(vovworld) - ເລື່ອງສະພາຄວາມໝັ້ນຄົງ ສະຫະປະຊາຊາດ ຮັບຮອງເອົາມະຕິລົງໂທດໃຫມ່ສຳລັບ ສປປເກົາຫຼີ ໃນວັນທີ 30/11 ໄດ້ຮັບຖືວ່າ ແມ່ນການກະທຳເຂັ້ມແຂງທີ່ສຸດນັບແຕ່ກ່ອນມາຮອດປະຈຸບັນສຳລັບປະເທດນີ້. ວົງການການເມືອງຫຼາຍປະເທດ ກໍ່ຄືວົງການນັກໄຈ້ແຍກຖືວ່າ ຂອບເຂດການລົງໂທດເຊິ່ງມະຕິເຕື້ອງເຖິງນັ້ນຈະເປັນຄວາມກົດດັນເພື່ອໃຫ້ ສປປເກົາຫຼີ ຫຼຸດຜ່ອນບັນດາການກະທຳທີ່ກໍ່ຄວາມເຄັ່ງຕຶງໃຫ້ພາກພື້ນ ແລະ ກັບຄືນສູ່ການເຈລະຈາລະຫວ່າງ 6 ຝ່າຍ. ເຖິງຢ່າງໃດກໍ່ຕາມ, ນີ້ແມ່ນສິ່ງທີ່ບໍ່ງ່າຍດາຍ
(ພາບປະກອບ/Reuters)
(vovworld) - ເລື່ອງສະພາຄວາມໝັ້ນຄົງ ສະຫະປະຊາຊາດ ຮັບຮອງເອົາມະຕິລົງໂທດໃຫມ່ສຳລັບ ສປປເກົາຫຼີ ໃນວັນທີ 30/11 ໄດ້ຮັບຖືວ່າ ແມ່ນການກະທຳເຂັ້ມແຂງທີ່ສຸດນັບແຕ່ກ່ອນມາຮອດປະຈຸບັນສຳລັບປະເທດນີ້. ວົງການການເມືອງຫຼາຍປະເທດ ກໍ່ຄືວົງການນັກໄຈ້ແຍກຖືວ່າ ຂອບເຂດການລົງໂທດເຊິ່ງມະຕິເຕື້ອງເຖິງນັ້ນຈະເປັນຄວາມກົດດັນເພື່ອໃຫ້ ສປປເກົາຫຼີ ຫຼຸດຜ່ອນບັນດາການກະທຳທີ່ກໍ່ຄວາມເຄັ່ງຕຶງໃຫ້ພາກພື້ນ ແລະ ກັບຄືນສູ່ການເຈລະຈາລະຫວ່າງ 6 ຝ່າຍ. ເຖິງຢ່າງໃດກໍ່ຕາມ, ນີ້ແມ່ນສິ່ງທີ່ບໍ່ງ່າຍດາຍ.
ມະຕິສະບັບໃໝ່ຂອງສະພາຄວາມໝັ້ນຄົງທີ່ມີໝາຍເລກ 2321 ນັ້ນ, ແມ່ນກ່ຽວຂ້ອງເຖິງເຫດທົດລອງນິວເຄຼຍຄັ້ງທີ 5, ນີ້ກໍ່ແມ່ນເຫດທົດລອງ ນິວເຄຼຍໃຫຍ່ກວ່າໝູ່ຂອງ ສປປເກົາຫຼີ ທີ່ດຳເນີນເມື່ອເດືອນ 9 ຜ່ານມາ. ມະຕິຍາວ 17 ໜ້າ, ເຊິ່ງໄດ້ຮັບການຮັບຮອງເອົາດ້ວຍບັດສະໜັບສະໜູນ 15 ບັດ ແລະ ບໍ່ມີບັດຄ້ານ. ນີ້ແມ່ນມະຕິລົງໂທດທີ 6 ຂອງສະພາຄວາມໝັ້ນຄົງ ສປຊ ທີ່ມີຕໍ່ ສປປເກົາຫຼີ.
