(vovworld) - ການລົງທຶນ, ດຳເນີນທຸລະກິດຢູ່ ສປປ ລາວ ແມ່ນຫນຶ່ງໃນບັນດາຍຸດທະສາດຊຶ່ງວິສາຫະກິດ ຫວຽດນາມ ຫລາຍແຫ່ງພວມມູ້ງໄປເຖິງ, ໃນນັ້ນມີບັນດາທະນາຄານການຄ້າ ຫວຽດນາມ. ເພາະວ່າ ຕາມບັນດາທະນາຄານເຫົຼ່ົານີ້, ຫວຽດນາມ ແລະ ລາວ ມີສາຍພົວພັນມິດຕະພາບທີ່ເປັນມູນເຊື້ອແບບພິເສດ, ມີຄວາມສະຫນິດຕິດພັນ, ໄວ້ເນື້ອເຊື່ອໃຈ ແລະ ໃກ້ຊິດສະຫນິດສະຫນົມ. ເລື່ອງບັນດາທະນາຄານດັ່ງກ່າວມີຫນ້າຢູ່ ລາວ ຈະແມ່ນຂົວຕໍ່, ຮັບໃຊ້ຄວາມຕ້ອງການດ້ານທຶນຮອນ, ການບໍລິການທະນາຄານ, ຫນູນຊ່ວຍບັນດາວິສາຫະກິດ ຫວຽດນາມ ລົງທຶນຜະລິດດຳເນີນທຸລະກິດ ຢູ່ ລາວ ພ້ອມທັງປະກອບສ່ວນຊຸກຍູ້ດ້ານເສດຖະກິດ ການຄ້າ ລະຫວ່າງ ສອງປະເທດ ຫວຽດນາມ ແລະ ລາວ.
ທະນາຄານລົງທຶນ ແລະ ພັດທະນາ ຫວຽດນາມ (BIDV) ແມ່ນທະນາຄານແຫ່ງທຳອິດຂອງ ຫວຽດນາມ ທີ່ຮ່ວມມືດຳເນີນທຸລະກິດຢູ່ ສປປ ລາວ. ວັນທີ 22/6/1999, ທະນາຄານລົງທຶນ ແລະ ພັດທະນາ ຫວຽດນາມ (BIDV) ແລະ ທະນາຄານການຄ້າ ລາວ (BCEL) ໄດ້ລົງນາມໃນຂໍ້ຕົກລົງຮ່ວມມືສ້າງຕັ້ງທະນາຄານຮ່ວມທຸລະກິດ ລາວ ຫວຽດ (LVB). ຕາມທ່ານ Nguyen Kim Dieu ຮອງຜູ້ອຳນວຍການໃຫຍ່ LVB ແລ້ວ, ພາຍຫລັງ 12 ປີ ແຫ່ງການເຄື່ອນໄຫວ, ຍອດຈຳນວນຊັບສິນຂອງທະນາຄານ LVB ໄດ້ເພີ່ມຂຶ້ນທົບ 30 ເທົ່າ, ບັນລຸກວ່າ 330 ລ້ານ USD, ລະດັບເຕີບໂຕແຕ່ລະປີບັນລຸກວ່າ 30%. ດ້ວຍທ່າເຕີບໂຕນັ້ນ, ທະນາຄານ LVB ໄດ້ຜັນຂະຫຍາຍເປີດສາຂາຢູ່ບັນດາແຂວງ ຂອງລາວຕື່ມອີກ 3 ແຫ່ງ. ນອກຈາກການເຄື່ອນໄຫວດຳເນີນທຸລະກິດແລ້ວນັ້ນ, ທະນາຄານ LVB ຍັງແມ່ນແຫ່ງເປັນທີ່ປຶກສາຫນູນຊ່ວຍ ແລະ ເຊື່ອມຕໍ່ຂໍ້ມູນຂ່າວສານໃນການສົ່ງເສີມການລົງທຶນ, ການຄ້າ ລະຫວ່າງສອງປະເທດ.
