(vovworld)-
ບໍ່ພຽງແຕ່ມີຊື່ສຽງດ້ວຍທີວທັດທຳມະຊາດ, ພູຜາປ່າໄມ້ທີ່ສວຍງາມ, ດອກໝັ້ນ, ດອກຈອງຂາວກະຈະທີ່ບານສະພັ້ງເມື່ອລະດູບານໃໝ່ວຽນມາເທົ່ານັ້ນ, ຫາກນັກທ່ອງທ່ຽວຍັງຮູ້ຈັກເຖິງເມືອງບັກຮ່າ-ແຂວງລາວກາຍດ້ວຍບັນດາງານບຸນທີ່ເປັນເອກກະລັກສະເພາະ, ພິເສດແມ່ນງານບຸນແຂ່ງມ້າປະເພນີທີ່ມີມາເກືອບ 100 ປີ, ຊື່ງຖືກຈັດຂຶ້ນໃນເດືອນ 6 ຂອງແຕ່ລະປີ. ໃນງານບຸນ, ຜູ້ລ້ຽງມ້າແມ່ນຊາວກະສິກອນ ແລະ ມ້າແຂ່ງຂັນແມ່ນໂຕຂົນສົ່ງສິນຄ້າໃຫ້ຊາວກະສິກອນໃນຊີວິດປະຈຳວັນ…ຍ້ອນເຫດນັ້ນ, ການແຂ່ງມ້າຢູ່ເຂດພູພຽງບັກຮ່າ ຍາມໃດກໍ່ດຶງດູດແຂກທ່ອງທ່ຽວເປັນຈຳນວນຫຼວງຫຼາຍ ແລະ ກາຍເປັນວັດທະນະທຳທີ່ເປັນເອກະລັກສະເພາະຊອງຊາວຊົນເຜົ່າຢູ່ທີ່ນີ້.
ກະກຽມແຂ່ງມ້າ
(ພາບ:vov)
ງານບຸນແຂ່ງມ້າບັກຮ່າໄດ້ດຶງດູດບັນດາຜູ້ລ້ຽງມ້າທີ່ມາຈາກຫຼາຍແຂວງໃນເຂດຕາເວັນຕົກສ່ຽງເໜືອຄື: ອຽນບ໋າຍ, ຮ່າຢາງ, ລາຍເຈົາ, ເຊີນລາ, ດ້ຽນບຽນ…ສຳລັບຊາວຊົນເຜົ່າສ່ວນໜ້ອຍບັກຮ່າ ແລ້ວ, ວຽກງານກະກຽມໃຫ້ແກ່ການແຂ່ງມ້າຕ້ອງລະອຽດຮຽບຮ້ອຍທີ່ສຸດ. ທ່ານວ່າງວັນຕ້າຍ ຊາວເຜົ່າໄຕ, ຢູ່ບ້ານນາອາງອາ ຕາແສງນາໂຮ໋ຍ, ເມືອງບັກຮ່າ, ຜູ້ທີ່ໄດ້ລ້ຽງມ້າເປັນເວລາກ່ວາ 30 ປີໃຫ້ຮູ້ວ່າ: ໃນຊຸມປີມໍ່ໆມານີ້, ຂະບວນການແຂ່ງມ້າໄດ້ພັດທະນາ, ບັນດາໂຕມ້າລ້ຽງຢູ່ບ້ານ, ນອກຈາກໄປໄຮ່ນາ, ຂົນສົ່ງສິນຄ້າແລ້ວ, ຍັງໄດ້ຮັບການຝຶກແອບເພື່ອກາຍເປັນມ້າແຂ່ງຂັນອີກດ້ວຍ. ທ່ານວ່າງວັນຕ້າຍ ໃຫ້ຮູ້ວ່າ:
“ເມື່ອເລືອກມ້າເຂົ້າຮ່ວມການແຂ່ງຂັນຕ້ອງເລືອກເອົາໂຕທີ່ມີຕີນຊື່, ເລັບໜາ, ຖ້າເລັບຕີນແຫວອອກຄືໂຕເປັດມ້າຈະແລ່ນບໍ່ໄວ. ພາຍຫຼັງເລືອກໄດ້ມ້າໂຕດີແລ້ວຕ້ອງໃຫ້ມັນກິນອີ່ມ, ສະອາດ. ເມື່ອກ່ອນຂ້ອຍໄດ້ຮັບຊະນະໃນການແຂ່ງມ້າຍ້ອນວ່າ ມ້າຂອງຂ້ອຍມີແນວພັນດີ, ຮູ້ຄວາມ ແລະ ຕ້ອງຝຶກແອບເປັນປະຈຳ, ແຕ່ບໍ່ໃຫ້ມ້າຝຶກແອບຫຼາຍເກີນໄປ“
