(vovworld) - ວັນທີ 30/10, ຢູ່ຮ່າໂນ້ຍ, ກະຊວງຊັບພະຍາກອນສິ່ງແວດລ້ອມຫວຽດນາມ ໄດ້ປະກາດບົດລາຍງານແຫ່ງຊາດກ່ຽວກັບຊີວະນາໆພັນປີ 2011 ຂອງຫວຽດນາມ. ບົດລາຍງານແມ່ນປື້ມຄູ່ມືໜູນຊ່ວຍບັນດາອົງການສູນກາງ ແລະ ທ້ອງຖິ່ນໃນວິວັດການສ້າງແຜນສັງລວມ, ແຜນການ, ໂຄງການອະນຸລັກຮັກສາຊີວະນາໆພັນ ຈະລວບລວມກັບບັນດາບັນຫາປົກປັກຮັກສາສິ່ງແວດລ້ອມອື່ນ ແລະ ການຮັບມືກັບການປ່ຽນແປງຂອງດິນຟ້າອາກາດ, ປະກອບສ່ວນປະຕິບັດເປົ້າໝາຍພັດທະນາແບບຍືນຍົງຂອງປະເທດຊາດ, ພ້ອມທັງແມ່ນເອກະສານເພື່ອພິຈາລະນາຮັບໃຊ້ວຽກງານຄົ້ນຄວ້າດ້ານວິທະຍາສາດ, ບຳລຸງສ້າງ ແລະ ຮັບໃຊ້ວົງຄະນະຍາດ.
ໃນພິທີປະກາດບົດລາຍງານແຫ່ງຊາດກ່ຽວກັບຊີວະນາໆພັນປີ 2011, ກະຊວງຊັບພະຍາກອນສິ່ງແວດລ້ອມຫວຽດນາມ ກໍຈັດຕັ້ງກອງປະຊຸມສຳມະນາຍຸດທະສາດແຫ່ງຊາດກ່ຽວກັບຊີວະນາໆພັນເຖິງປີ 2020, ວິໄສທັດເຖິງປີ 2030. ຕາມທ່ານຮອງລັດຖະມົນຕີກະຊວງຊັບພະຍາກອນສິ່ງແວດລ້ອມຫວຽດນາມ Bui Cach Tuyen ແລ້ວ, ຫວຽດນາມ ໄດ້ຮັບການຮັບຮູ້ແມ່ນປະເທດທີ່ມີຊີວະນາໆພັນສູງສຸດໃນໂລກ, ມາຮອດປະຈຸບັນ ຫວຽດນາມ ໄດ້ມີກອບກົດໝາຍກ່ຽວຂ້ອງເຖິງການອະນຸລັກຮັກສາຊີວະນາໆພັນຢ່າງຄົບຖ້ວນພໍສົມຄວນ. ເລື່ອງສ້າງຍຸດທະສາດແຫ່ງຊາດກ່ຽວກັບຊີວະນາໆພັນເຖິງປີ 2020, ວິໄສທັດເຖິງປີ 2030 ແມ່ນຈຳເປັນ, ເພາະມັນແມ່ນພາກສ່ວນທີ່ບໍ່ອາດຕັດແຍກອອກຈາກຍຸດທະສາດແຫ່ງຊາດກ່ຽວກັບການພັດທະນາເສດຖະກິດສັງຄົມໄດ້, ເພື່ອແນໃສ່ປົກປັກຮັກສາ ແລະ ນຳໃຊ້ແຫຼ່ງຊັບພະຍາກອນຊີວະນາໆພັນຢ່າງໝັ້ນຄົງ, ສ້າງພື້ນຖານໃຫ້ແກ່ການພັດທະນາແບບຍື່ນຍົງໃຫ້ປະເທດຊາດໃນສະພາບສັງຄົມ, ເສດຖະກິດ ແລະ ສິ່ງແວດລ້ອມມີການຫັນປ່ຽນຢ່າງຕໍ່ເນື່ອງຄືປະຈຸບັນ.