ທ່ານນາຍົກລັດຖະມົນຕີຫງວຽນເຕີນຢູງ ແລະທ່ານນາຍົກລັດຖະມົຕີ ທອງສິງທຳມະວົງເປັນເຈົ້າພາບກອງະຊຸມການຮ່ວມມືລົງທຶນຫວຽດນາມ ລາວ
ພາບປະກອບ (ພາບ:chinhphu.vn)
(vovworld) - ປີ 2011 ແມ່ນປີທີ່ມີບັນດາບາດກ້າວຫັນປ່ຽນບຸກທະລຸໃນການເຄື່ອນໄຫວຮ່ວມມືລົງທຶນ ແລະ ການຄ້າຂອງຫວຽດນາມ ຢູ່ລາວ. ໃນປີຜ່ານມາ, ຫວຽດນາມ ລົງທຶນເຂົ້າລາວ 39 ໂຄງການໃຫຍ່ ດ້ວຍມູນຄ່າ 275 ລ້ານ USD, ວົງເງິນການຄ້າສອງສົ້ນບັນລຸ 700 ລ້ານ USD, ເພີ່ມຂຶ້ນເກືອບ 70 % ເມື່ອທຽບໃສ່ປີ 2010.ນີ້ແມ່ນຕົວເລກສະຖິຕິດີພໍສົມຄວນ, ສ້າງບາດກ້າວບຸກທະລຸໃນການເຄື່ອນໄຫວຮ່ວມມືລົງທຶນຫວຽດນາມ ແລະລາວ.
ດ້ວຍຄວາມມານະພະຍາຍາມ ແລະ ຄວາມຕັດສິນໃຈຂອງການນຳສອງປະເທດ ເພື່ອມູ້ງໄປເຖິງປີແຫ່ງຄວາມສາມັກຄີມິດຕະພາບ ຫວຽດນາມ ລາວ ປີ 2012 ແລະ ສະເຫລີມສະຫລອງ 50 ປີ ແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ, ມີການເຄື່ອນໄຫວຫລາຍຢ່າງໄດ້ຮັບການຜັນຂະຫຍາຍ ໃນນັ້ນພົ້ນເດັ່ນແມ່ນການເຄື່ອນໄຫວຮ່ວມມືລົງທຶນ. ທີ່ກອງປະຊຸມການຮ່ວມມືລົງທຶນ ຫວຽດນາມ ລາວ ທີ່ດຳເນີນໄປໃນເດືອນກັນຍາປີ 2011, ທ່ານນາຍົກລັດຖະມົນຕີ ລາວ ທອງສິງ ທຳມະວົງ ໄດ້ຢືນຢັນວ່າ ການລົງທຶນຂອງຫວຽດນາມ ແມ່ນແບບຢ່າງກ່ຽວກັບການລົງທຶນຕ່າງປະເທດ, ປະກອບສ່ວນອັນຕັ້ງຫນ້າເຂົ້າໃນການສ້າງສາ ແລະ ພັດທະນາເສດຖະກິດ ສັງຄົມຂອງລາວ.
ຫນຶ່ງໃນບັນດາແບບຢ່າງກ່ຽວກັບການເຄື່ອນໄຫວຂອງວິສາຫະກິດຫວຽດນາມ ຢູ່ ລາວ ນັ້ນແມ່ນການຮ່ວມທຸລະກິດລະຫວ່າງ ກຸ່ມບໍລິສັດໂທລະຄົມມະນາຄົມການທະຫານ Viettel ແລະ ບໍລິສັດໂທລະຄົມມະນາຄົມລາວ Lao telecom (Unitel). ໂດຍນຳເຂົ້າເຄື່ອນໄຫວຢ່າງເປັນທາງການເມື່ອ ປີ 2009, ໃນເບື້ອງຕົ້ນ ມີສະຖານີກະຈາຍຄື້ນພຽງ100 ແຫ່ງ ແລະ ສ້າງລາຍຮັບໄດ້ 2.4 ລ້ານUSD /ປີ ເທົ່ານັ້ນ, ມາຮອດປະຈຸບັນ Unitel ໄດ້ກາຍເປັນຫນຶ່ງໃນບັນດາບໍລິສັດໃຫຍ່ກວ່າໝູ່ຢູ່ລາວ ດ້ວຍລາຍຮັບໃນປີ 2011 ບັນລຸເກືອບ 110 ລ້ານໂດລາສະຫະລັດ, ເພີ່ມອັດຕາສ່ວນຄອງຕະຫລາດຂຶ້ນ 40% , ນຳຫນ້າຕະຫລາດໂທລະຄົມມະນາຄົມ ຢູ່ ລາວ. ດ້ວຍຄວາມຮັບຮູ້ທີ່ວ່າ: ການດຳເນີນທຸລະກິດຕ້ອງຕິດພັນກັບຄວາມຮັບຜິດຊອບຕໍ່ສັງຄົມ, Unitel ຍັງຕັ້ງຫນ້າເຂົ້າຮ່ວມບັນດາໂຄງການຮັບປະກັນຊີວິດສັງຄົມ, ບັນດາໂຄງການຮັບໃຊ້ຊີວິດການເປັນຢູ່ຂອງປະຊາຊົນ ແລະ ໄດ້ຮັບການຕີລາຄາສູງຈາກພັກ, ລັດ, ກອງທັບ ແລະ ປະຊາຊົນລາວຄື: ໄດ້ຕິດຕັ້ງເຄືອຂ່າຍອິນເຕີແນດໂດຍບໍ່ຕ້ອງເສຍຄ່າໃຫ້ແກ່ໂຮງຮຽນ ແລະ ຮາກຖານການສຶກສາຫລາຍ ແຫ່ງ, ສະຫນອງເຄື່ອງຄອມພິວເຕີໃຫ້ແກ່ເດັກພິການ ແລະ ໂທລະສັບໃຫ້ແກ່ປະຊາຊົນທຸກຍາກ. ທ່ານ ຟ້າມແທນຊາງ ຜູ້ອຳນວຍການໃຫຍ່ບໍລິສັດໄດ້ແບ່ງປັນວ່າ:
“ຫນຶ່ງໃນບັນດາສິ່ງທີ່ພວກຂ້າພະເຈົ້າມີຄວາມເອົາໃຈໃສ່ຕົ້ນຕໍນັ້ນແມ່ນ ເມື່ອລົງທຶນເຂົ້າລາວ ຕ້ອງເຂົ້າໃຈກ່ຽວກັບວັດທະນະທຳ ປະເທດຊາດ ແລະ ປະຊາຊົນລາວ. ແລະ ກົງກັນຂ້າມ ພວກຂ້າພະເຈົ້າກໍຊອກທຸກວິທີ ເຮັດແນວໃດເພື່ອໃຫ້ພະນັກງານ ລັດຖະກອນ ລາວ ເຂົ້າໃຈໄດ້ກ່ຽວກັບວັດທະນະທຳ ແລະ ວິທີເຮັດວຽກຂອງຊາວຫວຽດນາມ ເພື່ອສາມາດປະສານສົມທົບນຳກັນໄດ້. ນັ້ນແມ່ນປະຖົມປັດໃຈ ໃຫ້ແກ່ການພັດທະນາວຽກງານ ກໍຄືບັນຫາບຳລຸງສ້າງ, ການຈັດຕັ້ງໃນບໍລິສັດ. ນອກນັ້ນ ຫນຶ່ງໃນບັນດາຈຸດພິເສດຂອງ Vietel ເມື່ອລົງທຶນຢູ່ຕ່າງປະເທດ ແມ່ນທຸກສິ່ງທຸກຢ່າງຕ້ອງປະຕິບັດຢ່າງວ່ອງໄວ ແລະ ຮຽບຮ້ອຍ.”
