ການພົວພັນການຄ້າຫວຽດນາມ-ອິນເດຍພັດທະນາຢ່າງແຮງ
ພາບປະກອບ
(vovworld) – ການພົວພັນທາງດ້ານການຄ້າລະຫວ່າງ ຫວຽດນາມ - ອິນເດຍ ໃນຊຸມປີມໍ່ໆມານີ້ພັດທະນາຢ່າງແຮງ, ແມ່ນໜຶ່ງໃນ 5 ເສົາຄ້ຳໃນການພົວພັນຮ່ວມມືຍຸດທະສາດ ຫວຽດນາມ - ອິນເດຍ. ທ່ານ ຫງວຽນເຊີນຮ່າ, ທີ່ປຶກສາດ້ານການຄ້າ ຫວຽດນາມ ປະຈຳ ອິນເດຍ ໃຫ້ຮູ້ວ່າ: ອິນເດຍແມ່ນໜຶ່ງໃນຈຳນວນ 10 ຄູ່ຮ່ວມມືການຄ້າລາຍໃຫຍ່ຂອງ ຫວຽດນາມ ແລະ ຫວຽດນາມ ແມ່ນຄູ່ຮ່ວມມືການຄ້າໃຫຍ່ອັນດັບ 4 ຂອງອິນເດຍໃນສະມາຄົມ ອາຊຽນ. ອິນເດຍ ແລະ ຫວຽດນາມ ພວມເພີ່ມທະວີການພົວພັນການຄ້າ 2 ຝ່າຍດ້ວຍຫຼາຍມາດຕະການ, ໃນນັ້ນມີເລື່ອງຊຸກຍູ້ການເຄື່ອນໄຫວຮ່ວມມືດ້ານກົດໝາຍແມ່ນພື້ນຖານເພື່ອຜັນຂະຫຍາຍການເຄື່ອນໄຫວການຄ້າ ແລະ ການລົງທຶນຕ່າງໆ. ອິນເດຍ ໄດ້ຮັບຮູ້ຫວຽດນາມ ມີພື້ນຖານເສດຖະກິດການຕະຫຼາດຢ່າງຄົບຖ້ວນ, 2 ປະເທດໄດ້ເຊັນສັນຍາສະບັບຕ່າງໆ, ພິເສດແມ່ນສັນຍາການຄ້າເສລີສິນຄ້າ ອາຊຽນ - ອິນເດຍ (AITIG) ສ້າງເງື່ອນໄຂສະດວກໃຫ້ການຊື້ຂາຍສິນຄ້າລະຫວ່າງບັນດາວິສາຫະກິດ 2 ປະເທດ.
ເພື່ອຂຸດຄົ້ນທ່າແຮງ ແລະ ເສີມຂະຫຍາຍບັນດາຄວາມສາມາດບົ່ມຊ້ອນການຮ່ວມມືເສດຖະກິດ, ການຄ້າ ແລະ ການລົງທຶນ 2 ຝ່າຍ, ຫວຽດນາມ ແລະ ອິນເດຍ ມີແຜນນະໂຍບາຍປະຕິບັດບັນດາມາດຕະການຄື: ອະນຸກຳມະການການຄ້າປະສົມລະຫວ່າງກະຊວງອຸດສາຫະກຳ ການຄ້າ ຫວຽດນາມ ແລະ ກະຊວງການຄ້າ ແລະ ອຸດສາຫະກຳ ອິນເດຍ ຈັດກອງປະຊຸມເປັນປະຈຳປີ, ຊຸກຍູ້ການເຄື່ອນໄຫວຂອງເວທີປາໄສວິສາຫະກິດ ຫວຽດນາມ - ອິນເດຍ...