(vovworld)- ພາຍຫລັງດຳເນີນມາເປັນເວລາ 2 ວັນ ກອງປະຊຸມລັດຖະມົນຕີການຕ່າງປະເທດ 7 ປະເທດອຸດສາຫະກຳຊັ້ນນຳຂອງໂລກ (G7) ຫາກໍ່ສິ້ນສຸດຢູ່ນະຄອນ Hiroshima ປະເທດຍີ່ປຸ່ນ ຊື່ງແມ່ນສະຖຖານທີ່ໄດ້ຮັບຖືວ່າຮ່ອງຮອຍປະຫວັດສາດກ່ຽວກັບໂທດກຳນຳໃຊ້ລະເບີດປະລະມານູ. ກອງປະຊຸມ G7 ແມ່ນໂອກາດເພື່ອໃຫ້ປະເທດເຈົ້າພາບຍີ່ປຸ່ນ ສົ່ງສານເພື່ອໂລກປອດອາວຸດນິວເຄຼຍ ພ້ອມທັງເນັ້ນຫນັກຢ່າງແຮງເຖິງຫລັກໝັ້ນຄັດຄ້ານບັນດາການກະທຳນາບຂູ່ສັນຕິພາບ, ສະຖຽນລະພາບ.
ບັນດາລັດຖະມົນຕີການຕ່າງປະເທດ G7 ປະຊຸມຢູ່Hiroshima
ພາບ:vtv.vn
|
“ຖະແຫລງ Hiroshima” ໄດ້ຮັບການຮັບຮອງເອົາພາຍຫລັງກອງປະຊຸມໄດ້ຢັ້ງຢືນຄືນຄຳໝັ້ນສັນຍາຊອກຫາໂລກປອດໄພກວ່າໃຫ້ທຸກຄົນ, ພ້ອມທັງຊຸກຍູ້ໂລກປອດອາວຸດນິວເຄຼຍ. ຖະແຫລງການຮ່ວມໄດ້ຕຳຫນິຕິຕຽນບັນດາການບຸກໂຈມຕີຂອງອິດສະລາມຫົວຮຸນແຮງທີ່ເກີດຂຶ້ນໃນໄລຍະມໍ່ໆມານີ້ ຢູ່ຕວກກີ, ຝລັ່ງ, ແບນຊິກ ແລະ Nigeria, ຄັດຄ້ານບັນດາເຫດທົດລອງນິວເຄຼຍ ແລະ ຍິງລູກສອນໄຟຂອງ ສປປ ເກົາຫລີ ພ້ອມທັງຄັດຄ້ານບັນດາການກະທຳພຽງລຳພັງຝ່າຍດຽວ ເພື່ອປ່ຽນແປງສະພາບເດີມບັນດາເຂດທະເລຢູ່ພາກພື້ນ ອາຊີ ປາຊີຟີກ.
ສານເພື່ອໂລກປອດອາວຸດນິວເຄຼຍ
ກອງປະຊຸມລັດຖະມົນຕີການຕ່າງປະເທດ G7 ປີນີ້ໂດຍມີການເຂົ້າຮ່ວມຂອງລັດຖະມົນຕີການຕ່າງປະເທດ 7 ປະເທດ ລວມມີ: ການາດາ, ຝລັ່ງ, ເຢຍລະມັນ, ອີຕາລີ, ຍີ່ປຸ່ນ, ອັງກິດ ແລະ ອາເມລິກາ. ໂດຍແມ່ນລັດຖະມົນຕີການຕ່າງປະເທດອາເມລິກາຄົນທຳອິດໄປຢ້ຽມຢາມນະຄອນ Hiroshima, ເລື່ອງທ່ານ John Kerry ພ້ອມດ້ວຍລັດຖະມົນຕີບັນດາປະເທດໄດ້ໄປເຖິງສວນສາທາລະນະ ແລະ ຫໍພິພິດທະພັນອາໄລຫາສັນຕິພາບ Hiroshima ຊື່ງແມ່ນສະຖານທີ່ວາງສະແດງບັນດາຮ່ອງຮອຍຂອງລູກລະເບີດປະລະມານູ ເມື່ອວັນທີ 6/8/1945 ມີລັກສະນະເປັນສັນຍາລັກເລິກເຊິ່ງ, ແມ່ນບາດກ້າວປະຫວັດສາດ ເພື່ອມານະພະຍາຍາມຊຸກຍູ້ໂລກປອດອາວຸດນິວເຄຼຍ.
