|
ພິທີສະເຫຼີມສະຫຼອງ 70 ປີແຫ່ງວັນຊາດຫວຽດນາມ 2/9
|
ເຫດການທີ 1 : ພິທີສະເຫຼີມສະຫຼອງ 70 ປີແຫ່ງວັນຊາດຫວຽດນາມ 2/9 ແລະ 40 ປີແຫ່ງວັນປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ
ພິທີສະເຫຼີມສະຫຼອງ, ເດີນຂະບວນ, ສວນສະໜາມໄດ້ຖືກຈັດຂຶ້ນຢ່າງສົມກຽດຢູ່ຮ່າໂນ້ຍ ແລະ ນະຄອນໂຮ່ຈິມິນ. ຜ່ານບັນດາການເຄື່ອນໄຫວສະເຫຼີມສະຫຼອງ, ພວກເຮົາຍິ່ງຮັບຮູ້ຢ່າງເລິກເຊິ່ງກ່ຽວກັບຄວາມໝາຍປະຫວັດສາດທີ່ຍິ່ງໃຫຍ່ ແລະ ບັນດາບົດຮຽນແຫ່ງໄຊຊະນະຂອງການປະຕິວັດເດືອນສິງຫາ ພາໄປເຖິງການສະຖາປະນາປະເທດແຫ່ງສາທາລະນະລັດປະຊາທິປະໄຕຫວຽດນາມ ປະຈຸບັນແມ່ນສາທາລະນະລັດສັງຄົມນິຍົມຫວຽດນາມ; ຂອງມະຫາໄຊລະດູບານໃໝ່ 1975 ອັນໄດ້ພາໃຫ້ປະເທດຊາດໂຮມເຂົ້າກັນເປັນບຶກໜຶ່ງແຜ່ນດຽວ ; ປະຊາຊົນມີຄວາມເອກອ້າງທະນົງໃຈ ແລະ ເຊື່ອໝັ້ນຕໍ່ອະນາຄົດທີ່ສະຫວ່າງສະໄຫວຂອງປະເທດຊາດຫວຽດນາມວິລະຊົນທີ່ພວມປ່ຽນແປງໃໝ່ ແລະ ຂະຫຍາຍຕົວຢ່າງຂງແຮງ.
ກອງປະຊຸມໃຫຍ່ອົງຄະນະພັກນະຄອນຮ່າໂນ້ຍ
|
ເຫດການທີ 2 : ຫວຽດນາມຈັດຕັ້ງກອງປະຊຸມໃຫຍ່ອົງຄະນະພັກຂັ້ນຕ່າງໆສຳເລັດຜົນ
ຜົນສຳເລັດຂອງກອງປະຊຸມໃຫຍ່ອົງຄະນະພັກຂັ້ນຕ່າງໆກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ ແມ່ນໝາກຜົນທີ່ຕ້ອງເປັນໄປຂອງການຊີ້ນຳນຳພາຢ່າງເປັນເຈົ້າການ ແລະ ເປັນເອກະພາບ, ມີປະສິດທິຜົນຂອງພັກກອມມູນິດຫວຽດນາມກ່ຽວກັບການປ່ຽນໃໝ່ວຽກງານກໍ່ສ້າງພັກ ນັບແຕ່ຕົ້ນອາຍຸການກອງປະຊຸມໃຫຍ່ຄັ້ງທີ 11 ຂອງພັກມາຮອດປະຈຸບັນ. ນີ້ແມ່ນປະຖົມປັດໄຈສຳຄັນເພື່ອຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກໃນທ້າຍເດືອນ 1/2016.
ທ່ານ ຫງວຽນຟູ້ຈ້ອງ ພົບປະກັບທ່ານ Obama
|
ເຫດການທີ 3 : ການເຄື່ອນໄຫວພົວພັນຕ່າງປະເທດທີ່ພົ້ນເດັ່ນ
ຄວາມປະທັບທີ່ສຸດແມ່ນການຢ້ຽມຢາມອາເມລິກາຄັ້ງປະຫວັດສາດຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຕາມຄຳເຊີນຂອງປະທານາທິບໍດີ Barack Obama . ນີ້ເປັນຄັ້ງທຳອິດທີ່ເລຂາທິການໃຫຍ່ພັກກອມມູນິດຫວຽດນາມຢ້ຽມຢາມອາເມລິກາ. ບັນດາການເຄື່ອນໄຫວພົວພັນຕ່າງປະເທດຂອງພັກ, ລັດ ແລະ ການເຄື່ອນໄຫວພົວພັນລະຫວ່າງປະຊາຊົນກັບປະເທດຕ່າງໆໄດ້ຖືກດຳເນີນຢ່າງຟົດຟື້ນ ອັນໄດ້ຊຸກຍູ້ການພົວພັນ 2 ຝ່າຍ, ຫຼາຍຝ່າຍໃຫ້ແຂງແຮງ. ຜ່ານນັ້ນກໍເປັນປະກອບສ່ວນເຂົ້າໃນການປົກປ້ອງຜົນປະໂຫຍດຂອງປະເທດຊາດ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ; ສະແດງໃຫ້ເຫັນວ່າ ຫວຽດນາມເປັນສະມາຊິກທີ່ມີຄວາມຮັບຜິດຊອບໃນປະຊາຄົມໂລກ.
IPU 132 ໂດຍສະພາແຫ່ງຊາດຫວຽດນາມເປັນເຈົ້າພາບຈັດຂຶ້ນ
|
ເຫດການທີ 4 : ຈັດຕັ້ງກອງປະຊຸມສະມັດຊາໃຫຍ່ສະຫະພັນລັດຖະສະພາສາກົນຄັ້ງທີ 132 (IPU 132) ສຳເລັດຜົນ
IPU 132 ໂດຍສະພາແຫ່ງຊາດຫວຽດນາມເປັນເຈົ້າພາບຈັດຂຶ້ນເປັນຄັ້ງທຳອິດ ໄດ້ດຶງດູດການເຂົ້າຮ່ວມຂອງຜູ້ແທນກວ່າ 1.600 ຄົນທີ່ມາຈາກກວ່າ 160 ລັດຖະສະພາພາຄີຂອງ IPU , ບັນດາສະມາຊິກຮ່ວມສຳພັນ, ບັນດານັກສັງເກດການ ແລະ ບັນດາອົງການຈັດຕັ້ງສາກົນ. ໝາກຜົນທີ່ສຳຄັນທີ່ສຸດຂອງ IPU 132 ແມ່ນໄດ້ຮັບຮອງເອົາຖະແຫຼງການຮ່າໂນ້ຍ “ບັນດາເປົ້າໝາຍພັດທະນາແບບຍືນຍົງ: ຫັນຄຳເວົ້າເປັນການກະທຳຕົວຈິງ” ຊຶ່ງໄດ້ສະແດງໃຫ້ເຫັນຄວາມມຸ່ງຫວັງ ແລະ ຄຳໝັ້ນໝາຍຂອງ IPU ແລະ ບັນດາລັດຖະສະພາພາຄີໃນການກໍ່ສ້າງ ແລະ ຊຸກຍູ້ການປະຕິບັດບັນດາເປົ້າໝາຍພັດທະນາແບບຍືນຍົງໂດຍສະຫະປະຊາຊາດພວມກໍ່ສ້າງເຖິງປີ 2030, ໃນນັ້ນຖືເອົາມະນຸດແມ່ນໃຈກາງ
ບັນດາການເຈລະຈາ TPP ຂອງຫວຽດນາມ
|
ເຫດການທີ 5 : ຫວຽດນາມໄດ້ບັນລຸຂໍ້ຕົກລົງທີ່ສຳຄັນໃນຂົງເຂດການຄ້າ.
ຫວຽດນາມໄດ້ລົງນາມຢ່າງເປັນທາງການຫຼື ສຳເລັດການເຈລະຈາສັນຍາການຄ້າເສລີ (FTA) ກັບສ.ເກົາຫຼີ; ສະຫະພັນເສດຖະກິດ ອາຊີ-ເອີລົບ; ສະຫະພາບເອີລົບ; ສຳເລັດການເຈລະຈາສັນຍາຄູ່ຮ່ວມມືຂ້າມປາຊີຝິກ TPP ກັບ 11 ປະເທດສະມາຊິກທີ່ຍັງເຫຼືອ. ບັນດາສັນຍາການຄ້າເສລີສະບັບໃໝ່ ພວມໄດ້ຮັບຄວາມ ຫວັງວ່າ ຈະສ້າງກະແສຟອງເຊື່ອມໂຍງເຂົ້າກັບເສດຖະກິດໂລກຄັ້ງທີ 2 ທີ່ແຂງແຮງກວ່າຂອງພື້ນຖານເສດຖະກິດຫວຽດນາມໃນໄລຍະທີ່ຈະມາເຖິງດ້ວຍກາລະໂອກາດ ແລະ ສິ່ງທ້າທາຍຫຼາຍຢ່າງ.
