ຮອດທ້າຍວັນທີ 14/4/2016, ແນວໂຮມປະເທດຊາດຫວຽດນາມຢູ່ທ້ອງຖິ່ນຕ່າງໆໃນທົ່ວປະເທດຫວຽດນາມໄດ້ສຳເລັດວຽກງານຮັບເອົາຄຳເຫັນຂອງຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສສຳລັບບັນດາຜູ້ໄດ້ຮັບການສະເໜີອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 14 ເພື່ອປຶກສາຫາລືຄັ້ງທີ 3, ເປັນເອກະພາບກັນກ່ຽວກັບບັນຊີລາຍຊື່ບັນດາຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016-2021. ທີ່ບັນດາກອງປະຊຸມ, ຜູ້ມີສິດເລືອກຕັ້ງໄດ້ປະກອບຄຳເຫັນກັບບັນດາຜູ້ອອກສະໝັກຮັບເລືອກຕັ້ງກ່ຽວກັບຄຸນທາດ, ຄວາມສາມາດ, ຄຸນສົມບັດ, ການພົວພັນຢູ່ເຂດຊຸມຊົນ… ດ້ານອື່ນ, ຜູ້ມີສິດເລືອກຕັ້ງກໍສະແດງຄວາມເປັນຫ່ວງ ແລະ ໄດ້ຝາກຝັງຄວາມມຸ່ງຫວັງຕໍ່ບັນດາຜູ້ໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຈະກາຍເປັນຕົວແທນຂອງປະຊາຊົນຢ່າງແທ້ຈິງ.
ກອງປະຊຸມຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສສຳລັບບັນດາຜູ້ອອກສະໝັກຮັບເລືອກຕັ້ງ |
ກອງປະຊຸມຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສສຳລັບບັນດາຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດແມ່ນມີ່ຄວາມໝາຍສຳຄັນ. ຜ່ານນີ້, ຜູ້ອອກສະໝັກຮັບເລືອກຕັ້ງແຕ່ລະທ່ານ ກໍຮັບຮູ້ໄດ້ເຖິງຄວາມເປັນກຽດ, ຄວາມຮັບຜິດຊອບອັນສູງສົ່ງຂອງຜູ້ເປັນຕົວແທນຂອງປະຊາຊົນ. ບົນພື້ນຖານຄຳຄິດເຫັນໃຫ້ຂໍ້ສັງເກດ ປະກອບສ່ວນຂອງຜູ້ມີສິດເລືອກຕັ້ງ, ບັນດາຜູ້ອອກສະໝັກຮັບເລືອກຕັ້ງຈະສືບຕໍ່ມານະພະຍາຍາມ, ຝຶກຝົນຫຼໍ່ຫຼອມ, ຍົກສູງຄວາມສາມາດປະຕິບັດວຽກງານ, ເຊີດຊູຈິດໃຈຮັບຜິດຊອບເພື່ອເຮັດສຳເລັດບັນດາບັນຫາທີ່ຜູ້ມີສິດເລືອກຕັ້ງມີຄວາມສົນໃຈເປັນຢ່າງດີ.