ກອງປະຊຸມລັດຖະມົນຕີການຕ່າງປະເທດ G7 ດຳເນີນໄປໃນສະພາບຄວາມເຄັ່ງຕຶງມໍ່ໆມານີ້ຢູ່ແຫລມເກົາຫລີ ບໍ່ທັນມີສັນຍານຫລຸດລົງເທື່ອ. ພາຍຫລັງເກີດບັນດາເຫດຍິງທົດລອງລູກສອນໄຟນັບແຕ່ຕົ້ນປີມາຮອດປະຈຸບັນ, ສປປ ເກົາຫລີ ສືບຕໍ່ອອກຄຳກ່າວເຕືອນກ່ຽວກັບຄວາມສາມາດນຳໃຊ້ອາວຸດເຄມີ ເພື່ອໂຕ້ຕອບບັນດາຄຳສັ່ງລົງໂທດຂອງ ສປຊ, ອາເມລິກາ ແລະ ສເກົາຫລີ. ພຽງຢາງກໍຖະແຫລງຍູ້ແຮງການປັບປຸງສາງອາວຸດນິວເຄຼຍຂອງຕົນ ແລະ ໃຫ້ຮູ້ວ່າ: ປະເທດນີ້ ພ້ອມແລ້ວນຳໃຊ້ອາວຸດນິວເຄຼຍບໍ່ວ່າໃນເວລາໃດ ແລະ ຍາມໃດກໍໃນທ່າ “ບຸກໂຈມຕີ” ຖ້າຫາກຖືກສັດຕູນາບຂູ່. ຫວ່າງແລ້ວນີ້, ບັນດາດາວທຽມສອດແນມຂອງ ອາເມລິກາ ໄດ້ພົບເຫັນມີສັນຍານກ່ຽວກັບເລື່ອງ ສປປ ເກົາຫລີ ພວມກະກຽມໃຫ້ເຫດຍິງລູກສອນໄຟນຳວິຖີໂດຍບໍ່ເຄີຍມີມາກ່ອນ ດ້ວຍໄລຍະຍິງສາມາດໄປເຖິງເຂດດິນແດນ ອາເມລິກາ. ບັນດາຂໍ້ມູນດັ່ງກ່າວຖືກຍົກອອກກົງກັບເວລາ ສປປ ເກົາຫລີ ຖະແຫລງທົດລອງເຄື່ອງຈັກລູກສອນໄຟຂ້າມທະວີບສຳເລັດເພື່ອອາດສາມາດບຸກໂຈມຕີ ອາເມລິກາ ເພື່ອໂຕ້ຕອບການຊ້ອມຮົບຮ່ວມຂອງກອງທັບອາເມລິກາ ແລະ ສເກົາຫລີ.
