(vovworld)- ໂດຍແມ່ນປະຕູພົວພັນແລກປ່ຽນເສດຖະກິດພາຍໃນປະເທດ ແລະ ສາກົນ, ນະຄອນ ມອງກາຍ ແຂວງ ກວ໋າງນີງ ຍາມໃດກໍມີທ່າແຮງເພື່ອພັດທະນາການທ່ອງທ່ຽວຢູ່ເຂດຊາຍແດນ. ນະຄອນ ມອງກາຍ ພວມຍາດແຍ່ງທ່າໄດ້ປຽບດ້ານທ່ອງທ່ຽວທີ່ມີຢູ່ແລ້ວ ພ້ອມທັງນຳບັນດາວິສາຫະກິດທ່ອງທ່ຽວມຸ້ງໄປເຖິງການແກ້ງແຍ້ງຢ່າງປອດໃສ, ມີປະສິດທິຜົນ.
ນັກທ່ອງທ່ຽວຈີນ ມາຢ້ຽມຢາມ ມອງກາຍ-ກວ໋າງນີງ
|
ໃນຫລາຍປີມານີ້ ເມື່ອນະຄອນ ຕຸງຊີງ ຂອງຈີນ ອອກຫນັງສືຜ່ານແດນໃຫ້ພົນລະເມືອງຈີນ ຜ່ານດ່ານຊາຍແດນໄປທ່ອງທ່ຽວໃນເວລາມື້ຫນຶ່ງ, ຈຳນວນນັກທ່ອງທ່ຽວຈີນ ມາຢ້ຽມຢາມ ນະຄອນ ມອງກາຍ ນັບມື້ນັບເພີ່ມຂຶ້ນ. ໄລ່ສະເພາະ 5 ເດືອນຕົ້ນປີ 2015, ຈຳນວນນັກທ່ອງທ່ຽວເຂົ້າອອກເມືອງ ມອງກາຍ ແມ່ນເກືອບ 350.000 ເທື່ອຄົນ. ທ່ານນາງ ຟ້າມທິແອງ, ຮອງຫົວຫນ້າພະແນກວັດທະນະທຳຖະແຫລງຂ່າວ ນະຄອນ ມອງກາຍ ໃຫ້ຮູ້ວ່າ: ອຳນາດການປົກຄອງນະຄອນ ມີຄວາມຮັບຜິດຊອບຄຸ້ມຄອງຈຳນວນນັກທ່ອງທ່ຽວຖືຫນັງສືຜ່ານແດນປະເພດດັ່ງກ່າວ. ນັບແຕ່ເດືອນ 10/2013 ເປັນຕົ້ນມາ, ມີວິສາຫະກິດ 17 ແຫ່ງທີ່ຂຶ້ນກັບສະໂມສອນທ່ອງທ່ຽວ 849 ຂອງນະຄອນ ມອງກາຍ ໄດ້ຂຸດຄົ້ນຮູບການບໍລິການທ່ອງທ່ຽວດັ່ງກ່າວ. ນີ້ແມ່ນຮູບແບບສະໂມສອນທ່ອງທ່ຽວເຄື່ອນໄຫວຕາມຂໍ້ກຳນົດຂອງກະຊວງຕຳຫລວດກ່ຽວກັບການຈັດຕັ້ງ ແລະ ຄຸ້ມຄອງພົນລະເມືອງ ຈີນທີ່ຖືຫນັງສືຜ່ານແດນ ໂດຍຈີນ ສະໜອງໃຫ້ເຂົ້າຢ້ຽມຢາມ ຫວຽດນາມ.
ແຕ່ເດືອນ 8/2014 ເປັນຕົ້ນມາ, ນະຄອນ ມອງກາຍ ໄດ້ປະກາດ 3 ລາຍການທ່ອງທ່ຽວ, ສະຖານທີ່ທ່ອງທ່ຽວ 12 ແຫ່ງ, ນຳຫລາຍຮູບການບໍລິການເຂົ້າເຄື່ອນໄຫວ. ດ້ວຍຄວາມຕັດສິນໃຈເຮັດໃຫ້ແຫລມ ຊາຫວີ, ຈາໂກ໋ … ກາຍເປັນບັນດາສະຖານທີ່ທ່ອງທ່ຽວທີ່ດູດດື່ມບໍ່ພຽງແຕ່ສຳລັບນັກທ່ອງທ່ຽວພາຍໃນປະເທດເທົ່ານັ້ນ ຫາກນັບທັງນັກທ່ອງທ່ຽວເຂດຊາຍແດນອີກດ້ວຍ. ທ່ານນາງ ຟ້າມທິແອງ ຢືນຢັນວ່າ:
“ທັດສະນະຂອງນະຄອນ ມອງກາຍ ແມ່ນສ້າງເງື່ອນໄຂສະດວກທີ່ສຸດໃຫ້ບັນດາວິສາຫະກິດປະຕິບັດກົດໝາຍວ່າດ້ວຍການທ່ອງທ່ຽວທີ່ພວມປະກາດໃຊ້ໃນປະຈຸບັນ ເພື່ອຂຸດຄົ້ນແຫລ່ງນັກທ່ອງທ່ຽວຜ່ານຊາຍແດນ, ພິເສດ ແມ່ນນັກທ່ອງທ່ຽວມາຢ້ຽມຢາມ ມອງກາຍ ໃນເວລາມື້ຫນຶ່ງ.”
