ໃນອາທິດ, ມີທ່ານຜູ້ຟັງບາງທ່ານໄດ້ຝາກຈົດໝາຍ, ອີແມວ, ໂທລະສັບມາຍັງລາຍການ ຖາມກ່ຽວກັບການຢ້ຽມຢາມ ແລະ ເຮັດວຽກຂອງທ່ານລັດຖະມົນຕີວ່າການກະຊວງອຸດສາຫະກຳ - ການຄ້າ ຫວຽດນາມ ຫວູຮູຍຮ່ວາງ ຢູ່ ລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກຂ້າພະເຈົ້າຈະຕອບຄຳຖາມເຊີ່ງທ່ານຜູ້ຟັງຝາກມາລາຍການໃນອາທິດຜ່ານມາ.
ພິທີເຊັນສັນຍາລະຫວ່າງ 2 ຝ່າຍ |
ໃນອາທິດຜ່ານມາ, ທ່ານ ວິໄລຫອມ, ຢູ່ນະຄອນຫຼວງ ວຽງຈັນ ໄດ້ຝາກ ອີແມວ ມາຍັງລາຍການດ້ວຍເນື້ອໃນວ່າ: ອາທິດຜ່ານມາ, ຂ້າພະເຈົ້າໄດ້ອ່ານຂ່າວຕ່າງໆກ່ຽວກັບການຢ້ຽມຢາມ ແລະ ເຮັດວຽກຂອງທ່ານລັດຖະມົນຕີວ່າການກະຊວງອຸດສາຫະກຳ - ການຄ້າ ຫວຽດນາມ ຫວູຮູຍຮ່ວາງ. ໃນການຢ້ຽມຢາມຄັ້ງນີ້, ທ່ານລັດຖະມົນຕີວ່າການກະຊວງອຸດສາຫະກຳ - ການຄ້າ ຫວຽດນາມ ຫວູຮູຍຮ່ວາງ ແລະ ທ່ານນາງ ລັດຖະມົນຕີວ່າການກະຊວງອຸດສາຫະກຳ - ການຄ້າ ລາວ ເຂັມມະນີ ພົນເສນາ ໄດ້ເຊັນສັນຍາການຄ້າ 2 ຝ່າຍ ເພື່ອແທນໃຫ້ສັນຍາສະບັບເກົ່າ. ຂ້າພະເຈົ້າຢາກຮູ້ສາຍເຫດທີ່ພາໃຫ້ຝ່າຍ ຫວຽດນາມ ແລະ ລາວ ລົງນາມໃນສັນຍາການຄ້າສະບັບໃໝ່? ແລະ ເມື່ອສັນຍາສະບັບໃໝ່ໄດ້ຮັບການລົງນາມ ຈະສ້າງເງື່ອນໄຂສະດວກຄືແນວໃດໃຫ້ແກ່ການແລກປ່ຽນການຄ້າລະຫວ່າງ 2 ປະເທດ?
ທ່ານ ວິໄລຫອມ ທີ່ເຄົາລົບ, ເມື່ອເວົ້າເຖິງສາຍເຫດລົງນາມໃນສັນຍາການຄ້າໃໝ່ ແທນໃຫ້ສັນຍາການຄ້າ ທີ່ລົງນາມກ່ອນນີ້ 17 ປີ, ໃນການຕອບສຳພາດຕໍ່ນັກຂ່າວ VOV ປະຈຳ ລາວ, ທ່ານລັດຖະມົນຕີວ່າການກະຊວງອຸດສາຫະກຳ - ການຄ້າ ຫວຽດນາມ ຫວູຮູຍຮ່ວາງ, ໃຫ້ຮູ້ວ່າ:
“ປີ 1998, ຫວຽດນາມ ແລະ ລາວ ໄດ້ເຊັນສັນຍາການຄ້ານຳກັນ. ຜ່ານ 17 ປີ, ໃນສະພາບການເສດຖະກິດໂລກ, ພາກພື້ນມີການປ່ຽນແປງ, ທ່າອ່ຽງໂລກາພິວັດດ້ານການຄ້າ ແມ່ນທ່າອ່ຽງເປັນຕົ້ນ ແລະ ສະພາບເສດຖະກິດ ຫວຽດນາມ ແລະ ລາວ ກໍ່ຄືແນວນັ້ນ, ບັນຫາເຊື່ອມໂຍງ ໄດ້ ແລະ ພວມແມ່ນບັນຫາເຊິ່ງພັກ, ລັດ ຫວຽດນາມ ແລະ ລາວ ລ້ວນແຕ່ມີຄວາມເອົາໃຈໃສ່ທີ່ສຸດ. ດັ່ງນັ້ນ, ບັນດາເນື້ອໃນໃນສັນຍາປີ 1998 ບໍ່ເໝາະສົມອີກ ແລະ 2 ຝ່າຍໄດ້ປຶກສາຫາລື, ເຫັນດີເປັນເອກະສັນເຊັນສັນຍາສະບັບໃໝ່, ເຊິ່ງອີງຕາມສັນຍາການຄ້າເຊິ່ງບັນດາປະເທດ ອາຊຽນ ໄດ້ລົງນາມໂດຍພື້ນຖານ. ເນື້ອໃນສຳຄັນນັ້ນແມ່ນ 2 ປະເທດໃຫ້ຄຳໝັ້ນສັນຍາສະຫງວນບຸລິມະສິດຫຼາຍຢ່າງກ່ຽວກັບພາສີ, ປະລິມານ, ປະເພດ, ສິນຄ້າທີ່ໄດ້ຮັບບຸລິມະສິດກ່ຽວກັບພາສີດ້ວຍປະມານ 95% ວົງເງິນການສົ່ງອອກແມ່ນໄດ້ຊົມໃຊ້ບຸລິມະສິດດ້ານພາສີ. ສິ່ງດັ່ງກ່າວສະແດງໃຫ້ເຫັນການພົວພັນແບບພິເສດລະຫວ່າງ ຫວຽດນາມ ແລະ ລາວ ໃນການພົວພັນດ້ານເສດຖະກິດ, ການຄ້າ ແລະ ການລົງທຶນ. ນອກນັ້ນ, 2 ຝ່າຍຍັງຕົກລົງເຊັນສັນຍາການຄ້າເຂດຊາຍແດນໂດຍໄວ ດ້ວຍເນື້ອໃນບຸລິມະສິດໃຫ້ກັນກ່ຽວກັບສິດ, ກອບກົດໝາຍເຊິ່ງທັງ 2 ຝ່າຍໄດ້ຕົກລົງນຳກັນ ແລະ ບໍ່ສົ່ງຜົນສະທ້ອນເຖິງປະເທດທີ 3”
ເມື່ອເວົ້າເຖິງຜົນປະໂຫຍດ ເຊິ່ງສັນຍາການຄ້າສະບັບໃໝ່ນຳມາໃຫ້ໃນການແລກປ່ຽນການຄ້າລະຫວ່າງ 2 ປະເທດ, ທ່ານລັດຖະມົນຕີວ່າການກະຊວງອຸດສາຫະກຳ - ການຄ້າ ຫວຽດນາມ ຫວູຮູຍຮ່ວາງ, ເວົ້າຕື່ມອີກວ່າ:
“ 2 ຝ່າຍໄດ້ສະຫງວນບຸລິມະສິດອັນໃຫຍ່ຫຼວງໃຫ້ກັນນັບທັງທາງດ້ານຈຳນວນ, ປະເພດສິນຄ້າ, ອັດຕາພາສີ, ລະບຽບການດ້ານການຄ້າ, ກໍ່ຄືເຮັດແນວໃດເພື່ອໃຫ້ສິນຄ້າຂອງລາວ ສາມາດສົ່ງມາຫວຽດນາມ ໃນໄລຍະໄວທີ່ສຸດ, ສະດວກທີ່ສຸດ ແລະ ກົງກັນຂ້າມ. ໃນສັນຍາກໍ່ຊີ້ແຈ້ງວ່າ, ພ້ອບກັບບັນຫາພັດທະນາດ້ານການຄ້າ, 2 ຝ່າຍຍັງສົ່ງເສີມວິສາຫະກິດ 2 ປະເທດຄົ້ນຄວ້າ, ຊອກຫາກາລະໂອກາດລົງທຶນໃນຂົງເຂດບໍລິການ ເພື່ອແນໃສ່ຊຸກຍູ້ການພົວພັນດ້ານການຄ້າ ແລະ ເພີ່ມຜະລິດຕະພັນສິນຄ້າ. 2 ຝ່າຍຈະມີທ່າແຮງເພີ່ມປະລິມານສິນຄ້າສົ່ງອອກ ແລະ ຕອບສະໜອງຄວາມຕ້ອງການຂອງທັງ 2 ປະເທດ ແລະ ອາດຈະສົ່ງໄປຍັງປະເທດທີ 3 ໄດ້”.
++++
ໃນອາທິດ, ເພື່ອນ ໝອນແກ້ວ, ແຂວງ ຫຼວງພະບາງ ໄດ້ຝາກ ອີແມວ ມາຍັງລາຍການໂດຍຖາມວ່າ: ຂ້າພະເຈົ້າໄດ້ຮັບຟັງຫຼາຍບົດຂຽນກ່ຽວກັບບັນດາຜົນງານພົ້ນເດັ່ນຂອງ ຫວຽດນາມ ໃນປີ 2014, ແຕ່ຂ້າພະເຈົ້າບໍ່ຮູ້ແຈ້ງບັນດາຜົນງານໃດແດ່? ຂໍທາງລາຍການໃຫ້ຮູ້ກ່ຽວກັບບັນດາຜົນງານພົ້ນເດັ່ນດ້ານເສດຖະກິດ, ການທູດ, ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກຂອງ ຫວຽດນາມ ໃນປີ 2014 ໄດ້ບໍ່?
