(vovworld) - Battambang ແມ່ນນະຄອນມໍລະດົກຢູ່ ກຳປູເຈຍ ດ້ວຍກິດຈະກຳສະຖາປັດຕະຍະກຳບູຮານຫລາຍແຫ່ງ. ຜ່ານການເວລາ, ກິດຈະກຳເຫລົ່ານັ້ນ ໄດ້ຖືກເປເພ, ໃນນັ້ນມີບັນດາກິດຈະກຳແບບສະຖາປັດຕະຍະກຳຝລັ່ງ. ປະຈຸບັນ, ອຳນາດການປົກຄອງ ແລະ ປະຊາຊົນນະຄອນ Battambang ພວມມານະພະຍາຍາມຮັກສາບັນດາກິດຈະກຳເຫົຼ່ານັ້ນ.
ເຮືອນບູຮານ ຢູ່ ນະຄອນ Battambang
ພາບ:internet
|
Battambang ແມ່ນນະຄອນຂຶ້ນກັບແຂວງ Battambang ປະເທດ ກຳປູເຈຍ ຫ່າງຈາກນະຄອນຫລວງ ພະນົມເປັນ 293 ກິໂລແມດ. ຢູ່ທີ່ນີ້ ມີກິດຈະກຳກວ່າ 800ແຫ່ງໄດ້ຮັບການກໍ່ສ້າງແຕ່ສະໄຫມຝລັ່ງ ໃນຊຸມປີຕົ້ນສັດຕະວັດທີ 20 ຄື ຕະຫລາດ Battambang, ສະຖານີລົດໄຟ, ສຳນັກງານປົກຄອງແຂວງ ແລະ ວີນລາບູຮານຫລາຍແຫ່ງ. ພ້ອມກັບການເວລາ, ກິດຈະກຳບາງແຫ່ງໄດ້ຖືກເປເພ ແລະ ເລື່ອງບຸລະນະສ້ອມແປງກໍເຮັດໃຫ້ 30 - 40%ຈຳນວນກິດຈະກຳບູຮານໃນນະຄອນ ຖືກສູນຫາຍໄປ. ເພາະວ່າ, ເມື່ອສ້ອມແປງເຮືອນຊານ ປະຊາຊົນບໍ່ຄິດເຖິງເລື່ອງຕ້ອງອະນຸລັກຮັກສາສະຖາປັດຕະຍະກຳບູຮານ. ປະຈຸບັນ, ອຳນາດການປົກຄອງແຂວງ Battambang ພວມພະຍາຍາມຂົນຂວາຍເພື່ອໃຫ້ປະຊາຊົນເຂົ້າໃຈເຖິງສິ່ງດັ່ງກ່າວ. ທ່ານ Ui Ry ຮອງເຈົ້າແຂວງແຂວງ Battambang ໃຫ້ຮູ້ວ່າ:
“ອຳນາດການປົກຄອງ ແລະ ສະພາປະຊາຊົນແຂວງ Battambang ໄດ້ມີເອກະສານກຳນົດກ່ຽວກັບການສ້ອງແປງບັນດາວີນລາບູຮານເພື່ອໃຫ້ປະຊາຊົນປະຕິບັດຕາມ. ພວກຂ້າພະເຈົ້າກໍຈັດຜູ້ທີ່ມີບົດຮຽນໃນການອະນຸລັກຮັກສາມາຊ່ວຍປະຊາຊົນໃນການສ້ອມແປງ ເຮັດແນວໃດເພື່ອແນໃສ່ອະນຸລັກຮັກສາການອອກແບບບູຮານໃຫ້ໄດ້.”
ປະຈຸບັນ, ມີກິດຈະກຳບາງແຫ່ງຖືກສ້ອມແປງບໍ່ຮັກສາຮູບເດີມໄວ້ໄດ້, ບາງກິດຈະກຳຖືກຕິດປ້າຍໂຄສະນາບໍ່ສາມາດເຫັນສະຖາປັດຕະຍະກຳໄດ້. ມີວີນລາບູຮານຫລາຍແຫ່ງຖືກສ້ອມແປງເປັນບັນດາຮ້ານສິນຄ້ານ້ອຍ. ຕໍ່ຫນ້າສະພາບການຄືດັ່ງກ່າວ, ມີນັກສະຖາປະນິກໄດ້ຮຽກຮ້ອງໃຫ້ອຳນາດການປົກຄອງມານະພະຍາຍາມກວ່າອີກໃນການອະນຸລັກຮັກສາບັນດາກິດຈະກຳບູຮານເຫຼົ່ານັ້ນ. ທ່ານ Sao Somvasak ນັກສະຖາປະນິກ ໃຫ້ຮູ້ວ່າ:
“ຂ້າພະເຈົ້າປາດຖະຫນາວ່າ ອຳນາດການປົກຄອງຄວນກຳນົດຢ່າງຈະແຈ້ງກ່ຽວກັບການອະນຸລັກຮັກສາບັນດາກິດຈະກຳບູຮານຄືດັ່ງອະນຸລັກຮັກສາບັນດາວັດວາອາຮາມ. ຂ້າພະເຈົ້າເຫັນວ່າ ພວກເຮົາບໍ່ທັນມີເອກະສານທາງດ້ານກົດໝາຍສະບັບໃດທີ່ກ່ຽວຂ້ອງເຖິງເລື່ອງອະນຸລັກຮັກສາບັນດາກິດຈະກຳບູຮານ. ພວກເຮົາຢາກໄດ້ຮັບການສະຫນັບສະຫນູນຈາກຂັ້ນລັດ ແລະ ບັນດາອົງການກ່ຽວຂ້ອງ. ທາງລັດຄວນສະຫງວນບ້ວງເງິນໃຫ້ແກ່ທ້ອງຖິ່ນໃນການອະນຸລັກຮັກສາບັນດາກິດຈະກຳສະຖາປັດຕະຍະກຳບູຮານ.”
