ສັບປະດາສຸດຍອດເວທີປາໄສຮ່ວມມືເສດຖະກິດອາຊີ - ປາຊີຟິກປີ 2017 (APEC 2017) ຖືກຈັດຂຶ້ນຢູ່ດ່ານັ້ງ, ຫວຽດນາມ ໃນເດືອນ 11/2017 ດ້ວຍຈຸດສຸມແມ່ນກອງປະຊຸມສຸດຍອດ APEC. ພ້ອມກັນນັ້ນແມ່ນບັນດາການເຄື່ອນໄຫວທີ່ດຳເນີນໃນຕະຫຼອດປີ. ປີ APEC 2017 ດ້ວຍຫົວຂໍ້ວ່າ “ສ້າງກຳລັງໜູນໃໝ່, ພ້ອມກັນເພີ່ມພູນຄູນສ້າງໃຫ້ອະນາຄົດລວມ”. APEC 2017 ໂດຍມີການເຂົ້າຮ່ວມຂອງຜູ້ຕາງໜ້າການນຳ 21 ພື້ນຖານເສດຖະກິດສະມາຊິກ, ມີຜູ້ແທນທາງການນັບພັນຄົນ, ນັກຂ່າວ, ນັກທຸລະກິດ.
ນີ້ແມ່ນເທື່ອທີ 2, ພາຍຫຼັງໄລຍະ 10 ປີທີ່ຫວຽດນາມ ເປັນເຈົ້າພາບຈັດຕັ້ງ APEC, ບໍ່ພຽງແຕ່ປະກອບສ່ວນຍົກສູງທີ່ຕັ້ງທ່ວງທ່າຂອງຫວຽດນາມ, ເປີດກວ້າງການພົວພັນກັບຕ່າງປະເທດເທົ່ານັ້ນ, ຫາກຍັງປະກອບສ່ວນຊຸກຍູ້ປະຊາຄົມວິສາຫະກິດ APEC ເພີ່ມທະວີການລົງທຶນ, ດຳເນີນທຸລະກິດຢູ່ຫວຽດນາມອີກດ້ວຍ.
ກາລະໂອກາດຊຸກຍູ້ດ້ານການຄ້າ ແລະ ການລົງທຶນ.
APEC ພວມປະກອບ 59% GDP ແລະ 48% ດ້ານການຄ້າທົ່ວໂລກ, ດ້ວຍບັນດາພື້ຶ້ນຖານເສດຖະກິດໃຫຍ່ກວ່າໝູ່ໃນໂລກຄື: ອາເມລິກາ, ຈີນ, ຍີ່ປຸ່ນ. ການຮ່ວມມື APEC ມີຄວາມໝາຍໃຫຍ່ຫຼວງສຳລັບແຕ່ລະພື້ນຖານເສດຖະກິດສະມາຊິກ. ສຳລັບຫວຽດນາມ, APEC ໄດ້ນຳມາເຊິ່ງບັນດາຜົນປະໂຫຍດສຳຄັນ. ນີ້ແມ່ນບ່ອນເຕົ້າໂຮມບັນດາຄູ່ຮ່ວມມືຍຸດທະສາດ, ຄູ່ຮ່ວມມືດ້ານເສດຖະກິດ, ການຄ້າແຖວໜ້າຂອງຫວຽດນາມ, ນຳມາເຊິ່ງການລົງທຶນໂດຍກົງຈາກຕ່າງປະເທດປະມານ 80%, ຍອດມູນຄ່າການຄ້າສາກົນ 79% ແລະ ຈຳນວນແຂກທ່ອງທ່ຽວມາຫວຽດນາມ 70%. ສັນຍາການຄ້າເສລີ (FTA) ສ່ວນຫຼາຍເຊິ່ງຫວຽດນາມໄດ້ລົງນາມແມ່ນຄູ່ຮ່ວມມືຂອງ APEC. ນອກນັ້ນ, ເຂົ້າຮ່ວມໃນ APEC, ສິນຄ້າຂອງຫວຽດນາມ ໄດ້ແຊກຊຶມເຂົ້າຕະຫຼາດໃຫຍ່ກວ່າໝູ່, ດ້ວຍອັດຕາພາສີນັບມື້ນັບຫຼຸດລົງຕາມຂັ້ນຕອນຫັນການຄ້າຂອງ APEC ເປັນເສລີ.