ທ່ານ ໝອນແກ້ວ ທີ່ຮັກແພງ , ພວກຂ້າພະເຈົ້າຂໍແນະນຳບາງຜົນງານພົ້ນເດັ່ນຂອງ ຫວຽດນາມ ດັ່ງຕໍ່ໄປນີ້.
+ ກ່ຽວກັບທາງການທູດ: ຫວຽດນາມ ໄດ້ເປັນເຈົ້າການຊຸກຍູ້ການພົວພັນກັບບັນດາຄູ່ຮ່ວມມືຍຸດທະສາດຢ່າງມີຈຸດສຸມ ຜ່ານການພົວພັນຕ່າງປະເທດຂັ້ນສູງ, ການພົວພັນຕ່າງປະເທດປະມຸກລັດ. ລະອຽດຄື: ທ່ານເລຂາທິການໃຫຍ່ ໄປຢ້ຽມຢາມ ລັດເຊຍ; ສົ່ງທູດພິເສດຂັ້ນສູງໄປຍັງ ຈີນ; ປະທານປະເທດ ຢ້ຽມຢາມ ຍີ່ປຸ່ນ, ກຳປູເຈຍ; ທ່ານນາຍົກລັດຖະມົນຕີຢ້ຽມຢາມ ອີຢູ, ອິນເດຍ, ເຂົ້າຮ່ວມກອງປະຊຸມເຂດອະນຸພາກພື້ນແມ່ນ້ຳຂອງເປີດກ້ວາງ; ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຢ້ຽມຢາມ ອາເມລິກາ ແລະ ເລື່ອງ ອາເມລິກາ ລົບລ້າງຄຳສັ່ງຂວ້ຳບາດອາວຸດສ່ວນໜຶ່ງ ໃຫ້ແກ່ ຫວຽດນາມ ແມ່ນບັນດາຜົນງານພົວພັນຕ່າງປະເທດທີ່ສຳຄັນໃນການພົວພັນ 2 ຝ່າຍກັບບັນດາປະເທດໃຫຍ່. ເລື່ອງ ອາຊຽນ ອອກມະຕິກ່ຽວກັບບັນຫາທະເລຕາເວັນອອກ ທີ່ກອງປະຊຸມລັດຖະມົນຕີວ່າການກະຊວງການຕ່າງປະເທດ ໃນເດືອນ 7 ກໍ່ແມ່ນເຫດການທີ່ມີຄວາມໝາຍ.
+ ກ່ຽວກັບດ້ານເສດຖະກິດ: ວົງເງິນສົ່ງອອກຂອງ ຫວຽດນາມ ໃນປີ 2014 ບັນລຸລະດັບສະຖິຕິ 150 ຕື້ USD, ການສົ່ງອອກເກີນດຸນບັນລຸ 2 ຕື້ USD - ສູງສຸດນັບແຕ່ປີ 2012, ພ້ອມກັບການລົງທຶນໂດຍກົງຈາກຕ່າງປະເທດ (FDI) ກ່ວາ 20 ຕື້ USD ແລະ ເງິນຝາກມາຈາກຕ່າງປະເທດກ່ວາ 10 ຕື້ USD ໄດ້ສ້າງເງື່ອນໄຂໃຫ້ສະກຸນເງິນດົ່ງ ເປັນປົກກະຕິ. ໄພເງິນເຟີ້ຂອງທັງປີໄດ້ຮັບການຄວບຄຸມຢູ່ໃນລະດັບຕ່ຳ, ອັດຕາກຳໄລຫລຸດຜ່ອນຢ່າງລຽນຕິດ, ພິເສດຊຸມເດືອນທ້າຍປີ (ບາງເດືອນອັດຕາສິນເຊື່ອເພີ່ມຂຶ້ນກ່ວາ 2,5 %) ເຮັດໃຫ້ຄວາມໄວ້ເນື້ອເຊື່ອໃຈຂອງຜູ້ໃຊ້ສອຍເພີ່ມຂຶ້ນ, ການລົງທຶນຂອງບັນດາວິສາຫະກິດ ແລະ ຄອບຄົວກໍ່ດີຂຶ້ນ.
+ ບັນດາຜົນງານໃນການລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກມີຄວາມໝາຍສຳຄັນພິເສດສຳລັບການພັດທະນາແບບຍືນຍົງຂອງ ຫວຽດນາມ, ພ້ອມທັງຢັ້ງຢືນຜົນງານຂອງປະເທດພວມພັດທະນາໃນຮູບພາບລວມຂອງໂລກເພື່ອແນໃສ່ບັນລຸຈຸດໝາຍ “ບໍ່ມີໄພອຶດຫິວ”. ໂດຍແມ່ນໜຶ່ງໃນ 38 ປະເທດມີຜົນງານພົ້ນເດັ່ນໃນພາລະກິດລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ, ໃນປີ 2014, ຫວຽດນາມ ໄດ້ປະຕິບັດສຳເລັດ 90% ຄາດໝາຍພັດທະນາສະຫັດສະຫວັດຂອງ ສປຊ ກ່ຽວກັບການລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ ແລະ ນອນໃນກຸ່ມ 18 ປະເທດ ໄດ້ຮັບໃບຍ້ອງຍໍກ່ຽວກັບການລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ໃບຢັ້ງຢືນບັນລຸໄດ້ຄາດໝາຍສະຫັດສະຫວັດຈາກອົງການທັນຍາຫານ ແລະ ກະເສດ ສປຊ (FAO).
+ ການຮັບປະກັນຊີວິດສັງຄົມ: ຈຸດພົ້ນເດັ່ນໃນຂົງເຂດຮັບປະກັນຊີວິດສັງຄົມປີ 2014 ແມ່ນສະແດງໃຫ້ເຫັນຜ່ານຈຳນວນຄົນງານມີວຽກເຮັດງານທຳເພີ່ມຂຶ້ນ, ອັດຕາສ່ວນຄອບຄົວທຸກຍາກຫລຸດລົງ, ຈຳນວນຜູ້ເຂົ້າຮ່ວມປະກັນສັງຄົມໄດ້ຮັບການປັບປຸງ, ຕັດສິນເພີ່ມເງິນເດືອນໃຫ້ແກ່ຜູ້ມີຄຸນງາມຄວາມດີ, ຜູ້ອອກກິນເບ້ຍບຳນານ, ຜູ້ມີລະດັບເງິນເດືອນຕ່ຳ… ໃນຂົງເຂດແຮງງານ, ປີ 2014 ຄາດວ່າໄດ້ສ້າງວຽກເຮັດງານທຳໃຫ້ແກ່ຄົນງານ 1,6 ລ້ານຄົນ, ເພີ່ມຂຶ້ນ 3,7 % ເມື່ອທຽບໃສ່ປີ 2013, ໃນນັ້ນ ສົ່ງຄົນງານໄປເຮັດວຽກຢູ່ຕ່າງປະເທດປະມານ 105.000 ຄົນ, ລື່ນກາຍຄາດໝາຍທີ່ວາງອອກກວ່າ 20%. ແລະ ໃນປີຜ່ານມາ, ບັນດາຂະແຫນງການ, ທ້ອງຖິ່ນຕ່າງໆ ກໍໄດ້ຈັດຕັ້ງການປະຕິບັດບັນດານະໂຍບາຍຫລຸດຜ່ອນຄວາມທຸກຍາກ. ທະນາຄານແຫ່ງລັດ ເບີກຈ່າຍຈຳນວນເງິນ ກວ່າ 12.000 ຕື້ດົງ ເພື່ອຊື້ບັດປະກັນສຸຂະພາບໃຫ້ແກ່ຜູ້ທຸກຍາກ, ຊາວຊົນເຜົ່າສ່ວນຫນ້ອຍ, ເດັກນ້ອຍອາຍຸຕ່ຳກວ່າ 6 ປີ, ຫນູນຊ່ວຍຄອບຄົວໃກ້ຈະຖືກຈັດຢູ່ໃນລະດັບຄອບຄົວທຸກຍາກ, ນັກຮຽນ, ນັກສຶກສາ. ຫວຽດນາມ ກໍຍູ້ແຮງການປະຕິບັດນະໂຍບາຍຫນູນຊ່ວຍທີ່ດິນປຸກສ້າງເຮືອນຢູ່, ທີ່ດິນທຳການຜະລິດ, ນ້ຳສະອາດໃຫ້ແກ່ຊາວຊົນເຜົ່າສ່ວນຫນ້ອຍ, ປະຕິບັດສິນເຊື່ອບຸລິມະສິດໃຫ້ແກ່ຄອບຄົວທຸກຍາກໄດ້ກູ້ຢືມທຶນ ນັບແສນໆຄັ້ງ ດ້ວຍຈຳນວນເງິນເກືອບ 10.000 ຕື້ດົງ.
ລາຍການໂອ້ລົມກັບເພື່ອນລາວຂອງພວກເຮົາຂໍ້ສິ້ນສຸດລົງພຽງເທົ່າ ນີ້. ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການກະລຸນາສົ່ງຈົດໝາຍມາຍັງລາຍການໂດຍຈ່າໜ້າ ຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.8256631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.