ເຮືອນບູຮານຫລັງຫນຶ່ງພາຍຫລັງໄດ້ຮັບການບຸລະນະ
ພາບ:internet
|
ບັນດາຄວາມມານະພະຍາຍາມຂອງອຳນາດການປົກຄອງ Battambang ໃນການອະນຸລັກຮັກສາບັນດາກິດຈະກຳສະຖາປັດຕະຍະກຳບູຮານ ໄດ້ເຮັດໃຫ້ປະຊາຊົນສະໝັກໃຈເຂົ້າຮ່ວມການອະນຸລັກຮັກສາບັນດາກິດຈະກຳສະໄຫມຝລັ່ງ. ປ້າ Bun Ruon ພ້ອມກັບຄອບຄົວດຳລົງຊີວິດຢູ່ Battambang ໃຫ້ຮູ້ວ່າ: ເຮືອນຂອງປ້າໄດ້ຮັບການກໍ່ສ້າງແຕ່ສະໄຫມຝລັ່ງ ແລະ ປ້າປາຖະໜາຢາກຮັກສາບັນດາສະຖາປັດຕະຍະກຳບູຮານໃຫ້ໄດ້. ຕາມປ້າແລ້ວ, ເມື່ອປະຕິສັງຂອນຄວນຮັກສາຮູບເດີມໄວ້ໄດ້. ເພາະວ່າ ນີ້ແມ່ນບັນດາກິດຈະກຳທີ່ມີຄູນຄ່າປະຫວັດສາດ ແລະ ກໍເປັນພະຍານຫລັກຖານຂອງໄລຍະຫນຶ່ງທີ່ຄວນໄດ້ຮັບການຮັກສາໄວ້ໃຫ້ລູກຫລານລຸ້ນ ຕໍ່ໆໄປ.
“ຂ້າພະເຈົ້າຢາກຮັກສາໄວ້ ແຕ່ບາງບ່ອນຖືກເປເພຍ້ອນການເວລາ. ບາງຄົນເວົ້ານຳຂ້າພະເຈົ້າວ່າ ບໍ່ສາມາດຮັກສາຮູບເດີມໄວ້ໄດ້ ເພາະວ່າ ເຮືອນຫລັງນີ້ໄດ້ຮັບການກໍ່ສ້າງມາເປັນເວລາກວ່າ 100 ປີແລ້ວ ຄວນມ້າງໄປເພື່ອກໍ່ສ້າງໃຫມ່. ແຕ່ຂ້າພະພັດຢາກຮັກສາໄວ້. ດັ່ງນັ້ນພຽງແຕ່ສ້ອມແປງບາງບ່ອນທີ່ຖືກເປເພໜັກເທົ່ານັ້ນ. ເພາະວ່າ, ຖ້າພວກເຮົາອະນຸລັກຮັກສາໄວ້ ເພື່ອສ້າງເປັນຄຸ້ມເມືອງເກົ່າກໍ່ດີທີ່ສຸດ.”
ປະຈຸບັນ ຈຳນວນນັກທ່ອງທ່ຽວມາຢ້ຽມຢາມ Battambang ນັບມື້ນັບເພີ່ມຂຶ້ນ. ສິ່ງທີ່ດຶງດູດນັກທ່ອງທ່ຽວນັ້ນແມ່ນບັນດາກິດຈະກຳສະຖາປັດຕະຍະກຳປະຫວັດສາດ. ອຳນາດການປົກຄອງ ແລະ ປະຊາຊົນ Battambang ຮັບຮູ້ໄດ້ສິ່ງດັ່ງກ່າວ ແລະ ພວມມານະພະຍາຍາມຈົນສຸດຄວາມສາມາດຂອງຕົນເພື່ອອະນຸລັກຮັກສາ ແລະ ປະຕິສັງຂອນບັນດາກິດຈະກຳດັ່ງກ່າວຄືນໃຫມ່ ເພື່ອໃຫ້ Battambang ສົມເປັນນະຄອນມໍລະດົກຊຶ່ງນັກທ່ອງທ່ຽວໄດ້ຕັ້ງຊື່ໃຫ້.
Manh Cuong