(vovworld) - ດ້ວຍຫົວຂໍ້ “ບັນດາຄາດໝາຍພັດທະນາຢ່າງໝັ້ນຄົງ, ຫັນຄຳເວົ້າເປັນການກະທຳຕົວຈິງ“ ກອງປະຊຸມໃຫຍ່ IPU – 132 ໂດຍຫວຽດນາມ ເປັນເຈົ້າພາບຈັດຕັ້ງແຕ່ວັນທີ 28/3-1/4, ຈະກາຍເປັນເວທີປາໄສສຳຄັນ, ຊ່ວຍເພີ່ມທະວີສຽງເວົ້າຂອງລັດຖະສະພາໃນການປະຕິບັດບັນດາຄາດໝາຍພັດທະນາສາກົນ. ໝາກຜົນຂອງ IPU – 132 ກໍ່ແມ່ນພື້ນຖານເພື່ອໃຫ້ສະມັດຊາໃຫຍ່ ສະຫະປະຊາຊາດພິຈາລະນາ, ປຶກສາຫາລື ແລະ ຕົກລົງກ່ຽວກັບການວາງຄາດໝາຍພັດທະນາຢ່າງໝັ້ນຄົງຫຼັງປີ 2015.
ທ່ານ Saber Chowdhury, ປະທານ IPU ອວຍພອນ
ທ່ານຫງວຽນຊິງຮຸ່ງ, ປະທານສະພາແຫ່ງຊາດຫວຽດນາມ ,
ປະທານ IPU-132
ພາບ:anninhthudo.vn
|
ໂດຍໄດ້ຮັບການສ້າງຕັ້ງຂຶ້ນແຕ່ປີ 1889, IPU ແມ່ນອົງການຈັດຕັ້ງສາກົນ, ເຊິ່ງເຕົ້າໂຮມລັດຖະສະພາບັນດາປະເທດທີ່ມີອະທິປະໄຕ. ຈຸດໝາຍ, ຄະຕິທຳຂອງ IPU ແມ່ນເພື່ອສັນຕິພາບ, ຄວາມສະເໝີພາບ, ຄວາມເມດຕາ, ເຄົາລົບ ແລະ ປົກປ້ອງສິດທິມະນຸດ, ສິດຂອງຊາດ, ສິດເສລີ ແລະ ສິດໄດ້ຊົມໃຊ້ຄວາມຜາສຸກ. ດ້ວຍ 166 ລັດຖະສະພາສະມາຊິກ ແລະ 10 ລັດຖະສະພາສະມາຊິກຮ່ວມສຳພັນ, ປະຈຸບັນ, IPU ແມ່ນສູນແຫ່ງການເຄື່ອນໄຫວການທູດລັດຖະສະພາສາກົນ, ເພື່ອສັນຕິພາບ, ປະຊາທິປະໄຕ, ການຮ່ວມມືລະຫວ່າງປະຊາຊາດ ແລະ ລັດຖະສະພາປະເທດຕ່າງໆ
ຫວຽດນາມເຊີດຊູຄັນທຸງສາມັກຄີ, ສັນຕິພາບ
ຈຸດໝາຍ, ຄະຕິທຳແຫ່ງການເຄື່ອນໄຫວຂອງ IPU ແມ່ນສົມກັບຄວາມມຸ່ງມາດປາຖະໜາ ແລະ ແນວທາງພັດທະນາຂອງຫວຽດນາມ. ຍ້ອນເຫດນັ້ນ, ການເປັນເຈົ້າພາບຈັດຕັ້ງ IPU – 132 ໃນໄລຍະທີ່ IPU ພວມຊຸກຍູ້ໂຄງການດຳເນີນງານຂອງຕົນໃຫ້ເໝາະສົມກັບບັນດາໂຄງການດຳເນີນງານ ເຊິ່ງສະຫະປະຊາຊາດໄດ້ວາງອອກໃນໄລຍະ 15 ປີຈະມາເຖິງ. ຫວຽດນາມ ໄດ້ສະໜັບສະໜູນຢ່າງແຮງໃຫ້ແກ່ການຊຸກຍູ້ປະຊາທິປະໄຕ, ສັນຕິພາບ ແລະ ການພັດທະນາຢູ່ໂລກ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ຢືນຢັນສິ່ງດັ່ງກ່າວວ່າ:
“ຢາກໃຫ້ໂລກມີຄວາມສາມັກຄີ, ສັນຕິພາບ, ຮ່ວມມືເພື່ອພ້ອມກັນແບ່ງປັນ, ຊຸກຍູ້ເພື່ອໃຫ້ຊີວິດມີຄວາມອີ່ມໜຳສຳລານ, ມີຄວາມຜາສຸກນັ້ນ, ທຳອິດແມ່ນຕ້ອງເຄົາລົບສິດທິມະນຸດ, ສິດແຫ່ງຊາດ, ສາມັກຄີກັນບົນຈິດໃຈໄວ້ເນື້ອເຊື່ອໃຈເຊິ່ງກັນ ແລະ ກັນ ຈຶ່ງມີກຳລັງແຮງສາມັກຄີທີ່ຍິ່ງໃຫຍ່ ມີລັກສະນະທົ່ວໂລກ, ປະກອບສ່ວນຊຸກຍູ້ການຮ່ວມມືທັງໝົດໃຫ້ປະສົບຜົນສຳເລັດໄດ້“.
ຕາມທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ , ປະຈຸບັນ, ບັນດາລັດຖະສະພານັບມື້ນັບມີບົດບາດສຳຄັນສຳລັບແຕ່ລະປະເທດໃນການຈັດແບ່ງແຫຼ່ງກຳລັງ, ຕົກລົງແຜນງົບປະມານແຫ່ງລັດ, ສ້າງທຸກກົນໄກນະໂຍບາຍດ້ວຍກົດໝາຍ ເພື່ອປະຕິບັດບັນດາໂຄງການຈຸດໝາຍແຫ່ງຊາດ, ປະຕິບັດສຳເລັດບັນດາຄາດໝາຍພັດທະນາແບບຍືນຍົງ. ຍ້ອນເຫດນັ້ນ, ຈຳເປັນຕ້ອງມີຄວາມເຫັນດີເປັນເອກະພາບ, ການສົມທົບກັນດຳເນີນງານລະຫວ່າງລັດຖະສະພາປະເທດຕ່າງໆ ເພື່ອໃຫ້ຄາດໝາຍພັດທະນາຢ່າງໝັ້ນຄົງປະກົດຜົນເປັນຈິງ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ, ເນັ້ນໜັກວ່າ:
“ຫວຽດນາມ ເອົາໃຈໃສ່ເປັນພິເສດ ບໍ່ພຽງແຕ່ວາງຄາດໝາຍຂອງໂຄງການພັດທະນາແບບຍືນຍົງເທົ່ານັ້ນ ຫາກສຳຄັນກວ່າ ຫັນຄຳເວົ້າເປັນການກະທຳ, ໂຄງການນັ້ນ, ມະຕິນັ້ນກາຍເປັນການກະທຳໃນກົນໄກລັດຖະສະພາລວມສາກົນ. IPU 132 ຄັ້ງນີ້ ປຶກສາຫາລືເຖິງເປົ້າໝາຍສະຫັດສະວັດໃຫ້ແກ່ 15 ປີຈະມາເຖິງ, IPU 132 ຕ້ອງເຮັດແນວໃດເພື່ອປະຕິບັດໂຄງການກະທຳນັ້ນ.”
ສ້າງຄວາມໄວ້ເນື້ອເຊື່ອໃຈຢ່າງແຮງ
ໃນໄລຍະກວ່າ 30 ປີແຫ່ງການປ່ຽນໃຫມ່ ແລະ ດຳເນີນການເຊື່ອມໂຍງ, ຫວຽດນາມ ຈາກປະເທດທຸກຍາກກາຍເປັນປະເທດພວມພັດທະນາ, ມີລາຍຮັບລະດັບປານກາງ. ນີ້ແມ່ນບາດກ້າວຫັນປ່ຽນສຳຄັນໃນເສັ້ນທາງເຊື່ອມໂຍງເຂົ້າກັບສາກົນຂອງຫວຽ,ນາມ. 36 ປີ ນັບແຕ່ເມື່ອເຂົ້າເປັນສະມາຊິກ IPU, ສະພາແຫ່ງຊາດຫວຽດນາມ ຍາມໃດກໍແມ່ນສະມາຊິກຕັ້ງຫນ້າ ແລະ ມີຄວາມຮັບຜິດຊອບທີ່ເວທີປາໄສນີ້. ຫວຽດນາມ ດຳລົງຕຳແຫນ່ງເປັນການນຳສຳຄັນໃນ IPU, ໃນຄະນະບໍລິຫານ, ອົງການການນຳສູງສຸດຂອງ IPU.
ຫວຽດນາມ ໄດ້ປະກອບສ່ວນຂໍ້ລິເລີ່ມຫລາຍຂໍ້ໃນການປະຕິບັດບັນດາເປົ້າໝາຍສະຫັດສະວັດ ກ່ຽວກັບການສຶກສາຂັ້ນປະຖົມພາກບັງຄັບ, ເພີ່ມທະວີຄວາມສະເຫມີພາບລະຫວ່າງຍິງຊາຍ, ຍົກສູງບົດບາດ, ທີ່ຕັ້ງຂອງແມ່ຍິງ. ບັນດາຜົນງານຂອງຫວຽດນາມໃນການປະຕິບັດບັນດາເປົ້າໝາຍສະຫັດສະວັດພວມໄດ້ຮັບການຕີລາຄາສູງຈາກເພື່ອນມິດສາກົນ. ປະຈຸບັນ, ຫວຽດນາມ ແມ່ນຫນຶ່ງໃນ 5 ປະເທດພວມພັດທະນາຢູ່ ອາຊີ ມີອັດຕາສ່ວນສະມາຊິກສະພາແຫ່ງຊາດຍິງໃນສະພາແຫ່ງຊາດສູງສຸດ. ບັນດາສະມາຊິກສະພາແຫ່ງຊາດຍິງຂອງສະພາແຫ່ງຊາດຫວຽດນາມ ນັບມື້ນັບຕັ້ງຫນ້າເຂົ້າຮ່ວມກອງປະຊຸມສະມາຊິກສະພາແຫ່ງຊາດຍິງຂອງ IPU. ຄຽງຄູ່ກັນນັ້ນ, ດ້ວຍບັນດາຜົນງານບັນລຸໄດ້ໃນກິດຈະການປ່ຽນແປງໃຫມ່, ຫວຽດນາມ ກໍໄດ້ປະກອບສ່ວນ, ແບ່ງປັນບົດຮຽນກັບລັດຖະສະພາບັນດາປະເທດ. ສິ່ງດັ່ງກ່າວເຮັດໃຫ້ການເຄື່ອນໄຫວຂອງສະພາແຫ່ງຊາດຫວຽດນາມ ກັບ IPU ນັບມື້ນັບສະຫນິດແຫນ້ນກວ່າ. ທ່ານເລຂາທິການໃຫຍ່ IPU Martin Chungong ໃຫ້ຮູ້ວ່າ:
“ເມື່ອເວົ້າເຖິງການພົວພັນລະຫວ່າງ IPU ກັບຫວຽດນາມ ອາດຈະຢືນຢັນວ່າ ການຮ່ວມມືແມ່ນພັດທະນາຢ່າງບໍ່ຢຸດຢັ້ງ. ບໍ່ແມ່ນມາຫວຽດນາມຄັ້ງນີ້ ຂ້າພະເຈົ້າຈຶ່ງຮູ້ເຖິງສິ່ງດັ່ງກ່າວ ຫາກໃນຫລາຍປີຜ່ານມາ ສະພາແຫ່ງຊາດຫວຽດນາມ ກໍມີຫລາຍໂຄງການແລ້ວ. ຍົກຕົວຢ່າງໃນຂົງເຂດເຕັກໂນໂລຊີຂໍ້ມູນຂ່າວສານ, ສະພາແຫ່ງຊາດຫວຽດນາມ ໄດ້ຮັບຖືວ່າ ແມ່ນນຳຫນ້າໃນການນຳເອົາລະບົບຮັກສາເອກະສານນິຕິກຳຜ່ານຫນ້າເວັບ. ຂໍ້ລິເລີ່ມນຳໃຊ້ຂໍ້ມູນຂ່າວສານຂອງສະພາແຫ່ງຊາດຫວຽດນາມ ແມ່ນບົດຮຽນທີ່ດີໃຫ້ແກ່ສະພາແຫ່ງຊາດບັນດາປະເທດ. ສະນັ້ນ ເຂົ້າຮ່ວມ IPU 132, ບັນດາປະເທດສາມາດຖອດຖອນບົດຮຽນຈາກຫວຽດນາມ.”
ການເຂົ້າຮ່ວມຢ່າງຕັ້ງຫນ້າຂອງຫວຽດນາມ ໃນ IPU ໃນໄລຍະຜ່ານມາ, ບັນດາຜົນງານຊື່ງ ຫວຽດນາມ ຍາດມາໄດ້ໃນວິວັດການປ່ຽນໃຫມ່, ພ້ອມກັບແຜນການຈັດຕັ້ງ IPU 132 ດ້ວຍບັນດາເນື້ອໃນແທດຈິງ, ເໝາະສົມ ນັ້ນແມ່ນບັນດາພື້ນຖານເພື່ອໃຫ້ເພື່ອນມິດສາກົນເຊື່ອໝັ້ນຕໍ່ຜົນສຳເລັດຂອງ IPU 132 ຢູ່ຫວຽດນາມ.