ສາຂາທະນາຄານທະຫານ ຫວຽດນາມ ຢູ່ ລາວ
ພາບ: internet
|
ໂດຍສືບຕໍ່ຜົນສຳເລັດຂອງທະນາຄານລົງທຶນ ແລະ ພັດທະນາ ຫວຽດນາມ ຢູ່ ສປປ ລາວ, ທະນາຄານຫຸ້ນສ່ວນທະຫານ ຫວຽດນາມ (MB) ກໍເປີດສາຂາຢ່າງເປັນທາງການຢູ່ ລາວ ເມື່ອວັນທີ 14/10/2010. ການມີຫນ້າຂອງທະນາຄານຫຸ້ນສ່ວນ ທະຫານ ຫວຽດນາມ ຢູ່ ລາວ ໄດ້ດຶງດູດຄວາມສົນໃຈຈາກທຸກຂະແຫນງ, ທຸກຂັ້ນ ແລະ ວິສາຫະກິດສອງປະເທດ. ທ່ານ ທອງມີ ພົມວິໄຊ ຮອງລັດຖະມົນຕີກະຊວງແຜນການ ແລະ ການລົງທຶນ ລາວ ໄດ້ຊົມເຊີຍການມີຫນ້າ ຂອງທະນາຄານຫຸ້ນສ່ວນທະຫານຫວຽດນາມຢູ່ລາວ ແລະ ຢືນຢັນວ່າ: ຈະສ້າງທຸກເງື່ອນໄຂສະດວກເພື່ອໃຫ້ທະນາຄານຫຸ້ນສ່ວນທະຫານ ຫວຽດນາມ ດຳເນີນທຸລະກິດບັນລຸໝາກຜົນເປັນຢ່າງດີ.
ສຽງທ່ານ ທອງມີ ພົມວິໄຊ.
ທ່ານ Le Van Be ຮອງປະທານສະພາບໍລິຫານທະນາຄານຫຸ້ນສ່ວນທະຫານຫວຽດນາມ ໃຫ້ຮູ້ວ່າ: ດ້ວຍຈຳນວນທຶນເບື້ອງຕົ້ນແມ່ນ 12 ລ້ານ USD, ສາຂາທະນາຄານຫຸ້ນສ່ວນທະຫານຫວຽດນາມ ຢູ່ ລາວ ຈະຮັບໃຊ້ບັນດາວິສາຫະກິດ ຫວຽດນາມ ລົງທຶນຢູ່ ລາວ, ບັນດາວິສາຫະກິດ ແລະ ນິຕິບຸກຄົນຂອງ ລາວ, ບັນດາລູກຄ້າແມ່ນຊາວ ຫວຽດນາມ ອາໄສຢູ່ລາວ ແລະ ຊາວລາວ, ພ້ອມທັງປະກອບສ່ວນຊຸກຍູ້ຕະຫລາດເງິນຕາ ແລະ ເສດຖະກິດຂອງລາວ ໃຫ້ພັດທະນາ.
“ ເລື່ອງທະນາຄານຫຸ້ນສ່ວນທະຫານ ຫວຽດນາມ ໄດ້ຮັບຫນັງສືອະນຸຍາໃຫ້ລົງທຶນຢູ່ ສປປ ລາວ ແມ່ນບາດກ້າວເລີ່ມຕົ້ນໃຫ້ແກ່ທະນາຄານທະຫານຫວຽດນາມ ອອກສູ່ຕະຫລາດພາກພື້ນ ແລະ ໂລກ. ພວກຂ້າພະເຈົ້າປາຖະຫນາວ່າ ການເຂົ້າຮ່ວມຂອງທະທາຄານຫຸ້ນສ່ວນທະຫານ ຫວຽດນາມ ຢູ່ ສປປ ລາວ ຈະປະກອບສ່ວນເພີ່ມທະວີນ້ຳໃຈມິດຕະພາບ ລະຫວ່າງສອງປະເທດ, ສ້າງເງື່ອນໄຂຊຸກຍູ້ການພົວພັນດ້ານການຄ້າ ແລະ ການລົງທຶນໃຫ້ນັບມື້ນັບເພີ່ມຂຶ້ນລະຫວ່າງ ຫວຽດນາມ ແລະ ລາວ.”
