(vovworld)- ນັບແຕ່ປີ 2013 ເປັນຕົ້ນໄປ, ຫວຽດນາມ ຮັບບົດບາດເປັນປະທານຫນ່ວຍງານ Marketing ແລະ ໂຄສະນາໃນການຮ່ວມມືທ່ອງທ່ຽວ ອາຊຽນ. ນີ້ແມ່ນຂໍ້ສະດວກທີ່ສຸດເພື່ອໃຫ້ ຫວຽດນາມ ໂຄສະນາ, ແນະນຳການທ່ອງທ່ຽວ ຫວຽດນາມ ໃນກຸ່ມອາຊຽນ ກໍຄືກັບບັນດາປະເທດອື່ນນອກພາກພື້ນ. ເຖິງຢ່າງໃດກໍຕາມ, ສິ່ງສຳຄັນນັ້ນແມ່ນ ຫວຽດນາມ ພວມພ້ອມກັບອາຊຽນ ມານະພະຍາຍາມປະຕິບັດຈຸດໝາຍໃຫຍ່ກວ່າ, ນຳອາຊຽນກາຍເປັນຈຸດນັດພົບອັນດູດດື່ມສຳລັບນັກທ່ອງທ່ຽວສາກົນ.
ດ້ວຍພົນລະເມືອງກວ່າ 600 ລ້ານຄົນ, ມີທີ່ຕັ້ງຍຸດທະສາດນອນໃນເຂດໃຈກາງ ອາຊີ, ວັດທະນະທຳ ແລະ ມໍລະດົກທຳມະຊາດອຸດົມສົມບູນ, ອາຊຽນ ໄດ້ຮັບການຕີລາຄາວ່າແມ່ນພາກພື້ນມີຄວາມສາມາດບົ່ມຊ້ອນອັນໃຫຍ່ຫລວງເພື່ອພັດທະນາຂະແຫນງທ່ອງທ່ຽວ. ນອກນັ້ນ ຄວາມເປັນຫລາຍຮູບຫລາຍແບບຂອງບັນດາປະເທດສະມາຊິກ, ຄ່າບໍລິການພໍດີກໍເປັນປັດໄຈດຶງດູດນັກທ່ອງທ່ຽວມາຢ້ຽມຢາມບັນດາປະເທດ ອາຊຽນ ໃນຊຸມປີມໍ່ໆມານີ້. ຕາມບົດລາຍງານ“ກຳລັງຄວາມສາມາດແກ້ງແຍ້ງ ການທ່ອງທ່ຽວປີ 2012” ຫາກໍປະກາດ, ຂະແຫນງທ່ອງທ່ຽວຂອງ ອາຊຽນ ພວມຢູ່ໃນທ່າພັດທະນາຢ່າງແຂງແຮງ. ປີ 2011, ຈຳນວນນັກທ່ອງທ່ຽວສາກົນມາຢ້ຽມຢາມ ພາກພື້ນ ອາຊຽນ ຂຶ້ນເຖິງ 81 ລ້ານເທື່ອຄົນ. ສະເພາະປີ 2012, ເຖິງວ່າ ໂລກປະສົບກັບວິກິດການການເງິນ, ລາຄານ້ຳມັນເພີ່ມຂຶ້ນສູງ ແລະ ໄພທຳມະຊາດໄດ້ສົ່ງຜົນສະທ້ອນໂດຍກົງເຖິງຫລາຍປະເທດໃນໂລກ, ແຕ່ຂະແຫນງທ່ອງທ່ຽວໄດ້ປະກອບສ່ວນຫລາຍພໍສົມຄວນໃນການຮັກສາເສດຖະກິດເປັນປົກກະຕິ ແລະ ການພັດທະນາຂອງພາກພື້ນ. ຂົງເຂດທ່ອງທ່ຽວໄດ້ປະກອບສ່ວນອັນໃຫຍ່ຫລວງເຂົ້າໃນການພັດທະນາລວມຂອງພື້ນຖານເສດຖະກິດ ສັງຄົມຂອງບັນດາປະເທດສະມາຊິກ, ສ້າງວຽກເຮັດງານທຳ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ຊ່ວຍຮັດແຄບຊ່ອງຫວ່າງການພັດທະນາເສດຖະກິດລະຫວ່າງບັນດາປະເທດສະມາຊິກ ອາຊຽນ, ສ້າງທ່າພັດທະນາເສດຖະກິດແບບຍືນຍົງໃຫ້ແກ່ພາກພື້ນ. ປີ 2012 ອາຊຽນ ໄດ້ຕ້ອນຮັບນັກທ່ອງທ່ຽວສາກົນກວ່າ 98 ລ້ານເທື່ອຄົນ, ເພີ່ມຂຶ້ນ 11,9% ເມື່ອທຽບໃສ່ປີ 2011. ທ່ານ Ramon R Jimenez ຮອງຫົວຫນ້າຫ້ອງການທ່ອງທ່ຽວ ຟີລີບປິນ ໃຫ້ຮູ້ວ່າ:
“ໃນອາຊຽນ, ຍາມໃດບັນດາປະເທດກໍມີການຮ່ວມມືນຳກັນຢ່າງແຫນ້ນແຟ້ນ, ໜູນຊ່ວຍເຊິ່ງກັນ ແລະ ກັນ ພ້ອມກັນພັດທະນາໃນຂົງເຂດເຊື່ອມຕໍ່, ຊຸກຍູ້ການພັດທະນາຂະແຫນງທ່ອງທ່ຽວຕາມທິດນຳ“ປະເທດຫນຶ່ງຂາດ, ບັນດາປະເທດອື່ນມີ” ເພື່ອເຮັດແນວໃດນຳ ອາຊຽນ ກາຍເປັນພາກພື້ນດຶງດູດນັກທ່ອງທ່ຽວຫລາຍກວ່າໝູ່. 10 ປະເທດສະມາຊິກ ອາຊຽນ ພວມມານະພະຍາຍາມສ້າງອາຊຽນກາຍເປັນຈຸດນັດພົບລວມ ພ້ອມກັບຈຸດໝາຍສ້າງປະຊາຄົມໃນປີ 2015.”
ເຖິງວ່າ ບັນລຸໄດ້ບັນດາໝາກຜົນຕັ້ງຫນ້າກໍຕາມ ແຕ່ຕາມການຕີລາຄາແລ້ວ, ບັນດາປະເທດສະມາຊິກ ອາຊຽນ ເກືອບທັງໝົດ ພຽງຂຸດຄົ້ນສ່ວນຫນຶ່ງຂອງຄວາມສາມາດບົ່ມຊ້ອນ ຍ້ອນມີບາງຈຸດອ່ອນ, ລວມມີ: ພື້ນຖານໂຄງລ່າງ, ບໍລິການສາທາລະນະສຸກ, ແລະ ການຄຸ້ມຄອງສິ່ງແວດລ້ອມຍັງຂາດ. ສະນັ້ນ ເພື່ອຮັບປະກັນການພັດທະນາຂະແຫນງທ່ອງທ່ຽວແບບຍືນຍົງ, ອາຊຽນ ຕ້ອງຕອບສະຫນອງພື້ນຖານໂຄງລ່າງຢ່າງຄົບຖ້ວນກໍຄືແຫລ່ງຊັບພະຍາກອນມະນຸດ, ຮັບປະກັນຄຸນນະພາບ ບໍລິການ, ສ້າງສະພາບແວດລ້ອມແຫ່ງການທ່ອງທ່ຽວຢ່າງປອດໄພ, ຂຽວ ແລະ ໝັ້ນຄົງ.
ກອງປະຊຸມ ລັດຖະມົນຕີກະຊວງທ່ອງທ່ຽວ ອາຊຽນ ຄັ້ງທີ 16
ພາບ:internet
|
ຊື່ງແມ່ນສະມາຊິກຕັ້ງຫນ້າຂອງອາຊຽນ, ໃນໄລຍະຜ່ານມາ, ຂະແຫນງທ່ອງທ່ຽວ ຫວຽດນາມ ໄດ້ເຂົ້າຮ່ວມທຸກການເຄື່ອນໄຫວຮ່ວມມືທ່ອງທ່ຽວໃນ ອາຊຽນ ຢ່າງຕັ້ງຫນ້າ ແລະ ຮອບດ້ານ. ໃນຂົງເຂດບຳລຸງສ້າງ, ພັດທະນາແຫລ່ງຊັບພະຍາກອນມະນຸດໃນຂົງເຂດທ່ອງທ່ຽວ, ດ້ວຍການຊ່ວຍເຫລືອຂອງໂຄງການເພີ່ມກຳລັງຄວາມສາມາດພັດທະນາການທ່ອງທ່ຽວມີຄວາມຮັບຜິດຊອບຕໍ່ສິ່ງແວດລ້ອມ ແລະ ສັງຄົມ ໂດຍສະຫະພາບ ເອີລົບອຸປະຖຳ, ຫວຽດນາມ ໄດ້ເປັນເຈົ້າພາບຮຽບຮຽງປື້ມແນະນຳການປະຕິບັດຂໍ້ຕົກລົງຮັບຮູ້ເຊິ່ງກັນ ແລະ ກັນ ສຳລັບບັນດາຂະແຫນງທ່ອງທ່ຽວ ອາຊຽນ. ປີ 2013- 2014, ຫວຽດນາມ ຮັບຫນ້າທີ່ເປັນປະທານກຸ່ມງານ Marketing ແລະ ໂຄສະນາ, ເສີມຂະຫຍາຍບົດບາດເປັນເຈົ້າການ, ຕັ້ງຫນ້າໃນການຮ່ວມມືທ່ອງທ່ຽວອາຊຽນ. ເສີມຂະຫຍາຍທ່າແຮງຂອງ ຫວຽດນາມ ນັ້ນແມ່ນ ພາກກາງຫວຽດນາມ ນອນໃນແລວເສດຖະກິດຕາເວັນອອກ - ຕາເວັນຕົກ, ຫວຽດນາມ ພວມພ້ອມກັບບັນດາປະເທດຂຸດຄົ້ນຄວາມສາມາດບົ່ມຊ້ອນຢ່າງໃຫຍ່ຫລວງຂອງພາກພື້ນຢ່າງສຸດຂີດ, ສ້າງບັນດາຜະລິດຕະພັນ, ລາຍການທ່ອງທ່ຽວມີເຄື່ອງໝາຍການຄ້າເພື່ອດຶງດູດນັກທ່ອງທ່ຽວ. ໄປຄຽງຄູ່ກັບການໂຄສະນາ ຕ້ອງຕັ້ງຫນ້າສ້າງນະໂຍບາຍເພື່ອສ້າງເງື່ອນໄຂສະດວກໃຫ້ແກ່ນັກທ່ອງທ່ຽວໄປມາໃນບໍລິເວນແລວເສດຖະກິດຕາເວັນອອກ - ຕາເວັນຕົກ. ຫລຸດຜ່ອນບັນດາລະບຽບການບໍລິຫານທີ່ບໍ່ຈຳເປັນ, ພ້ອມທັງນຳໃຊ້ເຕັກໂນໂລຊີຢູ່ບັນດາດ່ານຊາຍແດນສາກົນທາງບົກ, ສະຫນາມບິນ, ທ່າກຳປັ່ນ. ທ່ານ ຫງວຽນແມ້ງເກື່ອງ, ຮອງຫົວຫນ້າກົມໃຫຍ່ທ່ອງທ່ຽວ ຫວຽດນາມ ຖືວ່າ:
“ແຕ່ລະທ້ອງຖິ່ນມີທ່າແຮງຫນຶ່ງເພື່ອສຸມໃສ່ສ້າງ ແລະ ພັດທະນາເຄື່ອງໝາຍທ່ອງທ່ຽວ. ນີ້ແມ່ນສະຖານທີ່ມີທັດສະນີຍະພາບ, ປູຊະນີຍະສະຖານປະຫວັດສາດຫລາຍແຫ່ງ ເຊິ່ງເປັນຮ່ອງຮອຍຈາກສົງຄາມ, ສະນັ້ນ ຕ້ອງຂຸດຄົ້ນ, ສ້າງຈຸດເດັ່ນ, ມີວິວັດການເພື່ອປະຕິບັດ. ພວກເຮົາຕ້ອງສ້າງຜະລິດຕະພັນລະຫວ່າງເຂດ. ບັນດາປະເທດຄວນຮວ່ມສຳພັນ, ຮ່ວມມືນຳກັນ ເຮັດແນວໃດເພື່ອຫລຸດຜ່ອນບັນດາລະບຽບການບໍລິຫານໃຫ້ສະດວກແລະງ່າຍດາຍກວ່າ.”
ວັດຢູ່ ມ້ຽນມາ
ພາບ:internet
|
ປະຈຸບັນ ອາຊຽນ ກວມອັດຕາສວ່ນ 10%ຂອງຈຳນວນການທ່ອງທ່ຽວທົ່ວໂລກ ແລະ ອັດຕາສ່ວນນີ້ໄດ້ຮັບການຄາດຄະເນວ່າຈະເພີ່ມຂຶ້ນ 30% ໃນຮອບເວລາ 10 - 20ປີຈະມາເຖິງ. ສືບຕໍ່ສົມທົບກັນຢ່າງມີປະສິດທິຜົນລະຫວ່າງບັນດາປະເທດ ອາຊຽນ, ລະຫວ່າງ ອາຊຽນກັບບັນດາປະເທດຄູ່ເຈລະຈາ, ພິເສດແມ່ນປະຕິບັດແຜນຍຸດທະສາດການທ່ອງທ່ຽວໄລຍະ 2012-2015 ແນ່ນອນວ່າຈະດຶງດູດນັກທ່ອງທ່ຽວສາກົນມາຍັງພາກພື້ນ, ປະກອບສ່ວນອັນໃຫຍ່ຫລວງເຂົ້າໃນການພັດທະນາເສດຖະກິດສັງຄົມຂອງບັນດາປະເທດ ອາຊຽນ, ຮັບແຄບຊ່ອງຫວ່າງການພັດທະນາເສດຖະກິດສັງຄົມລະຫວ່າງ ອາຊຽນ.