ໄພອັນຕະລາຍເຊິ່ງໂລກຈະຕ້ອງປະເຊີນຫນ້າກັບອາວຸດນິວເຄຼຍ ຍັງກ່ຽວຂ້ອງເຖິງການກະທຳຢ່າງຮ້າຍແຮງຂອງອົງການກໍ່ການຮ້າຍ, ພົ້ນເດັ່ນແມ່ນ ອົງການລັດອິດສະລາມ IS ອ້າງຊື່ເອງ. ຕາມແຫລ່ງຂ່າວສືບລາຊະການລັບ, ການນຳໃຊ້ອາວຸດເຄມີຂອງ IS ພວມມີທ່າອ່ຽງເພີ່ມຂຶ້ນ ແລະ ອາວຸດເຄມີ ຊື່ງ IS ໄດ້ນຳໃຊ້ແມ່ນ ທາດເຄມີ Mustard ທີ່ຍັງເຫລືອຈາກໄລຍະສົງຄາມໂລກຄັ້ງທີ 1. ເດືອນ 2 ຜ່ານມາ, ອົງການສືບລາຊະການລັບສູນກາງ ອາເມລິກາ CIA ໄດ້ກ່າວຫາ IS ເປັນຄັ້ງທຳອິດໄດ້ນຳໃຊ້ອາວຸດເຄມີ ຢູ່ ອີຣັກ ແລະ ຊີຣີ, ໃນນັ້ນ ມີ Mustard ຫວ່າງມໍ່ໆມານີ້, ວັນທີ 4/4 ຜ່ານມາ, ລັດຖະບານ ຊີຣີ ກໍມີຄຳກ່າວຫາວ່າ IS ໄດ້ຍິງລູກປືນຈຳນວນຫນຶ່ງບັນຈຸ Mustard ໃສ່ບັນດາຖານທີ່ໝັ້ນການທະຫານຢູ່ພາກຕາເວັນອອກປະເທດນີ້ ຢູ່ ແຂວງ Deir al Zour. ສະນັ້ນ ບັນດານັກການທູດຊັ້ນນຳຂອງ ອາເມລິກາ, ຍີ່ປຸ່ນ, ອັງກິດ, ການາດາ, ຝລັ່ງ, ເຢຍລະມັນ ແລະ ອີຕາລີ ໃຫ້ຄຳໝັ້ນສັນຍາສຳເລັດແຜນການດຳເນີນງານ G7 ຊື່ງບັນດາການນຳກຸ່ມນີ້ໃຫ້ສັດຕະຍາບັນທີ່ກອງປະຊຸມສຸດຍອດ G7 ໃນເດືອນ 5 ຈະມາເຖິງ. ເລື່ອງເລືອກເຟັ້ນ ນະຄອນ Hiroshima ເປັນຈັດນັດພົບຂອງບັນດາລັດຖະມົນຕີການຕ່າງປະເທດກຸ່ມ G7 ປີນີ້ ກໍເປັນການສະແດງໃຫ້ເຫັນຄຳໝັ້ນສັນຍາຢ່າງແຮງຂອງກຸ່ມ. ນະຄອນ Hiroshima ແມ່ນຫນຶ່ງໃນຮ່ອງຮອຍກ່ຽວກັບໂທດກຳສົງຄາມ 2 ແຫ່ງ, ກາຍເປັນສັນຍາລັກເພື່ອຕັກເຕືອນໃຫ້ໂລກກ່ຽວກັບຄວາມອັນຕະລາຍຂອງອາວຸດນິວເຄຼຍ. ສິ່ງດັ່ງກ່າວກໍສະແດງໃຫ້ເຫັນຄວາມເອົາໃຈໃສ່ຕົ້ນຕໍປະຈຸບັນກ່ຽວກັບດ້ານການເມືອງ ຄວາມສະຫງົບປອດໄພ ນັ້ນແມ່ນ ບັນຫານິວເຄຼຍ ແລະ ກອງປະຊຸມ G7 ແມ່ນກາລະໂອກາດເພື່ອໃຫ້ບັນດາປະເທດສົ່ງສານດັ່ງກ່າວ.
