(vovworld) ພາຍຫລັງລັດຖະທຳມະນູນ ໄດ້ຮັບການຮັບຮອງເອົາຈາກສະພາແຫ່ງຊາດ ຫວຽດນາມ ຊຸດທີ 8 ແລະ ມີຜົນບັງຄັບໃຊ້ນັບແຕ່ວັນທີ 1/1/2014 ເປັນຕົ້ນໄປ, ສອງຫນ້າທີ່ສຳຄັນເພື່ອຜັນຂະຫຍາຍການປະຕິບັດລັດຖະທຳມະນູນແມ່ນການເຜີຍແຜ່ ແລະ ປັບປຸງເອກະສານນິຕິກຳ. ປະຕິບັດສອງຫນ້າທີ່ດັ່ງກ່າວເປັນຢ່າງດີ ຈະປະກອບສ່ວນຮັບປະກັນໃຫ້ແຕ່ລະເນື້ອໃນຂອງລັດຖະທຳມະນູນກ້າວເຂົ້າສູ່ຊີວິດ, ແລະມີການກະທົບຢ່າງຕັ້ງຫນ້າເຖິງທຸກຂົງເຂດຂອງສັງຄົມ. ບັນນາທິການວິທະຍຸກະຈາຍສຽງຫວຽດນາມ ມີບົດທີ່ພາດຫົວຂໍ້ວ່າ: ການປະຕິບັດລັດຖະທຳມະນູນ- ຫນ້າທີ່ສຳຄັນໃນປີ 2014
ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ
ກ່າວຄຳເຫັນທີ່ກອງປະຊຸມຜັນຂະຫຍາຍການປະຕິບັດ
ລັດຖະທຳມະນູນ
|
ໃນວິວັດການຜັນຂະຫຍາຍປະຕິບັດລັດຖະທຳມະນູນ ຮຽກຮ້ອງໃຫ້ມີການເຂົ້າຮ່ວມຢ່າງຕັ້ງຫນ້າຂອງປະຊາຊົນ, ທຸກຂັ້ນ, ທຸກຂະແຫນງການ, ຮັບປະກັນການຊີ້ນຳນຳພາຂອງຄະນະພັກທຸກຂັ້ນ, ການຊີ້ນຳເປັນຈຸດສຸມ, ເປັນເອກະພາບຂອງອຳນາດການປົກຄອງ, ການປະສານສົມທົບຂອງແນວໂຮມປະເທດຊາດຫວຽດນາມ ແລະ ອົງການຈັດຕັ້ງມະຫາຊົນ.
ເຜີຍແຜ່ ລັດຖະທຳມະນູນ ຢ່າງກວ້າງຂວາງຢູ່ພາຍໃນ ແລະ ຕ່າງປະເທດ
ເຜີຍແຜ່ລັດຖະທຳມະນູນ, ພິເສດແມ່ນບັນດາຈຸດໃຫມ່ຂອງ ລັດຖະທຳມະນູນ ແມ່ນວຽກງານໄດ້ຮັບບຸລິມະສິດຕົ້ນຕໍໃນການຈັດຕັ້ງຜັນຂະຫຍາຍປະຕິບັດ ລັດຖະທຳມະນູນ. ວຽກງານເຜີຍແຜ່ ສ່ວນຫລາຍແມ່ນເຮັດແຈ້ງບັນດາເນື້ອໃນຕົ້ນຕໍ, ບັນດາຈຸດໃຫມ່ໃນລັດຖະທຳມະນູນ. ບັນດາອົງການສື່ມວນຊົນລ້ວນແຕ່ມີຫນັງສືພິມສະເພາະ, ຄໍລຳ, ພິມຈຳຫນ່າຍບັນດາສິ່ງພິມ, ຫົວເລື່ອງສະເພາະເຜີຍແຜ່ ລັດຖະທຳມະນູນ. ທ່ານ ເລມີງທົງ, ຮອງຫົວຫນ້າກຳມາທິການກົດໝາຍຂອງສະພາແຫ່ງຊາດ ຫວຽດນາມ ໃຫ້ຮູ້ວ່າ:
“ບັນດາອົງການສື່ມວນຊົນ ເຜີຍແຜ່, ສຶກສາກົດໝາຍ ແມ່ນບັນດາອົງການນຳຫ້ນາໃນການເຜີຍແຜ່ລາຍການ, ເນື້ອໃນ ແລະ ຈິດໃຈຂອງລັດຖະທຳມະນູນ. ນີ້ແມ່ນຫນ້າທີ່ຈຸດສຸມຂອງສື່ມວນຊົນ. ສະນັ້ນ ສື່ມວນຊົນຕ້ອງປະກອບສ່ວນຢ່າງຕັ້ງຫນ້ານຳເນື້ອໃນຈິດໃຈຂອງລັດຖະທຳມະນູນເຂົ້າສູ່ແຕ່ລະຂົງເຂດຂອງຊີວິດສັງຄົມ, ເຮັດໃຫ້ປະຊາຊົນທຸກຊັ້ນວັນນະເຂົ້າໃຈເນື້ອໃນຂອງລັດຖະທຳມະນູນຢ່າງຄົບຖ້ວນ, ຖືກຕ້ອງ ແລະ ງາຍດ່າຍທີ່ສຸດ.”