ຫວຽດນາມ ຖືເລື່ອງເປັນເຈົ້າພາບຈັດຕັ້ງປີ APEC 2017 ແມ່ນໂອກາດເພື່ອຊຸກຍູ້ດ້ານການຄ້າ, ການລົງທຶນ. ຍ້ອນເຫດນັ້ນ, ຄຽງຂ້າງບັນດາເຫດການທີ່ມີລັກສະນະ “ແບບຢ່າງ“ ນັບແຕ່ກ່ອນມານີ້ເຊັ່ນ: ກອງປະຊຸມສະພາໃຫ້ຄຳປຶກສາດຳເນີນທຸລະກິດ APEC ແລະ ກອງປະຊຸມສຸດຍອດບັນດາຜູ້ອຳນວຍການໃຫຍ່ວິສາຫະກິດ APEC, ໃນຂອບເຂດປີ APEC 2017, ຫວຽດນາມ ສະເໜີຈັດຕັ້ງບາງເຫດການພິເສດ. ທີໜຶ່ງແມ່ນກອງປະຊຸມກ່ຽວກັບ Doing Business ຫວຽດນາມ. ເຫດການນີ້ຈະດຳເນີນຄືດັ່ງບັ້ນຮ່ວມກຳລັງເພື່ອສົ່ງເສີມດ້ານການຄ້າ ແລະ ການລົງທຶນຂອງ ຫວຽດນາມ ໃນສະຕະວັດທີ 21. ດ້ວຍສານແຂງແຮງທີ່ວ່າ, ເຖິງວ່າຈະມີສັນຍາຄູ່ຮ່ວມມືຂ້າມ ປາຊີຟິກ (TPP) ຫຼືບໍ, ຫວຽດນາມກໍ່ສືບຕໍ່ປ່ຽນໃໝ່, ເຊື່ອມໂຍງ ແລະ ອາຊີ - ປາຊີຟິກ ຍັງຄົງແມ່ນຄູ່ຮ່ວມມືທີ່ສຳຄັນແຖວໜ້າຂອງ ຫວຽດນາມ. ເຫດການທີສອງແມ່ນ, ເວທີປາໄສເລີ່ມດຳເນີນອາຊີບ APEC ຈະຖືກຈັດຂຶ້ນເປັນຄັ້ງທຳອິດຢູ່ນະຄອນ ໂຮ່ຈີມິນ. ນີ້ຈະແມ່ນແຫ່ງພົບປະຂອງບັນດານັກເລີ່ມດຳເນີນອາຊີບແຖວໜ້າໃນພາກພື້ນ.
ຫວຽດນາມ ພວມຢືນຢູ່ຕໍ່ໜ້າກະແສເຊື່ອມໂຍງ ແລະ ການປະຕິວັດອຸດສາຫະກຳ, ເລື່ອງຊຸກຍູ້ການເລີ່ມດຳເນີນອາຊີບບົນພື້ນຖານປ່ຽນໃໝ່ຢ່າງມີຫົວຄິດປະດິດສ້າງ ພວມແມ່ນທ່າອ່ຽງຂອງໂລກ. ລັດຖະບານ ຫວຽດນາມ ກໍ່ໄດ້ປຸກລະດົມການກໍ່ສ້າງປະເທດແຫ່ງການເລີ່ມດຳເນີນອາຊີບ. ດ້ວຍຂໍ້ລິເລີ່ມຈັດຕັ້ງເວທີປາໄສເລີ່ມດຳເນີນອາຊີບ APEC, ຫວຽດນາມ ຫວັງວ່ານີ້ຈະແມ່ນໂອກາດເປີດສາກໃຫ້ແກ່ໄລຍະໃໝ່ຂອງການເລີ່ມດຳເນີນອາຊີບຢູ່ ຫວຽດນາມ.
ກາລະໂອກາດໂຄສະນາບັນດາທ່າສະດວກ ແລະ ຄວາມສາມາດບົ່ມຊ້ອນດ້ານການທ່ອງທ່ຽວ
APEC 2016 ແມ່ນປີທຳອິດທີ່ປະເທດຕ່າງໆຜັນຂະຫຍາຍຫຼາຍຍຸດທະສາດໄລຍະຍາວກ່ຽວກັບການເຕີບໂຕດ້ານຄຸນນະພາບ, ການປະຕິຮູບໂຄງປະກອບ, ວິສາຫະກິດຂະໜາດນ້ອຍ ແລະ ກາງ, ການຮ່ວມມືດ້ານການບໍລິການ. ກຳນົດທ່າແຮງຂອງ ຫວຽດນາມ ໃນວິວັດແຫ່ງການສ້າງໂຄງປະກອບ, ປ່ຽນໃໝ່ຮູບແບບເຕີບໂຕແມ່ນກະສິກຳ, ການທອ່ງທ່ຽວ ແລະ ເຕັກໂນໂລຢີສູງ, APEC 2017 ແມ່ນໂອກາດເພື່ອໃຫ້ ຫວຽດນາມ ແນະນຳກ່ຽວກັບຄວາມຕັດສິນໃຈປ່ຽນແປງໃໝ່ ແລະ ການເຊື່ອມໂຍງ, ກ່ຽວກັບແຜນຮ່າງສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ ເຊິ່ງລັດຖະບານໄດ້ຢື່ນສະເໜີຕໍ່ສະພາແຫ່ງຊາດຮັບຮອງເອົາ.
