ໃນຂະນະທີ່ລັດເຊຍ ແລະ ບັນດາປະເທດຝ່າຍຕາເວັນຕົກຍັງພວມຊອກຫາວິທີການແກ້ໄຂວິກິດການຢູແກຼນຢ່າງມີປະສິດທິຜົນນັ້ນ, ໃນທ້າຍອາທິດທີ່ຜ່ານມາ, ທ່ານປະທານຄະນະກຳມະການເອີລົບ EC Jean – Claude Junrker ໄດ້ຮຽກຮ້ອງໃຫ້ສ້າງຕັ້ງກຳລັງກອງທັບປະສົມຂອງເອີລົບ ຊຶ່ງໄດ້ກໍ່ໃຫ້ເກີດບັນດາປະຕິກິລີຍາທີ່ກົງກັນຂ້າມກັນຢູ່ພາຍໃນບັນດາປະເທດສະມາຊິກ EU, ພ້ອມທັງເຮັດໃຫ້ການພົວພັນລະຫວ່າງລັດເຊຍ ແລະ EU ໄປຕາມແນວໂນ້ມທີ່ບໍ່ດີ.
ທ່ານປະທານຄະນະກຳມະການເອີລົບ EC Jean – Claude Junrker
(ພາບ: Reuters) |
ຕອບສຳພາດນັກຂ່າວໜັງສືພິມ Welt am Aonntag ຂອງເຢັຍລະມັນ, ທ່ານປະທານຄະນະກຳມະການເອີລົບ EC Jean – Claude Junrker ໃຫ້ຮູ້ວ່າ ກຳລັງນີ້ຈະຊ່ວຍ EU ສົມທົບກັນເປັນຢ່າງດີກ່ວາກ່ຽວກັບນະໂຍບາຍການຕ່າງປະເທດ ແລະ ປ້ອງກັນຊາດ, ແລະ ເພື່ອຮັບເອົາໜ້າທີ່ຄວາມຮັບຜິບຊອບລວມຂອງເອີລົບຕໍ່ໜ້າທົ່ວໂລກ. ກອງກຳລັງເອີລົບເປັນເອກະພາບ ຈະປັບປຸງນະໂຍບາຍຂອງ EU ກ່ຽວກັບຄວາມສະຫງົບໃນສະພາບເກີດວິກິດການຕ່າງໆຄື ວິກິດການຢູແກຼນ.
ພາຍຫຼັງສົງຄາມໂລກຄັ້ງທີ 2 , ໃນຊຸມປີ 50 ຂອງສະຕະວັດກ່ອນ, ເຢັຍລະມັນ, ຝະລັ່ງ, ອີຕາລີ ແລະ ບັນດາປະເທດຂຶ້ນກັບ ສຳພັນທະພາບພາສີ Benelux ໄດ້ມີຄວາມຫວັງຢາກສ້າງຕັ້ງປະຊາຄົມປ້ອງກັນຊາດເອີລົບ. ແຕ່ແນວຄວາມຄິດໃນຄາວນັ້ນ ຖືກລົ້ມເຫຼວຍ້ອນບໍ່ສາມາດຜ່ານຜ່າຮົ້ວກີດຂວາງໃນສະພາແຫ່ງຊາດຝະລັ່ງ. ນັບແຕ່ນັ້ນເປັນຕົ້ນມາ, ແຜນການນີ້ ຍັງໄດ້ຮັບການເຕື້ອງເຖິງຢ່າງຫຼວງຫຼາຍ. ໃນມໍ່ໆມານີ້ຄືປີ 2004, EU ໄດ້ຕົກລົງສ້າງຕັ້ງກຳລັງການທະຫານລະຫວ່າງບັນດາປະເທດສະມາຊິກເພື່ອກຽມພ້ອມແຊກແຊງເຂົ້າບັນດາເຂດເກີດວິກິດການ, ແຕ່ໃນຕົວຈິງ, ກຳລັງນີ້ ບໍ່ມີຍາມໃດຖືກຜັນຂະຫຍາຍເທື່ອ.
