ທ່ານ ວັນແສງ, ແຂວງ ຫຼວງພະບາງ ໄດ້ຝາກອີແມວມາຍັງລາຍການດ້ວຍເນື້ອໃນວ່າ: “ໃນອາທິດ, ຂ້າພະເຈົ້າໄດ້ເອົາໃຈໃສ່ພິເສດເຖິງບົດຂຽນ “ແຂວງຫຼວງພະບາງ ກັບວຽກງານອະນຸລັກຮັກສາມໍລະດົກ” ໃນລາຍການ “ຊາຍຄາອາຊຽນ”. ໂດຍແມ່ນຊາວຫຼວງພະບາງ, ດັ່ງນັ້ນຂ້າພະເຈົ້າກໍ່ສົນໃຈເຖິງບັນຫານີ້ທີ່ສຸດ. ຂ້າພະເຈົ້າຫວັງວ່າຊາວ ຫວຽດນາມ ເວົ້າສະເພາະ ແລະ ປະຊາຊົນໃນທົ່ວໂລກເວົ້າລວມ ຈະຮູ້ຈັກເຖິງບັນດາມໍລະດົກ, ປູຊະນີຍະສະຖານ, ທິວທັດທຳມະຊາດຂອງແຂວງຫຼວງພະບາງ, ຈາກນັ້ນຈະຊຸກຍູ້ຂະແໜງທ່ອງທ່ຽວພັດທະນາ ປະກອບສ່ວນຍົກສູງລະດັບຄອງຊີບຂອງປະຊາຊົນ. ຂ້າພະເຈົ້າຕີລາຄາສູງບົດຂຽນນີ້ ຍ້ອນວ່າພວກເພື່ອນແມ່ນນັກຂ່າວຕ່າງປະເທດ ແຕ່ໄດ້ເຂົ້າໃຈວຽກງານອະນຸລັກຮັກສາຂອງຫຼວງພະບາງທີ່ສຸດ, ສິ່ງດັ່ງກ່າວສະແດງໃຫ້ເຫັນວ່າພວກເພື່ອນມີຄວາມຮັກພິເສດຕໍ່ປະເທດລ້ານຊ້າງຂອງພວກເຮົາ. ນອກຈາກລາຍການ “ຊາຍຄາອາຊຽນ” ແລ້ວ, ຂ້າພະເຈົ້າຍັງມັກບັນດາບົດຂຽນໃນລາຍການ “ວັດທະນະທຳ ຫວຽດນາມ” ອີກ, ຜ່ານບັນດາບົດຂຽນນີ້ຂ້າພະເຈົ້າໄດ້ເຂົ້າໃຈຫຼາຍກ່ວາກ່ຽວກັບພື້ນຖານວັດທະນະທຳຫຼາຍຮູບຫຼາຍແບບຂອງປະເທດພວກເພື່ອນ.”
ເພື່ອນ ລັດດາພອນ, ຢູ່ນະຄອນຫຼວງ ວຽງຈັນ ໄດ້ຝາກອີແມວມາຍັງລາຍການ ໂດຍຖາມວ່າ: “ໃນຕົ້ນເດືອນ 9 ນີ້, ຂ້າພະເຈົ້າໄດ້ຟັງຂ່າວກ່ຽວກັບກອງປະຊຸມສຳມະນາກ່ຽວກັບວຽກງານເປັນເສນາທິການຮັບໃຊ້ລັດຖະບານ ແລະ ນາຍົກລັດຖະມົນຕີ 2 ປະເທດ ຫວຽດນາມ - ລາວ. ຂ້າພະເຈົ້າຢາກຮູ້ລາຍລະອຽດກ່ຽວກັບກອງປະຊຸມສຳມະນາດັ່ງກ່າວແດ່”
ເພື່ອນ ລັດດາພອນ ທີ່ຮັກແພງ, ກອງປະຊຸມສຳມະນາກ່ຽວກັບວຽກງານເປນເສນາທິການສັງລວມຮັບໃຊ້ໃຫ້ລັດຖະບານ ແລະ ນາຍົກລັດຖະມົນຕີຂອງ 2 ປະເທດ ຫວຽດນາມ - ລາວ ໄດ້ຮັບການຈັດຕັ້ງຢູ່ແຂວງ ເງະອານ (ພາກກາງ ຫວຽດນາມ) ໃນຕົ້ນເດືອນ 9 ນີ້. ນີ້ແມ່ນກອງປະຊຸມສຳມະນາຄັ້ງທີ 