(vovworld) - ການຮ່ວມມື ແລະ ຮ່ວມສຳພັນ ອາຊຽນ ພວມກ້າວເຂົ້າສູ່ໄລຍະພັດທະນາໃຫມ່, ດ້ວຍບັນດາບາດກ້າວຫັນປ່ຽນຢ່າງແຂງແຮງກ່ຽວກັບຄຸນນະພາບ, ມຸ່ງໄປເຖິງຈຸດໝາຍກາຍເປັນປະຊາຄົມສະຫນິດຕິດພັນທາງດ້ານການເມືອງ, ດ້ານເສດຖະກິດເຂັ້ມແຂງ ແລະ ອຸ້ມຊູຊ່ວຍເຫລືອເຊິ່ງກັນ ແລະ ກັນ, ແບ່ງປັນໃນທຸກຂົງເຂດ,ໃນນັ້ນ ມີວັດທະນະທຳລະຫວ່າງບັນດາປະເທດໃນປີ 2015. ໃນວິວັດການນັ້ນ, ປະຊາຊົນບັນດາປະເທດ ອາຊຽນ ຈະໄດ້ດຳລົງຊີວິດໃນຄວາມສັນຕິພາບ, ສະຖຽນລະພາບ ແລະ ຄວາມປອງດອງຊາດ, ໄດ້ສ້າງເງື່ອນໄຂພັດທະແບບຍືນຍົງ ແລະ ວັດທະນາຖາວອນໃນພື້ນຖານວັດທະນະທຳເປີດ, ດ້ວຍຄຸນຄ່າ ແລະ ສີສັນວັດທະນະທຳທີ່ເປັນເອກະລັກໄດ້ຮັບການຮັກສາ ແລະ ເຄົາລົບ. ນັ້ນກໍແມ່ນຈຸດປະສົງຂອງການພົວພັນແລກປ່ຽນວັດທະນະທຳ ອາຫານການກິນພື້ນເມືອງຂອງຊາດ ພາຍໃຕ້ຫົວຂໍ້ວ່າ: Contact Morning ໂດຍບັນດາປະເທດສະມາຊິກ ສະມາຄົມແມ່ຍິງ ອາຊຽນ ປະຈຳ ນະຄອນຫລວງ ຢາກາກຕາ ຂອງປະເທດ ອິນໂດເນເຊຍຈັດຕັ້ງຂຶ້ນ ໃນວັນທີ 12/10 ຜ່ານມາ.
ດ້ວຍຈຸດປະສົງຍູ້ແຮງຄວາມສາມັກຄີໃນພາກພື້ນກໍຄືການຮ່ວມມືລະຫວ່າງບັນດາສະມາຊິກຜ່ານການເຄື່ອນໄຫວສັງຄົມ ແລະ ວັດທະນະທຳ, ແມ່ນຫນຶ່ງໃນບັນດາການເຄື່ອນໄຫວປະຈຳປີຂອງສະມາຄົມ ນັ້ນແມ່ນ Contact Morning. ວັນທີ 12/10 ຢູ່ ສຳນັກງານສະຖານທູດ ຫວຽດນາມ ປະຈຳຢາກາກຕາ ໄດ້ດຳເນີນການເຄື່ອນໄຫວພົວພັນແລກປ່ຽນວັດທະນະທຳ ອາຫານການກິນພື້ນເມືອງຂອງຊາດ ພາຍໃຕ້ຫົວຂໍ້ວ່າ: Contact Morning ຄັ້ງທີ 3 ໂດຍ ຫວຽດນາມ, ລາວ ແລະ ມຽນມາ ຮ່ວມກັນຈັດຕັ້ງ. ເຂົ້າຮ່ວມ Contact Morning ຄັ້ງນີ້, ນອກຈາກສະມາຊິກຂອງສະມາຄົມແມ່ຍິງ ອາຊຽນ, ພັນລະຍາຂອງເອກອັກຄະລັດຖະທູດບັນດາປະເທດສະມາຊິກອາຊຽນ ປະຈຳ ອິນໂດເນເຊຍ ແລະ ຜູ້ຕາງຫນ້າອົງການທູຕະນຸທູດປະຈຳ ອາຊຽນ ຍັງມີທ່ານນາງ Sranya Natalegawa ພັນລະຍາຂອງທ່ານລັດຖະມົນຕີການຕ່າງປະເທດ ອິນໂດເນເຊຍ ແລະ ພັນລະຍາເອກອັກຄະລັດຖະທູດບັນດາປະເທດຄູ່ເຈລະຈາຂອງ ອາຊຽນ, ໃນນັ້ນ ມີອາເມລິກາ ແລະ ຍີ່ປຸ່ນ ພ້ອມກັບແຂກມີກຽດຈຳນວນຫນຶ່ງ. ກ່າວຄຳເຫັນທີ່ພິທີໄຂ, ທ່ານນາງ Mahaswi Swajaya ປະທານ ສະມາຄົມແມ່ຍິງ ອາຊຽນ ປະຈຳຢາກາກຕາໄດ້ເວົ້າວ່າ:
“ຈຸດປະສົງຂອງໂຄງການນີ້ແມ່ນການພົບປະທາງການທູດລະຫວ່າງບັນດາພັນລະຍາຂອງເອກອັກຄະລັດຖະທູດ ແລະ ແຂກຖືກເຊີນອິນໂດເນເຊຍ ແລະ ສາກົນຫລາຍທ່ານ ເພື່ອພ້ອມກັນຮັບຊົມລາຍການວັດທະນະທຳ, ຮັບປະທານເຍື່ອງອາຫານ ແລະ ພິເສດແມ່ນການພົບປະແລກປ່ຽນລະຫວ່າງແມ່ຍິງບັນດາປະເທດສະມາຊິກ ອາຊຽນ ເພື່ອໃຫ້ມີໂອກາດແນະນຳພື້ນຖານວັດທະນະທຳຂອງປະເທດຕົນກັບບັນດາປະເທດໃນພາກພື້ນ ແລະ ເພື່ອນມິດສາກົນ.”
ຢູ່ໃນບໍລິເວນຂອງສຳນັກງານສະຖານທູດ ຫວຽດນາມ ປະຈຳ ຢາກາກຕາ ໄດ້ຮັບການປະດັບປະດາທີ່ສວຍງາມດ້ວຍທຸງຊາດບັນດາປະເທດສະມາຊິກອາຊຽນ ພ້ອມກັບຮ້ານວາງສະແດງເຄື່ອງສິລະປະຫັດຖະກຳ, ເຍື່ອງອາຫານທີ່ແຊບນົວ ແລະ ສີສັນຫລາກຫລາຍສະແດງໃຫ້ເຫັນຄວາມເປັນຫລາຍຮູບຫລາຍແບບດ້ານວັດທະນະທຳຂອງບັນດາປະເທດເຂົ້າຮ່ວມ.
ທ່ານນາງ Nguyen Thi Hanh ພັນລະຍາຂອງເອກອັກຄະລັດຖະທູດ ຫວຽດນາມປະຈຳອິນໂດເນເຊຍ
|
ໃນການພົບປະແລກປ່ຽນ, ທ່ານນາງ Nguyen Thi Hanh ພັນລະຍາຂອງເອກອັກຄະລັດຖະທູດ ຫວຽດນາມ ປະຈຳອິນໂດເນເຊຍ ໃຫ້ຮູ້ວ່າ:
“ທີ່ງານພົບປະແລກປ່ຽນຄັ້ງນີ້, ຫວຽດນາມ ໄດ້ກະກຽມບັນດາເຍື່ອງອາຫານທີ່ເປັນເອກະລັກສະເພາະຄື: ແນມ ແລະ ເຝີ ນອກນັ້ນຍັງມີຂອງຂວັນທີ່ລະນຶກອີກດ້ວຍ ພິເສດແມ່ນບັນດາຜະລິດຕະພັນເຮັດດ້ວຍມື. ຫວຽດນາມ ຍັງເປີດຮ້ານວາງສະແດງເພື່ອແນະນຳບັນດາເຄື່ອງພື້ນເມືອງ, ໃນນັ້ນມີກາເຟ ຫວຽດນາມ.”
