ໃນການຕອບຄຳຖາມຂອງທ່ານຜູ້ຟັງພາກນີ້, ພວກເຮົາຄັດສະເຫນີບາງຄຳເຫັນ ແລະ ຕອບຄຳຖາມທີ່ທ່ານຜູ້ຟັງມີຄວາມສົນໃຈ.
ເພື່ອນໄຊສົມພອນ, ນັກສຶກສາລາວທີ່ພວມຮຳ່ຮຽນຢູ່ສະຖາບັນທະນາຄານຫວຽດນາມ ມີຄວາມປິຕິຊົມຊື່ນເມື່ອໄດ້ຮັບຂ່າວວ່າ: ລາຍການກະຈາຍສຽງພາກພາສາລາວ ພ້ອມກັບ 11 ລາຍການກະຈາຍສຽງພາກພາສາຕ່າງປະເທດຂອງລະບົບພາສາຕ່າງປະເທດ ໄດ້ນຳສະເຫນີ ແລະ ຮັກສາໄວ້ທາງ ອິນເຕີແນດ ໃນເວລາ 1 ອາທິດ. ເພື່ອນໄຊພອນເວົ້າວ່າ:
“ໃນໄລຍະມໍ່ໆມານີ້, ຂ້າພະເຈົ້າໄດ້ຮັບຂ່າວວ່າ ພາກພາສາລາວ ວິທະຍຸ ກະຈາຍສຽງຫວຽດນາມໄດ້ມີເວັບໄຊທາງອິນເຕີແນດ, ໃນເວັບໄຊດັ່ງກ່າວ ມີບັນດາລາຍການມ່ວນໆຊຶ່ງຂ້າພະເຈົ້າມີຄວາມສົນໃຈຄື: ລາຍການທ່ອງທ່ຽວ, ໂອ້ລົມກົບເພື່ອນລາວ ແລະອື່ນຯ ແລະ ມີຂ່າວໃຫມ່ໆອອກທຸກວັນ. ຂ້າພະເຈົ້າເຫັນວ່າລາຍການພາກພາສາລາວ ອອກເວັບໄຊດັ່ງກ່າວແມ່ນເລື່ອງທີ່ດີ ແລະ ຕົວຈິງຫລາຍ, ເພາະວ່າໃນປະຈຸບັນ ທາງໂທລະຄົມມະນາຄົມພວມພັດທະນາຢ່າງໄວວາທີ່ສຸດ ແລະ ດຶງດູດຄວາມສົນໃຈຈາກທ່ານຜູ້ຟັງ ແລະ ເລື່ອງດັ່ງກ່າວສາມາດຕອບສະຫນອງຄວາມຮຽກຮ້ອງຕ້ອງການຂອງປະຊາຊົນທຸກຊັ້ນຄົນ, ທຸກເພດໄວ. ແຕ່ກ່ອນ ຂ້າພະເຈົ້າກໍໄດ້ຮັບຟັງລາຍການຜ່ານວິທະຍຸກ ແຕ່ບໍ່ເປັນປະຈຳປານໃດ, ເພາະວ່າ ບາງເທື່ອກໍ່ບໍ່ມີເວລາຫວ່າງ. ເມື່ອມີເວັບໄຊໃຫມ່ນີ້ ພວກຂ້າພະເຈົ້າອາດຈະຕິດຕາມລາຍການເປັນປະຈຳ, ແນ່ນອນວ່າ ຂ້າພະເຈົ້າຈະປະກອບຄຳຄິດຄຳເຫັນໃຫ້ແກ່ລາຍການ ແລະ ແນະນຳໃຫ້ໝູ່ເພື່ອນໄດ້ຮັບຊາບ.“
ເພື່ອນໄຊສົມພອນທີ່ຮັກແພງ, ນັບແຕ່ວັນທີ 15/12 , ພວກເພື່ອນສາມາດຮັບຟັງ ແລະ ອ່ານຂ່າວເດັ່ນກໍຄືຄໍລຳທັງໝົດຂອງລາຍການ. ຂໍຂອບອົກຂອບໃຈພວກເພື່ອນທີ່ມີຄວາມສົນໃຈລາຍການຂອງພວກເຮົາ. ພວກເພື່ອນເຂົ້າແວບໄຊ vovworld.vn ເພື່ອອ່ານ ແລະ ຮັບຟັງບັນດາຄໍລຳທີ່ພວກເພື່ອນມີຄວາມສົນໃຈ.
