(vovworld)- ເວທີປາໄສປະຊາຊົນ ອາຊຽນ ຄັ້ງທີ 9 ດຳເນີນໄປຢູ່ປະເທດ ບຣູໄນ ແຕ່ວັນທີ 6 - 8/4/2013. ຫົວຂໍ້ຂອງເວທີປາໄສປີນີ້ ແມ່ນ “ ອາຊຽນ ພ້ອມກັນສ້າງອະນາຄົດ” ເພື່ອມຸ່ງໄປເຖິງຈຸດໝາຍຊຸກຍູ້ຄວາມສາມັກຄີ, ຊອກຫາສຽງເວົ້າລວມ, ຄວາມສົນໃຈລວມຂອງສັງຄົມພົນລະເຮືອນ ແລະ ປະຊາຊົນອາຊຽນ ເພື່ອພ້ອມກັນສ້າງປະຊາຄົມ ອາຊຽນ ເປັນເອກະພາບ, ວັດທະນາຖາວອນ.
ເວທີປາໄສປະຊາຊົນ ອາຊຽນປີນີ້ ຄາດວ່າມີຜູ້ແທນ 500 ທ່ານທີ່ຕາງຫນ້າໃຫ້ແກ່ປະຊາຊົນທຸກຊັ້ນວັນນະຂອງບັນດາປະເທດ ອາຊຽນ ເຂົ້າຮ່ວມ. ຈຸດໝາຍຂອງເວທີປາໄສປີນີ້ ແມ່ນເພີ່ມທະວີຄວາມສາມັກຄີ ແລະ ຄວາມເປັນເອກະພາບກັນກ່ຽວກັບສຽງເວົ້າ, ຄວາມເອົາໃຈໃສ່, ຄວາມຕ້ອງການ ແລະ ບັນດາຄຳສະເຫນີຂອງສັງຄົມພົນລະເຮືອນກັບປະຊາຊົນໃນອາຊຽນ ເພື່ອມຸ່ງໄປການສ້າງປະຊາຄົມອາຊຽນໃຫ້ປະກົດຜົນເປັນຈິງ. ເວທີປາໄສປະຊາຊົນ ອາຊຽນ 2013 ຈະສຸມໃສ່ 3 ເສົາຄ້ຳຕົ້ນຕໍຂອງການພັດທະນາແບບຍືນຍົງຊື່ງລວມມີ: ເສດຖະກິດ, ສັງຄົມ ແລະ ສິ່ງແວດລ້ອມ. ການເຄື່ອນໄຫວປີນີ້ ຄາດວ່າຈະດຳເນີນວາລະປະຊຸມຄົບຄະນະ 8 ຄັ້ງ ຊື່ງລວມມີຫລາຍເນື້ອໃນທີ່ແຕກຕ່າງກັນຄື: ອາຊຽນ - ພ້ອມກັນສ້າງອະນາຄົດຂອງພວກເຮົາ; ບຮູໄນ ປະເທດແຫ່ງສັນຕິພາບ; ວິໄສທັດ ອາຊຽນ; ການເຂົ້າຮ່ວມຂອງຊາວຫນຸ່ມ; ຕິດຕາມກົນໄກການສະເຫນີຂອງເວທີປາໄສປະຊາຊົນ.
ພາບປະກອບ:internet
|
ເພື່ອຮັບປະກັນການສືບທອດໃນວິວັດທະນາການສ້າງ ແລະ ພັດທະນາຂອງເວທີປາໄສ, ຫວຽດນາມ ໄດ້ຕັ້ງຫນ້າເຂົ້າຮ່ວມ ແລະ ສົມທົບກັບບັນດາປະເທດສະມາຊິກອາຊຽນເພື່ອໃຫ້ເວທີປາໄສປະຊາຊົນອາຊຽນ ກາຍເປັນຂົວເຊື່ອມຕໍ່ສຳຄັນໃນການເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະກັນ, ສ້າງຄວາມສາມັກຄີ. ທ່ານນາງ ຫງວຽນຮ່ວາງເວີນ, ເລຂາທິການໃຫຍ່ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ຖືວ່າ:
“ຄະນະຜູ້ແທນ ຫວຽດນາມ ເຂົ້າຮ່ວມເວທີປາໄສຄັ້ງນີ້ມີຜູ້ແທນ 15 ຄົນທີ່ຕາງຫນ້າໃຫ້ບັນດາອົງການຈັດຕັ້ງປະຊາຊົນຂອງຫວຽດນາມ.ທີ່ເວທີປາໄສຄັ້ງນີ້,ຫວຽດນາມ ຈະເປັນປະເທດບັນລະຍາຍຕົ້ນຕໍຢູ່ວາລະປະຊຸມ