ກຳລັງທະຫານປະສົມ ແມ່ນວິໄສທັດ, ແງ່ຫວັງຂອງເອີລົບເມື່ອມີກາລະໂອກາດ
ຕາມທ່ານປະທານຄະນະກຳມະການເອີລົບ EC Jean – Claude Junrker ຮູບພາບຂອງ EU ໄດ້ຂີ້ຮ້າຍລົງຫຼາຍພໍສົມຄວນ ແລະ ທາງດ້ານການຕ່າງປະເທດ, ເບິ່ງຄືວ່າ EU ບໍ່ສາມາດແບກຫາບໜ້າທີ່ຄວງາມຮັບຜິດຊອບຂອງຕົນຢ່າງເຂັ້ມງ
ວດ. ຍິ່ງກວ່ານັ້ນ, ກຳລັງທະຫານປະສົມຂອງ EU ໄດ້ສະແດງໃຫ້ໂລກເຫັນວ່າ ຈະບໍ່ມີຍາມໃດເກີດການສູ້ຮົບລະຫວ່າງບັນດາປະເທດສະມາຊິກ, ຊ່ວຍໃຫ້ການໃຊ້ຈ່າຍງົບປະມານສຳລັບພາຫະນະອຸປະກອນການທະຫານມີປະສິດທິຜົນກວ່າເກົ່າ ແລະ 28 ປະເທດສະມາຊິກໃນກຸ່ມຈະມີຄວາມເປັນເອກະພາບກວ່າ. ດ້ວຍກຳລັງການທະຫານປະສົມ, ກຸ່ມນີ້ສາມາດປະຕິກິລີຍາໄວກວ່າຕໍ່ໜ້າໄພນາບຂູ່ຕໍ່ສັນຕິພາບຊຶ່ງປະເທດສະມາຊິກໜຶ່ງຫຼືປະເທດໃກ້ຄຽງໃດໜຶ່ງຕ້ອງປະເຊີນໜ້າ. ທ່ານປະທານຄະນະກຳມະການເອີລົບ EC Jean – Claude Junrker ຍັງຢືນຢັນວ່າ ແນ່ນອນວ່າ ດ້ວຍຂໍ້ຕົກລົງສ້າງຕັ້ງ ກຳລັງການທະຫານປະສົມ, EU ຈະສົ່ງສານເຖິງລັດເຊຍທີ່ວ່າ ບັນດາປະເທດສະມາຊິກຖືເປັນສຳຄັນທີ່ສຸດການປົກປ້ອງບັນດາຜົນປະໂຫຍດຂອງ EU . ທ່ານປະທານຄະນະກຳມະການເອີລົບ EC Jean – Claude Junrker ຍັງປະຕິເສດທັດສະນະໂດຍຖືວ່າ ການສ້າງຕັ້ງ ກຳລັງການທະຫານປະສົມຂອງ EU ຈະກາຍເປັນສິ່ງທ້າທາຍທີ່ມີຕໍ່ກຸ່ມ NATO
ກໍ່ຄວາມແບ່ງແຍກພາຍໃນ, ເພີ່ມທະວີຄວາມບາດໝາງ
ປະສິດທິຜົນຕົວຈິງຈາກແນວຄວາມຄິດສ້າງຕັ້ງ ກຳລັງການທະຫານປະສົມແມ່ນຄືແນວໃດ ແມ່ນຍັງບໍ່ທັນຮູ້ເທື່ອ, ແຕ່ຂໍ້ສະເໜີຂອງ ທ່ານປະທານຄະນະກຳມະການເອີລົບ EC Jean – Claude Junrker ໃນທັນທີ່ ໄດ້ກໍ່ໃຫ້ເກີດປະຕິກິລີຍາທີ່ກົງກັນຂ້າມກັນ. ກ່ອນອື່ນໝົດ ແມ່ນຢູ່ພາຍໃນ EU, ວັນທີ 9/3, ນາຍຍົກລັດຖະມົນຕີເຢັຍລະມັນ Angela Merkel ແລະ ລັດຖະມົນຕີການຕ່າງປະເທດເຢັຍລະມັນ Frank – Walter Steinmeier ໄດ້ພ້ອມກັນສະແດງການສະໜັບສະໜູນແນວຄວາມຄິດຂອງປະທານຄະນະກຳມະການເອີລົບ EC . ນາຍຍົກລັດຖະມົນຕີເຢັຍລະມັນ Angela Merkel ຖືວ່າ ໃນຂັ້ນພື້ນຖານແລ້ວ, ການຮ່ວມດ້ານການທະຫານຢ່າງເລິກເຊິ່ງກ້ວາງຂວາງຢູ່ເອີລົບ ແມ່ນສິ່ງທີ່ຄວນເຮັດ ແນໃສ່ຊ່ວຍຮັບມືກັບສິ່ງທ້າທາຍໃນເມື່ອຕ້ອງການມີຄຳຕອບລວມຂອງກຸ່ມ. ໃນຂະນະນັ້ນ, ລັດຖະມົນຕີການຕ່າງປະເທດເຢັຍລະມັນ Frank – Walter Steinmeier ໄດ້ກ່າວເຕືອນກ່ຽວກັບບັນດາໄພອັນຕະລາຍ ແລະ ການນາບຂູ່ໃໝ່ທີ່ມີຕໍ່ຄວາມເປັນລະບຽບຮຽບຮ້ອຍສັນຕິພາບເອີລົບ, ຮຽກຮ້ອງໃຫ້ຕ້ອງມີຄວາມແທດເໝາະຢ່າງວ່ອງໄວໃນຍຸດທະສາດປ້ອງກັນຄວາມສະຫງົບ.
