ວັນທີ 23/3, ໃນຂອບເຂດການຢ້ຽມຢາມເຢັຍລະມັນເປັນຄັ້ງທຳອິດນັບແຕ່ພາຍຫຼັງສາບານຕົວເຂົ້າດຳລົງຕຳແໜ່ງ, ທ່ານນາຍົກລັດຖະມົນຕີ ເກຼັກ Alexis Tsipras ໄດ້ປຶກສາຫາລືກັບຄູ່ຕຳແໜ່ງປະເທດເຈົ້າພາບ ທ່ານນາງ Angela Merkel ກ່ຽວກັບວິກິດການໜີ້ສິນປະຈຸບັນຂອງ ເກຼັກ ກໍຄືການຊຸກຍູ້ການພົວພັນ 2 ຝ່າຍ. ກົງກັນຂ້າມກັບບັນດາຖະແຫຼງການທີ່ມີລັກສະນະການທູດຂອງການນຳລັດຖະບານ 2 ທ່ານທີ່ການປະຊຸມຂ່າວ ພາຍຫຼັງການພົບປະ, ຫາງສຽງສາມາດເຫັນໄດ້ເຖິງຮົ້ວກີດຂວາງຢ່າງໃຫຍ່ຫຼວງທີ່ຍັງຄົງຕົວລະຫວ່າງ 2 ຝ່າຍເວົ້າສະເພາະ ແລະ ລະຫວ່າງ ເກຼັກກັບ EU ເວົ້າລວມ.
ຂອງທ່ານນາຍົກລັດຖະມົນຕີ ເກຼັກ Alexis Tsipras ແລະ ທ່ານນາງ ນາຍົກລັດຖະມົນຕີເຢັຍລະມັນ Angela Merkel |
1 ວັນກ່ອນການຢ້ຽມຢາມເຢັຍລະມັນເປັນຄັ້ງທຳອິດຂອງ ທ່ານນາຍົກລັດຖະມົນຕີ ເກຼັກ Alexis Tsipras, ວັນທີ 22/3, ລັດຖະມົນຕີການຕ່າງປະເທດເກຼັກ Nikos Kotzias ໄດ້ໄປຮອດແບກລິງ ເພື່ອປຶກສາຫາລືກັບຄູ່ຕຳແໜ່ງປະເທດເຈົ້າພາບ Frank – Walter Steimmeier. ກ່າວຄຳເຫັນຢູ່ທີ່ນີ້, ລັດຖະມົນຕີການຕ່າງປະເທດເຢຍລະມັນ Frank – Walter Steimmeier ຢືນຢັນວ່າ ເຢຍລະມັນ ແລະ ເກຼັກ ຈະບໍ່ປະໃຫ້ບັນດາບັນຫາຕ້ອງນຳໄປແກ້ໄຂຢູ່ຂັ້ນທະວີບເອີລົບ ອັນໄດ້ເຮັດໃຫ້ສົງ່ຜົນສະທ້ອນເຖິງການພົວພັນ 2 ຝ່າຍທີ່ດີງາມ. 2 ຝ່າຍຕັດສິນໃຈຊຸກຍູ້ຄວາມສາມາດບົ່ມຊ້ອນຮ່ວມມືອັນໃຫຍ່ຫຼວງລະຫວ່າງ ເຢຍລະມັນ ແລະ ເກຼັກ ກໍຄືເພີ່ມທະວີຄວາມເຂົ້າອົກເຂົ້າໃຈຊຶ່ງກັນແລະກັນ.
