(vovworld)- ຄືດັ່ງພວກເຮົາໄດ້ໃຫ້ຂ່າວໄປແລ້ວ, ທ່ານປະທານສະພາແຫ່ງຊາດ ສີລັງກາ Chamal Rajapaksa ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການໃນເວລາ 6 ວັນ (ນັບແຕ່ວັນທີ 15/7) ຕາມຄຳເຊີນຂອງທ່ານປະທານສະພາແຫ່ງຊາດ ຫວຽດນາມ ຫງວຽນຊີງຮຸ່ງ. ການຢ້ຽມຢາມບໍ່ພຽງແຕ່ເພື່ອແນໃສ່ເພີ່ມທະວີການຮ່ວມມືລະຫວ່າງສະພາແຫ່ງຊາດສອງປະເທດເທົ່ານັ້ນ ຫາກຍັງເປີດກາລະໂອກາດຮ່ວມມືໃຫມ່ໃນຫລາຍຂົງເຂດລະຫວ່າງ ຫວຽດນາມ ແລະ ສີລັງກາ ອີກດ້ວຍ.
ທ່ານປະທານສະພາແຫ່ງຊາດ ຫວຽດນາມ ຫງວຽນຊີງຮຸ່ງ ຕ້ອນຮັບ
ທ່ານປະທານສະພາແຫ່ງຊາດ ສີລັງກາ Chamal Rajapaksa
ພາບ:TTXVN
|
ການພົວພັນລະຫວ່າງ ຫວຽດນາມ ແລະ ສີລັງກາ ມີຫລາຍຈຸດພິເສດ. ອາດຈະບໍ່ມີຫລາຍຄົນຮູ້ຈັກວ່າ: ທ່ານປະທານ ໂຮ່ຈິມີນ ໄດ້ເດີນທາງເຖິງ ສີລັງກາ ເປັນສາມຄັ້ງ ຄືເມື່ອປີ 1911, 1928 ແລະ 1946. ຢູ່ນະຄອນຫລວງ ໂກລົມໂບ ຍັງຄົງຕົວໂຮງແຮມທີ່ມີຊື່ວ່າ: New Colonial Hotel ຊື່ງແມ່ນໂຮງແຮມທີ່ທ່ານປະທານໂຮ່ຈິມີນ ພັກຜ່ອນໃນໄລຍະໄປ ຊອກຫາເສັ້ນທາງກູ້ຊາດ. ປະຊາຊົນສອງປະເທດ ໄດ້ມີຄວາມເຫັນອົກເຫັນໃຈ ແລະ ສະຫນັບສະຫນູນເຊິ່ງກັນ ແລະ ກັນໃນບັນດາການຕໍ່ສູ້ປົດປອ່ຍຊາດຂອງແຕ່ລະປະເທດ. ການນຳຮຸ່ນປະຈຸບັນຂອງ ສີລັງກາ ສ່ວນຫລາຍແມ່ນບັນດາຜູ້ເຄີຍໄດ້ລົງຖະຫນົນເຂົ້າຮ່ວມການແຫ່ຂະບວນຄັດຄ້ານສົງຄາມຢູ່ ຫວຽດນາມ. ຈາກຂະບວນການນັ້ນ, ສະມາຄົມສາມັກຄີ ສີລັງກາ- ຫວຽດນາມ ໄດ້ຮັບການສ້າງຕັ້ງຂຶ້ນເມື່ອປີ 1966. ມາຮອດປະຈຸບັນ, ສະມາຄົມຍັງຄົງເຄື່ອນໄຫວຢ່າງຕັ້ງຫນ້າໃນການຊຸກຍູ້ການພົວພັນສອງປະເທດ. ເຖິງວ່າໂລກໄດ້ຜ່ານຜ່າການຜັນແປຫລາຍຢ່າງກໍຕາມ, ແຕ່ມາຮອດປະຈຸບັນ ການພົວພັນສາມັກຄີລະຫວ່າງ ຫວຽດນາມ ແລະ ສີລັງກາ ບໍ່ມີການປ່ຽນແປງ ແລະ ນ້ຳໃຈສາມັກຄິມິດຕະພາບບໍລິສຸດຜຸດຜ່ອງ ແມ່ນພື້ນຖານອັນໝັ້ນແກ່ນໃຫ້ແກ່ສາຍພົວພັນລະຫວ່າງສອງປະເທດພັດທະນາຢ່າງໝັ້ນຄົງໃນຊຸມປີຜ່ານມາ.