ບໍ່ພຽງແຕ່ມີທິວທັດທຳມະຊາດທີ່ສວຍງາມ, ມີອາຫານການກິນທີ່ເປັນເອກະລັກສະເພາະເທົ່ານັ້ນ, ຫວຽດນາມ ຍັງມີທ່າແຮງກ່ຽວກັບບັນດາຄຸນຄ່າປະຫວັດສາດ, ວັດທະນະທຳ ແລະ ຈິດວີນຍານມີທີ່ເລິກເຊິ່ງອີກດ້ວຍ. ປະຈຸບັນ, ຫວຽດນາມ ພວມຕັ້ງໜ້າກະກຽມໃຫ້ແກ່ການໂຄສະນາເຜີຍແຜ່ສິ່ງດັ່ງກ່າວນີ້, ກ່ອນອື່ນໝົດແມ່ນກະກຽມບັນດາຂອງຂວັນໃຫ້ປະມຸກລັດ, ບັນດາຜູ້ອຳນວຍການໃຫຍ່ທີ່ສັບປະດາສຸດຍອດ APEC 2017. ບາງເທື່ອຂອງຂວັນນັ້ນຈະແມ່ນຮູບປັ້ນທີ່ມີຊື່ວ່າ “ແມ່ ແລະ ລູກ”, ເພື່ອນຶກເຖິງເທບນິຍາຍກ່ຽວກັບແມ່ ເອົາເກີ ດ້ວຍພົກໄຂ່ 100 ໜ່ວຍ, ສົ່ງສານກ່ຽວກັບຄວາມຮັກ, ຄຸນຄ່າວັດທະນະທຳ ຫວຽດນາມ ອອກສູ່ໂລກ. ພິເສດ, ຮູບປັ້ນແມ່ ແລະ ລູກນີ້ຈະຖືກຕັ້ງຢູ່ຝັ່ງທະເລ ດ່ານັ້ງ, ຊຶ່ງເປັນສະຖານທີ່ຈະດຳເນີນກອງປະຊຸມສຸດຍອດ APEC 2017 ຢ່າງເປັນທາງການ. ໃນສະພາບທີ່ການປະທະກັນ, ສົງຄາມພວມມີໄພແຜ່ລາມອອກຢ່າງກ້ວາງຂວາງໃນໂລກ, ສານກ່ຽວກັບຄອບຄົວ, ຄວາມສະໜິດຕິດພັນ ແລະ ຄວາມຮັກໃນເລື່ອງລາວນີ້ແມ່ນມີຄວາມໝາຍທີ່ສຸດໃຫ້ໂລກແຫ່ງມີຄວາມມະນຸດສະທຳກ່ວາ.
ຫວຽດນາມ ພວມກ້າວເຂົ້າສູ່ໄລຍະປ່ຽນແປງໃໝ່ຢ່າງແຮງດ້ວຍ ລັດຖະບານອາຍຸການໃໝ່, ພ້ອມກັບໂຄງການປະຕິຮູບ ໂດຍລັດຖະບານປຸກລະດົມ ແລະ ມີຈິດໃຈສົ່ງເສີມການລົງທຶນ, ດຳເນີນທຸລະກິດໄດ້ຮັບການປຸກລຸກ. ຜ່ານການເປັນເຈົ້າພາບຈັດຕັ້ງປີ APEC 2017 ນີ້, ຫວຽດນາມ ຈະໝູນໃຊ້ກາລະໂອກາດເພື່ອຍົກສູງທີ່ຕັ້ງບົດບາດ, ຮູບພາບປະເທດຊາດ, ສິ່ງສຳຄັນກ່ວານັ້ນແມ່ນດຶງດູດການລົງທຶນ, ດຳເນີນທຸລະກິດ, ຊຸກຍູ້ການຮ່ວມມືດ້ານການທ່ອງທ່ຽວ, ຮັບໃຊ້ໃຫ້ແກ່ພາລະກິດຫັນປະເທດຊາດເປັນປະເທດອຸດສາຫະກຳ - ທັນສະໄໝ.