(vovworld) – ຕອນບ່າຍວັນທີ 13/05, ຢູ່ຮ່າໂນ້ຍ, ຄະນະໂຄສະນາສຶກສາສູນກາງ ແລະ ຫໍພິພິດຕະພັນໂຮ່ຈິມິນ ໄດ້ໄຂງານວາງສະແດງ “ບັນດາແບບຢ່າງທີ່ລຽບງ່າຍແຕ່ສູງສົ່ງ”. ການເຄື່ອນໄຫວນີ້ເພື່ອມຸ່ງໄປເຖິງສະເຫຼີມສະຫຼອງ 124 ປີແຫ່ງວັນຄ້າຍວັນເກີດ ປະທານໂຮ່ຈິມິນ (19/05/1980 – 19/05/2014) ແລະ ສະຫຼຸບ 3 ປີແຫ່ງການປະຕິບັດຕາມຄຳສັ່ງເລກທີ 3 ຂອງກົມການເມືອງກ່ຽວກັບ “ສືບຕໍ່ຍູ້ແຮງການຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນ”. ງານວາງສະແດງລວມມີ 2 ພາກຄື: “ຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນ ແມ່ນວຽກງານເປັນປະຈຳຂອງທົ່ວພັກ, ທົ່ວປວງຊົນຫວຽດນາມ” ແລະ ຮູບຖ່າຍ, ບົດຂຽນກ່ຽວກັບ “ບັນດາແບບຢ່າງທີ່ລຽບງ່າຍແຕ່ສູງສົ່ງ”. ທ່ານນາງ ຫງວຽນທຸຍດຶກ, ຜູ້ຮັກສາການຫົວໜ້າຫໍພິພິດຕະພັນໂຮ່ຈິມິນ ໃຫ້ຮູ້ວ່າ.
“ເພື່ອຕອບສະໜອງ, ປະກອບສ່ວນໃຫ້ແກ່ຂະບວນການຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນ ໃຫ້ນັບມື້ນັບກາຍເປັນປະຈຳ ແລະ ໃກ້ສິດຕິດແທດກັບຊາວຫວຽດນາມ ທຸກຄົນກວ່າ, ງານວາງສະແດງຄັ້ງທີ 2 “ບັນດາແບບຢ່າງທີ່ລຽບງ່າຍແຕ່ສູງສົ່ງ” ນີ້, ພວກຂ້າພະເຈົ້າປາດຖະໜາວ່າ ບັນດາເພື່ອນໜຸ່ມຈະເຂົ້າໃຈກວ່າກ່ຽວກັບຄວາມເມດຕາ, ຈິດໃຈຜ່ານຜ່າຄວາມຫຍຸ້ງຍາກຂອງບັນດາແບບຢ່າງທີ່ດີເດັ່ນ. ເພື່ອໃຫ້ລຸ່ນໜຸ່ມເຂົ້າໃຈໄດ້ວ່າ ພວກເຮົາຈົ່ງປະກອບສ່ວນຫຼາຍກວ່າອີກ ເພື່ອໃຫ້ປະຊາຊົນທຸກຄົນສາມັກຄີ, ຮ່ວມແຮງຮ່ວມໃຈເພື່ອຄວາມສະຫງົບ, ຄວາມວັດຖະນາຖາວອນ ແລະ ອະທິປະໄຕຂອງປະເທດຊາດ”.
ແລະກໍ່ໃນຕອນຄໍ່າວັນທີ 13/05, ຢູ່ແຂວງ ເຮົ້າຢາງ ໄດ້ໄຂງານບຸນຕັ້ງຄ້າຍເຍົາວະຊົນປະຕິບັດຕາມຄຳສັ່ງສອນຂອງປະທານໂຮ່ຈິມິນ. ເນື່ອງໃນໂອກາດນີ້, ຄະນະຊາວໜຸ່ມແຂວງເຮົ້າຢາງ ໄດ້ມອບເຮືອນ 7 ຫຼັງໃຫ້ບັນດາຊາວໜຸ່ມທີ່ປະສົບກັບຄວາມຫຍຸ້ງຍາກພິເສດກ່ຽວກັບເຮືອນຢູ່, ມອບທຶນສຶກສາເພື່ອຄວາມໄຝ່ຝັນ ໃຫ້ນັກຮຽນທຸກຍາກແຕ່ຮຽນເກັ່ງ 20 ຄົນ.