ບໍລິສັດປະກັນໄພ ຫວຽດ ລາວ ກໍແມ່ນຫນຶ່ງໃນບັນດາບໍລິສັດເຄື່ອນໄຫວດຳເນີນທຸລະກິດໂດຍໄວ ແລະ ເສີມຂະຫຍາຍຢ່າງມີປະສິດທິຜົນຢູ່ຕະຫລາດຂອງລາວ. ປີ 2011 ລາຍຮັບຂອງບໍລິສັດ ເພີ່ມຂຶ້ນ 112% ເມ່ືອທຽບໃສ່ປີ 2011 ບັນລຸກວ່າ 4 ລ້ານໂດລາສະຫະລັດ. ນີ້ແມ່ນບໍລິສັດຫນຶ່ງດຽວ ເປີດຫ້ອງການພົວພັນຕິດຕໍ່ 9 ແຫ່ງ ຢູ່ ບັນດາແຂວງນະຄອນໃຫຍ່ຂອງລາວ. ທ່ານ ຫວູມີນຫາຍ ຜູ້ອຳນວຍການໃຫຍ່ ທັງເປັນຮອງປະທານສະມາຄົມວິສາຫະກິດ ຫວຽດນາມ ລົງທຶນ ຢູ່ ລາວ ໄດ້ແບ່ງປັນບົດຮຽນວ່າ:
“ ເມື່ອໄປລົງທຶນຢູ່ລາວ, ຫນ້າທີ່ທຳອິດ ພວກເຮົາຕ້ອງສຸມໃສ່ບຳລຸງສ້າງ ແຫລ່ງຊັບພະຍາກອນມະນຸດ ແລະ ບັນຫາສຳຄັນໜຶ່ງອີກແມ່ນຕ້ອງມີສູນການຄ້າຂອງຫວຽດນາມ. ຕົວຢ່າງຄື ຢູ່ ລາວ ໄດ້ມີບັນດາຕະຫລາດຂອງຈີນ, ສູນ ລາວ Itech ຂອງໄທ. ຫວຽດນາມ ຈຳເປັນຕ້ອງມີສູນການຄ້າແຫ່ງຫນຶ່ງ, ເພື່ອເປັນສະຖານທີ່ໃຫ້ບັນດາວິສາຫະກິດພົບປະ ສ້າງເງື່ອນໄຂຫນູນຊ່ວຍໃຫ້ບັນດາວິສາຫະກິດວາງສະແດງບັນດາຜະລິດຕະພັນ ກໍ່ຄືໂຄສະນາກ່ຽວກັບການບໍລິການຂອງຕົນ, ເປັນຕົ້ນແມ່ນການຫນູນຊ່ວຍເຊິ່ງກັນ ແລະ ກັນກ່ຽວກັບຊັບພະຍາກອນມະນຸດ, ກ່ຽວກັບດ້ານທຶນຮອນ. ພິເສດ ແມ່ນບົດຮຽນໃນການບໍລິຫານ.”
ວິສາຫະກິດຫວຽດນາມ ລົງທຶນປູກຕົ້ນຢາງພາລາຢູ່ ລາວ
ພາບ:TTXVN
ນອກນັ້ນ ຍັງມີບໍລິສັດ, ວິສາຫະກິດຫວຽດນາມ ຫລາຍແຫ່ງໄດ້ ແລະ ພວມລົງທຶນຢ່າງມີປະສິດທິຜົນໃນຫຼາຍຂົງເຂດຢູ່ລາວ ຄື: ຂຸດຄົ້ນບໍ່ແຮ່, ພະລັງງານ, ປູກປ່າ. ໃນນັ້ນກຸ່ມບໍລິສັດຮ່ວາງແອງຢາລາຍ, ບໍລິສັດກອບສ ລອງແທ່ນ... ໄດ້ຮັບການຕີລາຄາສູງ..
ອາດຈະເວົ້າໄດ້ວ່າ ປີ 2011 ແມ່ນປີແຫ່ງຜົນສຳເລັດຂອງວິສາຫະກິດຫວຽດນາມຫລາຍແຫ່ງທີ່ພວມດຳເນີນທຸລະກິດຢູ່ລາວ. ເຖິງຢ່າງໃດກໍຕາມ ໃນຊຸມປີຈະມາເຖິງ ຄຽງຂ້າງບັນດາກາລະໂອກາດໃຫ່ຍນັ້ນ, ຍັງມີສິ່ງທ້າທາຍບໍ່ຫນ້ອຍສຳລັບບັນດາວິສາຫະກິດຫວຽດນາມ, ຂະນະທີ່ບັນດາວິສາຫະກິດຕ່າງປະເທດເຂົ້າມາລົງທຶນຢູ່ລາວນັບມື້ນັບຫຼາຍ.
ແອນດ່າວ+ຜູ້ຮ່ວມງານ