ເພື່ອພອນໄຊ, ນັກສຶກສາຢູ່ມະຫາວິທະຍາໄລແຫ່ງຊາດລາວ ໄດ້ສົ່ງຄຳຖາມເຖິງລາຍການໂດຍເວົ້າວ່າ: ນ້ອງໄດ້ຮູ້ຂ່າວວ່າ ຢູ່ ຫວຽດນາມ ມີຝັ່ງທະເລຍາວຢຽດຈາກພາກເຫນືອລົງຮອດພາກໃຕ້, ດິນແດນກໍອຸດົມສົມບູນ, ແຕ່ຂໍໃຫ້ລາຍການແນະນຳໃຫ້ຮູ້ຕື່ມອີກວ່າ: ຄວາມຍາວຂອງແຄມທະເລຫວຽດນາມ ແມ່ນເທົ່າໃດ, ມີເກາະໃຫຍ່ ນ້ອຍຈັກແຫ່ງ ແລະ ເກາະໃຫຍ່ກວ່າໝູ່ແມ່ນເກາະແຫ່ງໃດແດ່?
ເພື່ອນພອນໄຊທີ່ຮັກແພງ! ປະເທດຫວຽດນາມ ມີເນື້ອທີ່ເກືອບ 332.000 ຕາລາງກິໂລແມດ, ດ້ວຍແຄມທະເລມີຄວາມຍາວປະມານ 3.300 ກິໂລແມດ, ມີເກາະກວ່າ ໃຫຍ່ນ້ອຍ ກວ່າ 4000 ແຫ່ງ. ໃນນັ້ນ ເກາະຟູກວັກ ແມ່ນເກາະແຫ່ງໃຫຍ່ກວ່າໝູ່, ເກາະແຫ່ງນີ້ຕັ້ງຢູ່ແຂວງ ກຽນຢາງທາງພາກໃຕ້ຫວຽດນາມ ດ້ວຍເນື້ອທີ 589,23 ຕາລາງກິໂລແມດ. ທິວທັດທຳມະຊາດຢູ່ເກາະແຫ່ງນີ້ແມ່ນງາມຫລາຍ, ຖ້າມີກາລະໂອກາດ ເຊີນເພື່ອນມາຢ້ຽມຢາມ ຟູກວັກແດ່ເດີ.
ເກາະຟູກວັກ
ສ່ວນເພື່ອນ ເຈີນຫວຽດຮືງ ຊຶ່ງແມ່ນອະດິດນັກສຶກສາຫວຽດນາມທີ່ຮ່ຳຮຽນຢູ່ລາວ, ປະຈຸບັນ ພວມດຳລົງຊີວິດຢູ່ເມືອງໄຕໂຮ່ ພັດມີຄວາມສົນໃຈກ່ຽວກັບການພົວພັນລະຫວ່າງ ຫວຽດນາມ ແລະ ລາວ ໃນອາທິດຜ່ານມາ.
ເພື່ອ ເຈີນຫວຽດຮືງ ທີ່ຮັກແພງ! ໃນອາທິດຜ່ານມາ (ແຕ່ວັນທີ 12 -19/12), ບັນດາການນຳກະຊວງ, ຂະແຫນງການ ຫວຽດນາມ ແລະ ລາວ ໄດ້ມີການພົບປະ ແລະ ເຮັດວຽກຄັ້ງຕ່າງໆ, ໃນນັ້ນ ມີການຢ້ຽມຢາມ ແລະ ເຮັດວຽກ ຢູ່ ຫວຽດນາມ ຂອງບັນດາຜູ້ແທນຂັ້ນສູງຂອງລາວຄື: ຄະນະພະນັກງານສານປະຊາຊົນສູງສຸດລາວ ໂດຍທ່ານ ຄຳພັນ ສິດທິດຳພາ ກຳມະການສູນກາງພັກ, ຫົວຫນ້າສານປະຊາຊົນສູງສຸດລາວ ນຳຫນ້າ, ຄະນະຜູ້ແທນກະຊວງການເງິນລາວ ໂດຍທ່ານ ພູເພັດ ຄຳໂພນວົງ ລັດຖະມົນຕີກະຊວງການເງິນ ນຳຫນ້າ, ຄະນະຜູ້ແທນກະຊວງຖະແຫລງຂ່າວ ແລະ ວັດທະນະທຳ ແລະ ທ່ອງທ່ຽວລາວ ໂດຍທ່ານລັດຖະມົນຕີ ບໍ່ແສງຄຳ ວົງດາລາ ນຳຫນ້າ, ຄະນະຜູ້ແທນ ກະຊວງໄປສະນີໂທລະຄົມມະນາຄົມ ແລະ ສື່ສານລາວ ໂດຍທ່ານ ຫຽມ ພົມມະຈັນ ລັດຖະມົນຕີນຳຫນ້າ.
