(vovworld)-ວັນທີ 3/2, ແມ່ນວັນສ້າງຕັ້ງພັກກອມມູນິດ ຫວຽດນາມ (3/2/1930-3/2/2016) ຄົບຮອບ 86 ປີ. ໃນໄລຍະ 86 ປີນັ້ນ, ພາລະກິດປ່ຽນແປງໃຫມ່ໂດຍພັກລິເລີ່ມ ແລະ ຊີ້ນຳນຳພາ ກ່ອນນີ້ 30 ປີ (1986) ເປັນຂີດໝາຍແຫ່ງໄລຍະພັດທະນາຂອງຫວຽດນາມ. ບັນດາໝາກຜົນອັນໃຫຍ່ຫລວງ, ຮອບດ້ານຂອງ 30 ປີແຫ່ງ ການປ່ຽນແປງໃຫມ່ນັ້ນ ໄດ້ຢັ້ງຢືນແນວທາງການປ່ຽນແປງໃຫມ່ຂອງພັກກອມມູນິດຫວຽດນາມ ແມ່ນຖືກຕ້ອງ, ມີຫົວຄິດປະດິດສ້າງ.
ທ່ານເລຂາທິການໃຫຍ່ຫງວຽນຟູຈ້ອງ ແລະ ບັນດາການນຳພັກ,ລັດ
ສະພາແຫ່ງຊາດ
ພາບ:internet
|
ໃນ 30 ປີແຫ່ງການປ່ຽນແປງໃຫມ່ (1986-2016) ແມ່ນໄລຍະປະຫວັດສາດສຳຄັນໃນພາລະກິດພັດທະນາຂອງຫວຽດນາມ. ການປ່ຽນແປງໃຫມ່ມີຂອບຂະຫນາດໃຫຍ່ ແລະ ມີຄວາມໝາຍປະຕິວັດ, ແມ່ນວິວັດແຫ່ງການປະຕິຮູບຢ່າງເລິກເຊິ່ງ, ຮອບດ້ານ, ແມ່ນພາລະກິດປະຕິວັດອັນຍິ່ງໃຫຍ່ຂອງທົ່ວພັກ, ທົ່ວປວງຊົນ ເພື່ອຈຸດໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ, ສີວິໄລ”.
ຂີດໝາຍປ່ຽນແປງໃຫມ່ຈາກຂໍ້ລິເລີ່ມ ແລະ ການຊີ້ນຳນຳພາຂອງພັກ
ຂອບຂະຫນາດ ແລະ ຄວາມໝາຍປະຕິວັດຢ່າງເລິກເຊິ່ງຂອງກິດຈະການປ່ຽນແປງໃຫມ່ ແມ່ນໄດ້ສະແດງອອກໃນກອງປະຊຸມໃຫຍ່ທົ່ວປະເທດຄັ້ງທີ VI ເມື່ອພັກຕັດສິນຫັນປ່ຽນພື້ນຖານເສດຖະກິດລວມສູນເກື້ອກູນອາຍາສິດໄປສູ່ພື້ນຖານເສດຖະກິດການຕະຫລາດຕາມການກຳນົດທິດສັງຄົມນິຍົມ ແລະ ຖືວ່າ ນັ້ນແມ່ນຮູບແບບເສດຖະກິດສັງລວມຂອງໄລຍະຂ້າມຜ່ານ ດ້ວຍຫລາຍຮູບການກຳມະສິດ, ຫລາຍພາກສ່ວນເສດຖະກິດ, ຮູບການຈັດຕັ້ງດຳເນີນທຸລະກິດ ແລະ ຮູບການແຈກຢ່າຍ. ຍ້ອນມີແນວທາງການພັດທະນາເສດຖະກິດອັນຖືກຕ້ອງ ແລະ ມີມາດຕະການເໝາະສົມ, ພາຍຫລັງ 30 ປີແຫ່ງການປ່ຽນແປງໃຫມ່, ຫວຽດນາມ ບັນລຸໄດ້ຜົນງານພັດທະນາເສດຖະກິດຫລາຍຢ່າງທີ່ຫນ້າປະທັບໃຈ, ຊື່ງໄດ້ຮັບການຕີລາຄາສູງຈາກໂລກ. ຮອງສາສະດາຈານ, ດຣ ຫງວຽນວຽດທົງ, ເລຂາທິການໃຫຍ່ ສະພາທິດສະດີສູນກາງ ໄດ້ຕີລາຄາວ່າ:
“ປະເທດຊາດໄດ້ຫລຸດພົ້ນອອກຈາກວິກິດການເສດຖະກິດສັງຄົມ ແລະ ຫລຸດພົ້ນອອກຈາກສະພາບປະເທດທຸກຍາກ, ດ້ອຍພັດທະນາ, ກ້າວເຂົ້າກຸ່ມປະເທດພວມພັດທະນາມີລາຍຮັບປານກາງ ແລະ ປະຈຸບັນ ພວມຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ເສດຖະກິດພັດທະນາ, ກໍ່ສ້າງ, ພັດທະນາພື້ນຖານເສດຖະກິດການຕະຫລາດຕາມການກຳນົດທິດສັງຄົມນິຍົມເທື່ອລະກ້າວ.”
