຳມະຊາດອື່ນເພື່ອຖົມຂຸມໃຫ້ແຫຼ່ງສະໜອງຈາກທໍ່ສົ່ງອາຍແກສນີ້.
ບັນດາກຸ່ມບໍລິສັດເສດຖະກິດກໍ່ຖືກເສຍຫາຍບໍ່ແມ່ນໜ້ອຍ. ຕາມກຸ່ມບໍລິສັດພະລັງງານ Saopem ຂອງອີຕາລີ ແລ້ວ, ກຸ່ມບໍລິສັດນີ້ຈະຖືກເສຍຫາຍປະມານ 2 ຕື້ USD ຈາກຂໍ້ຕົກລົງຢຸດຕິໂຄງການນີ້. ສ່ວນບັນດາບໍລິສັດອື່ນຂອງເອີລົບກໍ່ລົງທຶນເຂົ້າໂຄງການນີ້ຢ່າງໜ້ອຍສຸດແມ່ນ 2,5 ຕື້ USD, ໃນຂະນະນັ້ນກຸ່ມບໍລິສັດ Gazprom ຂອງລັດເຊຍ ກໍ່ລົງທຶນເຂົ້າກິດຈະກຳໃນເຂດຜືນແຜ່ນດິນຂອງລັດເຊຍເກືອບ 5 ຕື້ USD.
ໃນໄລຍະຍາວ, ການຕົກລົງຢຸດຕິໂຄງການ “ທໍ່ສົ່ງອາຍແກສລັດເຊຍ-ເອີລົບໃຕ້“ ບໍ່ພຽງແຕ່ເຮັດໃຫ້ແຜນທີ່ຄວາມປອດໄພດ້ານພະລັງງານຂອງເອີລົບໃນຊຸ່ມປີຕໍ່ໜ້າຖືກປ່ຽນແປງເທົ່ານັ້ນ, ຫາກຍັງກະທົບເຖິງສາຍພົວພັນລະຫວ່າງລັດເຊຍ - ອີຢູ, ກໍ່ຄືບັນດາບັນຫາພາຍໃນຂອງເອີລົບອີກດ້ວຍ.
ຢຸດຕິໂຄງການຍ້ອນສາຍເຫດດ້ານການເມືອງ ແລະ ການເງິນ
ປະທານາທິບໍດີລັດເຊຍ Putin ອະທິບາຍວ່າ, ຂໍ້ຕົກລົງຢຸດຕິໂຄງການແມ່ນຍ້ອນລັດເຊຍ ບໍ່ໄດ້ຮັບໜັງສືອະນຸຍາດໃຫ້ກໍ່ສ້າງຂອງ ບຸນກາຣີ, ເມື່ອວຽກງານໄດ້ຮັບການຜັນຂະຫຍາຍເຖິງເຂດຊາຍແດນຂອງປະເທດນີ້. ຕາມລັດເຊຍ ແລ້ວ, ຄະນະກຳມະການເອີລົບ (EC) ໄດ້ກໍ່ຄວາມດັນບັງຄັບໃຫ້ບຸນກາຣີ ຕ້ອງໂຈະການອອກໜັງສືອະນຸຍາດດ້ວຍສາຍເຫດ, ໂຄງການນີ້ລະເມີດກົດໝາຍວ່າດ້ວຍການແກ່ງແຍ້ງ ແລະ ນະໂຍບາຍຫັນແຫຼ່ງສະໜອງພະລັງງານຂອງ EU ເປັນຫຼາຍຮູບຫຼາຍແບບ. ເຖິງຢ່າງໃດກໍ່ຕາມ, ສາຍເຫດແມ່ນຍ້ອນ EU ບໍ່ຢາກຂຶ້ນກັບລັດເຊຍ, ພິເສດແມ່ນໃນສະພາບທີ່ສອງປະເທດ ພວມປະຕິບັດຄຳສັ່ງລົງໂທດດ້ານເສດຖະກິດເຊິ່ງກັນ ແລະ ກັນ.
ໃນຂະນະນັ້ນ, ມີຫຼາຍຄຳເຫັນອື່ນໆພັດຖືວ່າ, ລາຍຈ່າຍນັບມື້ນັບເພີ່ມຂຶ້ນໄດ້ພາໄປເຖິງເລື່ອງຢຸດຕິໂຄງການ. ປີ 2007, Gazprom ຄາດວ່າໂຄງການຈະລົງທຶນເງິນປະມານ 10 ຕື້ USD, ແຕ່ຮອດປີ 2014, ຕົວເລກດັ່ງກ່າວໄດ້ຂຶ້ນເຖິງປະມານ 40 ຕື້ USD. ນີ້ແມ່ນລາຍຈ່າຍຫຼາຍເກີດໄປສຳລັບ Gazprom, ໃນສະພາບທີ່ຍັງມີຫຼາຍໂຄງການສຳຄັນອື່ນອີກພວມລໍຖ້າກຸ່ມບໍລິສັດນີ້. ຖ້າຫາກສືບຕໍ່ປະຕິບັດໂຄງການນີ້. Gazprom ຕ້ອງໄດ້ຮັບການໜູນຊ່ວຍຈາກລັດຖະບານລັດເຊຍ. ແຕ່ໃນສະພາບການຄືປະຈຸບັນແມ່ນບໍ່ສາມາດປະຕິບັດໄດ້, ເພາະວ່າເສດຖະກິດລັດເຊຍ ພວມປະສົບກັບຄວາມຫຍຸ້ງຍາກຍ້ອນຄຳສັ່ງຄວຳ້ບາດຂອງຝ່າຍຕາເວັນຕົກ. ຍິ່ງກວ່ານັ້ນ, ຖ້າຫາກກໍ່ສ້າງທໍ່ສົ່ງນຳ້ມັນຜ່ານເຕິກກີເຖິງເອີລົບໃຕ້, Gazprom ມີແຕ່ເສຍເງິນພຽງປະມານ 10 ຕື້ USD ເທົ່ານນັ້ນ.
