ກອງປະຊຸມຄັ້ງທີ 3, ຄະນະບໍລິຫານງານສູນກາງພັກຊຸດທີ 12
ທີ່ກອງປະຊຸມຄັ້ງທີ 3 ທີ່ແກ່ຍາວແຕ່ວັນທີ 4-8/7/2016, ຄະນະບໍລິຫານງານສູນກາງຊຸດທີ 12 ຈະປຶກສາຫາລື ແລະ ຕົກລົງກ່ຽວກັບ: ລະບຽບການເຮັດວຽກຂອງ ຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ; ລະບຽບການເຮັດວຽກຂອງຄະນະກຳມະການກວດກາສູນກາງ; ຂໍ້ກຳນົດກ່ຽວກັບການປະຕິບັດກົດລະບຽບຂອງພັກ; ຂໍ້ກຳນົດກ່ຽວກັບວຽກງານກວດກາ, ຕິດຕາມກວດກາ ແລະ ການດຳເນີນກົດວິໄນຂອງພັກ; ເລື່ອງສະເໜີບຸກຄະລາກອນການນຳຂັ້ນສູງຂອງບັນດາອົງການລັດ, ແລະ ບາງບັນຫາສຳຄັນອື່ນໆອີກ.
ປ່ຽນໃໝ່, ປັບປຸງລະບຽບການເຮັດວຽກ
ກ່ຽວກັບລະບຽບການເຮັດວຽກຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາ ແລະ ຄະນະກຳມະການກວດກາສູນກາງ, ທ່ານເລຂາທິການໃຫຍ່ ຫງວຽນຟູ໋ຈ້ອງ, ຊີ້ແຈ້ງວ່າ:
“ນີ້ແມ່ນເລື່ອງຫັນກົດລະບຽບຂອງພັກເປັນລະອຽດ, ເຊິ່ງໃນນັ້ນກຳນົດບົດບາດ, ໜ້າທີ່, ຄວາມຮັບຜິດຊອບ, ສິດອຳນາດ, ລະບອບເຮັດວຽກ ແລະ ວິທີປະຕິບັດວຽກງານຂອງບັນດາອົງການການນຳພັກ, ຮັບປະກັນປະຕິບັດຫຼັກການດຳເນີນຊີວິດ ແລະ ການເຄື່ອນໄຫວຂອງພັກຢ່າງເຂັ້ມງວດ, ພິເສດແມ່ນຫຼັກການລວມສູນປະຊາທິປະໄຕ. ບົນພື້ນຖານສືບທອດລະບຽບການເຮັດວຽກຂອງກອງປະຊຸມຊຸດທີ 11 ແລະ ບັນດາຊຸດກ່ອນ, ສະໜິດຕິດພັນກັບມະຕິກອງປະຊຸມໃຫຍ່ຄັ້ງທີ 12 ແລະ ກົດລະບຽບຂອງພັກ, ລະບຽບການເຮັດວຽກຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາ ແລະ ຄະນະກຳມະການກວດກາສູນກາງຊຸດນີ້ຄວນມີບັນດາຂໍ້ກຳນົດຢ່າງລະອຽດ, ແໜ້ນແຟ້ນ, ເໝາະສົມກັບພຶດຕິກຳຕົວຈິງ, ຮັບປະກັນເສີມຂະຫຍາຍປະຊາທິປະໄຕໃນການດຳເນີນຊີວິດຂອງຄະນະບໍລິຫານງານສູນກາງ, ກົມການເມືອງ, ຄະນະເລຂາທິການ, ຄະນະກຳມະການກວດກາສູນກາງໃຫ້ດີກວ່າອີກ, ພ້ອມທັງຮັກສາກົດລະບຽບ, ຂໍ້ກຳນົດໃນພັກຢ່າງເຂັ້ມງວດ “.