ໄປຄຽງຄູ່ກັນນັ້ນ, ສື່ມວນຊົນຕ້ອງປົກປ້ອງລັດຖະທຳມະນູນ ເພື່ອແກ້ໄຂບັນດາທັດສະນະທີ່ຜິດພາດກ່ຽວກັບລັດຖະທຳມະນູນ, ສ່ອງແສງຢ່າງທັນການບັນດາການຕີລາຄາບໍ່ຖືກຕ້ອງໃນວິວັດການປະຕິບັດ ແລະ ເຂົ້າໃຈລັດຖະທຳມະນູນ, ປະກອບສ່ວນຕໍ່ສູ້ຕ້ານບັນດາທັດສະນະທີ່ຂາດເຈດຕະນາດີສຳລັບ ລັດຖະທຳມະນູນສະບັບໃຫມ່ໃນແນວຮົບດ້ານແນວຄິດ. ທ່ານ ເລວັນງຽມ, ຫົວຫນ້າກົມຖະແຫລງຂ່າວການຕ່າງປະເທດ, ສັງກັດກະຊວງຖະແຫລງຂ່າວສື່ສານ ຖືວ່າ: ຄວນມີແຜນການເຜີຍແຜ່ຢ່າງເປັນລະບົບ, ເປັນຕົ້ນໃນຂົງເຂດສິດທິມະນຸດ ເພື່ອປະຕິເສດບັນດາຖ້ອຍທຳນອງເສັກສັນປັ້ນແຕ່ງ.
“ພວກເຮົາຄວນມີແຜນການເຜີຍແຜ່ຢ່າງລຽນຕິດ, ຍາວນານ. ທີຫນຶ່ງ ຄວນຕິດພັນການເຜີຍແຜ່ພາຍໃນ ກັບ ການຕ່າງປະເທດ. ທີສອງ ວິທີປະຕິບັດຕ້ອງມີລັກສະນະເປັນເຈົ້າການ. ກ່ອນນີ້ ພວກເຮົາປະຕິບັດຕາມຂະບວນການ ປະຈຸບັນ ຕ້ອງປະຕິບັດເປັນປະຈຳ, ລຽນຕິດ. ຖືການເຜີຍແຜ່ຄວາມຮູ້, ການສຶກສາ, ຍົກສູງຄວາມຮູ້ກ່ຽວກັບສິດທິມະນຸດເປັນສຳຄັນ. ວຽກງານຄົ້ນຄ້ວາກ່ຽວກັບສິດທິມະນຸດໃນປະຈຸບັນຕ້ອງໄດ້ຮັບການເພີ່ມທະວີ, ນຳເຂົ້າຫລັກສູດ, ຕຳລາ ການສິດສອນຊັ້ນມັດທະຍົມ ແລະ ມະຫາວິທະຍາໄລ”
ນອກນັ້ນ ເພືຶ່ອຮັບປະກັນລັດຖະທຳມະນູນເສີມຂະຫຍາຍຜົນສັກສິດໃນຊີວິດສັງຄົມຢ່າງວ່ອງໄວ, ທຸກຂັ້ນ, ທຸກຂະແຫນງການຕ້ອງບຸລິມະສິດຜັນຂະຫຍາຍບັນດາການເຄື່ອນໄຫວຄົ້ນຄ້ວາ, ຊອກຮູ້ກ່ຽວກັບເນື້ອໃນລັດຖະທຳມະນູນເພື່ອເຫັນໄດ້ຄວາມໝາຍ, ບົດບາດອັນໃຫຍ່ຫລວງຂອງ ລັດຖະທຳມະນູນໃນຊີວິດສັງຄົມ, ເຫັນໄດ້ຢ່າງຈະແຈ້ງບັນດາການສືບທອດຂອງລັດຖະທຳມະນູນ, ຈາກສະບັບທຳອິດເມື່ອປີ 1946 ຕະຫລອດຮອດ ລັດຖະທຳມະນູນ ປີ 1992. ແລະ ເຫັນແຈ້ງບັນດາຫລັກຖານທິດສະດີ ແລະ ພຶດຕິກຳຂອງການປັບປຸງ, ເພີ່ມເຕີມໃນຄັ້ງນີ້, ເຫັນແຈ້ງບັນດາເນື້ອໃນຊື່ງ ລັດຖະທຳມະນູນຫັນແນວທາງພັດທະນາຂອງປະເທດຊາດໃນໄລຍະປ່ຽນແປງໃຫມ່ເປັນກົດໝາຍ ສະແດງໃຫ້ເຫັນຄວາມມຸ່ງມາດປາດຖະຫນາຂອງປະຊາຊົນທຸກຊັ້ນວັນນະໃນການສ້າງລັດຖະທຳມະນູນໃຫ້ເໝາະສົມກັບທີ່ຕັ້ງບົດບາດຂອງປະເທດຊາດໃນໄລຍະໃຫມ່.