ຫ້ອງເຄື່ອງຈັກເລກ 1 ໂຮງງານໄຟຟ້ານ້ຳຕົກ ລາຍເຈົາເລີ່ມເຄື່ອນໄຫວ
|
ເຫດການທີ 6 : ບາດກ້າວຫັນປ່ຽນຢ່າງແຂງແຮງໃນການກໍ່ສ້າງພື້ນຖານໂຄງລ່າງ
ຫ້ອງເຄື່ອງຈັກເລກ 1 ຂອງໂຮງງານໄຟຟ້ານ້ຳຕົກ ລາຍເຈົາ ດ້ວຍກຳລັງການຜະລິດໄຟຟ້າ 400 ເມກາວັດ ໄດ້ກະຈາຍໄຟຟ້າຢ່າງສຳເລັດຜົນ, ອັນໄດ້ເປີດແງ່ຫວັງຈະສຳເລັດບັນດາກິດຈະການທີ່ສຳຄັນທັງໝົດນີ້ໃນປີ 2016, ໄວກວ່າໜຶ່ງປີເມື່ອທຽບໃສ່ແຜນການທີ່ວາງອອກ. ມີຫຼາຍໂຄງການກໍ່ສ້າງທາງຄົມມະນາຄົມທີ່ສຳຄັນໄດ້ຖືກນຳເຂົ້າເຄື່ອນໄຫວຄື ເສັ້ນທາງຄວາມໄວສູງທີ່ທັນສະໄໝທີ່ສຸດ ຣ໋າໂນ້ຍ-ຫາຍຟ່ອງ, ຂົວເຍິກເຕີນ ແລະ ອາຄານຜູ້ໂດຍສານ T2 ສະໜາມບິນສາກົນໂນ້ຍບາຍ; ເສັ້ນທາງຄວາມໄວສູງ ນະຄອນໂຮ່ຈິມິນ-ລອງແທ່ງ-ເຢົາໄຢ; ຂົວ ໂກຈຽນ. ທັງນີ້ກໍເປັນການປະກອບສ່ວນສ້າງລະບົບພື້ນຖານໂຄງລ່າງໃຫ້ສົມບູນແບບເພື່ອຮັບໃຊ້ການພັດທະນາເສດຖະກິດ-ສັງຄົມຂອງປະເທດຊາດ
ລວມຍອດຜະລິດຕະພັນພາຍໃນ (GDP) ເພີ່ມ 6,68%
|
ເຫດການທີ 7 :ລວມຍອດຜະລິດຕະພັນພາຍໃນ (GDP) ເພີ່ມ 6,68%, ຊຶ່ງແມ່ນລະດັບເພີ່ມສູງສຸດໃນ 8 ປີທີ່ຜ່ານມາ.
ເຖິງວ່າໃນເງື່ອນໄຂທີ່ປະສົບກັບຄວາມຫຍຸ້ງຍາກ, ໂດຍສະເພາະ ສະພາບລາຄານ້ຳມັນດິບໃນໂລກໄດ້ຫຼຸດລົງຫຼາຍກໍຕາມ, ແຕ່ GDP ຍົງຄົງເຕີບໂຕ; ລາຍຮັບງົບປະມານສູງກວ່າເມື່ອທຽບໃສ່ການຄາດຄະເນ. ພ້ອມກັນນັ້ນ, ດັດຊະນີລາຄາໃຊ້ສອຍ CPI ໄດ້ເພີ່ມຂຶ້ນ 0,63% ເມື່ອທຽບໃສ່ປີ 2014, ຊຶ່ງແມ່ນລະດັບຕ່ຳສຸດໃນ 14 ປີທີ່ຜ່ານມາ. ການຜັນແປລະຫວ່າງການເຕີບໂຕ GDP ແລະ ເງິນເຟີ້ໃນປີ 2015 ໄດ້ຮັບການຕີລາຄາວ່າ ແມ່ນຜົນສຳເລັດຂອງພື້ນຖານເສດຖະກິດ ແລະ ການບໍລິຫານຂອງລັດຖະບານ.