ຄົບຄະນະຈຳນວນຫນຶ່ງ ແລະ ເປັນປະທານກອງປະຊຸມສຳມະນາຄັ້ງຕ່າງໆ. ພວກຂ້າພະເຈົ້າກຳນົດວ່າ ຈະເຂົ້າຮ່ວມແລະປະກອບສ່ວນຢ່າງຕັ້ງຫນ້າແກ່ການເຄື່ອນໄຫວຂອງເວທີປາໄສກໍຄື ຜົນສຳເລັດຂອງເວທີປາໄສ. ສະນັ້ນ ບັນດາອົງການຈັດຕັ້ງປະຊາຊົນຂອງ ຫວຽດນາມ ໄດ້ຕັ້ງຫນ້າກະກຽມ ດ້ວຍບົດບາດແມ່ນອົງການປະສານງານຕົ້ນຕໍໃຫ້ແກ່ກອງປະຊຸມສຳມະນາກ່ຽວກັບການພັດທະນາຊັບພະຍາກອນທຳມະຊາດແບບຍືນຍົງ, ຄົນພິການ, ສັນຕິພາບ ແລະ ຄວາມໝັ້ນຄົງຢູ່ພາກພື້ນອາຊີ ຕາເວັນອອກສຽງໃຕ້. ຜ່ານບັນດາການເຄື່ອນໄຫວນີ້, ຄະນະຜູ້ແທນ ຫວຽດນາມ ພະຍາຍາມແນະນຳໃຫ້ເພື່ອນມິດ ອາຊຽນ ກ່ຽວກັບປະເທດຊາດ, ຊາວຫວຽດນາມ, ການພົບປະແລກປ່ຽນວັດທະນະທຳ, ຊຸກຍູ້ຄວາມສາມັກຄີລະຫວ່າງປະຊາຊົນບັນດາປະເທດ ອາຊຽນ.”
ອາຊຽນ ແມ່ນພາກພື້ນມີພົນລະເມືອງກວ່າ 600 ລ້ານຄົນ, ແຕ່ລະປະເທດມີສີສັນວັດທະນະທຳສະເພາະ. ອາຊຽນ ກໍພວມປະເຊີນຫນ້າກັບສິ່ງທ້າທາຍຫລາຍຢ່າງຄື: ຊັບພະຍາກອນໝົດກ້ຽງ, ການປ່ຽນແປງຂອງດິນຟ້າອາກາດ, ການຄ້ຳປະກັນດ້ານສະບຽງອາຫານ ແລະອື່ນໆໄດ້ສົ່ງຜົນສະທ້ອນເຖິງປະຊາຊົນ, ພິເສດແມ່ນເປົ້າໝາຍເຄີຍຖືກຜົນສະທ້ອນຄື: ແມ່ຍິງ, ເດັກນ້ອຍ, ຄົນພິການ. ວົງຄະນາຍາດພວມຖືກກຳລັງດັນນັບມື້ນັບຫລາຍຍ້ອນວິວັດທະນາການພາກເອກະຊົນເຂົ້າຮ່ວມສະຫນອງ ບັນດາບໍລິການເບິ່ງແຍງສຸຂະພາບ, ການສຶກສາ, ຄົມມະນາຄົມ, ໄຟຟ້າ ແລະ ນ້ຳປະປາ. ປະຊາຊົນອົບພະຍົບ, ເຂົ້າເມືອງ, ບໍ່ມີບ່ອນເພິ່ງພາອາໄສນັບລ້ານຄົນ ຍັງຖືກໃຊ້ຄວາມຮຸນແຮງ, ຂູດຮີດ ແລະ ການຄ້າມະນຸດ. ສະພາບຂູດຮີດເດັກຍັງບໍ່ທັນໄດ້ຮັບການຄວບຄຸມເທື່ອ. ປະຊາຊົນຫລາຍຄົນ ຍັງຄົງແມ່ນເປົ້າໝາຍຂອງບັນດາການປະທະກັນດ້ວຍອາວຸດ. ສິ່ງທ້າທາຍທັງໝົດນັ້ນພວມແມ່ນຄວາມວິຕົກກັງວົນລວມຂອງພາກພື້ນ. ເພາະສະນັ້ນ ເວທີປາໄສປະຊາຊົນປີນີ້ກໍໃຫ້ບຸລິມະສິດແກ່ການປຶກສາຫາລືບັນດາບັນຫາຂ້າມຊາດທີ່ສົ່ງຜົນສະທ້ອນເຖິງປະຊາຊົນບັນດາປະເທດສະມາຊິກ ອາຊຽນ, ຊອກຫາກົນໄກປະສານສົມທົບລະຫວ່າງບັນດາອົງການຈັດຕັ້ງປະຊາຊົນບັນດາປະເທດອາຊຽນ ເພື່ອແກ້ໄຂສິ່ງທ້າທາຍດັ່ງກ່າວ. ພ້ອມທັງຕິດພັນສັງຄົມພົນລະເຮືອນກັບລັດຖະບານ ຜ່ານການຊຸກຍູ້ສະພາບແວດລ້ອມແຫ່ງການເຄື່ອນໄຫວໃຫ້ແກ່ບັນດາອົງການສັງຄົມພົນລະເຮືອນໃນອາຊຽນ. ຄຽງຄູ່ກັນນັ້ນ ເວທີປາໄສຈະຍົກອອກຂໍ້ສະເຫນີຕໍ່ບັນດາການນຳປະເທດ ອາຊຽນ ເພື່ອພິຈາລະນາການຊຸກຍູ້ອາຊຽນ ຖືມະນຸດເປັນຕົ້ນ. ທ່ານນາງເລຂາທິການໃຫຍ່ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ໃຫ້ຮູ້ວ່າ:
“ເວທີປາໄສປະຊາຊົນແມ່ນໂອກາດທີ່ດີເພື່ອໃຫ້ປະຊາຊົນບັນດາປະເທດພົບປະ, ແລກປ່ຽນກ່ຽວກັບບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ, ສົມທົບກັນໃນບັນດາໂຄງການດຳເນີນງານໃນຕໍ່ຫນ້າ, ນຳສຽງເວົ້າຂອງປະຊາຊົນກໍຄືຂໍ້ສະເຫນີຂອງປະຊາຊົນເພື່ອຍື່ນສະເຫນີຕໍ່ບັນດາການນຳ ອາຊຽນ. ຂ້າພະເຈົ້າຖືວ່າ ນີ້ກໍແມ່ນຄວາມມຸ່ງຫວັງຂອງຫວຽດນາມໃນເວທີປາໄສຄັ້ງນີ້.”
ໃນຫລາຍປີຜ່ານມາ, ບັນດາປະເທດ ອາຊຽນໄດ້ມີຄວາມພະຍາຍາມເພື່ອສາມັກຄີຮ່ວມມື, ມິດຕະພາບພ້ອມກັນພັດທະນາມຸ່ງໄປເຖິງການສ້າງປະຊາຄົມ ອາຊຽນ ໃນປີ 2015. ສ້າງເງື່ອນໄຂເພື່ອໃຫ້ປະຊາຊົນບັນດາປະເທດ ອາຊຽນ ມີຄວາມສາມັກຄີກວ່າ, ເພີ່ມທະວີການພົບປະແລກປ່ຽນແມ່ນສິ່ງທີ່ສຳຄັນທີ່ສຸດ. ດ້ວຍຫລາຍຮູບການແຕກຕ່າງກັນ ນັບທັງສອງຝ່າຍ, ຫລາຍຝ່າຍ, ອະນຸພາກພື້ນ ແລະ ພາກພື້ນ, ນັບທັງການຮ່ວມມືພາຍນອກ, ເຮັດແນວໃດເພື່ອໃຫ້ບົດບາດຂອງປະຊາຊົນສຳຄັນກວ່າ, ປະຊາຊົນບັນດາປະເທດ ອາຊຽນມີການສົມທົບກັນດີກວ່າ, ຕັ້ງຫນ້າກວ່າໃນອະນາຄົດ ນັ້ນແມ່ນຄວາມມຸ່ງມາດປາດຖະຫນາລວມຂອງປະຊາຊົນ ຫວຽດນາມ ແລະ ປະຊາຊົນບັນດາປະເທດ ອາຊຽນ. ການຕ່າງປະເທດປະຊາຊົນ ດ້ວຍຈິດໃຈ ອາຊຽນ ມຸ່ງໄປເຖິງປະຊາຊົນຕ້ອງຊອກຫາບັນດາເນື້ອແທ້ ແລະ ເນື້ອໃນ, ວິທີການເຄື່ອນໄຫວຂອງຕົນຢ່າງເໝາະສົມເພື່ອຫນູນຊ່ວຍບັນດາຄວາມານະພະຍາຍາມຂອງລັດຖະບານ, ຫນູນຊ່ວຍບັນດາຄວາມມານະພະຍາຍາມຂອງສະພາແຫ່ງຊາດ, ຂອງບັນດານັກລົງທຶນ, ວົງການນັກທຸລະກິດ ແລະ ອົງການຈັດຕັ້ງອື່ນ. ນັ້ນແມ່ນຈຸດໝາຍທີ່ຄະນະຜູ້ແທນ ຫວຽດນາມ ມຸ່ງໄປເຖິງໃນການເຂົ້າຮ່ວມເວທີປາໄສປະຊາຊົນ ອາຊຽນ ຄັ້ງນີ້.