ອາເມລິກາ ແມ່ນໜຶ່ງໃນບັນດາຄູ່ຮ່ວມມືການຄ້າໃຫຍ່ສຸດຂອງ ຫວຽດນາມ. ຮອດທ້າຍເດືອນພະຈິກ 2024, ວົງເງິນການຄ້າລະຫວ່າງ ຫວຽດນາມ ແລະ ອາເມລິກາ ບັນລຸ 135 ຕື້ USD, ໃນນັ້ນ ວົງເງິນສົ່ງອອກຂອງ ຫວຽດນາມ  ບັນລຸ 123 ຕື້ USD, ເພິ້ມຂຶ້ນ 23%; ການນຳເຂົ້າຈາກ ອາເມລິກາ ບັນລຸ 12 ຕື້ USD, ເພີ່ມຂຶ້ນ 15%. ບັນດາຜະລິດຕະພັນສົ່ງອອກຫຼັກແຫຼ່ງຂອງ ຫວຽດນາມ ໄປຍັງ ອາເມລິກາ ລວມມີ: ຜະລິດຕະພັນກະເສດ, ເຄື່ອງຕ່ຳແຜ່ນຕັດຫຍິບ, ເກີບໜັງ, ສິນທະເລ ແລະ ອາໄຫຼ່ເຄື່ອງເອເລັກໂຕນິກ.

        ກ່ຽວກັບການລົງທຶນໂດຍກົງຈາກຕ່າງປະເທດ (FDI), ອາເມລິກາ ແມ່ນໜຶ່ງໃນບັນດານັກລົງທຶນໃຫຍ່ຢູ່ ຫວຽດນາມ, ດ້ວຍບັນດາໂຄງການພົ້ນເດັ່ນເຊັ່ນ: Intel (1,5 ຕື້ USD), Amkor (1,6 ຕື້ USD), ພ້ອມກັບການເປີດກວ້າງການເຄື່ອນໄຫວຂອງບັນດາກຸ່ມບໍລິສັດຄື Synopsys, Nvidia ແລະ Marvel.

ໃນໄຕມາດທີ 3 ປີ 2024, ຫວຽດນາມ ດຶງດູດເງິນລົງທຶນ FDI 27,78 ຕື້ USD, ເພີ່ມຂຶ້ນ 11,6% ເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນ ອາເມລິກາ ກໍປະກອບສ່ວນບໍ່ໜ້ອຍເຂົ້າໃນການຊຸກຍູ້ການພັດທະນາເຕັກໂນໂລຢີສູງ ແລະ ການຫັນເປັນດີຈີຕອນ ຢູ່ ຫວຽດນາມ. ດ້ວຍຂະແໜງເກີບໜັງ, ອາເມລິກາ ແມ່ນຕະຫຼາດຫຼັກແຫຼ່ງຂອງບັນດາວິສາຫະກິດ ຫວຽດນາມ.

        ອົງການການຄ້າ ຫວຽດນາມ ປະຈຳ ອາເມລິກາ ຖືວ່າ, ປີ 2025 ໝັ້ນໝາຍວ່າ ຈະເປັນປີພັດທະນາຢ່າງແຮງໃນການພົວພັນການຄ້າລະຫວ່າງ ຫວຽດນາມ ແລະ ອາເມລິກາ, ດ້ວຍຍອດວົງເງິນສົ່ງອອກຄາດວ່າຈະບັນລຸແຕ່ 125 ຕື້ USD - 130 ຕື້ USD.