ຜູ້ມີສິດເລືອກຕັ້ງເລືອກເອົາຜູ້ທີ່ມີຄຸນທາດ, ຄວາມຮູ້ຄວາມສາມາດ
ທີ່ບັນດາກອງປະຊຸມຜູ້ມີສິດເລືອກຕັ້ງຢູ່ເມືອງບາດິງ, ຮ່າໂນ້ຍ, ຜູ້ມີສິດເລືອກຕັ້ງຖືວ່າ ສະພາແຫ່ງຊາດນັບມື້ນັບປະຕິບັດສິດເປັນຕົວແທນຂອງປະຊາຊົນ. ໃນກອງປະຊຸມສະໄໝສາມັນຄັ້ງຕ່າງໆຂອງສະພາແຫ່ງຊາດ, ການໂຕ້ແຍ້ງກັນລະຫວ່າງສະມາຊິກສະພາແຫ່ງຊາດກັບຜູ້ນຳຂະແໜງການຕ່າງໆ ໄດ້ນັບມື້ນັບກ້ວາງເລິກ, ໄປສູ່ເນື້ອແທ້ຂອງບັນຫາ. ທ່ານ ວູ້ແມ້ງຄາ, ຜູ້ມີສິດເລືອກຕັ້ງຖືວ່າ ນີ້ແມ່ນບັນດາບາດກ້າວທີ່ຍາວໄກກ່ຽວກັບປະຊາທິປະໄຕໃນເວທີປາໄສຂອງສະພາແຫ່ງຊາດ. ທ່ານ ວູ້ແມ້ງຄາ ຊີ້ແຈ້ງວ່າ :
“ ຂ້າພະເຈົ້າເຫັນວ່າ ບັນຍາກາດປະຊາທິປະໄຕນັບມື້ນັບໄດ້ຮັບການປະຕິບັດ. ທີ່ຕັ້ງບົດບາດຂອງປະເທດຊາດນັບມື້ນັບສູງຂຶ້ນ. ເພາະສະນັ້ນ, ເມື່ອເລືອກເອົາ ສະມາຊິກສະພາແຫ່ງຊາດ ແມ່ນບໍ່ພຽງແຕ່ເອົາໃຈໃສ່ເຖິງໂຄງປະກອບເທົ່ານັ້ນ, ຫາກຍັງຕ້ອງເອົາໃຈໃສ່ເຖິງຄວາມສາມາດຂອງສະມາຊິກສະພາແຫ່ງຊາດອີກດ້ວຍ ”
ທ່ານ ເລມິນທົງ, ຮອງເລຂາທິການໃຫຍ່ສະພາແຫ່ງຊາດໃຫ້ຮູ້ວ່າ ມາຮອດຈຸດເວລານີ້, ບັນດາທ້ອງຖິ່ນໃນທົ່ວປະເທດໄດ້ສຳເລັດວຽກງານຮັບເອົາຄຳເຫັນຂອງຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສ ແລະ ໄດ້ດຳເນີນການປຶກສາຫາລືຄັ້ງທີ 3. ການຮັບເອົາຄຳເຫັນ, ຂໍ້ສັງເກດສຳລັບຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ, ສະມາຊິກສະພາປະຊາຊົນຢູ່ທ້ອງຖິ່ນແມ່ນເນື້ອໃນປະການໜຶ່ງທີ່ສຳຄັນ ແລະ ຈຳເປັນທີ່ສຸດເພື່ອຮັບປະກັນໃຫ້ ຜູ້ມີສິດເລືອກຕັ້ງສາມາດເລືອກເອົາບັນດາຜູ້ທີ່ມີຄຸນທາດ, ຄວາມຮູ້ຄວາມສາມາດເຂົ້າໃນສະພາແຫ່ງຊາດ ແລະ ສະພາປະຊາຊົນຂັ້ນຕ່າງໆ. ພ້ອມກັນນັ້ນ, ນີ້ກໍແມ່ນພື້ນຖານເພື່ອໃຫ້ກອງປະຊຸມປຶກສາຫາລືຄັ້ງທີ 3 ຊັງຊາ, ລົບຊື່ບັນດາຜູ້ທີ່ບໍ່ມີຄຸນທາດ, ຄວາມຮູ້ຄວາມສາມາດຢ່າງພຽງພໍອອກຈາກບັນຊີລາຍຊື່ບັນດາຜູ້ອອກສະໝັກຮັບເລືອກຕັ້ງ. ທ່ານ ເລມິນທົງ, ຮອງເລຂາທິການໃຫຍ່ສະພາແຫ່ງຊາດໃຫ້ຮູ້ວ່າ :