ຄັດຄ້ານບັນດາການກະທຳພຽງລຳພັງຝ່າຍດຽວບົນທະເລ
ບັນຫາຂັດແຍ້ງກັນຢູ່ທະເລຕາເວັນອອກ ກໍແມ່ນຫົວເລື່ອງຮ້ອນເຮັ່ງໃນກອງປະຊຸມບັນດາລັດຖະມົນຕີການຕ່າງປະເທດ G7 ຄັ້ງນີ້. ທະເລຕາເວັນອອກ ກໍໄດ້ຮັບການເຕື້ອງເຖິງໃນຖະແຫລງການຮ່ວມຂອງກອງປະຊຸມ ດ້ວຍເນື້ອໃນວ່າ: ບັນດາລັດຖະມົນຕີ ເຫັນດີເປັນເອກະພາບແມ່ນເນັ້ນຫນັກເຖິງຄວາມສຳຄັນໂດຍພື້ນຖານຂອງການຄຸ້ມຄອງ ແລະ ແກ້ໄຂຄວາມຂັດແຍ້ງກັນບົນທະເລໂດຍສັນຕິວິທີ. ປະເທດເຈົ້າພາບ ຍິ່ປຸ່ນ ຕັ້ງຄວາມຫວັງວ່າ: ບັນດາລັດຖະມົນຕີການຕ່າງປະເທດ G7 ຄັດຄ້ານບັນດາການກະທຳພຽງລຳພັງຝ່າຍດຽວ ເພື່ອປ່ຽນແປງໃຫ້ສະພາບເດີມຢູ່ບັນດາເຂດທະເລ, ພ້ອມທັງສົ່ງເສີມ ຝ່າຍຕາເວັນຕົກ ມີທັດສະນະຫລາຍກວ່າເພື່ອຕາງຫນ້າໃຫ້ບັນດາປະເທດ ອາຊີຕາເວັນອອກສ່ຽງໃຕ້ໃນບັນຫາກ່ຽວຂ້ອງເຖິງທະເລຕາເວັນອອກ.
ເຖິງວ່າບໍ່ເຕື້ອງເຖິງຈີນໂດຍກົງກໍຕາມ, ແຕ່ໃນຖະແຫລງການຂອງກອງປະຊຸມ ແມ່ນຕຳຫນິຕິຕຽນຄວາມມັກໃຫຍ່ໄຝ່ສູງຂອງປັກກີງ ບົນທະເລຕາເວັນອອກ, ພິເສດ ການປະເຊີນຫນ້າຢູ່ທະເລຕາເວັນອອກຫວ່າງແລ້ວນີ້ ລະຫວ່າງອາເມລິກາ ກັບຈີນ ໄດ້ກໍ່ຄວາມວິຕົກກັງວົນນັບມື້ນັບຫລາຍໃນພາກພື້ນ ແລະ ໃນໂລກ.
ການຮ່ວມມື G7 ຕົ້ນກຳເນີດແມ່ນ G8 (ຊື່ງແມ່ນບັນດາປະເທດອຸດສາຫະກຳແຖວຫນ້າໃນໂລກ”, ຍ້ອນລັດເຊຍ ຖອນອອກຈາກກຸ່ມດັ່ງກ່າວແມ່ນກ່ຽວຂ້ອງເຖິງເລື່ອງ ມົດສະກູ ໂຮມເກາະ Crimea ເຂົ້າເຂດດິນແດນຂອງຕົນເມື່ອປີ 2014 ໄດ້ ແລະ ພວມກະທົບຢ່າງແຮງເຖິງສະພາບການທົ່ວໂລກ ເພາະ ມີການເຂົ້າຮ່ວມຂອງບັນດາປະເທດມະຫາອຳນາດກວ່າໝູ່ໃນໂລກ. ສານຈາກກອງປະຊຸມລັດຖະມົນຕີການຕ່າງປະເທດ G7 ຄັ້ງນີ້ ອີກຄັ້ງຫນຶ່ງເຮັດໃຫ້ປະຊາຄົມສາກົນປາດຖະຫນາຕໍ່ການປະກອບສ່ວນຄວາມຮັບຜິດຊອບຂອງບັນດາປະເທດມະຫາອຳນາດເພື່ອໃຫ້ໂລກປອດອາວຸດນິວເຄຼຍ, ມີສັນຕິພາບ ແລະ ສະຖຽນລະພາບ.