ການແຂ່ງມ້າ
(ພາບ:vov)
ໃນທຸກໆປີ, ການແຂ່ງມ້າທີ່ເປັນມູນເຊື້ອຢູ່ບັກຮ່າ ໄດ້ດຶງດູດການເຂົ້າຮ່ວມຂອງແຂກທ່ອງທ່ຽວພາຍໃນ ແລະ ຕ່າງປະເທດເປັນຈຳນວນຫຼວງຫຼາຍ. ເມື່ອເຫັນຊາວໜຸ່ມທ້ອງຖິ່ນບັນຊາມ້າທີ່ເຄີຍຂົນສົ່ງສິນຄ້າ, ໄຖນາປະຈຳວັນແຂ່ງຂັນກັນນັ້ນ, ບາງຄົນກໍ່ຮູ້ສຶກຕົກໃຈເມື່ອເຫັນມ້າແລ່ນໄວເກີນໄປຈົນອອກຈາກເດີນ ຫຼືເມື່ອເຫັນຜູ້ບັນຊາມ້າລົ້ມລົງ. ທ່ານ Matthias Matt ແຂກທ່ອງທ່ຽວມາຈາກນະຄອນ Hamburg ປະເທດເຢຍລະມັນ ແບ່ງປັນວ່າ:
“ຂ້າພະເຈົ້າຮູ້ສຶກຈັບອົກຈັບໃຈທີ່ສຸດ. ຈຸດພິເສດສະເພາະແມ່ນການເຂົ້າຮ່ວມຂອງຊາວທ້ອງຖິ່ນທຸກຄົນ, ຜູ້ໃດກໍ່ຢາກຊົມແຂ່ງມ້າ ແລະ ນິຍົມທີ່ສຸດ. ຍັງມີຈຸດພິເສດໜຶ່ງອີກ, ນັ້ນແມ່ນເມື່ອໃກ້ຈະຮອດຫຼັກໄຊແລ້ວ ພັດມີມ້າສອງໂຕບໍ່ແລ່ນອີກ ແລ້ວເຂົ້າກິນຫຍ້າໃນເດີນ…ເວລານັ້ນ, ຂ້າພະເຈົ້າ ແລະ ຜູ້ຊົມລ້ວນແຕ່ຮູ້ສຶກມ່ວນແລະ ເປັນຕາຫົວທີ່ສຸດ. ນັ້ນແມ່ນວັນບຸນທີ່ດູດດື່ມຢ່າງແທ້ຈິງ“
(ພາບ:vov)
ງານບຸນແຂ່ງມ້າບັກຮ່າ ແມ່ນວັນບຸນທີ່ດູດດື່ມ, ສະແດງໃຫ້ເຫັນຄວາມກ້າຫານ, ວ່ອງໄວຂອງຜູ້ແຂ່ງ, ແລະ ກາຍເປັນວັດທະນະທຳທີ່ເປັນເອກະລັກສະເພາະຂອງຊາວເຜົ່າເຂດຕາເວັນຕົກສ່ຽງເໜືອ. ບັນດາຜູ້ບ່າວຊາວເຜົ່າທ້ອງຖິ່ນສັດຊື່, ກ້າຫານ ແລະ ບັນດາໂຕມ້າໂດຍເຂົາເຈົ້າລ້ຽງເອງໃນແຕ່ລະວັນເພື່ອຂົນສົ່ງສິນຄ້າ, ໄຖນານັ້ນ, ແຕ່ເມື່ອເຂົ້າຮ່ວມການແຂ່ງຂັນພັດສ້າງຄວາມຈັບອົກຈັບໃຈໃຫ້ແກ່ຜູ້ຊົມ. ການແຂ່ງຂັນແຕ່ລະຄັ້ງ ຍາມໃດກໍໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວເມື່ອມາຢ້ຽມຢາມເຂດພູພຽງບັກຮ່າຈົນຍາກຈະລືມໄດ້./