(vovworld)-ວັນທີ 14/9/2015 ແມ່ນສະເຫລີມສະຫລອງ 70 ປີ ແຫ່ງວັນປະທານໂຮ່ຈິມີນ ເຊັນລັດຖະດຳລັດ ສ້າງຕັ້ງກະຊວງກະສິກຳການກະເສດ ດ້ວຍຫນ້າທີ່ ເບິ່ງແຍງເຖິງການພັດທະນາຂະແຫນງກກະສິກຳ, ປ່າໄມ້ ຂອງຫວຽດນາມ. ນັບແຕ່ໄລຍະຍັງເປັນປະເທດກະສິກຳທີ່ທຸກຍາກ, ມາຮອດປະຈຸບັນ ຫວຽດນາມ ໄດ້ມີ ບາດກ້າວພັດທະນາ ໃນການຄ້ຳປະກັນດ້ານສະບຽງອາຫານແຫ່ງຊາດ. ນອກນັ້ນ ຫວຽດນາມ ຍັງກາຍເປັນປະເທດທີ່ມີບັນດາປະເພດຜະລິດຕະພັນກະເສດສົ່ງອອກຢືນອັນດັບ ຫນຶ່ງ, ອັນດັບສອງຂອງໂລກ.
ພາບປະກອບ:cantho.vn
|
ໃນໄລຍະປ່ຽນໃຫມ່, ກະສິກຳຫວຽດນາມ ບັນລຸໄດ້ບັນດາຜົນງານພົ້ນເດັ່ນ, ຮັກສາການເຕີບໂຕຢ່າງສະຫມ່ຳສະເຫມີ ແລະ ເປັນປົກກະຕິ, ສະແດງໃຫ້ເຫັນທ່າໄດ້ປຽບຂອງຫວຽດນາມ ເມື່ອທຽບໃສ່ບັນດາປະເທດໃນພາກພື້ນ ແລະ ໃນໂລກ. ກະສິກຳ ໄດ້ກາຍເປັນບ່ອນອີງພື້ນຖານໃຫ້ອຸດສາຫະກຳ ແລະ ການບໍລິການ, ປະກອບສ່ວນສຳຄັນເຂົ້າໃນການຮັບປະກັນສະຖຽນລະພາບທາງສັງຄົມຢູ່ຫວຽດນາມ.
ປະເທດສົ່ງອອກຜະລິດຕະພັນກະເສດຫລາຍສຸດ
ມາຮອດປີ 2014, ກະສິກຳ ຫວຽດນາມ ກວມອັດຕາສ່ວນ 18% ໃນ GDP. ຫວຽດນາມ ແມ່ນຫນຶ່ງໃນບັນດາປະເທດສົ່ງອອກຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳໃຫຍ່ຫລາຍສຸດໃນໂລກ ດ້ວຍຜະລິດຕະພັນຫລັກແຫລ່ງຫລາຍຢ່າງ. 10 ປະເພດຜະລິດຕະພັນກະເສດບັນລຸວົງເງິນສົ່ງອອກກວ່າ 1 ຕື້ USD ຂອງຫວຽດນາມ ລວມມີ: ເຂົ້າສານ, ກາເຟ, ຢາງພາລາ, ໝາກມ່ວງຫິມະພານ, ໝາກພິກໄທ, ໝາກໄມ້, ກຸ້ງ, ປາຈາ, ເຄື່ອງປ່າຂອງດົງ. ຫວຽດນາມ ຢືນແຖວຫນ້າໃນໂລກກ່ຽວກັບການສົ່ງອອກໝາກມ່ວງຫິມະພານ, ໝາກພິກໄທ, ຢືນອັນດັບສອງກ່ຽວກັບການສົ່ງອອກເຂົ້າສານ, ກາເຟ; ຢືນອັນດັບ 4 ກ່ຽວກັບການສົ່ງອອກຢາງພາລາ; ຢືນອັນດັບ 5 ກ່ຽວກັບການສົ່ງອອກສິນໃນນ້ຳ; ຢືນອັນດັບ 7 ກ່ຽວກັບການສົ່ງອອກຊາ. ບັນດາຜົນງານຂອງຂະແຫນງກະສິກຳ ໄດ້ປະກອບສ່ວນໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຍົກສູງຊີວິດການເປັນຢູ່ຂອງປະຊາຊົນ ແລະ ຮັກສາເສດຖະກິດເປັນປົກກະຕິ, ຄ້ຳປະກັນດ້ານສະບຽງອາຫານ ພ້ອມທັງ ຍົກສູງທີ່ຕັ້ງບົດບາດຂອງຫວຽດນາມ ໃນເວທີສາກົນ. ທ່ານ ກາວດືກຟາດ, ລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃຫ້ຮູ້ວ່າ:
“ໃນ 5 ປີຜ່ານມາ, ໝາກຜົນສຳຄັນທີ່ສຸດຊື່ງຂະແຫນງກະສິກຳບັນລຸໄດ້ ນັ້ນແມ່ນ ຮັກສາການເຕີບໂຕສະເລ່ຍ 3%/ປີ, ນີ້ແມ່ນລະດັບສູງເມື່ອທຽບໃສ່ລະດັບສະເລ່ຍໃນໂລກ. ການສົ່ງອອກຜະລິດຕະພັນກະເສດ ໄດ້ເພີ່ມຂຶ້ນຢ່າງແຮງ, ປີ 2014 ບັນລຸເກືອບ 31 ຕື້ USD. ຕໍ່ຈາກນັ້ນ ແມ່ນ ການຜັນຂະຫຍາຍໂຄງການຈຸດໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃຫມ່ ໄດ້ກາຍເປັນຂະບວນການແຜ່ລາມອອກຢ່າງກວ້າງຂວາງຢູ່ບັນດາທ້ອງຖິ່ນໃນທົ່ວປະເທດ, ສ້າງການຫັນປ່ຽນຢ່າງເຫັນໄດ້ຊັດກ່ຽວກັບຊີວິດການເປັນຢູ່ຂອງບັນດາເຂດຊົນນະບົດ.”
ຍາດແຍ່ງທ່າໄດ້ປຽບຂອງຂະແຫນງກະສິກຳເຂດຮ້ອນເພື່ອເຊື່ອມໂຍງ
ມາຮອດປະຈຸບັນ, ຫວຽດນາມ ມີການພົວພັນດ້ານການຄ້າເປັນປົກກະຕິກັບກວ່າ 160 ປະເທດ ແລະ ເຂດແຄ້ວນ. ພື້ນຖານເສດຖະກິດຂອງຫວຽດນາມ ເວົ້າລວມ, ບັນດາຜະລິດຕະພັນຂອງຂະແຫນງກະສິກຳ ເວົ້າສະເພາະ ພວມມີກາລະໂອກາດຫລາຍຢ່າງເພື່ອເຂົ້າຮ່ວມ 7 ຕະຫລາດການຄ້າເສລີ ລວມມີ: ເຂດສັນຍາການຄ້າ ສິນຄ້າອາຊຽນ; ເຂດການຄ້າເສລີ ອາຊຽນ -ຈີນ; ເຂດການຄ້າ ເສລີ ອາຊຽນ -ອິນເດຍ; ອາຊຽນ -ອົດສະຕາລີ; ອາຊຽນ - ສເກົາຫລີ; ອາຊຽນ - ຍີ່ປຸ່ນ ແລະ ຫວຽດນາມ -ຍີ່ປຸ່ນ. ເພື່ອເຊື່ອມໂຍງເປັນຢ່າງດີ ແລະ ຮັກສາໝາກຜົນແຫ່ງການພັດທະນາໃນ 70 ປີຜ່ານມາ, ຂະແຫນງກະສິກຳ ຫວຽດນາມ ພວມສຸມໃສ່ສ້າງໂຄງປະກອບຂະແຫນງຄືນໃຫມ່. ທ່ານ ກາວດືກຟາດ, ລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຢືນຢັນວ່າ:
