(ທີ່ກອງປະຊຸມສຳມະນາ )
(vovworld) – ວັນທີ 27/8, ທ່ານນາງຮອງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ ໄດ້ໃຫ້ການຕ້ອນຮັບທ່ານ Yasuhisa Shiozaki ລັດຖະມົນຕີວ່າການກະຊວງສາທາລະນະສຸກ, ແຮງງານ ແລະ ສະຫວັດດີການ ຍີ່ປຸ່ນ. ທີ່ການຕ້ອນຮັບທ່ານ Yasuhisa Shiozaki ລັດຖະມົນຕີກະຊວງສາທາລະນະສຸກ, ແຮງງານ ແລະ ສະຫວັດດີການ ຍີ່ປຸ່ນ, ທ່ານນາງຮອງປະທານສະພາແຫ່ງຊາດ ຫງວຽນທິກີມເງິນ ປາດຖະໜາວ່າ: ຍີ່ປຸ່ນ ສືບຕໍ່ຮັບນັກເຝິກງານ, ນັກພະຍາບານ ຫວຽດນາມ ມາເຮັດວຽກຢູ່ ຍີ່ປຸ່ນ ເພື່ອຜົນປະໂຫຍດລວມຂອງປະຊາຊົນ 2 ປະເທດ ແລະ ພາລະກິດພັດທະນາຂອງແຕ່ລະປະເທດ.
ສ່ວນທ່ານ Yasuhisa Shiozaki ລັດຖະມົນຕີວ່າການກະຊວງສາທາລະນະສຸກ, ແຮງງານ ແລະ ສະຫວັດດີການ ຍີ່ປຸ່ນ ເນັ້ນໜັກວ່າ: ຍີ່ປຸ່ນ ຈະຮ່ວມມື ແລະ ຮັບເອົາບັນດາຂໍ້ສະເໜີຂອງ ຫວຽດນາມ, ພິເສດແມ່ນບັນດາບັນຫາໃນຂົງເຂດ ຊຶ່ງທ່ານຄຸ້ມຄອງໂດຍກົງ. ທ່ານລັດຖະມົນຕີ ກໍໃຫ້ຄຳໝັ້ນສັນຍາຈະສືບຕໍ່ຊຸກຍູ້ການຮັບເອົານັກເຝິກງານ ຫວຽດນາມ ມາຮ່ຳຮຽນ ແລະ ເຮັດວຽກຢູ່ ຍີ່ປຸ່ນ.
ກ່ອນໜ້ານັ້ນ, ທ່ານນາງຮອງປະທານສະພາແຫ່ງຊາດ ຫງວຽນທິກີມເງິນ ໄດ້ເຂົ້າຮ່ວມກອງປະຊຸມສຳມະນາ “ພັດທະນາເສດຖະກິດ ແລະ ບຳລຸງສ້າງແຫຼ່ງຊັບພະຍາກອນມະນຸດຂອງ ຫວຽດນາມ” ໂດຍກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ສົມທົບກັບອົງການບຳລຸງສ້າງແຫຼ່ງຊັບພະຍາກອນມະນຸດສາກົນ ຍີ່ປຸ່ນ (IM) ຈັດຕັ້ງ. ກ່າວຄຳເຫັນທີ່ກອງປະຊຸມສຳມະນາ, ທ່ານນາງຮອງປະທານສະພາແຫ່ງຊາດ ຫງວຽນທິກີມເງິນ ຢືນຢັນວ່າ: ຫວຽດນາມ ຖືເປັນສຳຄັນ ວຽກງານພັດທະນາແຫຼ່ງຊັບພະຍາກອນມະນຸດທີ່ສຸດ ບຳລຸງສ້າງຖັນແຖວກຳມະກອນເຕັກນິກມີສີມືສູງ, ມີລະບຽບວິໃນ ແລະ ເປັນເຈົ້າການນຳໃຊ້ເຕັກໂນໂລຊີທັນສະໄໝທີ່ສຸດ. ເພາະສະນັ້ນ, ໃນການຮ່ວມມືກັບ ຍີາປຸ່ນ, ຫວຽດນາມ ຍາມໃດກໍຕີລາຄາສູງ ແລະ ຖື ບັນຫາການຮ່ວມມືບຳລຸງສ້າງ, ພັດທະນາແຫຼ່ງຊັບພະຍາກອນມະນຸດແມ່ນສຳຄັນທີ່ສຸດ.