ສຸມໃສ່ລົງໂທດບັນດາຂົງເຂດທີ່ມີແຫຼ່ງລາຍຮັບດ້ວຍເງິນຕາຕ່າງປະເທດ
ຈຸດປະສົງລົງໂທດເຊິ່ງມະຕິ 2321 ມຸ່ງໄປເຖິງ ແມ່ນເພື່ອເຮັດໃຫ້ພື້ນຖານເສດຖະກິດອ່ອນລົງ. ໂດຍລະອຽດແມ່ນ, 15 ປະເທດສະມາຊິກຂອງ ສະພາຄວາມໝັ້ນຄົງ ສປຊ ຕົກລົງຈັດວາງຄຳສັ່ງລົງໂທດຕໍ່ຂະແໜງອຸດສາຫະກຳສົ່ງອອກແຖວໜ້າຂອງ ສປປເກົາຫຼີ, ນັ້ນແມ່ນຖ່ານຫີນ, ກໍ່ຄວາມດັນຕໍ່ພຽງຢາງດ້ວຍການກີດຂວາງການສົ່ງອອກຖ່ານຫີນຂອງປະເທດນີ້ໃຫ້ຕຳ່ກວ່າລະດັບ 400 ລ້ານ USD/ປີ ຫຼື 7,5ລ້ານໂຕນ. ສິ່ງດັ່ງກ່າວເທົ່າກັບຄາດໝາຍຫຼຸດປະລິມານຖ່ານຫີນສົ່ງອອກໃນແຕ່ລະປີຂອງ ສປປເກົາຫຼີ ລົງກວ່າ 60%. ສາຍເຫດທີ່ພາໃຫ້ຖ່ານຫີນກາຍເປັນຂົງເຂດຈຸດສຸມໃນການຈັດວາງຄຳສັ່ງລົງໂທດຄັ້ງນີ້ ຂອງສະພາຄວາມໝັ້ນຄົງ ສປຊ, ນັ້ນແມ່ນການສົ່ງອອກຖ່ານຫີນ ແມ່ນໜຶ່ງໃນບັນດາແຫຼ່ງລາຍຮັບເງິນຕາຈາກຕ່າງປະເທດໃຫຍ່ກວ່າໝູ່ຂອງ ສປປເກົາຫຼີ ໃນປະຈຸບັນ. ມະຕິກໍ່ເພີ່ມເຕີມບັນດາຊັບພະຍາກອນໂລຫະເຊັ່ນ: ທອງ, ນິເກັນ, ເງິນ, ..ເຂົ້າບັນຊີລາຍຊື່ສິນຄ້າຖືກຫ້າມສົ່ງອອກຈາກ ສປປເກົາຫຼີ, ຄວບຄຸມຂົງເຂດເດີນທະເລ ແລະ ການເງິນຂອງປະເທດນີ້. ຄາດຄະເນວ່າ, ບັນດາມາດຕະການລົງໂທດໃໝ່ ຈະພາໃຫ້ແຫຼ່ງລາຍຮັບເງິນຕາຕ່າງປະເທດຂອງ ສປປເກົາຫຼີ ຫຼຸດລົງປະມານ 800 ລ້ານ USD/ປີ.
ຄຽງຂ້າງບັນຫາເສດຖະກິດ, ມະຕິສະບັບໃໝ່ກໍ່ຈັດວາງຄຳສັ່ງລົງໂທດສຳລັບເຈົ້າໜ້າທີ່ບາງທ່ານ ແລະ ອົງການຈັດຕັ້ງຂອງ ສປປເກົາຫຼີ ທີ່ຖືກສົງໃສວ່າມີສ່ວນກ່ຽວຂ້ອງເຖິງໂຄງການນິວເຄຼຍຂອງປະເທດນີ້. ບັນດາສະມາຊິກທັງໝົດຂອງອົງການລ້ວນແຕ່ຖືກຫ້າມບໍ່ໃຫ້ໄປມາໃນທົ່ວໂລກ, ຊັບສົມບັດຖືກປິດລ້ອມ. ມະຕິ 2321 ກໍ່ຫ້າມການອຸປະຖຳໃຫ້ບັນດາການເຄື່ອນໄຫວແລກປ່ຽນການຄ້າກັບ ສປປເກົາຫຼີ, ຮຽກຮ້ອງຮັດແໜ້ນເລື່ອງກວດກາສິນຄ້າຂອງປະເທດນີ້.
ບັນດາປະເທດທີ່ຖືກ ສປຊ ຮຽກຮ້ອງໃຫ້ຫຼຸດຜ່ອນຈຳນວນພາລະກອນການທູດຂອງ ສປປເກົາຫຼີ ຢູ່ປະເທດຕົນລົງ ແລະ ຈຳກັດຈຳນວນບັນຊີທະນາຄານຂອງບັນດາພາລະກອນການທູດລົງ. ຄຽງຂ້າງນັ້ນ. ສປຊ ກໍ່ກ່າວເຕືອນວ່າ ອາດຈະໂຈະຖານະນາມເປັນສະມາຊິກຂອງ ສປປເກົາຫຼີ ຖ້າຫາກວ່າປະເທດນີ້ສືບຕໍ່ລະເມີດບັນດາມາດຕາທີ່ຖືກຍົກອອກມາ.