ກາລະໂອກາດໃດໃຫ້ທັງສອງຝ່າຍ?
ພາຍຫລັງຖະແຫຼງການຢຸດຕິໂຄງການຂອງທ່ານປະທານາທິບໍດີ ລັດເຊຍ, ວັນທີ 6/12, ກຸ່ມບໍລິສັດ Gazprom ຂອງ ລັດເຊຍ ຢືນຢັນວ່າ: ບໍ່ມີເຈດຈຳນົງປະຕິບັດໂຄງການ “ທໍ່ສົ່ງອາຍແກສ ລັດເຊຍ - ເອີລົບ ໃຕ້” ອີກ ຍ້ອນບັນດາເຈົ້າໜ້າທີ່ເອີລົບ ບໍ່ສ້າງເງື່ອນໄຂເພື່ອສາມາດປະຕິບັດ.
ເຖິງຢ່າງໃດກໍ່ຕາມໃນສະພາບຕົວຈິງ, ປະຈຸບັນນັບທັງ ບຸນກາຣີ ແລະ ແຊກເບຍ ລ້ວນແຕ່ບໍ່ທັນໄດ້ຮັບປະກາດທາງການຈາກຝ່າຍລັດເຊຍ. ລັດຖະບານ ລັດເຊຍ ຍັງບໍ່ທັນອອກຄຳສັ່ງຍຸບເລິກສັນຍາລະຫວ່າງລັດຖະບານກັບບັນດາປະເທດເຂົ້າຮ່ວມໂຄງການ. ທ່ານ Dmitry Peskov, ເລຂາດ້ານສື່ມວນຊົນຂອງທ່ານປະທານາທິບໍດີລັດເຊຍ ກໍ່ບໍ່ມີຄຳຕອບກ່ຽວກັບຄວາມສາມາດຢຸດຕິບັນດາຂໍ້ຕົກລົງ. ມາຮອດໃນປະຈຸບັນ, ພຽງແຕ່ມີບໍລິສັດຮັບປະມຸນ Saipem ຂອງ ອີຕາລີ, ໄດ້ຮັບປະກາດຢຸດຕິໂຄງການ, ຕອນຜ່ານທະເລຂອງ “ທໍ່ສົ່ງອາຍແກສ ລັດເຊຍ - ເອີລົບ ໃຕ້” ເທົ່ານັ້ນ.
ໃນສະພາບການນັ້ນ, ທ່ານ Dmitry Baranov, ນັກຊ່ຽວຊານອັນດັບໜຶ່ງຂອງບໍລິສັດຄຸ້ມຄອງກອງທຶນລົງທຶນ Finam (ລັດເຊຍ), ເວົ້າວ່າໂຄງການ “ທໍ່ສົ່ງອາຍແກສ ລັດເຊຍ - ເອີລົບ ໃຕ້” ອາດຈະໄດ້ຮັບການປະຕິບັດຄືນໃໝ່ຖ້າຫາກ EU ປ່ຽນແປງທັດສະນະ. ໃນຂະນະນັ້ນ, ຂະຫຼວງໃຫຍ່ຮັບຜິດຊອບພະລັງງານຂອງ EU ທ່ານ Maros Sefcovic ຢືນຢັນວ່າ: EU ບໍ່ມີເຈດຈຳນົງທຳລາຍການພົບປະຂອງບັນດາຄູ່ຮ່ວມມືເຂົ້າຮ່ວມໂຄງການ “ທໍ່ສົ່ງອາຍແກສ ລັດເຊຍ - ເອີລົບ ໃຕ້”, ທີ່ຈັດຕັ້ງໃນວັນທີ 9/12. ທ່ານນາຍົກລັດຖະມົນຕີ ບຸນກາຣີ Boyko Borisov ຖະແຫຼງວ່າ: ບຸນກາຣີ ຕົກລົງຊຸກຍູ້ການກໍ່ສ້າງທໍ່ສົ່ງອາຍແກສນີ້ ດ້ວຍເລື່ອງຈັດໃຫ້ທ່ານຮອງນາຍົກລັດຖະມົນຕີ Tomislav Donchev ແລະ ທ່ານລັດຖະມົນຕີວ່າການກະຊວງພະລັງງານ Temenujka Petkov ໄປຍັງ ບຣຸກແຊນ ເຂົ້າຮ່ວມການພົບປະລະຫວ່າງຝ່າຍຕ່າງໆ.
ໂຄງການ “ທໍ່ສົ່ງອາຍແກສ ລັດເຊຍ - ເອີລົບ ໃຕ້” ຈະສືບຕໍ່ໄດ້ຮັບການຜັນຂະຫຍາຍໄດ້ຫຼືບໍ່? ສິ່ງດັ່ງກ່າວແມ່ນອີງໃສ່ເຈດຕະນາດີ, ຄວາມມານະພະຍາຍາມແກ້ໄຂຄວາມບໍ່ລົງລອຍກັນຂອງຝ່າຍຕ່າງໆ./.