ນັບແຕ່ວັນທີ 25-26/10/2016, ຢູ່ຮ່າໂນ້ຍ, ໄດ້ດຳເນີນກອງປະຊຸມສັ້ນສູງກ່ຽວກັບການຮ່ວມມືກຳປູເຈຍ-ລາວ-ມ້ຽນມາ-ຫວຽດນາມ(CLMV)ຄັ້ງທີ 8, ກອງປະຊຸມຂັ້ນສູງຍຸດທະສາດການຮ່ວມມືເສດຖະກິດ ອາເຢວາດີ-ເຈົ້າພະຍາ-ແມ່ຂອງ (ACMECS) ຄັ້ງທີ 7 ແລະ ກອງປະຊຸມເວທີປາໄສເສດຖະກິດໂລກກ່ຽວກັບແມ່ນ້ຳຂອງ (WEF - ແມ່ຂອງ). ເນື່ອງໃນໂອກາດນີ້, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິນມິນ ໄດ້ມີບົດຂຽນຢືນຢັນການຮ່ວມມື CLMV ແລະ ACMECS ແມ່ນເພື່ອແນໃສ່ມຸ່ງໄປສູ່ພາກພື້ນແມ່ຂອງທີ່ຂະຫຍັນຂັນເຄື່ອນ ແລະ ວັດທະນາຖາວອນ. .
ຫວຽດນາມເຂົ້ານຮ່ວມກອງປະຊຸມຂັ້ນສູງ ACMECS ກ່ຽວກັບຄວາມຮັບຜິດຊອບດ້ານການທ່ອງທ່ຽວ |
ຕາມທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິນມິນ, ບັນດາປະເທດອາຊີຕາເວັນອອກສ່ຽງໃຕ້ໄດ້ຜ່ານໄລຍະທາງທີ່ຍາວໄກແຫ່ງການກໍ່ສ້າງປະຊາຄົມອາຊຽນດ້ວຍຄຸນຄ່າເປັນແກ່ນສານແມ່ນຄວາມສາມັກຄີ, ຄວາມເຫັນດີເຫັນພ້ອມ ແລະ ເປັນເອກະພາບກັນໃນປະຊາຄົມທີ່ມີຫຼາຍຮູບຫຼາຍສີ. ໜຶ່ງໃນບັນດາສິ່ງທີ່ກີດຂວາງອັນໃຫຍ່ຫຼວງຂອງວິວັດທະນາການນີ້ແມ່ນຄວາມຜິດໂຕນກ່ຽວກັບລະດັບການພັດທະນາລະຫວ່າງບັນດາປະເທດສະມາຊິກ, ພິເສດແມ່ນລະຫວ່າງ 4 ປະເທດ ກຳປູເຈຍ, ລາວ, ມຽນມາ ແລະ ຫວຽດນາມ, ດ້ວຍ 6 ປະເທດສະມາຊິກທີ່ຍັງເຫຼືອຂອງອາຊຽນ.
ການຮ່ວມມື CLMV ແລະ ACMECS
ດ້ວຍເປົ້າໝາຍຮັດແຄບຄວາມຜິດໂຕນການພັດທະນາ ແລະ ຊຸກຍູ້ການເຊື່ອມໂຍງຂອງບັນດາປະເທດ CLMVເຂົ້າໃນວິວັດທະນາການພັດທະນາລວມຂອງພາກພື້ນ, ວັນທີ 28/11/2004, ການນຳຂັ້ນສູງບັນດາປະເທດ ກຳປູເຈຍ, ລາວ, ມຽນມາ ແລະ ຫວຽດນາມໄດ້ຈັດກອງປະຊຸມຂັ້ນສູງ CLMV ຄັ້ງທີ 1 ຢູ່ລາວ. ກອງປະຊຸມໄດ້ຮັບຮອງເອົາຖະແຫຼງການວຽງຈັນກ່ຽວກັບການເພີ່ມທະວີການຮ່ວມມື ແລະ ເຊື່ອມໂຍງເສດຖະກິດລະຫວ່າງບັນດາປະເທດ CLMV, ຢືນຢັນຄວາມຕັດສິນໃຈຮ່ວມມືຂອງ 4 ປະເທດເພື່ອເປົ້າໝາຍລວມ ແລະ ຮຽກຮ້ອງບັນດາຄູ່ຮ່ວມພັດທະນາ ແລະ ບັນດາອົງການຈັດຕັ້ງສາກົນຮ່ວມແຮງຮ່ວມໃຈຊຸກຍູ້ການພັດທະນາເສດຖະກິດ, ຄວາມກ້າວໜ້າສັງຄົມຢູ່ພາກພື້ນແມ່ນ້ຳຂອງ. ບັນດາຂົງເຂດຮ່ວມມືຕົ້ນຕໍໄດ້ຮັບການເລືອກເຟັ້ນລວມມີ ການຄ້າ-ການລົງທຶນ, ກະສີກຳ, ອຸດສາຫະກຳ, ຄົມມະນາຄົມ, ທ່ອງທ່ຽວ ແລະ ການພັດທະນາແຫຼ່ງຊັບພະຍາກອນມະນຸດ.