ນັບແຕ່ວັນທີ 12/5/2015 ເປັນຕົ້ນໄປ, ມີ ວິສາຫະກິດຕື່ມອີກ 4 ແຫ່ງ ຂຶ້ນກັບສະຫະສະມາຄົມທ່ອງທ່ຽວ ມອງກາຍ ໄດ້ເຂົ້າຮ່ວມການເຄື່ອນໄຫວເຮັດບໍລິການທ່ອງທ່ຽວຮັບໃຊ້ນັກທ່ອງທ່ຽວມາຈາກຈີນ. ແຕ່ວັນທີ 12-26/5, ບັນດາວິສາຫະກິດດັ່ງກ່າວ ໄດ້ຕ້ອນຮັບນັກທ່ອງທ່ຽວຈີນ ກວ່າ 2.200 ຄົນ ມາຢ້ຽມຢາມ ມອງກາຍ, ຄິດສະເລ່ຍແມ່ນ148 ຄົນ/ ວັນ. ຜູ້ຕາງຫນ້າບໍລິສັດທ່ອງທ່ຽວ ຈີນ ໃຫ້ຮູ້ວ່າ:
“ຂ້າພະເຈົ້າເຫັນວ່າ ໄລຍະນີ້ ບັນດາບໍລິສັດທ່ອງທ່ຽວຫວຽດນາມ ຕ້ອນຮັບນັກທ່ອງທ່ຽວຢ່າງສຸດຈິດສຸດໃຈ, ລອບຄອບຖິ່ຖ້ວນ ແລະ ເຮັດລະບຽບການຢ່າງວ່ອງໄວ. ຖ້າທຽບໃສ່ກ່ອນນີ້ແມ່ນດີຫລາຍແລ້ວ.”
ດ່ານຊາຍແດນ ສາກົນ ມອງກາຍ
ພາບ:mongcai.gov.vn
|
ນັກທ່ອງທ່ຽວເຂົ້າເມືອງຈະໄດ້ເຂົ້າຮ່ວມລາຍການທ່ອງທ່ຽວຄົບວົງຈອນເຖິງບັນດາສະຖານທີ່ທ່ອງທ່ຽວດູດດື່ມຄື: ໃຈກາງນະຄອນ, ຫາດຊາຍທະເລ ຈາໂກ໋, ສາລາບ້ານ, ແຫລມ ຊາຫວີ…ແລະ ໄດ້ຮັບຊົມລາຍການສະແດງສິລະປະ, ຊື້ເຄື່ອງເປັນທີ່ລະນຶກທີ່ມີຄຸນນະພາບສູງ ແລະ ໄດ້ຊົມໃຊ້ບໍລິການກິນດື່ມຕ່າງໆ. ເວລາ ພັກອາໄສຢູ່ນະຄອນ ມອງກາຍ ແມ່ນແກ່ຍາວແຕ່ 6-8 ໂມງໃນມື້. ທ່ານນາງ ຫວູທິເຮືອງຢາງ, ບໍລິສັດຫຸ້ນສ່ວນທ່ອງທ່ຽວ ແລະ ບໍລິການ ມອງກາຍ ຢືນຢັນວ່າ:
“ໂດຍແມ່ນບັນດາວິສາຫະກິດທີ່ເຮັດບໍລິການໃນບໍລິເວນນະຄອນ, ພວກຂ້າພະເຈົ້າຖືວ່າ ວຽກງານນີ້ແມ່ນຈຳເປັນທີ່ສຸດ ເພື່ອສ້າງສະພາບແວດລ້ອມແຫ່ງການດຳເນີນທຸລະກິດທ່ອງທ່ຽວທີ່ແກ່ງແຍ້ງຢ່າງສະເໝີພາບ, ລົບລ້າງສະພາບເຮັດການບໍລິການທ່ອງທ່ຽວໄລຍະສັ້ນເທື່ອລະກ້າວ, ທີ່ສົ່ງຜົນສະທ້ອນເຖິງພາບພົດທ່ອງທ່ຽວ ແລະ ຂຸດຄົ້ນຄວາມສາມາດບົ່ມຊ້ອນໃນການທ່ອງທ່ຽວຂອງ ມອງກາຍ ຢ່າງມີປະສິດທິຜົນ.”
ດ້ວຍການສ້າງເງື່ອນໄຂສະດວກໃຫ້ວິສາຫະກິດຫລາຍແຫ່ງເຂົ້າຮ່ວມການສ້າງເຄື່ອງໝາຍການຄ້າທ່ອງທ່ຽວຢູ່ເຂດຊາຍແດນ, ເພີ່ມທະວີວຽກງານກວດກາ, ຄວບຄຸມສະພາບແວດລ້ອມແຫ່ງການດຳເນີນທຸລະກິດ, ນະຄອນ ມອງກາຍ ພວມ ສ້າງພາບພົດທີ່ສວຍງາມໃນສາຍຕາຂອງນັກທ່ອງທ່ຽວ. ສິ່ງສຳຄັນກວ່ານັ້ນແມ່ນ ການເຊື່ອມຕໍ່ບັນດາລາຍການທ່ອງທ່ຽວ, ສະຖານທີ່ທ່ອງທ່ຽວ, ການໂຄສະນາບັນດາຜະລິດຕະພັນທີ່ເປັນເອກະລັກສະເພາະຂອງທ້ອງຖິ່ນ ຈະຊ່ວຍໃຫ້ນະຄອນມອງກາຍ ສ້າງຄວາມປະທັບໃຈດ້ານທ່ອງທ່ຽວຢ່າງແຮງ, ສ້າງທ່ວງທ່າເພື່ອຂຸດຄົ້ນຄວາມສາມາດບົ່ມຊ້ອນຂອງນະຄອນເຂດຊາຍແດນນີ້ຢ່າງສຸດຂີດ.”