ກວດກາເພື່ອຍົກເລີກ, ປັບປຸງບັນດາເອກະສານນິຕິກຳ
ເລື່ອງພິຈາລະນາ, ປັບປຸງບັນດາເອກະສານນິຕິກຳກ່ຽວກັບກົງຈັກລັດ, ນັບແຕ່ສິດອຳນາດ, ພາລະບົດບາດ, ໂຄງປະກອບການຈັດຕັ້ງຕະຫລອດຮອດວິທີການເຄື່ອນໄຫວ ແມ່ນຄຳຮຽກຮ້ອງຕ້ອງການທີ່ຈຳເປັນ, ຮັບປະກັນລະບົບເອກະສານນິຕິກຳສອດຄອ່ງກັບລັດຖະທຳມະນູນ. ຕາມນັ້ນແລ້ວ, ຫວຽດນາມ ບຸລິມະສິດການກວດກາ, ປັບປຸງ, ເພີ່ມເຕີມບັນດາກົດໝາຍຄື: ກົດໝາຍວ່າດ້ວຍການຈັດຕັ້ງສະພາແຫ່ງຊາດ, ກົດໝາຍວ່າດ້ວຍການຈັດຕັ້ງລັດຖະບານ, ກົດໝາຍວ່າດ້ວຍການຈັດຕັ້ງອຳນາດການປົກຄອງທ້ອງຖິ່ນ, ກົດໝາຍວ່າດ້ວຍການເຄື່ອນໄຫວຕິດຕາມກວດກາຂອງສະພາແຫ່ງຊາດ, ກົດໝາຍວ່າດ້ວຍການເລືອກຕັ້ງສະພາແຫ່ງຊາດ. ທ່ານ ເລມີງທົງ ຮອງຫົວຫນ້າກຳມາທິການກົດໝາຍຂອງສະພາແຫ່ງຊາດ ຫວຽດນາມ ໃຫ້ຮູ້ວ່າ:
“ໂຄງການສ້າງກົດໝາຍປີ 2014, 2015 ຕ້ອງບຸລິມະສິດໃຫ້ແກ່ບັນດາກົດໝາຍກ່ຽວກັບການຈັດຕັ້ງກົງຈັກ ເພາະວ່າ ຖ້າການປະຕິບັດບໍ່ສຳເລັດ ອາດຈະບໍ່ມີພື້ນຖານດ້ານກົດໝາຍອັນໝັ້ນແກ່ນໃຫ້ແກ່ການເລືອກຕັ້ງສະພາແຫ່ງຊາດຊຸດທີ 14. ນີ້ກໍແມ່ນວຽກງານຮີບດ່ວນຄວນຍູ້ແຮງ. ພວກເຮົາປະຕິບັດຕາມວິວັດການ, ແຕ່ລະປີ ສະພາແຫ່ງຊາດຈະຈັດແບ່ງບັນດາວຽກງານໃນຕໍ່ຫນ້າ. ວິວັດການສ້າງລະບົບນິຕິກຳຂອງພວກເຮົາ ນັບແຕ່ກົດໝາຍວ່າດ້ວຍການຈັດຕັ້ງຕະຫລອດຮອດເສດຖະກິດ, ສັງຄົມ, ການສຶກສາບຳລຸງສ້າງຄວນປະຕິບັດຕາມວິວັດການບຸລິມະສິດ.”
ຜັນຂະຫຍາຍການປະຕິບັດ ລັດຖະທຳມະນູນແມ່ນຫນ້າທີ່ສຳຄັນ, ມີສ່ວນກ່ຽວຂ້ອງໂດຍກົງ ແລະ ຜົນສະທ້ອນຢ່າງເລິກເຊິ່ງກວ້າງຂວາງເຖິງທົ່ວລະບົບການເມືອງ. ວິວັດການຜັນຂະຫຍາຍປະຕິບັດລັດຖະທຳມະນູນຢ່າງຕັ້ງຫນ້າ, ເຂັ້ມງວດຈະຮັບປະກັນໃຫ້ລັດຖະທຳມະນູນໄດ້ຮັບການເຄົາລົບ, ສ້າງກຳລັງຫນູນໃຫ້ແກ່ການພັດທະນາປະເທດຊາດ.