ກອງປະຊຸມຂັ້ນສູງອາຊີ-ເອີລົບ ຄັ້ງທີ 10 (ASEM - 10) ໄດ້ຖືກໄຂຂຶ້ນໃນວັນທີ 16/10 ຢູ່ນະຄອນ ມີລານ ປະເທດອີຕາລີ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ນຳໜ້າຄະນະຜູ້ແທນຂັ້ນສູງຫວຽດນາມເຂົ້າຮ່ວມກອງປະຊຸມ, ສືບຕໍ່ປະກອບສ່ວນເຂົ້າໃນບັນດາເນື້ອໃນທີ່ສຳຄັນຂອງກອງປະຊຸມ, ສົມທົບກັນໃນບັນດາບັນຫາພັດທະນາ, ຄວາມສະຫງົບ, ເພີ່ມທະວີການຮ່ວມມື 2 ຝ່າຍກັບບັນດາປະເທດພາຄີ ແນໃສ່ຍົກລະດັບການພົວພັນຄູ່ຮ່ວມມື . ຕໍ່ໄປນີ້, ນັກຂ່າວ vov ມີມົດທີ່ພາດຫົວຂໍ້ວ່າ : “ກອງປະຊຸມຂັ້ນສູງອາຊີ-ເອີລົບ ຄັ້ງທີ 10 : ຊຸກຍູ້ການສົນທະນາເພື່ອການພັດທະນາແບບຍືນຍົງ”. ເຊີນທ່ານຕິດຕາມຮັບຟັງ.
ເວທີປາໄສຮ່ວມມືອາຊີ-ເອີລົບ (ASEM) ໄດ້ຮັບການສ້າງຕັ້ງຂຶ້ນເມື່ອປີ 1966 ຕາມຂໍ້ລິເລີ່ມຂອງສິງກະໂປ, ຝະລັ່ງ ແລະການສະໜັບສະໜູນຢ່າງຕັ້ງໜ້າຈາກກຸ່ມອາຊຽນ. ນີ້ແມ່ນ ເວທີປາໄສສົນທະນາຢ່າງບໍ່ເປັນທາງການລະຫວ່າງບັນດາປະມຸກລັດ ແລະ ຜູ້ນຳລັດຖະບານບັນດາປະເທດສະມາຊິກອາແຊມ(ASEM), ການນຳສະຫະພາບເອີລົບ EU ແລະ ຄະນະເລຂາອາຊຽນ, ອາແຊມ ໄດ້ກວມເອົາປະມານ 63%ຈຳນວນປະຊາກອນຂອງໂລກ, 57% ຈີດີພີ ແລະ 68% ມູນຄ່າການຄ້າທົ່ວໂລກ. ປະຈຸບັນ, ອາແຊມມີຶ 53 ປະເທດສະມາຊິກ ແລະ ການເປີດກ້ວາງ ເຕີບໃຫຍ່ຢ່າງບໍ່ຢຸດຢັ້ງຂອງ ອາແຊມ ໄດ້ ແລະ ພວມຕໍ່ກຳລັງແຮງໃຫ້ແກ່ ເວທີປາໄສໃຫຍ່ອັນດັບ 2 ໃນໂລກນີ້ ຖັດຈາກກອງປະຊຸມສະມັດຊາໃຫຍ່ສະຫະປະຊາຊາດ ແລະ ທັງແມ່ນກົນໄກລະຫວ່າງພາກພື້ນທີ່ໃຫຍ່ທີ່ສຸດໃນໂລກປະຈຸບັນ.
ພາບປະກອບ ຮັບມືກັບສິ່ງທ້າທາຍລວມໃນທົ່ວໂລກ.
ເພີ່ມທະວີການຮ່ວມມື, ສົນທະນາ, ແນໃສ່ຊອກຫາວິທີການແກ້ໄຂຮັກສາສັນຕິພາບ, ສະຖຽນລະພາບ, ຊຸກຍູ້ການຟື້ນຟູເສດຖະກິດ ແລະ ຮັບມືກັບສິ່ງທ້າທາຍທົ່ວໂລກ, ນັ້ນແມ່ນຈຸດສຸມທີ່ກອງປະຊຸມຄັ້ງນີ້. ອາແຊມ 10 ມີຫົວຂໍ້ວ່າ “ ຄູ່ຮ່ວມມືມີໜ້າທີ່ຮັບຜິດຊອບເພື່ອການເຕີບໂຕ ແລະ ຄວາມສະຫງົບໝັ້ນຄົງ”, ຊຶ່ງເລັ່ງໃສ່ປຶກສາຫາລືເນື້ອໃນຕົ້ນຕໍ 4 ປະການເຊັ່ນ : ບັນດາບັນຫາເສດຖະກິດ - ການເງິນ ແລະ ການເຊື່ອມຕໍ່ອາຊີ-ເອີລົບ; ບັນດາບັນຫາທົ່ວໂລກ; ບັນດາບັນຫາສາກົນ ແລະ ພາກພື້ນທີ່ມີຄວາມສົນໃຈ; ກຳນົດທິດໃຫ້ອາແຊມໃນອະນາຄົດ.
ໃນຕົວຈິງ, ການເຕີບໂຕດ້ານເສດຖະກິດທີ່ເຕັມໄປດ້ວຍຄວາມປະທັບໃຈໃນຫຼາຍທົດສະວັດທີ່ຜ່ານມາ ໄດ້ຊ່ວຍໃຫ້ປະຊາຊົນນັບຮ້ອຍລ້ານຄົນຢູ່ 2 ທະວີບນີ້ຫຼຸດພົ້ນອອກຈາກຄວາມອຶດຫິວທຸກຍາກ. ຫຼາຍປະເທດສາມາດບັນລຸລະດັບລາຍຮັບປານກາງ, ບາງປະເທດໄດ້ກາຍເປັນປະເທດອຸດສາຫະກຳພັດທະນາ. ແຕ່ໜ່ວຍໂລກນີ້ ພັດພວມຕ້ອງຮັບຜົນກະທົບຈາກການປ່ຽນແປງຂອງດິນຟ້າອາກາດ, ນ້ຳທະເລຂຶ້ນສູງ, ຊັບພະຍາກອນທຳມະຊາດຖືກສູນຫາຍໄປ, ຄວາມໝັ້ນຄົງດ້ານພະລັງງານ, ຄວາມໝັ້ນຄົງດ້ານສະບຽງອາຫານ, ຄວາມໝັ້ນຄົງຂອງແຫຼ່ງນ້ຳ, ລ້ວນແຕ່ຖືກນາບຂູ່. ຍ້ອນເຫດນີ້, ການພ້ອມກັນກະທຳເພື່ອຜ່ານຜ່າສິ່ງທ້າທາຍ, ບັນລຸການເຕີບໂຕແບບຍືນຍົງ ກໍແມ່ນຈຸດໝາຍຊໍຶ່ງອາແຊມພວມມຸ່ງໄປສູ່. ສິ່ງນີ້ໄດ້ຮັບການຢັ້ງຢືນຈາກທ່ານຮອງນາຍົກລັດຖະມົນຕີຫວຽດນາມ ວູ້ວັນນິງ ທີ່ກອງປະຊຸມຄັ້ງໜຶ່ງໃນຂອບເຂດການຮ່ວມມື ອາແຊມ ຊຶ່ງຖືກຈັດຂຶ້ນຢູ່ຫວຽດນາມເມືອ່ບໍ່ດົນມານີ້. ທ່ານຮອງນາຍົກລັດຖະມົນຕີຫວຽດນາມ ວູ້ວັນນິງ ຢືນຢັນວ່າ : (ເທບ)
“ ໃນສະພາວະຫັນເປັນໂລກາພິວັດ ແລະ ເຊື່ອມໂຍງຢ່າງເລິກເຊິ່ງກວ່ານັ້ນ, ການອາໄສຊຶ່ງກັນ ແລະ ກັນແມ່ນນັບມື້ນັບສູງຂຶ້ນ. ບໍ່ມີປະເທດໃດ, ລັດຖະບານໃດ ທີ່ສາມາດກະທຳດ້ວຍຕົນເອງເພື່ອຮັບມືກັບສິ່ງທ້າທາຍໄດ້. ໂດຍແມ່ນໜຶ່ງໃນບັນດາເວທີປາໄສລະຫວ່າງພາກພື້ນທີ່ສຳຄັນ, ດ້ວຍກຳລັງຄວາມສາມາດດ້ານວິທະຍາສາດເຕັກໂນໂລຢີທີ່ດີ, ອາແຊມມີຄວາມສາມາດ ແລະ ມີຄວາມຮັບຜິດຊອບເພື່ອປະກອບສ່ວນນຳ 2 ທະວີບນີ້ກາຍເປັນກຳລັງຊຸກຍູ້ການພັດທະນາແບບຍືນຍົງຂອງໂລກ ”
ຫວຽດນາມຕັ້ງໜ້າຊຸກຍູ້ການຮ່ວມມືໃນອາແຊມ
ຜ່ານ 18 ປີແຫ່ງການເຂົ້າຮ່ວມອາແຊມ, ຫວຽດນາມຍາມໃດກໍແມ່ນສະມາຂິກທີ່ຕັ້ງໜ້າ, ຂະຫຍັນຂັນເຄື່ອນ ແລະ ມີຄວາມຮັບຜິດຊອບ. ໂດຍແມ່ນໜຶ່ງໃນຈຳນວນບັນດາສະມາຊິກສ້າງຕັ້ງຂອງອາແຊມ, ຫວຽດນາມໄດ້ມີການປະກອບສ່ວນສຳຄັນຫຼາຍຢ່າງໃຫ້ແກ່ເວທີປາໄສນີ້. ມາຮອດປະຈຸບັນ, ຫວຽດນາມໄດ້ນຳສະເໜີຫຼາຍຂໍ້ລິເລີ່ມເພີ່ມທະວີການຮ່ວມມືອາແຊມໃນຂົງເຂດວັດທະນະທຳ, ການສຶກສາ, ສາທາລະນະສຸກ, ຄົມມະນາຄົມຂົນສົ່ງ, ຄວາມໝັ້ນຄົງດ້ານພະລັງງານ. ພິເສດຫວຽດນາມແມ່ນປະເທດນຳໜ້າໃນອາແຊມ ຊຸກຍູ້ການເຕີບໂຕຂຽວ, ຕັ້ງໜ້າຜັນຂະຫຍາຍບັນດາຂໍ້ລິເລີ່ມສ້າງພື້ນຖານເສດຖະກິດຂຽວ ແທດເໝາະກັບເປົ້າໝາຍຂອງສະຫະປະຊາຊາດ. ຄວາມຈິງກ່ຽວກັບເຂົ້າຮ່ວມໃນ ອາແຊມ, ຫວຽດນາມໄດ້ຍາດແຍງ, ຖອດຖອນໄດ້ຫຼາຍບົດຮຽນ, ການຮ່ວມມື ແລະ ໜູນຊ່ວຍຈາກບັນດາສະມາຊິກ ອາແຊມໃນການຫັນປ່ຽນຮູບແບບການເຕີບໂຕເສດຖະກິດ, ປົກປັກຮັກສາສິ່ງແວດລ້ອມ, ຮັກສາ, ຂຸດຄົ້ນບັນດາແຫຼ່ງຊັບພະຍາກອນທຳມະຊາດຢ່າງມີປະສິດທິຜົນ. ສິ່ງນີ້ແມ່ນສອດຄ່ອງກັບຍຸດທະສາດພັດທະນາເສດຖະກິດສົງຄົມຂອງຫວຽດນາມແຕ່ນີ້ເຖິງປີ 2020, ນັ້ນແມ່ນພັດທະນາເສດຖະກິດໄວ, ຍືນຍົງ, ຕິດພັນກັບການ ປົກປັກຮັກສາສິ່ງແວດລ້ອມ. ທ່ານຮອງລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ເຈີນຮົ່ງຮ່າ ຖືວ່າ : (ເທບ)
“ ສຳລັບຫວຽດນາມແລ້ວ, ໂດຍເລີ່ມຈາກປະເທດທີ່ມີລະດັບເສດຖະກິດທີ່ປະສົບກັບຄວາມຫຍຸ້ງຍາກ, ດັ່ງນັ້ນບັນຫາຫຍຸ້ງຍາກທີ່ສຸດໃນປະຈຸບັນ, ນັ້ນແມ່ນເຕັກໂນໂລຢີ, ທຶນຮອນ. ຮ້ອນເຫດນີ້ເອງ, ໃນວິວັດການພັດທະນາ, ຫວຽດນາມຄວນກຳນົດເສັ້ນທາງ, ບັນດາຂົງເຂດຮັບບຸລິມະສິດເມື່ອລົງທຶນຕາມທິດເສດຖະກິດຂຽວ, ເຕັກໂນໂລຢີຂຽວ ແລະ ພະລັງງານສະອາດເພື່ອນຳມາເຊິ່ງປະສິດທິຜົນຫຼາຍຢ່າງ ”
ເຂົ້າຮ່ວມກອງປະຊຸມ ອາແຊມ 10 ຢູ່ອີຕາລີຄັ້ງນີ້, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ແມ່ນໜຶ່ງໃນຈຳນວນການນຳທຳອິດ 3 ທ່ານ ຂຶ້ນກ່າວປາໄສເປີດສາກກອງປະຊຸມຄົບຄະນະກ່ຽວກັບບັນດາບັນຫາທົ່ວໂລກ, ສືບຕໍ່ປະກອບສ່ວນບັນດາຂໍ້ລິເລີ່ມຊຶ່ງພວມແມ່ນຄວາມສົນໃຈລວມຂອງບັນດາປະເທດເກືອບທັງໝົດໃນໂລກ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຍັງແມ່ນໜຶ່ງໃນຈຳນວນການນຳຂັ້ນສູງ 3 ທ່ານຂອງອາຊີໄດ້ຮັບການເຊື້ອເຊີນພົບປະ ແລະ ສົນທະນາກັບບັນດາວິສາຫະກິດອັນດັບໜຶ່ງທີ່ມາຈາກ 2 ທະວີບອາຊີ-ເອີລົບໃນຂອບເຂດ ເວທີປາໄສວິສາຫະກິດອາຊີ-ເອີລົບຄັ້ງທີ 14. ຢູ່ນອກກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຍັງຈະມີການແລກປ່ຽນ, ພົບປະ 2 ຝ່າຍກັບປະມຸກລັດ ແລະ ຜູ້ນຳລັດຖະບານບັນດາປະເທດອີກຫຼາຍທ່ານ. ການພົບປະເຫຼົ່ານັ້ນ, ແນ່ນອນວ່າຈະເປັນການຮັດແໜ້ນຄວາມໄວ້ເນື້ອເຊື່ອໃຈດ້ານການເມືອງຕື່ມອີກ ແລະ ຊຸກຍູ້ການຮ່ວມມື 2 ຝ່າຍໃນບັນດາຂົງເຂດກັບບັນດາຄູ່ຮ່ວມມືທີ່ສຳຄັນຢູ່ 2 ທະວີບນີ້./.