ໃນຂະນະນັ້ນ ຄະນະຜູ້ແທນກະຊວງຄົມມະນາຄົມຂົນສົ່ງຫວຽດນາມ ໂດຍທ່ານ ດິງລາທັງ ລັດຖະມົນຕີກະຊວງດັ່ງກ່າວນຳຫນ້າ ກໍໄດ້ໄປຢ້ຽມຢາມ ແລະ ເຮັດວຽກຢູ່ລາວ. ໃນອາທິດ, ສະຫະສະມາຄົມນັກລົງທຶນ ຫວຽດນາມ ຢູ່ລາວ ກໍເຂົ້າຢ້ຽມຂຳ່ນັບທ່ານນາຍົກລັດຖະມົນຕີ ລາວ ທອງສິງ ທຳມະວົງ. ນອນນັ້ນ ຍັງມີການພົບປະຂັ້ນທ້ອງຖິ່ນຕ່າງໆອີກ.
ໃນການເຮັດວຽກເຫລົ່ານັ້ນ, ສອງຝ່າຍບັນລຸໄດ້ຂໍ້ຕົກລົງການຮ່ວມມື, ການລົງທຶນໃນຫລາຍຂົງເຂດໃນໄລຍະຈະມາເຖິງ. ພິເສດ ໃນປີ 2012, ບັນດາກະຊວງ, ຂະແຫນງການຂອງສອງປະເທດ ຈະຍູ້ແຮງວຽກງານໂຄສະນາ ແລະ ມີການເຄື່ອນໄຫວແທດຈິງຫລາຍຢ່າງ ເພື່ອສະເຫລີມສະຫລອງ “ປີແຫ່ງຄວາມສາມັກຄີມິດຕະພາບ ຫວຽດນາມ ລາວ 2012“ ເນື່ອງໃນໂອກາດສະເຫລີມສະຫລອງ 35 ປີ ແຫ່ງວັນລົງນາມໃນສົນທິສັນຍາມິດຕະການ ແລະ ການຮ່ວມມື (18/7/2012) ແລະ 50 ປີ ແຫ່ງວັນສ້າງຕັ້ງສາຍພົວພັນທາງການທູດ ຫວຽດນາມ ລາວ (5/9/2012). ການຢ້ຽມຢາມຂອງການນຳບັນດາກະຊວງ, ຂະແຫນງການສອງປະເທດ ໄດ້ດຳເນີນໄປໃນອາທິດ ແມ່ນການຢັ້ງຢືນສາຍພົວພັນມິດຕະພາບ, ການຮ່ວມມືຮອບດ້ານ ຫວຽດນາມ ລາວ ນັບມື້ນັບໄດ້ຮັບການພັດທະນາ ແລະ ເຂົ້າສູ່ລວງເລິກ.
ເພື່ອນ ໄຊສົມພອນ, ໂພນໄຊ ແລະ ຫວຽດຮືງ ທີ່ຮັກແພງ! ຫວັງວ່າ ໃນອາທິດຕໍ່ໆໄປ ພວກເພື່ອນຈະຕັ້ງຫນ້າປະກອບຄຳເຫັນໃຫ້ແກ່ລາຍການ ເພື່ອໃຫ້ລາຍການຂອງພວກເຮົານັບມື້ນັບມ່ວນກວ່າ. ຄຳເຫັນພວກເພື່ອນສາມາດສົ່ງຜ່ານຫນ້າເວັບໄຊຂອງພວກເຮົາໄດ້ ຜ່ານລະຫັດ: vovworld.vn. ພົບກັນໃຫມ່ໃນລາຍການຫນ້າ. /.