“ໃນເງື່ອນໄຂບັນດາຂະແຫນງເສດຖະກິດ ລ້ວນແຕ່ພັດທະນາ, ເລື່ອງສ້າງວຽກເຮັດງານທຳ, ຮັບປະກັນລາຍຮັບຂອງຊາວກະສິກອນ, ສືບຕໍ່ມານະພະຍາຍາມ ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແມ່ນຫນ້າທີ່ອັນໃຫຍ່ຫລວງສຳລັບທົ່ວຂະແຫນງກະສິກຳ. ເພື່ອແກ້ໄຂບັນດາບັນຫາພວມວາງອອກໂດຍພື້ນຖານ, ຄວາມຮຽກຮ້ອງຕ້ອງການ ນັ້ນແມ່ນ ຕ້ອງມີການດັດປັບໂດຍພື້ນຖານເພື່ອສ້າງເງື່ອນໄຂໃຫ້ພື້ນຖານກະສິກຳສືບຕໍ່ພັດທະນາ ດ້ວຍປະສິດທິຜົນສູງກວ່າ ແລະ ຍືນຍົງ. ຕາມນັ້ນແລ້ວ ຕ້ອງປະຕິບັດຫລາຍມາດຕະການຢ່າງຄົບຊຸດ, ໃນນັ້ນ ສິ່ງສຳຄັນທີ່ສຸດ ຕ້ອງຈັດຕັ້ງການຜະລິດຄືນໃຫມ່ ແລະ ຊຸກຍູ້ການຄົ້ນຄ້ວາ, ຖ່າຍທອດ ແລະ ໝູນໃຊ້ວິທະຍາສາດເຕັກນິກ.”
ທ່ານ ກາວດືກຟາດ, ລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃຫ້ຮູ້ຕື່ມອີກວ່າ: ການສ້າງໂຄງປະກອບຂະແຫນງກະສິກຳຄືນໃຫມ່ຕາມທິດເສີມຂະຫຍາຍທ່າໄດ້ປຽບ, ຍົກສູງຄຸນນະພາບປະສິດທິຜົນ ແລະ ພັດທະນາແບບຍືນຍົງ. ລະອຽດ ຂະແຫນງກະສິກຳ ຈະສຸມໃສ່ຂຸດຄົ້ນ ແລະ ຍາດແຍ່ງທ່າໄດ້ປຽບຂອງພື້ນຖານກະສິກຳເຂດຮ້ອນໃຫ້ດີສຸດ, ພັດທະນາບັນດາປະເພດຜະລິດຕະພັນກະເສດທີ່ມີທ່າແຮງກ່ຽວກັບການແກ້ງແຍ້ງໃນໂລກ. ຄຽງຄູ່ກັນນັ້ນ ຂະແຫນງກະສິກຳ ຈະຈັດຕັ້ງການສ້າງ ແລະ ພັດທະນາບັນດາເຂດກະເສດສຸມທີ່ມີຂອບຂະຫນາດໃຫຍ່, ເປີດກວ້າງຮູບການຟາມລ້ຽງ, ເສດຖະກິດສະຫະກອນ, ໝູນໃຊ້ວິທະຍາສາດເຕັກໂນໂລຊີສູງ, ເພີ່ມທະວີການເຊື່ອມຕໍ່ລະຫວ່າງການຜະລິດກັບອຸດສາຫະກຳປຸງແຕ່ງ, ຮັບປະກັນ ແລະ ຈຳຫນ່າຍຜະລິດຕະພັນ. ພິເສດ ການເຊື່ອມໂຍງເຂົ້າກັບສາກົນ ຈະແມ່ນການບຸລິມະສິດຕົ້ນຕໍເພື່ອປະຕິບັດການສ້າງໂຄງປະກອບຂະແຫນງກະສິກຳ ແລະ ພັດທະນາຊົນນະບົດຄືນໃຫມ່, ເພື່ອນຳຫວຽດນາມ ກາຍເປັນປະເທດເຂັ້ມແຂງກ່ຽວກັບປະລິມານການຜະລິດ, ມູນຄ່າສູງ ແລະ ເຄື່ອງໝາຍການຄ້າຂອງບັນດາຜະລິດຕະພັນກະເສດສົ່ງອອກຢ່າງວ່ອງໄວ.