(vovworld) – ມາດຕະຖານປະເທດອຸດສາຫະກຳຕາມທິດທັນສະໄໝ ແມ່ນຫົວຂໍ້ຂອງກອງປະຊຸມດຳເນີນໄປໃນຕອນເຊົ້າວັນທີ 26/02, ຢູ່ຮ່າໂນ້ຍ. ກອງປະຊຸມສຳມະນາເພື່ອແນໃສ່ປະກອບສ່ວນປັບປຸງຮ່າງບົດລາຍງານສະຫຼຸບບາງບັນຫາທິດສະດີ, ພຶດຕິກຳຕົວຈິງໃນຕະຫຼອດ 30 ປີແຫ່ງການປ່ຽນໃໝ່ ແລະ ຮ່າງບົດລາຍງານການເມືອງ ສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ.
ທີ່ກອງປະຊຸມສຳມະນາ, ບັນດານັກຄຸ້ມຄອງ ແລະ ນັກຊ່ຽວຊານດ້ານເສດຖະກິດຖືວ່າ, ເພື່ອໃຫ້ຫວຽດນາມ ກາຍເປັນປະເທດອຸດສາຫະກຳໂດຍພື້ນຖານ ແມ່ນບັນຫາໃຫຍ່. ໃນໄລຍະ 2016 – 2020, ຫວຽດນາມ ຕ້ອງສຸມໃສ່ແກ້ໄຂບາງໜ້າທີ່ຈຸດສຸມນັ້ນແມ່ນ: ສຸມໃສ່ສ້າງພື້ນຖານ ແລະ ລະບອບກົດໝາຍ, ແຫຼ່ງຊັບພະຍາກອນມະນຸດ, ພື້ນຖານໂຄງລ່າງ; ເລືອກເຟັ້ນ, ພັດທະນາບາງຂະແໜງ, ຂົງເຂດອຸດສາຫະກຳທັນສະໄໝ ແລະ ເສີມຂະຫຍາຍໃນພື້ນຖານເສດຖະກິດ. ທ່ານ ຫງວຽນດຶກກຽນ, ຮອງຫົວໜ້າກຳມາທິການເສດຖະກິດຂອງສະພາແຫ່ງຊາດ ຊີ້ແຈ້ງທັດສະນະວ່າ.
“ມາດຕະຖານປະເທດອຸດສາຫະກຳໃນແຕ່ລະໄລຍະ ກໍ່ມີຄວາມແຕກຕ່າງກັນ, ສະນັ້ນ, ພວກເຮົາຕ້ອງກຳນົດພື້ນຖານກະສິກຳຫວຽດນາມ ດ້ວຍຈຳນວນພົນລະເມືອງທີ່ຜະລິດກະສິກຳກວມເຖິງ 73%. ພວກເຮົາຕ້ອງແກ້ໄຂບັນຫາກະສິກຳ, ຊົນນະບົດ, ແກ້ໄຂວິວັດທະນາການຫັນເຂດຊົນນະບົດເປັນຕົວເມືອງໃຫ້ໄດ້, ເວລານັ້ນພວກເຮົາຈຶ່ງເອີ້ນໄດ້ວ່າແມ່ນປະເທດອຸດສາຫະກຳ”.