(vovworld) - ວັນທີ 04 ສິງຫາ,ໂດຍໄດ້ຮັບຄຳເຊີນຂອງທ່ານລັດຖະມົນຕີການຕ່າງປະເທດຫວຽດນາມ ຟ້າມບິ່ງມິນ, ທ່ານລັດຖະມົນຕີກະຊວງການຕ່າງປະເທດຝລັ່ງ Laurent Fabius ໄດ້ມາຢ້ຽມຢາມຫວຽດນາມ ຢ່າງເປັນທາງການ ແຕ່ວັນທີ 03 – 05 ສິງຫາ. ການຢ້ຽມຢາມຄັ້ງນີ້ໄດ້ດຳເນີນໄປໃນສະພາບທີ່ຫວຽດນາມ ແລະ ຝລັ່ງ ພວມຈັດຕັ້ງການເຄື່ອນໄຫວຕ່າງໆເພື່ອສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ (1973 -2013). ທີການເຈລະຈາ 2 ຝ່າຍໄດ້ສຸມໃສ່ແລກປ່ຽນກ່ຽວກັບບັນດາມາດຕະການເພື່ອຊຸກຍູ້ການພົວພັນຮ່ວມມືຢ່າງລະອຽດ: ໂດຍສະເພາະແມ່ນການພົວພັນຮ່ວມມືດ້ານເສດຖະກິດ - ການຄ້າ ໃຫ້ສົມກັບການພົວພັນລວມ, ຊິ່ງລວມມີການເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ປັນປຸງ ແລະ ເສີມຂະຫຍາຍຢ່າງມີປະສິດທິຜົນບັນດາກົນໄກເຈລະຈາເຊິ່ງປະຈຸປັນແມ່ນໃນຂົງເຂດການທູດ - ປ້ອງກັນຊາດ, ເສດຖະກິດ - ການຄ້າ ແລະ ວິທະຍາສາດເຕັກໂນໂລຊີ... 2 ຝ່າຍໄດ້ແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ; ຢືນຢັນຈະສືບຕໍ່ຮ່ວມມື ແລະ ສົມທົບກັນຢູ່ເວທີປາໄສພາກພື້ນ ແລະ ສາກົນຢ່າງແໜ້ນແຟ້ນ. ຝ່າຍຝລັ່ງ ສະໜັບສະໜູນການແກ້ໄຂການພິດພາດກັນຢູ່ທະເລຕາເວັນອອກ ໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ຮັບປະກັນສັນຕິພາບ, ສະຖຽນລະພາບ ແລະ ພັດທະນາຢູ່ພາກພື້ນ ທີ່ມີຄວາມໝາຍສຳຄັນນີ້; ບົນພື້ນຖານນັ້ນ 2 ຝ່າຍໄດ້ສະແດງຄວາມປິຕິຊົມຊື່ນຕໍ່ການຜັນແປຕ່າງໆອັນຕັ້ງໜ້າໃນຫວ່າງມໍ່ໆມານີ້ລະຫວ່າງບັນດາປະເທດອາຊຽນ ແລະ ຈີນ ເພື່ອແນໃສ່ສ້າງປະມວນຂໍກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC). ຝລັ່ງຢືນຢັນສະໜັບສະໜູນຫວຽດນາມ ພັດທະນາການພົວພັນຮ່ວມມືກັບ EU. ດ້ວຍຖານະເປັນຜູ້ປະສານງານການພົວພັນລະຫວ່າງ ອາຊຽນ - EU, ຫວຽດນາມ ຢືນຢັນ ສະໜັບສະໜູນຝລັ່ງ ເພີ່ມທະວີການພົວພັນກັບອາຊຽນ.