ທ່ານເລຂາທິການໃຫຍ່ ຫງວຽນຟູ໋ຈ້ອງ, ຖືວ່າ, ໃນລະບຽບການເຮັດວຽກ, ຄະນະບໍລິຫານງານສູນກາງ ກົມການເມືອງ, ຄະນະເລຂາທິການ ແລະ ຄະນະກຳມະການກວດກາສູນກາງຕ້ອງຮັກສາລະບອບຊີ້ນຳນຳພາລວມໝູ່ໄວ້ຢ່າງໝັ້ນຄົງ, ເພີ່ມທະວີຄວາມຮັບຜິດຊອບສ່ວນຕົວ, ພິເສດແມ່ນຜູ້ທີ່ເປັນຫົວໜ້າ; ຍົກສູງຄວາມສາມາດ ແລະ ປະສິດທິຜົນການຊີ້ນຳນຳພາຂອງພັກ. ພ້ອມທັງເສີມຂະຫຍາຍລັກສະນະເປັນເຈົ້າການ, ມີຫົວຄິດປະດິດສ້າງ ແລະ ຄວາມຮັບຜິດຊອບຂອງບັນດາອົງການຈັດຕັ້ງອື່ນໆໃນລະບົບການເມືອງ. ນີ້ແມ່ນບັນດາພື້ນຖານສຳຄັນເພື່ອປະກອບສ່ວນຍົກສູງຄູນນະພາບ, ປະສິດທິຜົນການເຄື່ອນໄຫວຂອງພັກ, ເພີ່ມທະວີກຳລັງແຮງ, ຄວາມສາມັກຄີເປັນເອກະພາບໃນພັກ, ປ່ຽນໃໝ່ວິທີຊີ້ນຳນຳພາຂອງພັກທີ່ມີຕໍ່ລັດ ແລະ ສັງຄົມ
ປະຕິບັດກົດລະບຽບໃນທົ່ວພັກຢ່າງເຂັ້ມງວດ ແລະ ເປັນເອກະພາບ
ທ່ານເລຂາທິການໃຫຍ່ ຫງວຽນຟູ໋ຈ້ອງ
ກ່ຽວກັບຂໍ້ກຳນົດປະຕິບັດກົດລະບຽບຂອງພັກ, ຂໍ້ກຳນົດກ່ຽວກັບວຽກງານກວດກາ, ຕິດຕາມກວດກາ ແລະ ກົດວິໄນຂອງພັກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໃຫ້ຮູ້ວ່າ, ກົມການເມືອງໄດ້ຊີ້ນຳຄະນະຈັດຕັ້ງສູນກາງ, ຄະນະກຳມະການກວດກາສູນກາງ ແລະ ບັນດາອົງການກ່ຽວຂ້ອງສົມທົບກັນກະກຽມບັນດາເນື້ອໃນສະເໜີ ແລະ ຮ່າງບັນດາຂໍ້ກຳນົດ. ເນື້ອໃນຂອງໃບສະເໜີ ແລະ ຮ່າງບັນດາຂໍ້ກຳນົດແມ່ນສະໜິດຕິດແທດກັບບົດລາຍງານສະຫຼຸບການປະບັດກົດລະບຽບຂອງພັກຊຸດທີ 11 ແລະ ຂໍ້ສະເໜິບັນດາເນື້ອໃນທີ່ເໝາະສົມກັບພຶດຕິກຳຕົວຈິງຂອງການປະຕິບັດກົດລະບຽບຂອງພັກ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງບັນດາເນື້ອໃນເຊິ່ງບັນດາກຳມະການສູນກາງຄວນປະກອບຄວາມເຫັນ:
“ນັ້ນແມ່ນຂໍ້ກຳນົດກ່ຽວກັບເປົ້າໝາຍ, ເນື້ອໃນການກວດກາ, ກ່ຽວກັບອຳນາດດຳເນີນກົດວິໄນຂອງໜ່ວຍພັກ; ເລື່ອງກຳນົດອົງຄະນະພັກຮາກຖານ, ໜ່ວຍພັກດຳເນີນຊີວິດປະຈຳໄລຍະ; ເລື່ອງກຳນົດກ່ຽວກັບເວລາກະກຽມຂອງສະມາຊິກພັກເພື່ອຄິດໄລ່ເຖິງອາຍຸເປັນສະມາຊິກພັກ; ເລື່ອງບໍ່ແບ່ງຂັ້ນຢ່າງລະອຽດໃນການພິຈາລະນາ, ແກ້ໄຂຄຳຮ້ອງທຸກ, ຟ້ອງຮ້ອງ ແລະ ເລື່ອງກຳນົດສະມາຊິກພັກທີ່ມີສິດຮ້ອງທຸກ ເຖິງຄະນະ ບໍລິຫານງານສູນກາງ; ຂໍ້ກຳນົດກ່ຽວກັບເງື່ອນໄຂບົ່ງຕົວສະມາຊິກພັກນອກອົງຄະນະພັກເຂົ້າຮ່ວມໃນຄະນະພັກ; ກ່ຽວກັບຂໍ້ກຳນົດບົດບາດ, ໜ້າທີ່ຂອງອົງຄະນະພັກພາກສ່ວນ; ກ່ຽວກັບສະພາບການຍ້ອງຍໍໃນພັກ: ກ່ຽວກັບວຽກງານກວດກາ, ຕິດຕາມກວດກາຂອງບັນດາອົງການຈັດຕັ້ງພັກ; ກ່ຽວກັບໜ້າທີ່ຂອງຄະນະກຳມະການກວດກາທຸກຂັ້ນ; ກ່ຽວກັບການດຳເນີນກົດວິໄນ ແລະ ການລົງມະຕິດຳເນີນກົດວິໄນ, ກ່ຽວກັບການຮ້ອງທຸກໃນການດຳເນີນກົດວິໄນຂອງພັກ“.
ທ່ານເລຂາທິການໃຫຍ່ ຫງວຽນຟູ໋ຈ້ອງ ກໍ່ຢືນຢັນວ່າເລື່ອງສະເໜີບຸກຄະລາກອນການນຳຂັ້ນສູງຂອງບັນດາອົງການລັດອາຍຸການ 2016-2021 ຢູ່ກອງປະຊຸມຄັ້ງນີ້ ແມ່ນມີຄວາມໝາຍສຳຄັນ. ສຳລັບບັນດາຕຳແໜ່ງປະທານປະເທດ, ນາຍົກລັດຖະມົນຕີລັດຖະບານ, ປະທານສະພາແຫ່ງຊາດ ແລະ 34 ຕຳແໜ່ງການນຳອື່ນໆຂອງບັນດາອົງການລັດ ໄດ້ຮັບການສະເໜີ ຫຼືໃຫ້ຄຳເຫັນຮັບຮອງເອົາຈາກກອງປະຊຸມສູນກາງຄັ້ງທີ 2 ຊຸດທີ 12 ດ້ວຍຈຳນວນບັດໄວ້ວາງໃຈສູງນັ້ນ, ຄະນະກຳມະການບໍລິຫານງານສູນກາງຈະບໍ່ດຳເນີນການປ່ອນບັດສະເໜີ ຫຼືຮັບເອົາຄຳເຫັນຄືນໃຫມ່ອີກ. ສຳລັບ 13 ຕຳແໜ່ງທີ່ຍັງເຫຼືອ ບໍ່ທັນຮັບເອົາບັດສະເໜີຢູ່ກອງປະຊຸມສູນກາງຄັ້ງທີ 2 ແລະ ບັນດາຕຳແໜ່ງທີ່ຄາດວ່າຈະມີການປ່ຽນແປງເມື່ອທຽບໃສ່ຄັ້ງກ່ອນ, ກົມການເມືອງຈະຂໍຄຳເຫັນຂອງສູນກາງດ້ວຍບັດ ກ່ອນທີ່ສະເໜີຢ່າງເປັນທາງການ ເພື່ອໃຫ້ສະພາແຫ່ງຊາດພິຈາລະນາ, ເລືອກຕັ້ງ ຫຼືໃຫ້ສັດຕະຍາບັນຢູ່ກອງປະຊຸມຄັ້ງທຳອິດຂອງສະພາແຫ່ງຊາດຊຸດທີ 14.