ບັນດາຖະແຫຼງການທີ່ມີລັກສະນະການທູດ
ທີ່ການປະຊຸມຂ່າວເມື່ອວັນທີ 23/3, ພາຍຫຼັງການເຈລະຈາທີ່ແກ່ຍາວເປັນ 1 ຊົ່ວໂມງລະຫວ່າງນາຍົກລັດຖະມົນຕີ 2 ທ່ານ, ຫາງສຽງບໍ່ເຫັນວ່າ 2 ຝ່າຍປະກາດທິດທາງການຮ່ວມມືລະອຽດທີ່ມີລັກສະນະມະຫາພາກໃນໄລຍະທີ່ຈະມາເຖິງ. ທ່ານນາງ ນາຍົກລັດຖະມົນຕີເຢັຍລະມັນ Angela Merkel ພຽງເນັ້ນໜັກລວມໆກ່ຽວກັບຄວາມສຳຄັນຂອງສາຍພົວພັນມິດຕະພາບລະຫວ່າງ 2 ປະເທດ ແລະ ຢືນຢັນຄວາມຫວັງຢາກໃຫ້ການຮ່ວມມືລະຫວ່າງ ເຢຍລະມັນ ແລະ ເກຼັກ ອີງບົນພື້ນຖານຄວາມໄວ້ເນື້ອເຊື່ອໃຈຕໍ່ກັນ. ສ່ວນທ່ານນາຍົກລັດຖະມົນຕີ ເກຼັກ Alexis Tsipras ກໍໄດ້ເນັ້ນໜັກເຖິງຄວາມສຳຄັນຂອງການຢ້ຽມຢາມທີ່ມີຕໍ່ການເພີ່ມທະວີຄວາມເຂົ້າໃຈກັນລະຫວ່າງ ລັດຖະບານຂອງ 2 ປະເທດ, ພ້ອມທັງຢືນຢັນວ່າ ການສົນທະນາແມ່ນມາດຕະການພຽງອັນດຽວເທົ່ານັ້ນເພື່ອສາມາດຜ່ານຜ່າຄວາມຫຍຸ້ງຍາກໃນປະຈຸບັນ.
ໝາກຜົນນີ້ ບໍ່ພາໃຫ້ຫາງສຽງຕົກສະເງີ້ເພາະ ກ່ອນທີ່ດຳເນີນການຢ້ຽມຢາມ, ທ່ານນາງ ນາຍົກລັດຖະມົນຕີເຢັຍລະມັນ Angela Merkel ໄດ້ເຄີຍກ່າວເຕືອນວ່າ ເກຼັກ ບໍ່ຄວນຕັ້ງຄວາມຫວັງຫຼາຍເກີນໄປຕໍ່ການຢ້ຽມຢາມເຢຍລະມັນຂອງ ທ່ານນາຍົກລັດຖະມົນຕີ ເກຼັກ Alexis Tsipras. ທ່ານນາງ ນາຍົກລັດຖະມົນຕີເຢັຍລະມັນ Angela Merkel ຢືນຢັນວ່າ ການພົບປະ 2 ຝ່າຍຄັ້ງນີ້ ບໍ່ອາດທົດແທນໃຫ້ຂໍ້ຕົກລົງທີ່ໄດ້ຮັບຄວາມເຫັນດີເປັນເອກະສັນຈາກບັນດາປະເທດໃຊ້ສະກຸນເງິນລວມເອີໂຣ, ຊຶ່ງລວມທັງບັນດາເງື່ອນໄຂເພື່ອແກ່ຍາວບ້ວງເງິນໜູນຊ່ວຍດ້ານການເງິນໃຫ້ ເກຼັກ ຕື່ມອີກ 4 ເດືອນ.
ກ່ອນໜ້ານັ້ນ, ຫາງສຽງຍັງຄົງບໍ່ລືມກ່ຽວກັບການພົວພັນລະຫວ່າງ ເຢຍລະມັນ ແລະ ເກຼັກ ໄດ້ເກີດຄວາມເຄັ່ງຕຶງພາຍຫຼັງທີ່ພັກ Syriza ຂອງທ່ານນາຍົກລັດຖະມົນຕີ ເກຼັກ Alexis Tsipras ຍາດໄດ້ໄຊຊະນະ ແລະ ສ້າງຕັ້ງສຳພັນທະມິດກຳອຳນາດຢູ່ເກຼັກ ພາຍຫຼັງການເລືອກຕັ້ງທົ່ວປະເທດເມື່ອຕົ້ນປີ. ລັດຖະບານຂອງ ທ່ານນາຍົກລັດຖະມົນຕີ ເກຼັກ Alexis Tsipras ມີບາດກ້າວເດີນຢ່າງລຽນຕິດ ພາໃຫ້ບັນດາຄູ່ຮ່ວມມືເອີລົບມີຄວາມວິຕົກກັງວົນ. ນັ້ນແມ່ນຄຳຖະແຫຼງຢຸດຕິບັນດາໂຄງການຮັດເຂັມຄັດ ເພື່ອແລກເອົາການຊ່ວຍເຫຼືອສາກົນ. ຕໍ່ຈາກນັ້ນ, ແມ່ນທ່າທີສະໜິດສະໜົມກັບລັດເຊຍໃນສະພາວະທີ່ການພົວພັນລະຫວ່າງລັດເຊຍ-ເອີລົບ ພວມຢູ່ໃນໄລຍະເຄັ່ງຕຶງ.
