(vovworld)- ໄລ່ມາຮອດເດືອນ 3/2013, ມາເລເຊຍ ມີເນື້ອທີ່ດິນກວ່າ 4,6 ລ້ານຕາລາງແມັດທີ່ໄດ້ສະຫງວນໃຫ້ແກ່ບັນດາໂຄງການບູລະນະ ແລະ ກໍ່ສ້າງບັນດາກິດຈະກຳບໍ່ກໍ່ມົນລະພິດເຖິງສິ່ງແວດລ້ອມ. ນີ້ແມ່ນໝາກຜົນຊື່ງບັນດານັກສະຖາປານິກ ພ້ອມກັບບັນດາເຈົ້າຂອງລົງທຶນ ມາເລເຊຍ ມຸ້ງໄປເຖິງເພື່ອປະຢັດພະລັງງານ, ປະຢັດນ້ຳ ແລະ ຫລຸດຜ່ອນສິ່ງເສດເຫລືອ.
ຮູບພາບກ່ຽວກັບປະເທດມາເລເຊຍ
ພາບ:internet
|
ກໍເຊັ່ນດຽວກັນກັບຫລາຍປະເທດທີ່ພວມພັດທະນາ, ບັນດານະຄອນ ແລະ ເຂດຕົວເມືອງຢູ່ມາເລເຊຍ ນັບມື້ນັບໄດ້ຮັບການເປີດກວ້າງເພື່ອຕອບສະຫນອງຄວາມຕ້ອງການກ່ຽວກັບພື້ນຖານໂຄງລ່າງຂອງປະຊາຊົນ. ເຖິງຢ່າງໃດກໍຕາມ, ວິວັດການນີ້ກໍເຮັດໃຫ້ສິ່ງເສດເຫລືອເພີ່ມຂຶ້ນ. ຕາມການສະຖິຕິແລ້ວ, ມາເລເຊຍຖືກຈັດອັນດັບທີ 66 ໃນໂລກກ່ຽວກັບດັດຊະນີພັດທະນາມະນຸດໃນປີ 2009 ແຕ່ພັດຢືນອັນດັບທີ 54 ກ່ຽວກັບດັດຊະນີປະສິດທິຜົນສິ່ງແວດລ້ອມໃນປີ 2010, ຫລຸດລົງ 28 ຂັ້ນເມື່ອທຽບໃສ່ປີ 2008. ສິ່ງດັ່ງກ່າວສະແດງໃຫ້ເຫັນວ່າ ພື້ນຖານເສດຖະກິດ ແລະ ຄຸນນະພາບການດຳລົງຊີວິດຂອງປະຊາຊົນມາເລເຊຍ ໄດ້ຮັບການຍົກສູງຂຶ້ນ ແຕ່ຜົນສະທ້ອນຈາກສິ່ງແວດລ້ອມບໍ່ແມ່ນຫນ້ອຍ ເຮັດໃຫ້ປະເທດມາເລເຊຍ ຕ້ອງມີມາດຕະການແກ້ໄຂເພື່ອສ້າງຄວາມດຸນດຽງລະຫວ່າງການພັດທະນາເສດຖະກິດ ກັບການປົກປັກຮັກສາສິ່ງແວດລ້ອມ. ສະນັ້ນ ບັນດານັກສະຖາປານິກມາເລເຊຍ ໄດ້ ແລະ ພວມສຸມໃສ່ບູລະນະ ແລະ ກໍ່ສ້າງບັນດາຫລັງຄາເຮືອນແບບຍືນຍົງ, ປະກອບສ່ວນແກ້ໄຂບັນຫາດັ່ງກ່າວ. ນັກສະຖາປານິກ Goh Kai Chen ຢູ່ມະຫາວິທະຍາໄລ Tun Hus sein Onn ມາເລເຊຍ ໃຫ້ຮູ້ວ່າ:
“ແຕ່ລະປີ ມາເລເຊຍ ມີສິ່ງເສດເຫລືອນັບພັນໆໂຕນ ແລະ ສິ່ງເສດເຫລືອນີ້ສ່ວນຫລາຍແມ່ນເກີດມາຈາກບັນດາຕືກອາຄານທີ່ປະຊາຊົນດຳລົງຊີວິດ. ນອກນັ້ນ ບັນດາຕຶກອາຄານກໍ່ນຳໃຊ້ພະນັກງານ ແລະ ນ້ຳເປັນຈຳນວນຫລາຍ. ສະນັ້ນ ພວກຂ້າພະເຈົ້າມຸ່ງໄປເຖິງການກໍ່ສ້າງບັນດາຕຶກອາຄານແບບຍືນຍົງ ເພື່ອປະກອບສ່ວນປົກປັກຮັກສາສິ່ງແວດລ້ອມຢູ່ມາເລເຊຍ.”