ຖ້າຫາກວ່າ ວົງການນັກການເມືອງເຢັຍລະມັນເຫັນດີເຫັນພ້ອມກັບກັບຂ້ໍສະເໜີຂອງປະທານຄະນະກຳມະການເອີລົບ EC ນັ້ນ, ທັດສະນະຂອງທ່ານ Junrker ຖືກປະສົບກັບການຄັດຄ້ານຂອງສະມາຊິກອື່ນໆອີກຈຳນວນໜຶ່ງຂອງເອີລົບ, ພິເສດແມ່ນຝະລັ່ງ ແລະ ອັງກິດ. 2 ປະເທດນີ້ໄດ້ສະແດງໃຫ້ເຫັນຄວາມລະມັດລະວັງທີ່ມີຕໍ່ການມອບໝາຍບົດບາດການທະຫານທີ່ໃຫຍ່ກວ່າໃຫ້ແກ່ EU, ເພາະສິ່ງນີ້ອາດຈະເຮັດໃຫ້ອ່ອນແອລົງ ແລະ ພາໃຫ້ ກຸ່ມ NATO ຖືກປັດເຂ່ຍອອກ. ນອກຈາກນັ້ນ, ອັງກິດຖືວ່າ ນີ້ແມ່ນແນວຄວາມຄິດບໍ່ມີແງ່ຫວັງ ແລະ ອັງກິດບໍ່ທັນມີເຈດຈຳນົງເຂົ້າຮ່ວມສຳພັນທະມິດການທະຫານນີ້ເທື່ອ.
ກ່ຽວກັບບັນຫາສາກົນ, ແນ່ນອນວ່າ ກໍບໍ່ອາດປະລະປະຕິກິລີຍາຂອງລັດເຊຍຊຶ່ງແມ່ນປະເທດທີ່ກ່ຽວຂ້ອງໂດຍກົງເຖິງຂໍ້ສະເໜີຂອງປະທານຄະນະກຳມະການເອີລົບ EC . ສະມາຊິກສະພາແຫ່ງຊາດຂັ້ນສູງຂອງລັດເຊຍ, ທ່ານ Leonid Slutsky ຖືວ່າ EU ພວມລະເມີເຟີ້ຝັນກ່ຽວກັບລັດເຊຍ. ທ່ານໄດ້ເປີດເຜີຍວ່າ ຄວາມລະເມີຟີ້ຝັນຂອງເອີລົບ ແມ່ນຢາກສ້າງຕັ້ງກອງທັບເປັນເອກະພາບເພື່ອສູ້ຢັນກັບລັດເຊຍ ຊຶ່ງແມ່ນປະເທດບໍ່ມີເຈດຈຳນົງໄປສູ່ສົງຄາມກັບບໍ່ວ່າປະເທດໃດໆ. ກຳມະການກຳມາທິການປ້ອງກັນຊາດສະພາຕ່ຳດູມາ ລັດເຊຍ ທ່ານ Franz Klintsevich ກໍໃຫ້ຂໍ້ສັງເກດວ່າ ຖ້າຫາກ ກຳລັງການທະຫານປະສົມຂອງ EU ໄດ້ຮັບການສ້າງຕັ້ງຂຶ້ນນັ້ນ, ຈະກາຍເປັນການກະທຳເກາະຜິດ. ທ່ານ Franz Klintsevich ຖືວ່າ ໃນສັງກາດນິວເຄຼຍນີ້, ບັນດາກອງກຳລັງເພີ່ມເຕີມ ບໍ່ຊ່ວຍຮັບປະກັນຄວາມສະຫງົບ, ແຕ່ພຽງສວມບົດບາດເກາະຜິດເທົ່ານັ້ນ.
ໃນສະພາວະທີ່ລັດເຊຍ ແລະ ບັນດາຝ່າຍທີ່ກ່ຽວຂ້ອງຍັງບໍ່ທັນຊອກຫາ ວິທີການແກ້ໄຂ ວິກິດການຢູແກຼນໄດ້ເທື່ອນັ້ນ, ເລື່ອງ EU ເພີ່ມທະວີການລົງໂທດຕ້ານລັດເຊຍນັ້ນ ກໍຍິ່ງກໍ່ຜົນເສຍຫາຍໃຫ້ແກ່ການພົວພັນລະຫວ່າງ EU ແລະ ລັດເຊຍ. ເປັນທີ່ຈະແຈ້ງແລ້ວວ່າ ສິ່ງນີ້ບໍ່ນຳມາເຊິ່ງຜົນປະໂຫຍດໃຫ້ແກ່ທຸກຝ່າຍ ແລະ ພາໃຫ້ການແກ້ໄຂຄວາມບໍ່ລົງລອຍກັນລະຫວ່າງລັດເຊຍ ແລະ EU ຍິ່ງປະສົບກັບຄວາມຫຍຸ້ງຍາກ.