ປະທານປະເທດເຈືອງເຕີ້ນຊາງ ມອບງົວໃຫ້ຊາວເຜົ່າແຂວງຮ່າຢາງ
|
ເຫດການທີ 8 : ຫວຽດນາມໄດ້ສຳເລັດເປົ້າໝາຍສະຫັດສະວັດໂດຍພື້ນຖານ
ຕາມບົດລາຍງານຂອງອົງການສະຫະປະຊາຊາດເພື່ອການພັດທະນາ UNDP , ຫວຽດນາມໄດ້ບັນລຸບັນດາຜົນງານອັນໃຫຍ່ຫຼວງຄືສາມາດຫຼຸດຜ່ອນອັດຕາຄວາມອຶດຫິວ ແລະ ທຸກຍາກ, ອັດຕານັກຮຽນເຂົ້າຮຽນຊັ້ນປະຖົມບັນລຸ 99%, ອັດຕາການຕາຍຂອງແມ່ ແລະ ເດັກໄດ້ຫຼຸດລົງ 3/4 … ຫວຽດນາມໄດ້ສຳເລັດກ່ອນກຳນົດ 5 ເປົ້າໝາຍໃນຈຳນວນ 8 ເປົ້າໝາຍສະຫັດສະວັດ ແລະ ພວມສືບຕໍ່ສູ້ຊົນປະຕິບັດສຳເລັດໃຫ້ໝົດສຳລັບບັນດາເປົ້າໝາຍຍັງເຫຼືອຊຶ່ງກ່ຽວຂ້ອງເຖິງການຊຸກຍູ້ສິ່ງແວດລ້ອມ, ສະພາບເດັກຂາດອາຫານ, ການປ້ອງກັນ ແລະ ຕ້ານການຕິດເຊື້ອ HIV/ໂລກເອດ…
ການສຶກສາໄດ້ປ່ຽນໃໝ່ການສອບເສັງຈົບຊັ້ນມັດທະຍົມຕອນປາຍ
|
ເຫດການທີ 9 :ການສຶກສາ ແລະ ກໍ່ສ້າງໄດ້ປ່ຽນໃໝ່ໂດຍພື້ນຖານກ່ຽວກັບການສອບເສັງຈົບຊັ້ນມັດທະຍົມຕອນປາຍແຫ່ງຊາດ
ຈຸດທີ່ແຕກຕ່າງໂດຍພື້ນຖານຂອງການສອບເສັງປີ 2015 ເມື່ອທຽບກັບຊຸມປີກ່ອນນີ້ ແມ່ນການສອບເສັງຖືກຈັດຕັ້ງເທື່ອດຽວ, ດ້ວຍຈຸດປະສົງ ກວດກາລະດັບຄວາມຮູ້ເພື່ອອອກໃບປະກາດສະນິຍະບັດຈົບຊັ້ນມັດທະຍົມຕອນປາຍ ແລະ ຄັດເລືອກເຂົ້າມະຫາວິທະຍາໄລ, ວິທະຍາໄລ. ການປ່ຽນແປງເຫຼົ້ານີ້ ແມ່ນເພື່ອແນໃສ່ຫຼຸດຜ່ອນກຳລັງດັນ, ຫຼຸດຜ່ອນການສິ້ນເປືອງເງິນທຶນ ແລະ ຄວາມເຄັ່ງຕຶງໃນທົ່ວສັງຄົມ, ໂຮງຮຽນ, ນັກຮຽນ ແລະ ພໍ່ແມ່ນັກຮຽນ.
ທ່ານ ຮີ່ງວັນແນ້ນ
|
ເຫດການທີ 10 : ການຕັດສິນໂທດທີ່ຜິດພາດສຳລັບທ່ານ ຫງວຽນແທງເຈີ້ນ ແລະ ທ່ານ ຮີ່ງວັນແນ້ນ
ບັນດາຄວາມຜິດພາດ, ຂໍ້ຂາດຕົກບົກຜ່ອງໃນການເຄື່ອນໄຫວສືບສວນ, ນຳຂຶ້ນສານດຳເນີນຄະດີ ແລະ ພິພາກສາ ໄດ້ພາໄປເຖິງການຕັດສິນໂທດທີ່ຜິດພາດສຳລັບຄະດີຂອງທ່ານ ຫງວຽນແທງເຈີ້ນ ແລະ ທ່ານ ຮີ່ງວັນແນ້ນ, ອັນໄດ້ຮຽກຮ້ອງໃຫ້ຕ້ອງສືບຕໍ່ສ້າງບັນດາປະມວນກົດໝາຍ, ກົດໝາຍທີ່ກ່ຽວຂ້ອງເຖິງການດຳເນີນຄະດີໃຫ້ສົມບູນແບບ. ປະມວນກົດໝາຍວ່າດ້ວຍການດຳເນີນຄະດີອາຍາ ຫາກໍໄດ້ຮັບການຮັບຮອງເອົາທີ່ກອງປະຊຸມສະໄໝສາມັນເທື່ອທີ 10 ສະພາແຫ່ງຊາດຫວຽດນາມຊຸດທີ 13 ໄດ້ກຳນົດແບບບັງຄັບວ່າ ຕ້ອງບັນທຶກສຽງຫຼືບັນທຶກພາບພ້ອມກັບສຽງເມື່ອດຳເນີນສອບປາກຄຳຜູ້ຖືກຫາຢູ່ສະຖານທີ່ກັກຂັງຫຼືຢູ່ສຳນັກງານອົງການສືບສວນ ຊຶ່ງໄດ້ຮັບມອບໝາຍໜ້າທີ່ດຳເນີນບາງການເຄື່ອນໄຫວສືບສວນ.