ຄວາມບໍ່ລົງລອຍກັນເພີ່ມທະວີຂຶ້ນ
ທີ່ການປະຊຸມຂ່າວເມື່ອວັນທີ 23/3, ທ່ານນາຍົກລັດຖະມົນຕີ ເກຼັກ Alexis Tsipras ໄດ້ຢືນຢັນວ່າ ໂຄງການຊ່ວຍເຫຼືອໃຫ້ແກ່ ເກຼັກ ໄດ້ຮັບການປະຕິບັດໃນ 5 ປີທີ່ຜ່ານມາ, ດ້ວຍການສະໜັບສະໜູນຈາກວົງການນັກການເມືອງເຢຍລະມັນນັ້ນ, ແມ່ນຍັງບໍ່ທັນນຳມາເຊິ່ງຜົນສຳເລັດເທື່ອ.
ໂດຍບໍ່ຫົວຊາຕໍ່ຄຳຖະແຫຼງຂອງທ່ານນາຍົກລັດຖະມົນຕີ ເກຼັກ Alexis Tsipras, ທ່ານນາງ ນາຍົກລັດຖະມົນຕີເຢັຍລະມັນ Angela Merkel ຍັງເນັ້ນໜັກທີ່ການປະຊຸມຂ່າວວ່າ ແບກລິງ ຈະສືບຕໍ່ກະຕຸກຊຸກຍູ້ ເກຼັກ ດຳເນີນການປະຕິຮູບແນໃສ່ຊຸກຍູ້ການພັດທະນາເສດຖະກິດ, ມຸ່ງໄປສູ່ການເຕີບໂຕ ແລະ ແກ້ໄຂໄພວ່າງງານຢູ່ໃນລະດັບສູງ.
ຕໍ່ໜ້າການຢ້ຽມຢາມເຢຍລະມັນຂອງ ທ່ານນາຍົກລັດຖະມົນຕີ ເກຼັກ Alexis Tsipras, ບັນດາລາຍລະອຽດໃນບ້ວງເງິນສະເໜີປະຕິຮູບຂອງ ເກຼັກ ເພື່ອຫຼີກລ້ຽງໄພລົ້ມລະລາຍຂອງພື້ນຖານເສດຖະກິດໃນ 2-3 ມື້ຂ້າງໜ້າ, ກໍໂດ້ເປີດເຜີຍທາງສື່ມວນຊົນເຢຍລະມັນ ເຊັ່ນ ແຜນການເພີ່ມອັດຕາພາສີ, ການຫັນເປັນເອກະຊົນ, ການຮຽກເກັບອາກອນຄືນຫຼັງ, ຍົກລະດັບເກັ່ນອາຍຸພັກກິນເບ້ຍບຳນານ. ນີ້ໄດ້ຮັບຖືວ່າ ແມ່ນບັນຫາທີ່ຫຍຸ້ງຍາກສຳລັບລັດຖະບານໃໝ່ຂອງ ເກຼັກ ເພາະເຂົາເຈົ້າບໍ່ອາດໄປຝືນກັບຄຳໝັ້ນໝາຍກັບຜູ້ມີສິດເລືອກຕັ້ງຢ່າງງ່າຍດາຍ. ເບິ່ງຄືວ່າ ຄວາມຫຍຸ້ງຍາກຫຼາຍຢ່າງຍັງຄົງລໍ່ຖ້າຢູ່ທາງໜ້າເພື່ອເປັນການທົດສອບຕໍ່ການພົວພັນລະຫວ່າງເຢຍລະມັນ ແລະ ເກຼັກ.