ພິທີເປີດສາຂາທະນາຄານ Vietinbank ຢູ່ ສປປ ລາວ
ພາບ: internet
|
ຖັດຈາກທະນາຄານຫຸ້ນສ່ວນທະຫານ ຫວຽດນາມ, ວັນທີ 9/2/2012 ຜ່ານມາ, ມີທະນາຄານຂອງ ຫວຽດນາມ ອີກແຫ່ງຫນຶ່ງເປີດສາຂາຢູ່ ສປປລາວ ຢ່າງເປັນທາງການ, ນັ້ນແມ່ນ ທະນາຄານຫຸ້ນສ່ວນອຸດສາຫະກຳ ການຄ້າ ຫວຽດນາມ (Vietinbank). ທ່ານ Pham Huy Hung ປະທານສະພາບໍລິຫານ Vietinbank ໃຫ້ຮູ້ວ່າ: ກໍເຊັນດຽວກັບບັນດາທະນາຄານ BIDV, MB. Vietinbank ມີຄວາມເອກອ້າງທະນົງໃຈເມື່ອມີຫນ້າຢູ່ ປະເທດລາວ ອ້າຍນ້ອງ ເພື່ອປະຕິບັດບັນດາການເຄື່ອນໄຫວວິຊາສະເພາະ, ບໍລິການທະນາຄານ, ປະກອບສ່ວນຮັບໃຊ້ປະຊາຄົມວິສາຫະກິດ ແລະ ນັກທຸລະກິດ ລາວ, ຮັບໃຊ້ວົງຄະນາຍາດຊາວ ຫວຽດນາມ ພວມດຳລົງຊີວິດ ແລະ ເຮັດວຽກຢູ່ ລາວ, ຊຸກຍູ້ການພົວພັນແລກປ່ຽນດ້ານການຄ້າ ແລະ ການຮ່ວມມືເສດຖະກິດ, ລົງທຶນ ຂອງບັນດາວິສາຫະກິດ ຫວຽດນາ ເຂົ້າລາວ. ສ່ວນທ່ານ ສົມພາວ ໄພສິດ ຜູ້ວ່າການທະນາຄານແຫ່ງ ສປປ ລາວ ໄດ້ເນັ້ນຫນັກວ່າ: Vietinbank ເປີດສາຂາຢູ່ ລາວ ແມ່ນມີຄວາມໝາຍສຳຄັນພິເສດ, ແມ່ນກົງກັບຈຸດເວລາຊຶ່ງພັກ ແລະ ປະຊາຊົນສອງປະເທດ ພວມມີຄວາມເບິກບານມ່ວນຊຶ່ນຈັດຕັ້ງການສະເຫລີມສະຫລອງ 50 ປີ ແຫ່ງວັນສ້າງສາຍພົວພັນທາງການທູດ ແລະ 35 ປີ ແຫ່ງວັນເຊັນສົນທິສັນຍາມິດຕະພາບລະຫວ່າງສອງປະເທດ. ສິ່ງດັ່ງກ່າວແມ່ນສະແດງໃຫ້ເຫັນຄວາມໄວ້ເນື້ອເຊື່ອໃຈຂອງ Vietinbank ຕໍ່ແນວທາງນະໂຍບາຍຂອງພັກ, ລັດ ສປປ ລາວ. ເລື່ອງ Vietinbank ເປີດສາຂາຢູ່ລາວ ບໍ່ພຽງແຕ່ປະກອບສ່ວນເຮັດໃຫ້ຂະແຫນງທະນາຄານຂອງ ລາວ ພັດທະນາເທົ່ານັ້ນ, ຫາກຍັງແມ່ນທະນາຄານແບບຢ່າງ, ທີ່ນຳຮູບການບໍລິຫານຢ່າງຊຳນານງານ, ເຕັກໂນໂລຊີທັນສະໄຫມ, ບໍລິການການເງິນເປັນຫລາຍຮູບແບບ ມາໃຫ້ ປະຊາຊົນລາວ, ວິສາຫະກິດ ລາວ ອີກດ້ວຍ.
ໃນສະພາບການເສດຖະກິດການເງິນໂລກ ພວມຜັນແປໄປຢ່າງສັບສົນ, ພື້ນຖານເສດຖະກິດຂອງສອງປະເທດ ຫວຽດນາມ ແລະ ລາວ ພວມປະສົບກັບຄວາມຫຍຸ້ງຍາກຫລາຍຢ່າງ. ແຕ່ດ້ວຍນ້ຳໃຈ້ມິດຕະພາບ, ການຮ່ວມມືແບບພິເສດ ລະຫວ່າງສອງປະເທດ, ບັນດາວິສາຫະກິດ ຫວຽດນາມ ແລະ ລາວ, ພິເສດ ແມ່ນບັນດາທະນາຄານໄດ້ຮຽງບ່າຮຽງໄຫລ່ກັນນັ້ນ ຈະນຳພື້ນຖານເສດຖະກິດສອງປະເທດຜ່ານຜ່າຄວາມຫຍຸ້ງຍາກ, ພ້ອມກັນພັດທະນາ ແລະ ປະກອບສ່ວນຮັດແຫນ້ນຄວາມສາມັກຄີມິດຕະພາບລະຫວ່າງສອງຊາດຍິ່ງກວ່າອີກ.
ແອງດ່າວ