ພັກກອມມູນິດຫວຽດນາມ ວາງອອກແຜນນະໂຍບາຍ ສົມທົບຢ່າງແຫນ້ນແຟ້ນລະຫວ່າງການຈະເລີນເຕີບໂຕເສດຖະກິດ ແລະ ການພັດທະນາວັດທະນະທຳ, ປະຕິບັດຄວາມກ້າວຫນ້າ ແລະ ຍຸຕິທຳສັງຄົມໃນແຕ່ລະນະໂຍບາຍ. ພັກກອມມູນິດຫວຽດນາມ ກໍເອົາໃຈໃສ່ເປັນພິເສດເຖິງການພັດທະນາການສຶກສາ, ບຳລຸງສ້າງ ແລະ ວິທະຍາສາດເຕັກໂນໂລຊີ, ຖືການພັດທະນາການສຶກສາ, ບຳລຸງສ້າງ ແລະ ວິທະຍາສາດ, ເຕັກໂນໂລຊີແມ່ນລັດຖະນະໂຍບາຍແຖວຫນ້າ.
ໃນຊຸມປີແຫ່ງການປ່ຽນແປງໃຫມ່, ພັກກອມມູນິດຫວຽດນາມ ມີຄວາມເອົາໃຈໃສ່ເຖິງການປະຕິບັດບັນດານະໂຍບາຍສັງຄົມ, ຮັບປະກັນ ແລະ ຍົກສູງຊີວິດທາງດ້ານວັດຖຸຂອງປະຊາຊົນທຸກຄົນ. ໝາກຜົນ ແມ່ນຮອດປີ 2015 ລາຍຮັບສະເລ່ຍໃສ່ຫົວຄົນບັນລຸກວ່າ 2100 USD, ເພີ່ມຂຶ້ນ 21 ເທົ່າ ພາຍຫລັງ 30 ປີແຫ່ງການປ່ຽນແປງໃຫມ່. ພັກ ແລະ ລັດ ໄດ້ປະຕິບັດສະເຫມີຕົ້ນສະເຫມີປາຍນະໂຍບາຍຫລຸດຜ່ອນຄວາມທຸກຍາກແບບຍືນຍົງຄຽງຄູ່ກັບການສົ່ງເສີມສ້າງຄວາມຮັ່ງມີຖືກຕ້ອງຕາມກົດໝາຍ ແລະ ຊອບທຳ, ເອົາໃຈໃສ່ເປັນພິເສດເຖິງບັນດານະໂຍບາຍຫລຸດຜ່ອນຄວາມທຸກຍາກໃຫ້ແກ່ບັນດາເມືອງທຸກຍາກ, ປະຊາຊົນຊົນເຜົ່າສ່ວນຫນ້ອຍ. ພາຍຫລັງ 30 ປີແຫ່ງການປ່ຽນແປງໃຫມ່, ຫວຽດນາມ ໄດ້ກໍ່ສ້າງ ແລະປັບປຸງລະບົບຮັບປະກັນຊີວິດສັງຄົມເປັນຫລາຍຮູບຫລາຍແບບ, ນັບມື້ນັບເປີດກວ້າງ ແລະ ມີປະສິດທິຜົນ; ພັດທະນາລະບົບປະກັນໄພຢ່າງແຮງ.