“ ໝາກຜົນຂອງກອງປະຊຸມປຶກສາຫາລືຄັ້ງທີ 3 ໄດ້ສ່ອງແສງເຖິງໝາກຜົນຂອງກອງປະຊຸມຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສສຳລັບບັນດາຜູ້ອອກສະໝັກຮັບເລືອກຕັ້ງເພື່ອໃຫ້ແນວໂຮມປະເທດຊາດຫວຽດນາມ ແລະ ບັນດາອົງການທີ່ກ່ຽວຂ້ອງດຳເນີນການປຶກສາຫາລື, ເລືອກເອົາບັນດາຜູ້ທີ່ມີມາດຕະຖານຢ່າງພຽງພໍຕາມລະບຽບກົດໝາຍ, ແລ້ວສົ່ງມາຍັງສະພາເລືອກຕັ້ງແຫ່ງຊາດກໍຄືຄະນະກຳມະການເລືອກຕັ້ງຂັ້ນແຂວງ, ຂັ້ນເມືອງແຕ່ລະຂັ້ນເພື່ອຂຶ້ນບັນຊີລາຍຊື່. ແນ່ນອນວ່າ ຜ່ານການຮັບເອົາຄຳຄິດເຫັນຂອງຜູ້ມີສິດເລືອກຕັ້ງ, ຜູ້ອອກສະໝັກຮັບເລືອກຕັ້ງບາງທ່ານຈະບໍ່ສາມາດຕອບສະໜອງຄວາມຮຽກຮ້ອງຕ້ອງການເພາະວ່າຄວາມໄວ້ວາງໃຈໃນບ່ອນຂອງຜູ້ມີສິດເລືອກຕັ້ງຢູ່ອາໄສແມ່ນສຳຄັນທີ່ສຸດ ”
ເປັນທີ່ຈະແຈ້ງແລ້ວວ່າ ກອງປະຊຸມຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສ, ຊຶ່ງແມ່ນບ່ອນທີ່ຜູ້ມີສິດເລືອກຕັ້ງມີຄວາມເຊື່ອໝັ້ນ, ຄວາມມຸ່ງຫວັງເພື່ອໃຫ້ຜູ້ແທນເມື່ອໄດ້ຮັບການເລືອກຕັ້ງ, ຍາມໃດກໍຈົດຈຳຄວາມມຸ່ງຫວັງຂອງ ຜູ້ມີສິດເລືອກຕັ້ງ.
ແມ່ນຂັ້ນຕອນຕ້ອງປະຕິບັດໃນການເລືອກຕັ້ງ
ທ່ານບຸຍວັນຊ່ວຽນ, ກຳມະການຜູ້ປະຈຳການກຳມາທິການກົດໝາຍຂອງສະພາແຫ່ງຊາດຫວຽດນາມຖືວ່າ ກອງປະຊຸມຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສ ແມ່ນໂອກາດເພື່ອໃຫ້ຜູ້ມີສິດເລືອກຕັ້ງຕິດຕາມກວດກາພະນັກງານ, ເພື່ອໃຫ້ພະນັກງານສືບຕໍ່ມານະພະຍາຍາມຮັບໃຊ້ປະຊາຊົນ, ຕອບສະໜອງຄວາມມຸ່ງຫວັງຂອງຜູ້ມີສິດເລືອກຕັ້ງ. ທ່ານບຸຍວັນຊ່ວຽນ, ກຳມະການຜູ້ປະຈຳການກຳມາທິການກົດໝາຍຂອງສະພາແຫ່ງຊາດຫວຽດນາມຖືວ່າ :
“ ນີ້ແມ່ນຂັ້ນຕອນຕ້ອງປະຕິບັດ, ຊຶ່ງສະແດງໃຫ້ເຫັນຄວາມໄວ້ວາງໃຈຂອງຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສສຳລັບຜູ້ອອກສະໝັກຮັບເລືອກຕັ້ງໃນເຂດຊຸມຊົນ. ນີ້ເປັນຄັ້ງທຳອິດທີ່ ຜູ້ມີສິດເລືອກຕັ້ງຕີລາຄາ, ໃຫ້ຂໍ້ສັງເກດກ່ຽວກັບທັງໝົດຄວາມຮຽກຮ້ອງຕ້ອງການທີ່ໄດ້ວາງອອກສຳລັບຜູ້ອອກສະໝັກຮັບເລືອກຕັ້ງ”
ກອງປະຊຸມຜູ້ມີສິດເລືອກຕັ້ງຢູ່ຕາມບ່ອນຢູ່ອາໄສແມ່ນພື້ນຖານສຳຄັນເພື່ອຕົກລົງບັນຊີລາຍຊື່ ບັນດາຜູ້ອອກສະໝັກຮັບເລືອກຕັ້ງທີ່ເຂົ້າຮ່ວມການປຶກສາຫາລືຄັ້ງທີ 3. ຈາກນັ້ນ ຜູ້ມີສິດເລືອກຕັ້ງສາມາດເລືອກເອົາບັນດາຜູ້ແທນທີ່ມີຄຸນທາດ, ຄຸນສົມບັດ, ຄວາມຮູ້ຄວາມສາມາດເພື່ອອຸທິດສ່ວນຈົນສຸດຄວາມສາມາດຂອງຕົນໃຫ້ແກ່ປະຊາຊົນ, ພ້ອມທັງເຂົ້າຮ່ວມຕັດສິນບັນດາບັນຫາສຳຄັນຂອງປະເທດຊາດ.