ພາບ:internet
|
ເພື່ອຫັນຄຳນິຍາມກ່ຽວກັບການກໍ່ສ້າງແບບຍືນຍົງປະກົດຜົນເປັນຈິງ, ດັດຊະນີກໍ່ສ້າງຕຶກອາຄານຂຽວ “Green Building Index” ທີ່ວາງອອກໃນປີ 2009 ໄດ້ອີງໃສ່ 6 ມາດຖານຄື: ປະຢັດພະລັງງານ, ປະຢັດນ້ຳ, ຄຸນນະພາບສິ່ງແວດລ້ອມໃນຕຶກອາຄານ, ການວາງແຜນກຳນົດ ແລະ ຄຸ້ມຄອງແບບຍືນຍົງ, ນຳໃຊ້ວັດຖະອຸປະກອນບໍ່ກໍ່ມົນລະພິດເຖິງສິ່ງແວດລ້ອມ, ສອດຄ່ອງກັບແຫລ່ງຊັບພະຍາກອນມະນຸດ ແລະ ລັກສະນະດັດສົມ. ບັນດາຕຶກອາຄານຂຽວຈະຫລຸດຜ່ອນຜົນສະທ້ອນເຖິງສຸຂະພາບຂອງມະນຸດ ແລະ ສິ່ງແວດລ້ອມຜ່ານການເລືອກເຟັ້ນສະຖານທີ່, ການອອກແບບ, ການກໍ່ສ້າງ, ນຳໃຊ້, ບູລະນະ ແລະ ລົບລ້າງບັນດາຕຶກອາຄານກໍ່ມົນລະພິດເຖິງສິ່ງແວດລ້ອມ. ພາຍຫລັງເກືອບ 4 ປີແຫ່ງການປະຕິບັດ, ມີກວ່າ 400 ໂຄງການຖືກຍື່ນສະເຫນີ, ໃນນັ້ນ 125 ໂຄງການໄດ້ຮັບຫນັງສືຢັ້ງຢືນເປັນຕຶກອາຄານຂຽວ. ແຕ່ລະປີ, ບັນດາກິດຈະກຳດັ່ງກ່າວປະກອບສ່ວນຫລຸດຜ່ອນອາຍແກສເຮືອນແກ້ວ 200.000 ໂຕນໃຫ້ແກ່ມາເລເຊຍ. ເພື່ອຮັບປະກັນລັກສະນະບໍ່ກໍ່ມົນລະພິດເຖິງສິ່ງແວດລ້ອມ ພ້ອມທັງຊຸກຍູ້ເຈົ້າຂອງລົງທຶນສືບຕໍບູລະນະ, ບັນດາຕຶກອາຄານນີ້ຖືກຈັດເປັນ 4 ອັນດັບ ໂດຍອີງໃສ່ດັດຊະນີກໍ່ສ້າງຂຽວ ແລະ ໄດ້ຮັບການປະເມີນຜົນ 3 ປີເທື່ອຫນຶ່ງ.
ເຖິງວ່າບັນລຸໄດ້ບັນດາໝາກຜົນທີ່ຫນ້າຊື່ນຊົມກໍຕາມ ແຕ່ການພັດທະນາຂະແຫນງກໍ່ສ້າງຂຽວຢູ່ມາເລເຊຍຍັງຖືກປະເຊີນຫນ້າກັບສິ່ງທ້າທາຍຫລາຍຢ່າງ. ນັກສະຖາປານິກ Goh Kai Chen ໃຫ້ຮູ້ວ່າ: ຍ້ອນການຂາດປະສົບການ ແລະ ເຕັກໂນໂລຊີ ດັ່ງນັນໃນການອອກແບບບໍ່ເຄີຍເຕື້ອງເຖິງເລື່ອງໝູນໃຊ້ການກໍ່ສ້າງແບບຍືນຍົງ.
‘ຄຳນິຍາມກ່ຽວກັບການກໍ່ສ້າງແບບຍືນຍົງຍັງແມ່ນສິ່ງໃຫມ່ອ່ຽມຢູ່ມາເລເຊຍ. ປະຊາຊົນຫລາຍຄົນບໍ່ທັນເຂົ້າໃຈໄດ້ຄວາມສຳຄັນຂອງການກໍ່ສ້າງຕິດພັນກັບການປົກປັກຮັກສາສິ່ງແວດລ້ອມ. ນອກນັ້ນ ຄ່າໃຊ້ຈ່າຍໃຫ້ແກ່ຕຶກອາຄານກໍ່ສ້າງແບບຍືນຍົງພັດສູງກວ່າ 40% ເມື່ອທຽບໃສ່ຕຶກອາຄານທຳມະດາ ແລະ ຄ່າໃຊ້ຈ່າຍທີ່ປະຢັດໄດ້ຈາກຕຶກອາຄານເຫລົ່ານັ້ນ ຍັງແມ່ນໄລຍະຕາມຫລັງ. ສ່ວນບັນດານັກລົງທຶນມີແຕ່ສົນໃຈເຖິງຜົນກຳໄລ ແລະ ເວລາຖອນທຶນເທົ່ານັ້ນ, ຫາກບໍ່ສົນໃຈເຖິງການກໍ່ສ້າງແບບຍືນຍົງ.”
ພ້ອມກັບທ່າອ່ຽງກໍ່ສ້າງແບບຍື່ນຍົງຢູ່ໃນໂລກ, ມາເລຊຍ ພວມປະຕິບັດບັນດາບາດກ້າວທຳອິດ. ບັນດາກິດຈະກຳບໍ່ກໍ່ມົນລະພິດເຖິງສິ່ງແວດລ້ອມພວມປະກອບສ່ວນສ້າງສະພາບແວດລ້ອມຂຽວຢູ່ມາເລເຊຍ.