3 ໃນຂອບເຂດການຮ່ວມມືລະຫວ່າງຫ້ອງວ່າການລັດຖະບານ 2 ປະເທດນັບແຕ່ປີ 2012 ມາຮອດປະຈຸບັນ. ທີ່ກອງປະຊຸມສຳມະນາ, ບັນດາຜູ້ແທນໄດ້ສຸມໃສ່ປຶກສາຫາລືບາງບັນຫາກ່ຽວກັບ: ບົດບາດຂອງຫ້ອງວ່າການລັດຖະບານໃນການປະຕິບັດລະບຽບການເຮັດວຽກຂອງລັດຖະບານ, ເປັນເສນາທິການກວດກາບັນດາໂຄງການ, ແຜນຮ່າງ ໂດຍກະຊວງ, ຂະແໜງການ, ທ້ອງຖິ່ນຍື່ນສະເໜີຕໍໍ່ລັດຖະບານ, ນາຍົກລັດຖະມົນຕີ, ລວບລວມໃຫ້ລັດຖະບານ ແລະ ນາຍົກລັດຖະມົນຕີໃນຂົງເຂດພົວພັນຕ່າງປະເທດ, ແນະນຳເນື້ອໃນພື້ນຖານຂອງລະບຽບການເຮັດວຽກຂອງຫ້ອງວ່າການລັດຖະບານ… ເພື່ອແນໃສ່ສືບຕໍ່ຫັນແຜນນະໂຍບາຍຂອງ 2 ພັກ, 2 ລັດຖະບານເປັນລະອຽດ, ເພີ່ມທະວີການພົວພັນສົມທົບກັນຢ່າງແໜ້ນແຟ້ນໃນວຽກງານເປັນເສນາທິການຜັນຂະຫຍາຍການປະຕິບັດບັນດາຂໍ້ຕົກລົງລະຫວ່າງ 2 ປະເທດ.
ໃນໂທລະສັບຫາພວກຂ້າພະເຈົ້າ, ເພື່ອນ ແສງອາລຸນ ໄດ້ເວົ້າວ່າ: “ຂ້າພະເຈົ້າໄດ້ຈື່ວ່າ, ຈຸດເວລານີ້ຂອງປີກ່ອນ, ພວກເພື່ອນມີຫຼາຍບົດຂຽນກ່ຽວກັບລະດູໃບໄມ້ຫຼົ່ນຢູ່ຮ່າໂນ້ຍ, ຂ້າພະເຈົ້າມັກບັນດາບົດຂຽນນັ້ນທີ່ສຸດ ແລະ ຫວັງວ່າຈະໄດ້ໄປຢ້ຽມຢາມນະຄອນຫຼວງ ຮ່າໂນ້ຍ ໃນຊຸມວັນຂອງລະດູໃບໄມ້ຫຼົ່ນເພື່ອໄດ້ເຫັນປະຈັກຕາທັດສະນີຍະພາບທີ່ສວຍງາມຂອງລະດູນີ້.”
ເພື່ອນ ແສງອາລຸນ ທີ່ຮັກແພງ, ນະຄອນຫຼວງ ຮ່າໂນ້ຍ ໄດ້ກ້າວເຂົ້າສູ່ລະດູໃບໄມ້ຫຼົ່ນແລ້ວ, ຖະໜົນສາຍຕ່າງໆເຕັມໄປດ້ວຍກິນຫອມຂອງດອກຕີນເປັດ. ຖ້າຫາກມານະຄອນຫຼວງ ຮ່າໂນ້ຍ ໃນຊຸມວັນນີ້ຈະເຫັນຖະໜົນ ເລືອງວັນການ, ຮ່າງມ້າ ເຕັມໄປດ້ວຍສີຫຼາກຫຼາຍຂອງເຄື່ອງຫຼິ້ນຕ້ອນຮັບບຸນວັນເພງເດືອນ 8 ຂອງເດັກ, ບັນດາຮ້ານຂາຍເຂົ້າໜົມໜຽວ, ເຂົ້າໜົມປີ້ງສຳລັບບຸນວັນເພງເດືອນ 8 (moon cake). ຮ່າໂນ້ຍ ຫວັງວ່າຈະໄດ້ຕ້ອນຮັບເພື່ອນໃນຊຸມວັນສວຍງາມນີ້.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com.