ໃນຂົງເຂດການຕ່າງປະເທດ, ພັກ ແລະ ລັດ ມີຫລາຍແຜນນະໂຍບາຍ, ນະໂຍບາຍ, ມາດຕະການເພື່ອເພີ່ມທະວີ, ເປີດກວ້າງການຮ່ວມມືສາກົນ, ເຂົ້າຮ່ວມບັນດາການພົວພັນສອງຝ່າຍ ແລະ ຫລາຍຝ່າຍ, ດຶງດູດແຫລ່ງເງິນລົງທຶນຂອງຕ່າງປະເທດ (FDI, ODA) ຢ່າງແຮງ, ຂຸດຄົ້ນບັນດາກົນໄກຮ່ວມມືສາກົນຢ່າງມີປະສິດທິຜົນ. ທີ່ຕັ້ງບົດບາດ ແລະ ອິດທິພົນຊື່ສຽງຂອງຫວຽດນາມ ໃນເວທີສາກົນນັບມື້ນັບໄດ້ຮັບການຍົກສູງຂຶ້ນ. ສາສະດາຈານ, ດຣ ວິທະຍາສາດ ຫວູມີນຢາງ, ສະມາຊິກສະພາທິດສະດີສູນກາງ ຖືວ່າ:
“ໃນຖານະແມ່ນຜູ້ຄົ້ນຄ້ວາປະຫວັດສາດ, ກອງປະຊຸມໃຫຍ່ຄັ້ງທີ VI ຂອງພັກ ແມ່ນກອງປະຊຸມໃຫຍ່ແຫ່ງການປ່ຽນແປງໃຫມ່, ເປັນຂີດໝາຍ, ແມ່ນເຫດການສຳຄັນຍິ່ງໃນປະຫວັດສາດຂອງຊາດ. ກອງປະຊຸມໃຫຍ່ຄັ້ງທີ VI ຂອງພັກ ໄດ້ນຳປະເທດຊາດບຸກທະລຸກ້າວຂຶ້ນ. ຂ້າພະເຈົ້າເຫັນວ່າ ກອງປະຊຸມໃຫຍ່ຄັ້ງທີ VI ຂອງພັກ ມີລັກສະນະຍິ່ງໃຫຍ່ຂອງກິດຈະການປ່ຽນແປງໃຫມ່ຊື່ງພັກໄດ້ລິເລີ່ມ.”
ຄວາມເປັນເອກະພາບລະຫວ່າງແນວຄິດຂອງພັກ, ຈິດໃຈຂອງປະຊາຊົນ
ຜົນງານອັນຍິ່ງໃຫຍ່, ສຳຄັນ ແລະ ມີຄວາມໝາຍປະຫວັດສາດໃນ 30 ປີແຫ່ງການປ່ຽນແປງໃຫມ່ ນັ້ນແມ່ນໄດ້ຢືນຢັນສິ່ງທີ່ເປັນພື້ນຖານ 2 ປະການ. ທີຫນຶ່ງ ແມ່ນຢັ້ງຢືນແນວທາງປ່ຽນແປງໃຫມ່ຂອງຫວຽດນາມ ໃນ 30 ປີຜ່ານມາ ແມ່ນຖືກຕ້ອງ, ມີຫົວຄິດປະດິດສ້າງ. ທີສອງ ເສັ້ນທາງກ້າວຂຶ້ນສັງຄົມນິຍົມຢູ່ຫວຽດນາມ ແມ່ນເໝາະສົມກັບເງື່ອນໄຂພຶດຕິກຳຕົວຈິງຂອງຫວຽດນາມ ແລະ ທ່າອ່ຽງພັດທະນາຂອງປະຫວັດສາດ. ເມື່ອຕີລາຄາກ່ຽວກັບບົດບາດຊີ້ນຳນຳພາຂອງພັກ, ທ່ານ ຫວູວັນຟຸກ, ບັນນາທິການໃຫຍ່ວາລະສານກອມມູນິດ ຖືວ່າ:
“ພຶດຕິກຳຕົວຈິງທີ່ມີຊີວິດຊີວາ, ອຸດົມສົມບູນຂອງການປະຕິວັດຫວຽດນາມ ໃນ 86 ປີຜ່ານມາ ພິເສດ ແມ່ນບັນດາຜົນງານອັນຍິ່ງໃຫຍ່, ມີຄວາມໝາຍປະຫວັດສາດຊື່ງປະເທດຊາດບັນລຸໄດ້ຜ່ານ 30 ປີແຫ່ງການປ່ຽນແປງໃຫມ່ ໂດຍພັກລິເລີ່ມ ແລະ ການຊີ້ນຳນຳພາ ສະແດງໃຫ້ເຫັນວ່າ ການຊີ້ນຳນຳພາອັນຖືກຕ້ອງຂອງພັກກອມມູນິດຫວຽດນາມ ແມ່ນປະຖົມປັດໄຈແຖວຫນ້າ ຕັດສິນທຸກໄຊຊະນະຂອງການປະຕິວັດຫວຽດນາມ, ເຮັດໃຫ້ພັກສົມເປັນຜູ້ນຳພາ ແລະຈັດຕັ້ງທຸກໄຊຊະນະຂອງການປະຕິວັດຫວຽດນາມ”. ພຶດຕິກຳຕົວຈິງນັ້ນ, ຜົນງານນັ້ນ ແມ່ນສະແດງໃຫ້ເຫັນຄວາມເປັນເອກະພາບລະຫວ່າງ “ແນວຄິດຂອງພັກ” ແລະ “ຈິດໃຈຂອງປະຊາຊົນ” ໃນວິວັດການສ້າງສາ ແລະ ປົກປັກຮັກສາປະເທດຫວຽດນາມ ສັງຄົມນິຍົມ”
ຕາມທ່ານ ສາສະດາຈານ, ດຣ ວິທະຍາສາດ ຫວູມີນຢາງ ແລ້ວ, ສາຍເຫດທີ່ພາໃຫ້ສຳເລັດຜົນຂອງກິດຈະການປ່ຽນແປງໃຫມ່ ນັ້ນແມ່ນພັກ ໄດ້ຖືຜົນປະໂຫຍດແມ່ນເຫນືອກວ່າສິ່ງໃດໝົດ, ທັງໝົດເພື່ອຜົນປະໂຫຍດຂອງປະຊາຊົນ, ຈາກນັ້ນວາງແນວທາງໃຫ້ເໝາະສົມກັບຄວາມມຸ້ງມາດປາດຖະຫນາຂອງປະຊາຊົນ.
“ມໍລະດົກອັນລ້ຳຄ່າຂອງພັກ ນັ້ນແມ່ນອິດທິພົນຊື່ສຽງຂອງພັກ ແລະ ການສະຫນັບສະຫນູນຂອງປະຊາຊົນ. ສະນັ້ນ ບົດຮຽນໃຫຍ່ສຸດ ແມ່ນພວກເຮົາເຮັດ ເພື່ອຜົນປະໂຫຍດຂອງຊາດ, ຜົນປະໂຫຍດຂອງປະຊາຊົນ, ຍາມໃດ ພັກກໍຢູ່ໃນໃຈຂອງປະຊາຊົນ ແລະ ໄດ້ຮັບການສະຫນັບສະຫນູນຈາກປະຊາຊົນ. ເມື່ອເຮັດໄດ້ສິ່ງດັ່ງກ່າວ ເຖິງວ່າວຽກງານມີຫລາຍປານໃດ, ແລະຄວາມຫຍຸ້ງຍາກຄືແນວໃດ ພວກເຮົາກໍ່ຈະສາມາດຜ່ານຜ່າໄດ້.”
ປີ 2016, ແມ່ນປີທຳອິດທີ່ທົ່ວພັກ, ທົ່ວປວງຊົນ ແລະ ທົ່ວກອງທັບ ຜັນຂະຫຍາຍການປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ກອງປະຊຸມໃຫຍ່ເປັນຂີດໝາຍໄລຍະພັດທະນາໃຫມ່ຂອງພັກ ແລະ ຂອງປະເທດຊາດ. ດ້ວຍບັນດາບົດຮຽນ ຖອດຖອນມາໄດ້ໃນ 30 ປີແຫ່ງການປ່ຽນແປງໃຫມ່, ດ້ວຍການກຳນົດທິດຂອງມະຕິກອງປະຊຸມໃຫຍ່ ຄັ້ງທີ XII ການຊີ້ນຳນຳພາ ປ່ຽນໃຫມ່ຂອງພັກຢ່າງບໍ່ຢຸດຢັ້ງ ພ້ອມກັບມູນເຊື້ອສາມັກຄີຂອງປະຊາຊົນ, ຫວຽດນາມຈະນຳໃຊ້ບັນດາກາລະໂອກາດຜົນສຳເລັດ ເພື່ອສືບຕໍ່ກ້າວຂຶ້ນບົນເສັ້ນທາງສ້າງສາປະເທດຫວຽດນາມ “ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ, ສີວິໄລ”.