ພ້ອມກັນນັ້ນ, 5 ປະເທດ ກຳປູເຈຍ, ລາວ, ມຽນມາ, ໄທ ແລະ ຫວຽດນາມ ໄດ້ສ້າງກົນໄກຍຸດທະສາດການຮ່ວມມືເສດຖະກິດ ອາເຢວາດີ-ເຈົ້າພະຍາ-ແມ່ຂອງ (ACMECS) ດ້ວຍເປົ້າໝາຍກວມລວມແມ່ນຮັບປະກັນສັນຕິພາບ, ສະຖຽນລະພາບ ແລະ ວັດທະນາຖາວອນລວມ. ການຮ່ວມມື ACMECS ແມ່ນເລັ່ງໃສ່ 8 ຂົງເຂດບຸລິມະສິດຊຶ່ງລວມມີ ການຄ້າ-ການລົງທຶນ, ກະສີກຳ, ອຸດສາຫະກຳ, ພະລັງງານ,ຄົມມະນາຄົມ, ທ່ອງທ່ຽວ ແລະ ການພັດທະນາແຫຼ່ງຊັບພະຍາກອນມະນຸດ, ສາທາລະນະສຸກ ແລະ ສິ່ງແວດລ້ອມ.
ຕາມທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິນມິນ, ພາຍຫຼັງເຄື່ອນໄຫວມາເປັນເວລາກວ່າ 13 ປີ, ການຮ່ວມມື CLMV ແລະ ACMECS ໄດ້ບັນລຸບັນດາໝາກຜົນທີ່ຕັ້ງໜ້າ, ປະກອບສ່ວນປັບປຸງສະພາບແວດລ້ອມແຫ່ງສັນຕິພາບ, ສະຖຽນລະພາບ, ຊຸກຍູ້ການນຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງບັນດາປະເທດພາກພື້ນແມ່ນ້ຳຂອງ, ຮັດແຄບຄວາມຜິດໂຕນກ່ຽວກັບລະດັບການພັດທະນາໃນອາຊຽນ. ຍ້ອນມີບັນດາການປະຕິຮູບດ້ານເສດຖະກິດຢ່າງກ້ວາງເລິກ ແລະ ຄວາມມານະພະຍາຍາມຫັນເປັນເສລີ ແລະ ສ້າງເງື່ອນໄຂສະດວກໃຫ້ການຄ້າ ແລະ ການລົງທຶນ, ພາກພື້ນແມ່ນ້ຳຂອງໄດ້ກາຍເປັນພາກພື້ນພັດທະນາຢ່າງຂະຫຍັນຂັນເຄື່ອນ ແລະ ເປັນກຳລັງຫນູນຊຸກຍູ້ການເຕີບໂຕທີ່ສຳຄັນຂອງອາຊຽນ.
ຫວຽດນາມໃນການຮ່ວມມື CLMV ແລະ ACMECS
ໂດຍແມ່ນປະເທດສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບ, ຫວຽດນາມໄດ້ ແລະ ພວມມີການປະກອບສ່ວນສຳຄັນໃນ ການຮ່ວມມື CLMV ແລະ ACMECS. ດ້ວຍທີ່ຕັ້ງເປັນປະຕູທາງທິດຕາເວັນອອກຂອງອະນຸພາກພື້ນແມ່ນ້ຳຂອງ, ຫວຽດນາມແມ່ນປັດໄຈທີ່ຂາດບໍ່ໄດ້ຂອງແລວເສດຖະກິດຕາເວັນອອກ-ຕາເວັນຕົກ ແລະ ແລວເສດຖະກິດທາງທິດໃຕ້. ຫວຽດນາມໄດ້ເປັນເຈົ້າການນຳສະເໜີ ແລະ ຜັນຂະຫຍາຍຫຼາຍຂໍ້ລະເລີ່ມໃໝ່, ປະກອບສ່ວນສ້າງບັນດາເອກະສານທີ່ສຳຄັນ, ສ້າງ ແລະ ຊຸກຍູ້ບັນດາຂໍ້ລິເລີ່ມ, ໃຫ້ການຫນູນຊ່ວຍພັດທະນາແກ່ບັນດາປະເທດສະມາຊິກ, ໃນນັ້ນມີການພັດທະນາແຫຼ່ງຊັບພະຍາກອນມະນຸດ ແລະ ກໍ່ສ້າງພື້ນຖານໂຄງລ່າງ.
