(vovworld) - ຕອນບ່າຍວັນທີ 11/3, ຢູ່ນະຄອນຫຼວງ ບັງກອກ ປະເທດ ໄທ, ຄະນະຜູ້ແທນການທະຫານຂັ້ນສູງ ກະຊວງປ້ອງກັນປະເທດ ຫວຽດນາມ ໂດຍທ່ານ ພົນເອກ ຟຸ່ງກວາງແທງ, ລັດຖະມົນຕີກະຊວງປ້ອງກັນປະເທດນຳໜ້າໄດ້ມີການເຈລະຈາກັບ ທ່ານ ສຸກຳພົນ ສຸວັນນະທັດ, ລັດຖະມົນຕີກະຊວງປ້ອງກັນປະເທດ ໄທ. ທີ່ການເຈລະຈາ, ລັດຖະມົນຕີກະຊວງປ້ອງກັນປະເທດ ໄທ ສຸກຳພົນ ສຸວັນນະທັດ ຖືວ່າ: ໃນໄລຍະມໍ່ໆມານີ້, ການຮ່ວມມືກ່ຽວກັບດ້ານປ້ອງກັນຊາດລະຫວ່າງ 2 ປະເທດນັບມື້ນັບພັດທະນາຢ່າງແຮງ ແລະ ກ້າວເຂົ້າສູ່ລວງເລິກ, ພິເສດແມ່ນບັນດາຂົງເຂດນະໂຍບາຍປ້ອງກັນຊາດ ແລະ ຄູ່ເຈລະຈາປ້ອງກັນຊາດປ້ອງກັນຄວາມສະຫງົບ, ການບຳລຸງສ້າງຝຶກແອບ, ການລາດຕາເວັນປະສົມ ແລະ ການ ພັດທະນາແຫຼ່ງຊັບພະຍາກອນມະນຸດ... ຕີລາຄາສູງການຮ່ວມມືດ້ານປ້ອງກັນຊາດລະຫວ່າງ 2 ປະເທດນັບມື້ນັບໄດ້ຮັບການພັດທະນາໃນຫຼາຍດ້ານ, ທ່ານ ລັດຖະມົນຕີກະຊວງປ້ອງກັນປະເທດ ຫວຽດນາມ ຟຸ່ງກວາງແທງ ຖືວ່າ: ການຮ່ວມມືດ້ານທະຫານເຮືອພິເສດແມ່ນການລາດຕາເວນ ແລະ ການພົວພັນແລກປ່ຽນລະຫວ່າງທະຫານ 2 ປະເທດແມ່ນບັນລຸໄດ້ໝາກຜົນທີ່ແທດຈິງຫຼາຍຢ່າງ, ປະກອບສ່ວນຮັກສາສະຖຽນລະພາບຂອງ 2 ປະເທດ. ທັງ 2 ຝ່າຍກໍ່ໄດ້ພິຈາລະນາ ກ່ຽວກັບບັນດາບັນຫາໃຫຍ່ໃນພາກພື້ນເຊິ່ງ ຫວຽດນາມ ແລະ ໄທ ຕ່າງມີຄວາມສົນໃຈ ແລະ ເຫັນດີເຫັນພ້ອມເພີ່ມທະວີການຮ່ວມມື 2 ຝ່າຍ ແລະ ຫຼາຍຝ່າຍ.
ຕາມແຜນການແລ້ວ, ຄະນະຜູ້ແທນກະຊວງປ້ອງກັນປະເທດ ຫວຽດນາມ ຈະສືບຕໍ່ມີການເຄື່ອນໄຫວຕ່າງໆ ຢູ່ ໄທ ຮອດວັນທີ 14/3/2013.