ແຂກຖືກເຊີນໄດ້ຮັບຊົມຮູບເງົາສາລະຄະດີແນະນຳກ່ຽວກັບເສດຖະກິດ, ວັດທະນະທຳ ແລະ ການທ່ອງທ່ຽວຂອງ ຫວຽດນາມ, ບາງຈຸດທີ່ເປັນເອກະລັກສະເພາະຂອງວັດທະນະທຳ ລາວ ແລະ ວາດຟ້ອນພື້ນເມືອງຂອງ ມ້ຽນມາ ພ້ອມກັບບັນດາເຍື່ອງອາຫານພື້ນເມືອງຂອງ ຫວຽດນາມ, ລາວ ແລະ ມ້ຽນມາ. ທ່ານນາງ Sabai Win ພັນລະຍາຂອງເອກອັກຄະລັດຖະທູດ ມ້ຽນມາ ປະຈຳ ອິນໂດເນເຊຍ ແບ່ງປັນວ່າ:
“ຂ້າພະເຈົ້າເຊື່ອໝັ້ນວ່າ ໝູ່ເພື່ອນທັງໝົດ ແລະ ສະມາຊິກ ສະມາຄົມແມ່ຍິງ ອາຊຽນ ລ້ວນແຕ່ມີຄວາມປິຕິຊົມຊື່ນ ແລະ ເຂົ້າຮ່ວມການເຄື່ອນໄຫວຄັ້ງນີ້ຢ່າງຕັ້ງຫນ້າ, ແນ່ນອນວ່າ ໝູ່ເພື່ອນລ້ວນແຕ່ມັກວາດຟ້ອນ ມ້ຽນມາຂອງພວກຂ້າພະເຈົ້າ. ດ້ວຍບົດບາດຮ່ວມກັບ ຫວຽດນາມ ແລະ ລາວຈັດຕັ້ງ, ພວກຂ້າພະເຈົ້າລ້ວນແຕ່ຢາກໂຄສະນາສິ່ງທີ່ເປັນເອກະລັກສະເພາະຂອງປະເທດຕົນ. ພວກຂ້າພະເຈົ້າຢາກຊຸກຍູ້ການພົວພັນກັບເພື່ອນມິດ ນັ້ນແມ່ນສາຍເຫດເປັນຫຍັງພວກຂ້າພະເຈົ້າມີຫນ້າຢູ່ທີ່ນີ້.”
ເຄື່ອງສິລະປະຫັດຖະກຳໄດ້ນຳມາວາງສະແດງໃນງານພົບປະແລກປ່ຽນ
|
ຕາມທ່ານ ບຸນມີ ໂກພູວົງ ພັນລະຍາຂອງເອກອັກຄະລັດຖະທູດ ລາວ ປະຈຳ ຢາກາກຕາ ແລ້ວ, ເມື່ອເຂົ້າຮ່ວມສະມາຄົມແມ່ຍິງ ອາຊຽນ ບັນດາສະມາຊິກລ້ວນແຕ່ຖືວ່າ: ສິ່ງທຳອິດເຂົາເຈົ້າໄດ້ຮັບນັ້ນແມ່ນມີເພື່ອນມິດຈາກຫລາຍປະເທດຕື່ມອີກ, ພິເສດແມ່ນບັນດາປະເທດສະມາຊິກ ອາຊຽນ ແລະ ມີຄວາມເຂົ້າໃຈກ່ຽວກັບພື້ນຖານວັດທະນະທຳທີ່ແຕກຕ່າງກັນ ແລະ ສຳຄັນ ແມ່ນໄດ້ແບ່ງປັນ, ຮຳ່ຮຽນເອົາບົດຮຽນເຊິ່ງກັນ ແລະ ກັນໃນຫລາຍຂົງເຂດ.
“ໃນລາຍການຄັ້ງນີ້, ປະເທດລາວ ໄດ້ນຳມາເຊິ່ງບັນດາເຍື່ອງອາຫານທີ່ເປັນເອກະລັກສະເພາະຂອງລາວ, ແນະນຳກ່ຽວກັບວັດທະນະທຳ ລາວ ແລະ ຜະລິດຕະພັນແພໄຫມຂອງລາວອີກດ້ວຍ. ຂ້າພະເຈົ້າມີຄວາມປິຕິຊົມຊື່ນຫລາຍ ແລະ ເຂົ້າຮ່ວມເຫດການນີ້ຢ່າງຕັ້ງຫນ້າເພື່ອແນະນຳວັດທະນະທຳ, ປະເທດຊາດ ແລະ ປະຊາຊົນ ສາມປະເທດສະມາຊິກ ອາຊຽນ.”
ການພົບປະແລກປ່ຽນລະຫວ່າງບັນດາພັນລະຍາຂອງເອກອັກຄະລັດຖະທູດ ແລະ ຜູ້ຕາງຫນ້າທູຕານຸທູດ ເປັນການປະກອບສ່ວນໃນການໂຄສະນາພາບພົດ, ປະຊາຊົນຂອງປະເທດຕົນເວົ້າສະເພາະ ແລະ ນຳພາບພົດ ອາຊຽນ ເຊື່ອມໂຍງ ແລະ ສາມັກຄີກັບປະຊາຄົມໂລກເວົ້າລວມ.