ເຫດການທີ່ ຫວຽດນາມ ເປີດສະຖານທູດຢູ່ນະຄອນຫລວງ ໂກລົມໂບ ຄືນໃຫມ່ເມື່ອເດືອນ 4/2011 ແລະ ການຢ້ຽມຢາມທາງລັດຖະກິດເປັນຄັ້ງທຳອິດເຖິງ ສີລັງກາ ຂອງທ່ານປະທານປະເທດ ເຈືອງເຕີນຊາງ ເມື່ອເດືອນ 10/2011 ໄດ້ເຮັດໃຫ້ການພົວພັນລະຫວ່າງສອງປະເທດຂຶ້ນສູ່ລະດັບສູງໃຫມ່. ໃນສອງສາມປີມໍ່ໆມານີ້, ການພົວພັນຮ່ວມມືລະຫວ່າງສອງຝ່າຍມີບາດກ້າວພັດທະນາໃນຫລາຍຂົງເຂດຄື: ການເມືອງ, ເສດຖະກິດ, ວັດທະນະທຳ, ການສຶກສາ. ສອງຝ່າຍ ສົມທົບກັນຢ່າງແຫນ້ນແຟ້ນໃນຂະບວນການບໍ່ຮ່ວມກຸ່ມ ແລະ ໃນບັນດາເວທີປາໄສສາກົນອື່ນ. ຊື່ງແມ່ນຫນຶ່ງໃນບັນດາສະມາຊິກສ້າງຕັ້ງສົນທິສັນຍາກົດໝາຍວ່າດ້ວຍທະເລ, ຍາມໃດ ສີລັງກາ ກໍສະຫນັບສະຫນູນບັນດາຫລັກການກ່ຽວກັບການຮັບປະກັນຄວາມໝັ້ນຄົງ ແລະ ຄວາມເສລີການເດີນທະເລ, ແກ້ໄຂການພິພາດຢູ່ທະເລໂດຍສັນຕິວິທີ, ອີງໃສ່ພື້ນຖານເຄົາລົບກົດໝາຍສາກົນ. ສີລັງກາ ຮ່ວມມືຢ່າງແຫນ້ນແຟ້ນກັບຫວຽດນາມ ຢູ່ບັນດາເວທີປາໄສພາກພື້ນ ແລະ ສາກົນ, ສະຫນັບສະຫນູນຫວຽດນາມ ສະໝັກຮັບເລືອກຕັ້ງເຂົ້າສະພາສິດທິມະນຸດຂອງ ສປຊ ອາຍຸການ 2014- 2016.
ເຖິງຢ່າງໃດກໍຕາມ, ການພົວພັນທາງດ້ານເສດຖະກິດ ລະຫວ່າງ ຫວຽດນາມ ແລະ ສີລັງກາ ຍັງຈຳກັດຢູ່ ແລະ ສ່ວນຫລາຍຍ້ອນການປະທະກັນຢູ່ ສີລັງກາ ທີ່ແກ່ຍາວເກືອບ 30 ປີ, ຮອດເດືອນ 5/2009 ຈື່ງສິ້ນສຸດລົງ. ປະຈຸບັດ, ສີລັງກາ ໄດ້ຮັບສັນຕິພາບຢ່າງສົມບູນ, ເປີດກາລະໂອກາດຫລາຍຢ່າງໃຫ້ແກ່ການພົວພັນຮ່ວມມືທຸກດ້ານ, ພິເສດ ໃນຂົງເຂດເສດຖະກິດລະຫວ່າງ ຫວຽດນາມ ກັບ ສີລັງກາ. ອາດຈະຖືວ່າ ສີລັງກາ ແມ່ນປະຕູຊ່ວຍສົ່ງສິນຄ້າ ຫວຽດນາມ ໄປຂາຍຢູ່ພາກພື້ນ ອາຊີໃຕ້ ຜ່ານການຂຸດຄົ້ນບັນດາສັນຍາການຄ້າເສລີ ຊື່ງ ສີລັງກາ ໄດ້ລົງນາມກັບ ອິນເດຍ ແລະ ປາກິສະຖານ. ໃນນະໂຍບາຍພັດທະນາເສດຖະກິດຂອງຕົນ, ສີລັງກາ ຖືການພົວພັນດ້ານເສດຖະກິດກັບ ຫວຽດນາມ ເປັນພິເສດ, ປາດຖະຫນາຢາກບັນດາວິສາຫະກິດ ຫວຽດນາມ ລົງທຶນຢ່າງແຂງແຮງເຂົ້າຂົງເຂດ ນ້ຳມັນອາຍແກສ, ໂທລະຄົມ, ຜະລິດກົນຈັກ, ສິນໃນນ້ຳ. ກົງກັນຂ້າມ, ສີລັງກາ ກໍປາດຖະຫນາຢາກເປີດກວ້າງການລົງທຶນເຂົ້າ ຫວຽດນາມ, ຜ່ານນັ້ນ ອາດຈະເປີດກາລະໂອກາດສຳພັດກັບຕະຫລາດ ອາຊຽນ ທີ່ກວ້າງໃຫຍ່. ແຕ່ປີ 2010 ມາຮອດປະຈຸບັນ, ມີ ວິສາຫະກິດໃຫຍ່ 2 ແຫ່ງຂອງ ສີລັງກາ ມາຊອກຮູ້ຕະຫລາດ, ສົ່ງເສີມກາລະໂອກາດການຮ່ວມມືເສດຖະກິດຢູ່ ຫວຽດນາມ. ພາຍຫລັງການຢ້ຽມຢາມ 2 ຄັ້ງນັ້ນ, ໄດ້ມີຫລາຍໂຄງການຮ່ວມມືລະອຽດໄດ້ຮັບການລົງນາມໃນບັນດາຂົງເຂດ: ການຢາ, ສາທາລະນະສຸກ, ສິນໃນນ້ຳ, ຜະລິດຊາ, ເຄື່ອງກົນຈັກກະສິກຳ,ເຕັກໂນໂລຊີຂໍ້ມູນຂ່າວສານ. ສອງປະເທດ ພວມສູ້ຊົນນຳວົງເງິນການຄ້າສອງຝ່າຍໃຫ້ຂຶ້ນເຖິງ 1 ຕື້ USD ໃນຊຸມປີຈະມາເຖິງ. ດ້ວຍເອກະສານ, ຂໍ້ຕົກລົງຮ່ວມມືຫລາຍສະບັບທີ່ໄດ້ຮັບການລົງນາມຄື: ສັນຍາຮ່ວມມືກ່ຽວກັບການສົ່ງເສີມ ແລະ ອາລັກຂາການລົງທຶນ, ການປ້ອງກັນ ແລະ ຕ້ານອາດຊະຍາກຳ, ສັນຍາຮ່ວມມືດ້ານວັດທະນະທຳ, ກະສິກຳ, ສິນໃນນ້ຳ, ບົດບັນທຶກຊ່ວຍຈຳກ່ຽວກັບການທາບທາມຄຳເຫັນການເມືອງສອງຝ່າຍລະຫວ່າງ ກະຊວງການຕ່າງປະເທດສອງປະເທດ ແລະ ອື່ນໆ ຫວຽດນາມ ແລະ ສີລັງກາ ພວມ ມີກາລະໂອກາດໃຫຍ່ເພື່ອເປີດກວ້າງ, ເພີ່ມທະວີການຮ່ວມມືໃນທຸກຂົງເຂດ ເພື່ອຄວາມວັດທະນາຖາວອນຢູ່ແຕ່ລະປະເທດ.
ການພົວພັນດ້ານການເມືອງອັນດີງາມ, ນ້ຳໃຈມິດຕະພາບທີ່ເປັນມູນເຊື້ອລະຫວ່າງສອງປະເທດ ແລະ ປະເທດ ສີລັງກາ ມີສັນຕິພາບ, ສະຖຽນລະພາບ ແມ່ນເງື່ອນໄຂສະດວກເພື່ອໃຫ້ບັນດາກະຊວງ, ຂະແຫນງການ, ວິສາຫະກິດສອງປະເທດ ສະແຫວງຫາເພື່ອຂຸດຄົ້ນ. ເພາະສະນັ້ນ ການຢ້ຽມຢາມຫວຽດນາມ ຄັ້ງນີ້ຂອງທ່ານປະທານສະພາແຫ່ງຊາດ ສີລັງກາ Chamal Rajapaksa ແນ່ນອນວ່າຈະເປີດບັນດາກາລະໂອກາດໃຫຍ່ກວ່າອີກ.