ສຳລັບການຮ່ວມມື CLMV, ຫວຽດນາມໄດ້ສ້າງກອງທຶນສຶກສາ CLMV, ຕາມນັ້ນແລ້ວ, ໃນແຕ່ລະປີ, ຫວຽດນາມສະໜອງທຶນສຶກສານັບສິບທຶນໃຫ້ບັນດາປະເທດກຳປູເຈຍ, ລາວ, ມຽນມາ. ໂຄງການທຶນສຶກສາໄດ້ຮັບການຕີລາຄາສູງຈາກບັນດາປະເທດ ແລະ ຖືກສະເໜີໃຫ້ສືບຕໍ່ປະຕິບັດໃນໄລຍະ 2016-2020. ໃນທັງ 2 ກົນໄກຮ່ວມມື CLMV ແລະ ACMECS, ຫວຽດນາມລ້ວນແຕ່ສວມບົດບາດເປັນຜູ້ປະສານງານບາງຂົງເຂດຮ່ວມມືລົງເລິກຂະແໜງ ແລະ ໄດ້ຜົນຂະຫຍາຍຫຼາຍການເຄື່ອນໄຫວທີ່ແທດຈິງ ຊ່ວຍຊຸກຍູ້ການຮ່ວມມືຮອບດ້ານລະຫວ່າງ 5 ປະເທດ.
ໂດຍໄດ້ຮັບຮູ້ໄດ້ເຖິງຄວາມສຳຄັນຂອງການນຳໃຊ້ຊັບພະຍາກອນທຳມະຊາດຢູ່ເຂດອ່າງແມ່ນ້ຳຂອງແບບຍືນຍົງ, ຫວຽດນາມໄດ້ຕັ້ງໜ້າຊຸກຍູ້ບັນກາການເຄຶ່ອນໄຫວຮ່ວມມືທາງດ້ານສິ່ງແວດລ້ອມ ແລະ ການຄຸ້ມຄອງແຫຼ່ງນ້ຳ. ຫວຽດນາມແມ່ນປະເທດທຳອິດທີ່ໄດ້ຍົກອອກຂໍ້ລິເລີ່ມສ້າງຕັ້ງກຸ່ມປະຕິບັດງານກ່ຽວກັບສິ່ງແວດລ້ອມໃນຂອບເຂດ ACMECS ແລະ ປະຈຸບັນສວມບົດບາດເປັນປະທານຮ່ວມກຸ່ມປະຕິບັດງານນີ້.
ສ້າງການຮ່ວມມືເປັນຮູບປະທຳໃນອະນາຄົດ
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິນມິນຢືນຢັນວ່າ ກອງປະຊຸມຂັ້ນສູງ ACMECS ຄັ້ງທີ 7 ແລະ ກອງປະຊຸມຂັ້ນສູງ CLMV ຄັ້ງທີ 8 ຈະຈັດຂຶ້ນຢູ່ຮ່າໂນ້ຍ ດ້ວຍຫົວຂໍ້ວ່າ: “ມຸ່ງໄປເຖິງອະນຸພາກພື້ນແມ່ນ້ຳຂອງທີ່ມີຄວາມຂະຫຍັນຂັນເຄື່ອນ ແລະ ວັດທະນາຖາວອນ: ກຳແຫນ້ນກາລະໂອກາດ, ສ້າງອະນາຄົດເປັນຮູບປະທຳ” ຊຶ່ງຈະເປີດໜ້າປະຫວັດສາດໃໝ່ໃຫ້ແກ່ການຮ່ວມມືໃນພາກພື້ນແມ່ນ້ຳຂອງ, ປະກອບສ່ວນນັບມື້ນັບຫຼາຍໃຫ້ແກ່ການພັດທະນາແບບຍືນຍົງ ແລະ ວັດທະນາຖາວອນລວມໃນພາກພື້ນ. ເນື່ອງໃນໂອກາດນີ້, ຕາມຂໍ້ລິເລີ່ມຂອງຫວຽດນາມ, ກອງປະຊຸມເວທີປາໄສເສດຖະກິດໂລກກ່ຽວກັບແມ່ນ້ຳຂອງ (WEF - ແມ່ຂອງ) ຖືກຈັດຂຶ້ນເປັນຄັ້ງທຳອິດ ພ້ອມກັບກອງປະຊຸມຂັ້ນສູງ ACMECS ແລະ CLMV ແນໃສ່ໂຄສະນາຄວາມສາມາດບົ່ມຊ້ອນຂອງພາກພື້ນແມ່ນນ້ຳຂອງໃຫ້ແກ່ປະຊາຄົມວິສາຫະກິດສາກົນ.