ທ່ານເອກອັກຄະລັດຖະທູດ ອາເມລິກາ ປະຈຳ ສປຊ Samantha Power ໃຫ້ຮູ້ວ່າ: ອາເມລິກາມີຄວາມປະເອີບໃຈຕໍ່ບັນດາຜົນງານເຊິ່ງມະຕິສະບັບໃໝ່ນີ້ນຳມາໃຫ້. ນີ້ແມ່ນມະຕິລົງໂທດຢ່າງຂັນແຂງທີ່ສຸດສຳລັບ ສປປເກົາຫຼີ. ທ່ານນາຍົກລັດຖະມົນຕີ ຍີ່ປຸ່ນ Shinzo Abe ຕີລາຄາວ່າ: ມະຕິ 2321 ໄດ້ສ່ອງແສງໃຫ້ເຫັນຈຸດປະສົງຂອງປະຊາຄົມສາກົນ ທີ່ດຳເນີນບັນດາມາດຕະການທີ່ຂັນແຂງກວ່າ ແລະ ຢູ່ໃນລະດັບແຕກຕ່າງກັນ ເມື່ອທຽບໃສ່ບັນດາມະຕິທີ່ໄດ້ຮັບການຮັບຮອງເອົາກ່ອນນີ້.
(ພາບປະກອບ/EPA)
ມະຕິຂອງ ສປຊ ມຸ່ງໄປສູ່ການປອດນິວເຄຼຍໃນແຫຼມເກົາຫຼີ
ສປຊ ເລີ່ມຈັດວາງບັນດາມາດຕະການລົງໂທດຫຼາຍຝ່າຍ ແລະ ຝ່າຍດຽວ, ພຽງຢາງ ຍັງຄົງສືບຕໍ່ລາຍການນິວເຄຼຍນັບແຕ່ນັ້ນມາຮອດປະຈຸບັນ. ການທົດລອງນິວເຄຼຍ, ລູກສອນໄຟນຳວິຖີໃນໄລຍະຫວ່າງແລ້ວນີ້ ໄດ້ເພີ່ມຂຶ້ນຫຼາຍ. ຕາມຕົວເລກສະຖິຕິ, ນັບແຕ່ເດືອນ 1/2016, ສປປເກົາຫຼີໄດ້ດຳເນີນການທົດລອງນິວເຄຼຍ 2 ຄັ້ງ ແລະ ຍິງລູກສອນໄຟນຳວິຖີຢ່າງໜ້ອຍສຸດແມ່ນ 25 ຄັ້ງ. ໃນນັ້ນມີທັງການຍິງດາວທຽມ, ຍິງລູກສອນໄຟນຳວິຖີຈາກກຳ່ປັ່ນດຳນ້ຳ. ທ່ານ ເລຂາທິການໃຫຍ່ ສປຊ Ban ki moon ເນັ້ນໜັກວ່າ, ຈຳນວນເຫດຍິງລູກສອນໄຟນີ້ຂອງ ສປປເກົາຫຼີ “ແມ່ນຫຼາຍບໍ່ເຄີຍມີມາເທື່ອ“, ແມ່ນໄພນາບຂູ່ເຖິງຄວາມໝັ້ນຄົງໃນພາກພື້ນ ແລະ ກົນໄກບໍ່ເຜີຍແຜ່ນິວເຄຼຍທົ່ວໂລກ. ຄວາມຈິງດັ່ງກ່າວໄດ້ພາໃຫ້ທ່ານເລຂາທິການໃຫຍ່ ສປຊ ຕ້ອງຮຽກຮ້ອງປະເທດຕ່າງໆຈົ່ງປະຕິບັດມະຕິ 2321 ຢ່າງເຂັ້ມງວດ. ຕາມທ່ານແລ້ວ, ນີ້ແມ່ນສິ່ງສຳຄັນໃນການຮັບມືກັບບັນດາການທ້າທາຍກ່ຽວກັບຄວາມໝັ້ນຄົງຢູ່ແຫຼມເກົາຫຼີ ກໍ່ຄືຢູ່ພາກພື້ນອື່ນໆ.
ພາຍຫຼັງປຶກສາຫາລືເປັນເວລາ 3 ເດືອນ, ສຸດທ້າຍສະພາຄວາມໝັ້ນຄົງ ສປຊ ກໍ່ເຫັນດີຮັບຮອງເອົາມະຕິລົງໂທດຢ່າງແຮງທີ່ສຸດສຳລັບ ສປປເກົາຫຼີ. ເຖິງຢ່າງໃດກໍ່ຕາມ, ສປຊ ຍັງຄົງສ້າງເງື່ອນໄຂເພື່ອໃຫ້ ສປປເກົາຫຼີ ກັບຄືນສູ່ການເຈລະຈາ ແລະ ປະຕິບັດຄຳໝັ້ນສັນຍາປອດນິວເຄຼຍ ດ້ວຍບັນດາການກະທຳຕົວຈິງ.